Mundu

El Club Xieitu quier recuperar la toponimia tradicional de los conceyos lleoneses de Vil.labelinu, Riel.lu, Murias de Paredes, Palacios del Sil, Santu Mil.lanu y Cabril.lanes. Pa ello la organización defensora de la variedá pal.lueza del asturianu, convoca un concursu baxo’l nome de Concha de Lama, al que pueden presentase trabayos hasta l’1 de setiembre de 2012. El trabayu ha consistir na recoyida de cuantos topónimos puedan conocese en cualesquier de los pueblos de dichu territoriu, de los qu’han recoyese la totalidá de les paraxes, praos y demás elementos.

La recoyida ha facese de la manera más completa posible y va incluyir, obligatoriamente, una curtia descripción xeográfica, hestórica y xeneral de la llocalidá nun llistáu ordenáu alfabéticamente de topónimos.

El premiu ye de 300 euros y la espublización del trabayu per parte del Club Xeitu.

Bases completes del concursu

Los socios d’Iniciativa pol Asturianu tán convocaos esti sábadu a una Xunta Xeneral estraordinaria esti sábadu 25 de febreru a les 17:00 hores nel Auditoriu d’Uviéu. L’oxetivu d’esta Xunta Xeneral ye la escoyeta d’una Xunta Direutiva pa l’asociación, amás de tormar otres decisiones al rodiu del funcionamientu d’esta organización fundada a finales del añu pasáu.

Páxina d’Iniciativa pol Asturianu

Xunta Moza, organización de mocedá de la Xunta pola Defensa de la Llingua Asturiana institúi un premiu únicu dotáu con un llote de productos de dambes organizaciones, amás, el trabayu que resulte gallardonáu pue ser imaxe de campañes de sensibilización y/o reivindicación. El tema ye “demuestra’l to amor… pola llingua” y tien de tar vinculáu con cualesquier aspectu llingüísticu o sociollingüísticu d’Asturies. Pue tar escritu en prosa o versu.

Los trabayos han ser inéditos y orixinales. Cada participante pue presentar tantes obres como-y preste. Les obres, manuscrites o mecanografiaes, han tener una estensión máxima de 140 caracteres (124 pa quien participe al traviés de Twitter). El plazu de presentación de trabayos termina’l ventiún de febreru, día internacional de la llingua materna, de dos mil doce.

Los trabayos puen presentase en formatu lletrónicu, bien mandando un corréu a amorpolallingua@gmail.com, bien al traviés de Twitter usando’l hastag #amorpolallingua; o per vía postal dirixendo les cartes a la dirección de la organización: Xunta Moza. cai La Gascona 12, 3u. 33001, Uviéu.

La obra premiada va dase a conocer nun actu cultural que se va celebrar el día 23 de febreru, a les 21 hores, nel CSOA La Madreña d’Uviéu; por ello, encamentamos a tolos participates qu’asistan a esta entrega de premios. El trabayu gallardonáu va pasar a ser propiedá de la Xunta pola Defensa de la Llingua Asturiana y Xunta Moza.

Escritores, editores, ilustradores, bibliotecarios, autores de cómic, músicos y persones interesaes na música asturiana, profesores de llingua asturiana, personal d’animación a la llectura, periodistes… Una amplia representación d’estos campos va participar el sábadu pela mañana na tercer edición de la Xunta d’Escritores y otros profesionales na Casa Natal del Padre Galo, en Cadavéu, nel conceyu de Valdés. Los actos van entamar de magar les diez de la mañana cola presentación de la xornada.

Participarán representantes del Conceyu de Valdés, l’Academia de la Llingua Aaturiana y la Conseyería de Cultura. Un conciertín va siguir a esti actu, a les 10:30, con Dani García de la Cuesta, Rafa Lorenzo y un gaiteru de la Banda “Faro de Luarca”.

A les 11 celebraráse “Les lletres por Cadavéu” por Dora Méndez, escritora, miembru de l’Asociación “Versos libres”, de Xixón.

