Mundu

El partíu de la Izquierda Europea (PIE) empecipia mañana’l so IV Congresu onde 33 formaciones van aldericar sobre les alternatives pa refundar Europa y onde como diz la vicepresidenta del PIE, Maite Mola, van “definir alternatives frente a una socialdemocracia europea que, como n’Alemaña, apautase pa consolidar les polítiques de Angela Mérkel”.

El Partíu de la Izquierda Europea (PIE) celebra a partir de mañana y demientres tola fin de selmana’l IV Congresu d’esta formación onde representantes d’un total de 33 formaciones (26 partíos miembros y 7 observadores) de la izquierda alternativa de toa Europa van aldericar sobre qué alternatives son necesaries pa “refundar Europa”, cola vista puesta en gran midida nes Elecciones Europees de 2014.

Izquierda Xunida, el Partíu Comunista d’España (PCE) y Esquerra Uunida i Alternativa (EUiA) integren la representación estatal, amás d’otres fuerces como Syriza (Grecia), Die Linke (Alemaña) o’l Front de Gauche (Francia). El congresu clausurase’l domingu cola elección de la so nueva dirección y va cuntar cola participación de 300 delegaos de tolos partíos integrantes del PIE, según una amplia llista d’invitaos, ente los que s’inclúin movimientos sociales y sindicatos. Ente estos postreros, van participar los dos líderes de la Confederación Europea de Sindicatos (CES), Ignacio Fernández Toxo y Bernadette Ségol.

La NASA va llantar en 2015 nabos na lluna amás de albahaca y arabidopsis nun proyectu que forma parte del Llunar Plant Habitat Team y la Cofradía d’Amigos de los Nabos d’Asturies felícitase per ello. Nun se trata de llantales na mesma tierra llunar sinón dientro d’una cámara sellada que dexe la guañada de los vexetales, instalando tamién cámares y sensores pa facer el siguimientu de la so crecedera, si llegara a producise.

La cámara coles granes va viaxar hasta la Lluna a bordu de la nave que resulte ganadora del premiu Google Llunar XPRIZE, que la NASA tampoco ta pa esbardiar y fletar una nave esclusiva pal esperimentu.

El contenedor selláu coles granes va llevar tamién una pequena cantidá d’agua que va ser dosificada y penerada pa dar empiezu a la guañada. Y una cantidá d’aire disponible pa tan solo cinco díes de crecedera. Nun se trata de caltener un plantíu llunar, sinón tan solo de ver si ye posible faer empezar vida allá enriba, por eso espérase que sía abonda con tan solo cinco díes.

Los datos de crecedera rexistraos van ser comparaos colos terrestres, y les plantes fotografiaes a pequenos intervalos. Y como nun ye posible faer crecer nada ensin la lluz del sol, va usase la mesma llume solar sobre la Lluna como fonte d’enerxía.

Les conclusiones d’esti esperimentu van dexar tener información sobre les futures posibilidaes de desenvolvimientu de vida humana nel nuesu satélite, ya inclusive d’establecer una base habitada permanente.

La primer biblioteca pública dafechamente dixital vieno acabante esti día d’abrir en Condáu de San Antonio, Texas, nos Estaos Xuníos. La Biblioteca nun presenta dengún llibru nin estantería sinon pantalles y puestos pa consultales como se pue ver na semeya.

L’apertura de la nueva Biblioteca d’esti condáu texanu fízose coles vacaciones que s’averen y les families que lleguen de fora de la ciudá como destinatarios, sigún asoleyó l’Ayuntamientu del Condáu nun comunicáu.

Os días 6 y 7 de dicembre, organizao pol Asociación Xuvenil Mezá, ha a celebrarse en Bual (Asturias) el VI Outono de Bual, festival de música, arte y lliteratura que se lleva fendo dende el ano 2008 y que ten como fin motivar y dar un pouco de vida al occidente asturiano.

Este ano, as xornadas pasan a denominarse Outono de Bual, antias chamadas Outono Cultural, y han a ferse en dous días. Como xa é d’avezo, estas sesióis van tar cargadas d’actos culturales. El venres día 6 vei ferse a presentación das xornadas na Casa da Cultura de Bual. Nella van participar dalgús nembros organizadores del Asociación Xuvenil Mezá y José Antonio Barrientos, alcalde de Bual. Despóis, y pr’arrancar col Outono, vei ferse un magosto nel Recinto Ferial de Bual de Riba, nel que, aparte de castañas y viño, hemos a cuntar cua presencia del grupo de gaitas Os Pampirolos de Grandas, que xa van tar de tarde tocando y cantando pollos bares da villa cua festa nomada «Pasa-pasabares 2013».

