Música

Taiwan, Xapón, Arxelia, Arxentina, Estaos Xuníos, Cataluña y Asturies son les seis nacionalidaes distintes de los componenetes de Fuxida, la primera banda gaites asturiana d’Estaos Xuníos que, fundada por el músicu uvieín Carlos Casado Huerta, estrenábase nos actos de San Patriciu esti mes, tres tol añu preparando l’estrenu.

Estremaes cultures axuntaes col mesmu proyectu: ser la primera banda gaites asturiana d’Estaos Xuníos. Tres dellos meses de trabayu, el músicu Carlos Casado Huerta (Uviéu, 1987) algamó que la Banda Gaites de Nueva York seya yá una realidá; el pasáu 14 de marzu debutó nel Centru Español de Queens, con una actuación dientro de la cellebración de San Patriciu.

“Representar a Asturies nun país onde nun rellacionen la gaita cola Península Ibérica y, si lo faen, ye con Galicia”. Esi ye’l finxu col que Carlos Casado –gaiteru y saxofonista que foi miembro de la Banda Gaites Ciudad de Oviedo y de grupos como Fala Non Caduca- decidió crear una banda gaites asturiana tres emigrar a Nueva York nel añu 2013. Fízolo amás con una filosofía novedosa hasta’l momentu: “Nun pedir pasaportes a naide”.

D’esta mena, Casado contactó col Centru Español de Queens pa que-y diera’l so sofitu cola compra de materiales –seis gaites, un tambor y un bombu mercaos a la Banda Gaites de Corvera- y ellí entamó a dar les clases a alumnos de cuatro continentes. “En Nueva York nun hai muncho asturianu de segunda xeneración. Pero amás, ¿Por qué la gaita asturiana tien que ser tocada namás por asturianos?”, cuestiona l’uveín; una reflexón que fai de la banda que dirixe un proyectu intercultural y que pon a Asturies nel mapa global.

Tres el so estrenu ente doscientes persones el pasáu sábado 14 de marzu nel Centru Español de Queens, onde interpretaron “En Oviedo nun me caso” y “Les dancites” –esta última xunto a la B.G de Corvera-; la banda va tomar parte el próximu ochobre nel reputáu desfile de la Hispanidá de Manhattan. Mentantu, van ampliar un repertoriu nel que nun habrá namás pieces asturianes, sinón tamién temes d’otros países onde la gaita seya instrumentu propiu.

A curtiu plazu, la banda va continuar los ensayos selmanales y organizará espiches coles qu’algamar fondos pa mercar traxes tradicionales –“Aceptamos donaciones de traxes asturianos vieyos”, bromia Casado-. Too esto con ilusión y un claru oxetivu a algamar: “Tocar n’Asturies y qu’estos nuevos gaiteros de mediu mundu interpreten les melodíes que peguen colos paisaxes que namás-yos pude enseñar en semeyes”.

Otru añu más l’EHrZ, concursu de grupos de música de naciones ensin Estáu y en llingües minorizaes del Euskal Herria Zuzenean, vuelve tener representación asturiana. La banda moscona de punk-rock Misiva ye la encargada de representar a Asturies nesta edición, pala que yá ta abiertu’l plazu de votación del públicu col que poder escoyer a los grupos que van tocar nel festival más importante d’Iparralde.

El plazu de votación del públicu ta abiertu hasta’l 20 de marzu; d’estos votos y de la selección del xuráu saldrán los grupos que van tocar nel festival más importante d’Iparralde (País Vascu francés).

Vascos, bretones, catalanes, gallegos… un total de 48 formaciones de delles naciones vuelven a tar presentes na segunda edición del concursu EHrZ. Tres la participación de Skontra y La Tarrancha l’añu pasáu, esti 2015 ye Misiva l’únicu grupu asturianu presente nel eventu. El cantar ‘Foriatu na mio ciudᒠ–adelantu del so próximu trabayu – ye la so carta de presentación énte’l xuráu y la votación del públicu. Pa puxar por ellos namás hai qu’entrar na web, da-y a “Honen ALDE Bozka”, meter el mail y validalo nun corréu que llega a la bandexa entrada.

