Mundu

L’área d’hostelería n’educación especial del Colexu Públicu d’Educación Básica “La Puela Ayande”, en collaboración cola biblioteca del centru y l’asignatura de Llingua Asturiana vienen acabantes d’entamar una innovadora esposición en realidá aumentada titulada “Pinchos con muncho cuentu/Pinchos con muitu cuentu (RA)”.

El proyectu lleváu alantre polos alumnos d’educación especial na asignatura d’hostelería, consistió nun trabayu socesivu de: documentación sobre relatos de la lliteratura universal en llingua asturiana, el diseñu de productos gastronómicos temáticos asociaos a dalgún aspeutu de les obres documentadas, la preparación de la receta, la ellaboración del productu termináu y la so inclusión na ufierta diaria de la cafetería del centru.

Como remate a tol trabayu, documentase tol procesu en realidá aumentada (RA) al traviés de paneles que s’esponen nel espaciu d’acoyida del centru.

La realidá aumentada (RA) ye’l términu que s’usa pa definir una visión per mediu d’un dispositivu tecnolóxicu d’información virtual ensertada nun formatu físicu. Nesti casu, al traviés de cualquier dispositivu móvil (teléfonu, tablet, etc.) escániense imaxes en paneles al traviés d’una aplicación concreta: la app layar, Asina, el material espositivo en formatu físicu: paneles ya imaxes, apaez ampliáu con archivos en dellos formatos dixitales.

L’amuesa va tar a disposición d’alumnáu, padres y visitantes dende’l miércoles 10 de xunu al martes 30 de xunu, nos espacios d’acoyida delCPEB LA PUELA AYANDE, cai Las Veigas S/N 33880, La Puela, Ayande.

Na nueche ellectoral, Izquierda Xunida d’asturies algamaba unos resultaos mui penrriba de los que-y daben les encuestes, calteniendo la so representación parlamentaria na Xunta Xneral y xorreciendo en númberu de conceyales y alcaldíes n’Asturies. Y facíalo en facebook con una felicitación billingüe. El so apueste pol asturianu y la oficialidá foi una de les sos marques programátiques nestes autonómiques y municipales.

La felicitación a la organización y a los militantes pol resultáu podía lleese na so páxina de facebook: “A falta de resultancies definitives oficiales yá podemos informar de qu’IX xorreció enforma nestes elecciones. Consolidemos y aumentemos alcaldíes: somos la primer fuerza político en Castrillón,Riosa,y Santalla d’Ozcos (coalición electoral)consiguimos mayoríes absolutes en Mieres, L.lena, Grao ya Illas, y entramos en conceyos onde nun teníamos representación,empatemos en Morcín. Amás polo xeneral xubimos nos conceyos onde yá teníamos representación y aumentamos la presencia territorial en nuevos conceyos.

A nivel autonómicu paremos a la derecha y vencimos a les encuestes, caltenemos la representación que teníamos: 5, asina que podemos tar enforma satisfechos y satisfeches con esta resultancia que foi posible gracies al incansable trabayu militante.

Agora tócanos siguir trabayando cola mesma ilusión, fuerza y allegría pa reconquistar la izquierda: con unidá, con identidá y pa garantizar l’estáu de bienestar de les persones dende una perspectiva de clase. Gracies nuevamente pol vuesu trabayu”.

Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos de los VI Cursos d’Asturianu en Xixón esti miércoles 25 de marzu a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llaneza 68, baxu), cola participación de los más de 50 alumnos qu’ente presencial y a distancia participaron nos curso. Nel actu van dar llectura a dellos testos, xunto a miembros d’Iniciativa pol Asturianu, el CUPA y l’Academia de la Llingua Asturiana.

L’actu va sirvir tamién pa entregar los premios del concursu lliterariu entamáu estos díes por Iniciativa pol Asturianu en collaboración editoriales asturianes pa promocionar les lletres asturianes coincidiendo col Día Internacional de la Poesía.

El Concursu a la Meyor Primer Sidre l’Añu, únicu en Asturies que tien comu protagonista a la sidre nuevo, ensin trasegar, va realizase los díis 20 y 21 na Sidrería Zapico de Xixón. Pesia qu’esti añu los llagares avisen que la sidre vien un pocu atrasao por xides climatolóxiques, y entá nun ta nel so meyor momentu, lo cierto ye qu’agora mesmo yá son 44 los llagares que s’animaron a participar nesti concursu a la “Meyor Primer Sidre l’Añu”, ello ye, a la sidre recién fecho y que nun foi trasegada

El concursu va rializase na Sidrería Zapico, de Xixón, los díis 20 y 21 de marzu, de magar les 17:30, y va tar abiertu a l’asistencia de públicu, cuntando con un xuráu de reconocíu prestixu. El vienres 20 va rializase la preseleición na que se van escoyer les cinco meyores que’l sábadu 21 van ser prebaes en tastia ciega pol xuráu con puntuación pública y en direutu, de tala forma que va dise conociendo la puntuación llograda por caúna de les 5 sidres finalistes.