El sábado 7 van ferse a mayoría das actividades, como sempre, na Casa da Cultura: ás doce vei ter cabida a presentación del llibro novo de Miguel Rodríguez Monteavaro, “Todos os tristes de mayo” (Trabe, 2013), poeta bualés que forma parte del organización del Outono. Esta presentación é a primeira que se fai nel llugar natal del autor y nella ha a participar, a parte del escritor, Esther Prieto, responsable da editorial Trabe.

A tarde ha a concentrarse en dous dos actos. Ás 17:30 hemos a ter a charla titulada «Espacios colectivos en Asturias: La Madreña, La Casa Azul, Cambalache y La Semiente. Propostas y futuro», a cargo de Delfín Valdés, activista y músico del Entregu, que vén da parte de La Semiente; d’Eva Martínez, colaboradora del Local Cambalache d’Uvieo; Faustino Loi, de La Casa Azul de Navia, y de Jara Coscuruella, úa das responsables del CSOA La Madreña d’Uvieo. Despóis da conferencia vén a música. El grupo que fusiona jazz con tradición asturiana formao por Mapi Quintana y Elías García vei fer un concerto íntimo que forma parte de xira que tán dando por Asturias y que vei concluir cua grabación del sou primeiro disco.

Llougo, de noite, vei haber máis actividades. Antias de nada, a cía: este ano vamos fer, como novedá, un comedor popular con precios asequibles pra todos os que se quiran achegar y pra todos os que quiran colaborar (haberá menú vexetariano y menú pra nenos). Despóis, nel Recinto Ferial de Bual de Riba, ha a ser el concerto del grupo de «mecigayu-ska» La Tarrancha, que chega a Bual por segundo ano consecutivo pr’amostrar al público qué significa a palabra diversión. Al remate del concerto vamos poder cuntar col grupo madrileño Skainhead, que vén por primeira vez al occidente asturiano pra presentar a súa «Gira de fin de año 2013». Esta banda foi formada en 2007 y ten xa dous discos y úa maqueta y a súa forma d’entender a música básase la publicación íntegra dos sous álbumes a internet de forma llibre, sin cuntar con discográficas nin deretos d’autor. Esta sesión musical nocturna é parte da novedá del Outono del ano pasao, que tuvo muito búa acoyida por parte del público.

Os actos van ser de baldre. A cultura asequible pral público é a base da filosofía del Asociación Xuvenil Mezá, que xa ta conseguindo afianzarse y ferse un furaco dentro das entidades organizadoras d’eventos de relevancia cultural en Asturias.

Este ano, como os últimos, el Outono nun recibíu subvención por parte de Política Llingüística y, cua escusa da crisis, féxose verdadeiramente difícil la organización das xornadas.

Pol Outono Cultural xa pasaron noutros anos nomes tan relevantes na sociedá como Alfredo González, Gerardo Díaz Quirós, Pepe el Ferreiro, Martxelo Otamendi, Pablo Texón, Txetxu Altube, Michael Lee Wolfe, Jacobo de Miguel ou a xente de Felpeyu, Vallarna, Espido y Tuenda. Esta é úa señal inequívoca de qu’as xornadas que s’han vivir el 7 de dicembre en Bual xa forman parte da cultura popular asturiana.

Programa completo:

Venres 6 de dicembre 19:30. Presentación de VI Outono de Bual. 20:00. Pasa-pasabares 2013. 22:30. Magosto nel Recinto Ferial de Bual de Riba. Cos Pampirolos.

Sábado 7 de dicembre 12:00 Presentación de “Todos os tristes de mayo”, de Miguel Rodríguez Monteavaro. Con Esther Prieto. 17:30. Mesa redonda: «Espacios colectivos en Asturias: La Madreña, La Casa Azul, Cambalache y La Semiente. Propostas y futuro». 19:30. Concerto: Mapi Quintana & Elías García. 22:00. Comedor con precios populares. 00:30. Concertos: La Tarrancha + Skainhead.

El ministru principal, líder del Partíu Nacional Escocés (SNP), dexó claro esta selmana que los impuestos escoceses nun van gastase en programes nucleares y que los misiles nucleares de Reinu Uníu van retirase d’Escocia, pero tamién qu’una Escocia independiente caltendría la llibra británica como moneda, tamién a la reina como la Xefa del Estáu.