Los grupos escoyíos van tener distintos premios: unos van apaecer nun recopilatoriu dixital, otros tocarán na venti edición del Euskal Herria Zuzenean, otros van tar presentes nel festival Gernikako Lekuak y otros van venir a tocar a Asturies el 24 d’abril nuna actividá organizada ente’l EHZ y Ixuxú Asturies-Euskal Herria elkartea.

Héctor Braga hai tiempu enforma que tien un blog y una canal propia en youtube enfotáu nel fechu de “qu’esto ye daqué casi indispensable pa tener cierta visibilidá n’internet”, pero esti mes vieno acabante de dar un pasu alantre al remocicar la so presencia audiovisual na rede con delles nueves opciones. Talamente como va cuntando nel so blog, apocayá remocicara esa presencia en You Tube y dende agora cunta nesa rede con delles llistes de reproducción: una coles sos propies interpretaciones en directu y otra dedicada a la banda de gaites que dirixe (Picos d’Europa).

Amás Héctor Braga ufre na so canal de You Tube otra llista con temes de los sos discos d’estudiu y una última sobre etnomusicoloxía, onde comparte grabaciones y filmaciones antigües qu’entiende que “tendríen d’espublizase al máximu pa nun perder esi patrimoniu audiovisual que tanto me gusta investigar y arrexuntar”.

Convídovos a suscribivos de baldre a la canal, y esfrutar del so conteníu. Encantaríame llegar siquier a 1000 suscriptores. Cola vuesa ayuda va ser posible.

Blogue del músicu Héctor Braga

Esti 17 de febreru Rock Estatal Records llanza ‘Eternes Promeses’, séptimu trabayu de Mala Reputación. Los asturianos tornen con diez temes musicalmente ambiciosos y llenos d’emotividá. “Que La Tierra…” ye l’adelantu del discu que nun mes va empezar a presentase en directu. Mala Reputación son unu de los nomes más respetaos de la escena rock asturiana y estatal.

Hai casi dos décades que la banda empezó a esplegar altes dosis de punk-rock, una propuesta que foi maureciendo colos años escontra un estilu cada vez más personal ya inconfundible. Ensin fondiase na repetición de fórmules y cola valentía de dar total llibertá a les sos moliciones musicales, roblen agora la so séptima referencia.

A falta d’unos díes pa que sala a la cai “Eternes Promeses”, la banda llanza’l single “Que La Tierra…”, un “rock ellaboráu, melódicu, sentíu… ” sigún la promoción que la so discográfica vieno faciendo estos díes. Amás, los asturianos yá tienen cerraes les diez primeres feches de la xira 2015. La fuerza del so directu va faer escala en sales de tola Península y en festivales como la Viña Rock.

El componente de Dixebra Eladio Díaz, formación a la que pertenez dende hai más de quince años, presenta estos díes el so primer trabayu discográficu en solitario, publicáu por Goxe Producciones. Failo acompañáu de la so banda paralela, Control Z, de la que formen parte dellos de los músicos de jazz con más prestixu y calidá de la escena asturiana: Marco Martínez a la guitarra, Antony da Cruz al baxu y Fernando Arias a la batería. De les voces encárguense nomes que sobresalen nel panorama hip hop del país como Grilo, Daniel Pose (aka Dani Antistailo) o Shalom.

Sobre la base musical creada a partir de les composiciones del saxofonista, estos músicos igüen una propuesta sonora radical y orixinal, creando ambientes onden entren el jazz, el funk, el hip hop, la tonada o la esperimentación. Les nueve pieces incluyíes nel discu son de clasificación difícil según los parametros convencionales nos que se mueve la música anguaño, y muestren una estructura llibre, complexa y nada previsible, onde la improvisación y la sorpresa surden a cada momentu. El resultáu ye una obra mui personal, ensin concesiones, de muncha calidá y qu’esixe a los oyentes tar predispuestos a sentir dalgo pa lo qu’ellos tamién tienen que poner de la so parte, nun exerciciu compartíu que busca’l feedback ente los dos actores.