Más tarde va presentase una “Leyenda de Ntra. Sra. de la Regla: recogida y escrita por el Padre Galo”, nun manuscritu inéditu recoyíu por Mary Rico.Darréu Rodolfo Pico, artista plástico y escritor, va falar de “Valdés na poesía afro-cubana”. La mañana va siguir con José Manuel Fernández Pérez, pregoneru de la fiesta de La Regalina falando del desenrrollu de la “faliel.la” anguaño.

María Esther García, miembru correspondiente de l’Academia de la Llingua Asturiana dará “Delles consideraciones sobre lliteratura n´asturianu: Nueves perspectivas”, mientres qu’Esther Prieto, d’Ediciones Trabe, va dar la conferencia “Lo difícil nun ye editar”.

Javier Antonio Marinas va falar del cómic asturianu nel sieglu XX, Ismael María González Arias de la “La influencia del programa SONES de la TPA na canción asturiana d’anguaño”, la escritora y profesora Carmen Guardado falará del escritor nes clases d’asturianu.

Darréu va celebrase un alderique tituláu “El Plan Llector, escritor ya investigador del centru (PLEI): De qué-y val a la llingua asturiana?”, con una charra previa de Norberto Martín Gómez, Director y Profesor del Colexu de Muñás (Valdés).

La xornada va remtar con un recuerdu a Nené Losada por Esther Prieto. Un recuerdu que Mary Rico va facer estensivu a los poetes Padre Galo y Casimiro Cienfuegos. L’actu remata a les dos y media la tarde.

Jesús Iglesias, cabezaleru d’Izquierda Xunida na Xunta Xeneral, va llevar a la cámara asturiana una proposición non de llei pa que’l Gobiernu d’Asturies “adopte los alcuerdos ya implemente les midíes necesaries que garanticen la publicación sistemática nel Boletín Oficial del Principáu d’Asturies (BOPA) de toles disposiciones, resolvimientos y alcuerdos de los órganos institucionales del Principáu, lo mesmo que de les lleis aprobaes pola Xunta Xeneral, n’asturianu y en gallego-asturianu”. Una midida prevista na Llei d’Usu y Promoción del Asturianu de 1998 pero qu’entá nun se llevó alantre.

Izquierda Xunida informó de qu’entrugó yá al Conseyu de Gobiernu per escrito sobre esta cuestión, respondiendo dende la institución executiva con un curtiu “Anguaño nun ta previsto”.

Pa Izquierda Xunida ye un bon momentu pa “cumplir coles previsiones de la Llei d’Usu y más agora, cuando la eliminación de la edición impresa del Boletín Oficial del Principáu d’Asturies amenorga los costos derivaos de tal midida”.

L’artículu quintu de la Llei d’Usu de 1998 recueye que les disposiciones, resolvimientos y alcuerdos de los órganos institucionalesdel Principáu, amás de les lleis aprobaes pola Xunta Xeneral, puedan publicase n’ asturianu, per aciu d’edición separtada del Boletín Oficial de Principáu d’Asturies.

Los vinientes díes 5 a 8 d’avientu celébrase na Universidá de Sao Paulo (Brasil) el II Congresu Internacional de Neoloxía nes Llingües Romániques (CINEO 2011), un importante eventu mundial d’espertos en neoloxía, la rama de la filoloxía encargada de la creación de nueves pallabres o neoloxismos nel usu de les llingües. Nesti congresu va participar una representación asturiana, formada pol profesor Ramón d’Andrés y les filólogues Sara Gutiérrez Rodríguez y Vanesa Díaz Fanjul, del grupu d’investigación Seminariu de Filoloxía Asturiana de la Universidá d’Uviéu, que van dar una conferencia d’una hora col títulu “El observatorio AsturNeo para el estudio de los neologismos en la lengua asturiana”, dientro la sección “Neoloxía y llingües minoritaries o minorizaes”.

AsturNeo ye l’acrónimu d’Observatoriu Asturianu de Neoloxía, un proyectu d’investigación dirixíu pol profesor Ramón d’Andrés, que se punxo en marcha nel 2010 gracies a un conveniu suscritu pola Universidá d’Uviéu, la Universidá Pompeu Fabra de Barcelona y el la Conseyería de Cultura d’Asturies.