Los planes del gobiernu pasaríen por caltener a Escocia como miembru de la Unión Europea pero col so propiu exércitu y autonomía económica dafechu pa recaudar los sos impuestos.

Los planes desplicolos esti martes el ministru principal escocés, Alex Salmond, nun informe de 670 páxines, que quier convencer a los escoceses de que voten a favor de la independencia nel referendu del 18 de setiembre del próximu añu pa romper la so unión con Inglaterra de 306 años, entamada cola derrota militar del Reinu d’Escocia.

El Vaticanu presentó unos frescos apocayá restauraos nes catacumbes de Priscila, conocíes por allugar la imaxe más antigua de la Virxe col Neñu. Los frescos del sieglu IV, podríen según dalgunos amosar sacerdotises na Ilesia cristiana, colo qu’abren otra vuelta una polémica que nun tenía prebes materiales históricamente falando, qu’agora paecen xurdir d’esta capiya griega.

El cardenal Gianfranco Ravasi, ministru de Cultura del Vaticanu, presidió la inauguración del ‘Cubículo de Lázaro’, una pequena cámara funeraria con imaxes del sieglu IV d’escenes bíbliques, de los apóstoles Pedro y Pablo, y unu de los primeros romanos soterraos ellí en nichos a lo llargo de la paré, como yera común na antigüedá.

Lo más interesante ye que la catacumba cunta con dos escenes nes que, según defensores de la ordenación sacerdotal de muyeres, apaecen sacerdotises. Una, na capiya griega en tonos ocres, qu’amuesa a un grupu de muyeres que celebren una llacuada, que se supon que ye la eucaristía. Otru frescu, nuna cámara funeraria ricamente decorada, representa a una muyer vistida con una túnica, similar a una sotana, coles manos na posición usada polos sacerdotes pal cultu públicu.

Esti martes 12 de payares, a les 19 hores, el salón d’actos del Colexu d’Abogaos d’Uviéu va acoyer una charra col títulu “Los crímenes del franquismu: acabar cola impunidá” qu’entama’l grupu asturianu d’apoyu a la Querella Arxentina. Nel actu van participar l’abogada Ana Messuti y José María “Chato” Galante, que visiten Asturies pa dar a conocer los avances d’esti procesu xudicial.

Primeramente, el llunes 11 de payares, a les 17 hores, Ana Messuti y Jose María “Chato” Galante van tener un alcuentru cola prensa nel Hotel El Magistral (C/ Xovellanos, 3), n’Uviéu..

La “Causa 4591/10 polos delitos de xenocidiu y/o crímenes de lesa humanidá cometíos n’España pola dictadura franquista ente’l 17 de xunetu de 1936 y el 15 de xunu de 1977” instruyida pola xueza Dña. María Servini de Cubría nel Xulgáu Nacional no Criminal y Correccional Federal N.u 1 de la República Arxentina (Buenos Aires), más conocida como la Querella Arxentina, ye la única causa abierta nel mundu contra’l franquismu. La xueza pidió yá les primeres estradiciones, ente elles la de dos ex-axentes de policía imputaos por delitos de tortura.

La Coordinadora Estatal d’apoyu a la Querella Arxentina axunta a más de 100 asociaciones de tol Estáu español y tien como oxetivu la promoción y espardimientu de la causa. Dende la selmana pasada, l’apoyu oficial del parllamentu andaluz sumóse a los yá aprobaos nes cámares del País Vascu y Cataluña, amás del apoyu de más de 100 conceyos de tol Estáu.

N’Asturies funciona dende va mediu añu un grupu d’apoyu que yá se reunió coles principales fuerces parllamentaries asturianes y que, hasta la fecha, consiguió en trece conceyos alcuerdos plenarios sofitando la Querella Arxentina.

Ana Messuti estudió Derechu na Universidá de Buenos Aires, onde dio clases de Filosofía del Derechu, y obtuvo’l doctoráu na Universidá de Salamanca con premiu estraordinariu. Foi funcionaria de les Naciones Uníes en Viena y Xinebra. Especializóse en Filosofía del Derechu Penal na Universidá de Roma y siguió la so actividá académica nel Institutu Vascu de Criminoloxía de San Sebastián, Escuela de la Maxistratura de Sao Paulo (Brasil), Universidá de Xinebra, Facultá de Derechu de la Universidá de Buenos Aires y Universidá de Rosario (Arxentina). Ana Messuti lleva tres años nel equipu d’ocho abogaos que s’encarguen de la Querella Arxentina.