Los testos de les canciones, qu’utilicen llingües como l’asturianu, el castellanu, el portugués, l’inglés o’l francés, complementen amañosamente les composiciones sonores, con lletres reflexives, íntimes y personales delles veces, pero non exentes de reivindicación. El timbre distintu de caún de los cantantes y la so particular manera de rapear, amás de la variedá idiomática, da-y al discu una diversidá que ye d’agradecer, fuxendo del peligru de la monotonía na que en munches ocasiones cai’l hip hop más ortodoxu. Destaca la pieza final, «Coyí d’un artu una flor», una especie de deconstrucción sonora d’esa perconocida tonada, nun exerciciu arriesgáu pero mui suxerente que nos muestra una visión nueva dafechu de la música vocal asturiana por escelencia.

Eladio Díaz y Control Z preséntense con esti discu orixinal y mui creativu, al altor de los músicos que-y dieron forma -instrumentistes avezaos y d’una calidá bultable-, col que s’asitien na vanguardia de la escena musical del país.

Esti viernes, día 6 de febreru, a les once la nueche, na Sala Acapulco (na Cai Padilla de Xixón), tendrá llugar un conciertu de sofitu y solidaridá pa co la Fiesta La Cultura. Nel mesmu van participarán delloos artistes asturianos, como figura nel cartelu-programa que aque recueye la semeya alxunta y ente los que s’alcuentren l’ex-Nuberu manolo Penaños, l’ex-componente del grupu Stukas Cesar Blanco, Carlos Riestra y el so grupu y los Jimaguas.

La entrada ye de 10 euros con consumición.

“Música en movimientu, pueblos moviéndose”. El llema ye’l reflexu de Glayíos/Oihuak, una iniciativa asociativa xuvenil pa sofitar a bandes asturianes y vasques lloñe de la so tierra. Acullá de la música, ye un proyectu que-y da puxu a un modelu nuevu de xestión cultural basáu na cooperación, l’autoxestión y la tresmisión de principios. Esti sábadu 31 ye la primera puesta n’escena col conciertu de los asturianos Skama la Rede y los donostiarres Skakeitan.

El Conseyu de la Mocedá del Principáu d’Asturies acoyó güei la presentación d’esti ciclu d’intercambios musicales. Los promotores del proyectu Xicu Ariza, miembru d’Ixuxú Asturies-Euskal Herria elkartea -asociación d’asturianos emigraos al País Vascu que fai de ponte sociocultural ente los dos pueblos-; y Miguel Rodríguez del Colectivu Xuvenil Glayíos; resaltaron xunto al cantante de Skama la Rede, Miguel Fernandi, la importancia del proyectu.

“Ye necesario esportar la música asturiana”. Les pallabres de Xicu Ariza parten de la crítica a “la carencia d’infraestructures y l’ausencia de polítiques culturales” que causen “dificultá pa desendolcar proyectos musicales estables quedándose namás n’Asturies”. D’esta miente Ariza destacó’l llabor desendolcáu con Ixuxú nos sos dos años de vida y apuntó qu’esti ye un nuevu pasu: “Intercambiar bandes asturianes y vasques que son mui conocíes nel so ámbitu, pa que cooperen y cadúna aproveche la relevancia que tien la otra nel so territoriu”. Too ello afitando “un circuitu estable con conciertos de calidá cada dos meses y a precios accesibles”.

“Amás de qué queremos facer ye mui importante cómo facelo”. Miguel Rodríguez sorrayó la filosofía del proyectu destacando’l dar un “tratu cercanu, tresparente y horizontal ente grupos y promotores”. Ente otros principios defendió’l calter non llucrativu y xuvenil: “Creemos en l’autoxestión dende la mocedá porque la xente mozo tien qu’empezar a dar alternatives a lo que vien establecío dende’l sistema”; y resaltó’l llabor social del proyectu. Nesti sen, distintos colectivos solidarios y culturales van tar nel conciertu dando a conocer el so trabayu.