El proyectu AsturNeo inscríbese na Rede d’Observatorios Neolóxicos establecida nuna serie d’universidaes del estáu español, de la Europa llingüísticamente románica, y d’América Llatina; esta Rede coordínase a nivel mundial dende la Universidá Pompeu Fabra de Barcelona. L’oxetivu primordial d’AsturNeo ye l’estudiu estadísticu y científicu de los neoloxismos producíos nel asturianu escritu de dellos diarios dixitales en llingua asturiana, faciendo asina un diagnósticu de la vitalidá de la llingua nesti terrén del léxicu.

Nel congresu CINEO 2011, fadráse una presentación del proyectu nesi foru internacional, al mesmu tiempu que s’avanzarán dellos resultaos provisionales de les investigaciones nos años 2010 y 2011.Nel so día’l Seminariu anuncia que va ufrir información detallada sobre toos estos aspectos.

Páxina web del congresu

Xuan Santori va presentar la so tesis sobre la lliteratura asturiana y la so influencia na construcción del estándar el próximu 16 d’avientu, convirtiéndose asina na primer tesis que pudo facese n’asturianu dende los primeros trámites hasta la so presentación. Va delles selmanes Asturnews avanzaba esti fechu y facía-y una entrevista al autor, qu’esplicaba tolos detalles del so procesu.

Xuan Santori: “Quedó claro que pueden iguase soluciones, que’l cambiu dase si se da colos botones precisos”

Esti sábadu 15 de magar les diez de la nueche el Parque l’Oeste d’Uviéu, acueye la oncena edición de los Alcuentros Tradicionales Trebolgu, onde esti añu participen La Curuxa, La Banda de Gaites de Villaviciosa-El Gaitero, La Banda… la tira! y Skama la Rede. La entrada ye de baldre, pudiendo consumise na barra de la folixa.

Esti miércoles 14, l’Arribada de Xixón va acoyer la presentación de les publicaciones de l’ALLA asoleyaes a lo llargo de 2011. Sedrá a les cinco la tarde nel Vieyu Institutu Xovellanos.

Darréu van presentase dos llibros en castellán: Sin cinta métrica del Grupo Encadenados; Camas de hierba d’Héctor Acebo, y el mesmu autor, va presentar la comunicación “La influencia de los poetas de la generación de los 50 en la poesía actua”.

A les 19:15 un alderique va tratar la situación de la poesía n’Asturies, presentándose darréu otra obra en castellán “Comprometido con la vida o el triunfo del anhídrido carbónico” de Juan Méjica.

El Conceyu Universitariu pol Asturianu (CUPA) tien abiertu’l plazu p’apuntase a la segunda edición de los Cursos Básicos d’Asturianu del CUPA, una esperiencia formativa qu’entama en collaboración cola Academia de la Llingua Asturiana y Caxa Rural que va celebrase nel conceyu de Xixón. Los cursos, que se va facer na sede del Conseyu de la Mocedá de Xixón (Avda. Manuel Llaneza 68), van entamar a partir d’ochobre nel casu del Nivel 1 y en payares el Nivel 2 y cuntando en dambos casos con 35 hores llectives.

CURSU BÁSICU D’ASTURIANU. NIVEL I

Llunes y miércoles, de 19 a 21 hores

-Empobináu a persones ensin conocimientos d’asturianu o con nivel baxu de conocencia

-Feches: 3 d’ochobre a 14 d’avientu de 2011

CURSU BÁSICU D’ASTURIANU. NIVEL II

Martes y xueves, de 19 a 21 hores

-Empobináu a persones que ficieren el primer nivel del cursu o tenga conocencia media d’asturianu y quieran afondar nes sos habilidaes llingüístiques

-Feches: 3 de payares a 15 d’avientu de 2011 & 10 a 26 de xineru de 2012

El preciu de la inscripción ye de 30 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, hasta’l 30 de setiembre nel casu del NIVEL I y hasta’l 30 d’ochobre nel casu del NIVEL II.

Dende’l CUPA animen a participar nestos cursos que van sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.