Jose María “Chato” Galante ye un ex-presu y represaliáu del franquismu, miembru de la Coordinadora Estatal d’Apoyu a la Querella Arxentina y querellante na causa.

El papa vieno dexando cayer estos díes delles polémiques perspeutives qu’empobinaríen camudamientos de fondu na Ilesia, cola ordenación futurible d’una muyer como Cardenal nun futuru próximu.

La forma d’averase a esti camudamientu profundu pasaría pola posibilidá de que puean nomase cardenales que nun seyan sacerdotes, basta que seyan diáconosy el fechu de qu’hai 800 años les muyeres podíen ser diaconises, colo que tornando a aquel procedimientu enrraigañáu na tradición eclesial pondríase enrriba la mesa una de les cuestiones que’l Papa Francisco atalanta que necesida discutiniu: el papel de la muyer na Ilesia.

Dellos medios europeos faciénse ecu de lqa cuestión esti día y asoleyaben lo qu’atalanten son novedaes importantes nel nuevu Papáu.

La noticia recoyida nel diariu madrilanu El País

L’Ayuntamientu d’Uviéu sumarase esti añu a les celebraciones de la Nueche Blanca’ con diverses actividaes gratuites qu’inclúin música, teatru y arte pala nueche del 5 d’Ochobre, según confirmó esti domingu l’alcalde, Agustín Iglesias Caunedo. Asina, la ciudá xunirase al calendariu de París, nuna fiesta del arte y la cultura que se vien desenvolviendo dende 2002 en tol mundu, con especial incidencia nel ámbitu européu y qu’algamara munchu éxitu estos años d’atrás en ciudaes como Madrid y que desapaeciera de la capital en 2010 por mor de la crisis.

La programación d’Uviéu va cuntar esa nueche del día 5 con actuaciones músicales de l Fee Reega y Pablo Und Destruktion, cantautores de folk alternativu que van ufiertar un conciertu dientro del estanque de los Coríos del Campu de San Francisco; y el dúo Les Casi Casiotone, que van actuar nel Paraninfu de la Universidá d’Uviéu.

Amás, la banda de folk-rock Lucas15 presenta nel Filarmónica’l so segundu discu; el pianista Jacobo de Miguel estrena per primer vegada nel Muséu de Belles Artes un repertoriu de pianu solu; y na plaza de Trascorrales va realizase un pequenu festival de música electrónica col Dj José Padilla.

Tamién habrá teatru cola compañía Rabos de Llagartesa estrenando n’esclusiva ‘Salvia Mater’, un espectáculu de teatru de cai, con 21 músicos y artistes que va percorrer el Campu de San Fransciscu; y la compañía Lluz, Micro y puntu que va representar ‘On el funambulista’, un espectáculu que se desenvuelvese al traviés de retroproyectores nel xardín del Conservatoriu de Música d’Asturies.

Otres actividaes incluyçíes na programación empobinenles el fotógrafu y diseñador Panci Calvo y la productora Things Happens plantegando una acción con proyecciones sobre teles de tul de 20 metros de llongura na cai Uría pa faer alicar ecos históricos de la ciudá. Y l’equipu d’arquitectura de Sergio Baragaño fai anuncia de la so ‘Suañando’l mar’, con contenedores que se van depositar na Fábrica de Gas y en que’l so interior plantégense diverses collaboraciones artístiques como la de Mónica Solar.

Dellos otros coleutivos y artistes vienen amosando’l so interés en sumase a la programación, polo que la programación entá nun s’alcuentra finada.

La delda del conxuntu de les alministraciones públiques n’españa algamó los 947.184 millones d’euros hasta xunetu, nuevu récord históricu, en creciendo nun mes en 4.426 millones d’euros, colo que’l pesu del endeldamientu públicu sobre’l PIB esguila al 92,6%, según datos del Bancu d’España.

D’esta forma, la delda supera nun puntu les previsiones del Gobiernu pa tol añu (91,6%). Esti cálculu fíxose con un PIB de 1.022.514 millones d’euros, teniendo en cuenta la evolución económica de los últimos cuatro trimestres, tal que fai’l Bancu d’España.

Nel mes de xunetu, la delda pública crez per tercer mes consecutivu dempués de que n’abril se rompiera l’enclín de crecedera que s’empecipiara n’agostu de 2012 y l’endeldamientu de les alministraciones públiques amenorgara nesi mes en más de 8.800 millones d’euros.