Rodríguez sorrayó tamién el papel de los patrocinadores. “Somos xóvenes -la mayoría al paru- y pa financiar el proyectu busquemos unos sofitos colos que compartiéramos filosofía”. Glayíos/Oihuak ta apoyáu por doce axentes -instituciones, pequeñes empreses y medios de comunicación- colos que se compartan principios: “La defensa de la cultura y la lingua, la economía social o que faigan un llabor d’espardimientu de la música del país”.

“El trabayu que faen estos mozos deberíen de facelo les instituciones publiques porque tán pa promocionar la cultura y la música propia del país. Pero seguramente nun lo faedríen ni la metá de bien de como lo ta faciendo esta xente”. Na so intervención, Miguel Fernandi ‘Burilo’ animó a la mocedá a que “tome la iniciativa de facer coses” y reconoció qu’esti proyectu facilita la xera de los grupos a la hora de tocar fuera. Amás agradeció’l calter colectivu y cooperativu: “nadie s’aprovecha de nadie; grupos y organizadores vamos toos a comuña.”

El cantante de Skama la Rede tamién recordó que Skakeitan y el so grupu yá compartieron escenariu l’añu pasáu nel desagospiáu CSOA La Madreña, naguando por que, como aquella vegada, “oxalá se vendan toles entraes”. Los dos grupos van abrir Glayíos/Oihuak Música en Movimentu a ritmu ska pa presentar los sos nuevos trabayos ‘Avante’ y Orekariak’. Les entraes pueden mercase anticipada a cinco euros –doce con discu d’un de los grupos-, y por ocho euros el sábadu 31 dende les 21.30 na puerta de la Sala Whippoorwill.

Un añu más l’Anuariu de la Música Asturiana, publicáu por Goxe Producciones, fai alcordanza de l’actividá producida nel últimu añu dientro del campu de la música d’espresión asturiana: la tradicional, aquella que la reellabora (folk y demás derivaos) y la qu’utiliza l’asturianu independientemente del estilu. Son yá dieciséis los años nos qu’esta publicación, siempre per estes feches, ve la lluz y trata fondamente temes y cuestiones rellacionaos cola nuestra música.

L’Entamu d’esti númberu, tituláu «La voluntá de ser y siguir de la música asturiana», firmáu pol so director, Xune Elipe, fala de la trayectoria de la publicación y comenta: «Echando una güeyada a los anteriores númberos vemos cómo, por desgracia, poco de lo que se propón nellos se fixo realidá, sobre too no que se refier al deséu d’una verdadera política musical por parte del Gobiernu d’Asturies, que sigue ensin da-y l’atención afechisca a esti sector, con acciones insuficientes, tímides y ensin continuidá, sacante dalguna escepción honrosa, como la creación del Premiu al Meyor Cantar.

Nesti sen, siguimos naguando por eses llinies d’actuación de los poderes públicos que lleven al oxetivu final de llograr visibilidá (interior y esterior), estabilidá y profesionalidá a esta rama de la industria cultural nel nuestru país». Tocántenes al restu de conteníos, apaecen dos informes titulaos «Cómo montar un festival y nun morrer nel intentu» y «Nuevu folk asturianu», reportaxes como «Música, televisión y neños», cróniques sobre’l III Sol Celta d’Avilés y el Premiu al Meyor Cantar 2014, entrevistes a Tejedor, Skama la Rede, Borja Baragaño y Os Folkgazáis, recoyida de material como «La historia del gaiteru y el conde ganaderu» o artículos d’opinión; amás na sección Collecha apaecen toles producciones discográfiques, bibliográfiques y audiovisuales, relatives a la música asturiana, del añu 2014.

Como ye vezu, l’A.M.A. inclúi como complementu un discu resume de los álbunes publicaos nesi tiempu, con dieciséis temes separtaos por estilos: tonada, folk, bandes de gaites, canción d’autor y rock.

L’Anuariu de la Música Asturiana 2014 pue consiguise nos puntos de venta que vienen darréu: Uviéu (Chigre L’Esperteyu y Tienda de Comerciu Xustu L’Arcu la Vieya), Xixón (Trisquel, Centru Social La Semiente, Llibrería Paradiso y La Revoltosa), Avilés (El Cafetón y El Cabanón), Candás (Llibrería Palabras de caramelo), Mieres (L’Abellugu y Habana), Villaviciosa (La Esbilla y Ringo Rango) y Santu Adrianu (El Sabil).

El Grupu de Baille Tradicional de Fitoria celebrará’l so 25u aniversariu’l prósimu 24 de xineru nel Auditoriu d’Uviéu a les 20:00 hores con una gala na que’l baille y la música tradicional serán los protagonistes. El Grupu de Baille Tradicional de Fitoria, fundáu nel añu 1989, recibió en 2014 el galardón “Urogallo de bronce” del Centru Asturianu de Madrid, ente otros munchos galardones a lo llargo de la so hestoria.

El grupu tamién formó parte de la delegación asturiana nel caberu Festival Intercélticu de Lorient, onde representó l’espectáculu «Tradicionando» collechando una perbona crítica.

Na gala del prósimu sábadu, presentaráse una parte d’esti espectáculu por primer vegada n’Uviéu. Amás d’ello, contaráse cola participación de formaciones que vienen collaborando col grupu nestos 25 años pa dar formar a un eventu d’una hora y media de duración con una puesta n’escena bien prestosa, col baille tradicional del país como filu conductor del mesmu.

La gala ye d’accesu llibre y de baldre.

Los donostiarres Skakeitan y los asturianos Skama la Rede van protagonizar la primer puesta n’escena de Glayíos/Oihuak, el ciclu de conciertos impulsáu por Ixuxú Asturies-Euskal Herria elkartea –asociación d’asturianos emigraos al País Vascu- y el Colectivu Xuvenil Glayíos. El sábadu 31 de xineru, les dos bandes ska van aprovechar la ocasión pa presentar na Sala Whippoorwill d’Uviéu los sos nuevos trabayos: ‘Orekariak’ y ‘Avante’.

A les diez de la nueche va entamar la descarga de ska, folk asturiano y punk-rock con Skama la Rede. N’activo dende’l 2003, esti grupu d’El Cabu Peñes y Villaviciosa ye ún de los nomes más destacaos de la escena de rock n’asturianu. El pasáu mes de xunetu publicaron el so cuartu discu ‘Avante’, un trabayu d’altor dientro de la so trayectoria ascendente y imparable gracies al so directu enérxicu y al so estilu inconfundible. Los anfitriones van dar pasu a Skakeitan. Con cerca de 70 conciertos en dos años namás -ente los que s’inclúin tocar con Manu Chao énte 60.000 persones- estos donostiarres yá son muncho más que la promesa moza del ska-rock vascu. Vitalidá, frescura y munchu puxu nestos herederos de clásicos del rock combativu y de la música xamaicano (Mano Negra, Rancid, Skalariak, Jimmy Cliff…). ‘Orekariak’ ye’l so segundu discu y ésta va ser la so primer puesta n’escena lloñe d’Euskal Herria. Entraes a preciu simbólicu Les entraes yá tán disponibles en dellos llocales del centru y oriente asturianu. Acordies a la filosofía de Glayíos/Oihuak d’ufrir música en directo de calidá a precios afayadizos, van costar cinco euros anticipada y ocho na puerta. Amás hai un oferta llimitada col oxetivu de fomentar la venta discos y sofitar asina la industria musical: entrada anticipada xunto col nuevu cedé de cualesquiera de les dos bandes, por doce euros. Amás del simbolismu nos precios, esta iniciativa desendolcará otros de los sos principios con esti conciertu. L’Asamblea de Para@s y Precari@s xóvenes va tener voz enriba l’escenariu p’amosar les sos reivindicaciones y, en rellación al consumu de productos sostenibles e impulsar la economía social, van encargase tamién de facer el catering colos productos que cultiven nes sos tierres colectives. Amás, na sala va haber puestos de materiales y información d’organizaciones con fines sociales. dempués del conciertu va haber folixa nel pub la luna (postigo alto, 9)