Lo mesmol que l’añu pasáu, y pa favorecer un procesu más xustu, en ca tanda elliminaráse la mayor y la menor puntuación, pa evitar cualquier esviación sobro la nota. Al rematar el concursu, y yá conocía la sidre ganador, el públicu asistente va poder prebar les sidres presentaes al concursu, pa que pueda conocer de primer man les sidres presentaes y valorales.

El pasáu miércoles 21 de xineru en Xinebra (Suiza) llevóse a cabu’l procesu de Revisión Periódica Universal del cumplimientu de los Drechos Humanos nel Estáu español per parte de les Naciones Xuníes (ONX). Esti procesu tien como oxetivu la revision per parte de trés estaos miembros de la ONX del cumplimientu nun país de la Declaración Universal de los Drechos Humanos (DUDH) y de los alcuerdos y convenios internacionales arreyaos a la mesma. Nesti casu, los estaos del Reinu Xuníu, Sierra Lleona y Macedonia foren los encargaos de revisar la situación del Estáu español.

Col enfotu de dar una visión más realista de lo que lleva asocediendo nesti Estáu les caberes décades, la Rede Europea d’Igualdá Llingüística (ELEN) apurrió un informe onde recoyía dolcenes de casos de violación y discriminación hacia falantes de les llingües diferentes del castellán, ello ye: aragonés, asturianu, catalán, gallegu y vascu.

En dellos casos como’l catalán, los incumplimientos y violaciones de la DUDH yeren mayoritariamente cometíos pola alministración española. Nel casu de la llingua asturiana, l’asociación Iniciativa pol Asturianu (miembru d’ELEN) recopiló más de 25 casos de discriminación nos caberos años, mayoritariamente cometíos per parte de l’alministración pública asturiana y alministraciones llocales. Estos casos diben dende la decision d’un xuez de nun considerer discriminatoriu multar a estudiantes d’una escuela en Villaviciosa con 25 pesetes por cada pallabra que dicíen n’asturianu, a la negación de les alministraciones llocales a almitir instancies nesta llingua, la negación a un ciudadanu asturianu de declarer na so llingua na Audiencia Nacional, o la falta de regularización de la escolarización en llingua asturiana (particularmente nes etapes pre-escolares y de Primaria).

Amás d’ello, tamién recoyía la falta ñidia de les sos obligaciones per parte del Estáu español a la hora de facer cumplir a la Comunidá Autónoma del Principáu d’Asturies y a los Gobiernos llocales la llegalidá vixente (Estatutu d’Autonomía y Llei d’Usu del Bable/Asturianu), qu’obliguen a un tratu igualitariu hacia los falantes d’asturianu al respective del tratu que reciben los que s’espresen en castellán.

A lo cabero, l’informe concluyía que tolos casos recopilaos a lo llargo’l territoriu español amosaben una discriminación sistemática ya institucionalizada, y que la busca de xusticia al traviés de los (hostiles) xulgaos ta yá escosada, lo qu’afita los pegoyos p’apelar a la Corte Europea de Drechos Humanos y al Tribunal de Xusticia Européu y posiblemente L’Haya.

Una delegación d’ELEN tuvo presente nel procesu, onde l’Estáu español espunxo una vision positivista y autocomplaciente de la so realidá interna, a la que los representantes de los trés estaos miembros arrespondieron de forma tolerante y igualmente complaciente.

Magar too esto, los estaos evaluadores sí formularon entrugues y espunxeron la realidá del Estáu no tocante a abusos de drechos fundamentals, como son l’abusu de la fuercia per parte de les autoridaes, les fatídiques polítiques d’aisllamientu de deteníos y la brutalidá de les midíes emplegaes pa refugar la entrada de migrantes desarmaos ya indefensos nes valles de Ceuta y Melilla.

Desafortunadamente, Iniciativa pol Asturianu y ELEN camienten que ye inalmisible que nengunu de los estaos revisores se dignare a formular una sola entruga no tocante a los drechos llingüísticos, lo que dexa a es clares la falta de compromisu real per parte de les Naciones Xuníes hacia un drechu fundamental qu’amás ta recoyíu na Declaración Universal de los Drechos Llingüísticos, ellaborada por esta mesma institución y amestada a la Declaración Universal de los Drechos Humanos.

Pa rematar, Iniciativa pol Asturianu quier declarana esti miércoles pela mañana na see de l’ALLA que “so fonderu compromisu hacia la defensa de los drechos fundamentales de los falantes non solo d’asturianu, sinón de toles llingües minorizaes. La próxima cita internacional, na qu’Iniciativa pol Asturianu y ELEN tarán presentes, sedrá nel mes de xunu, en Xinebra, onde la Oficina del Altu Comisionáu pa los Drechos Humanos va evaluar el cumplimientu per parte del Estáu español de la Carta Europea de les Llingües Rexonales o Minoritaries (ECRML), testu que robló y ratificó y qu’inda anguaño ta bien lloñe de cumplir”.

Sedrá ellí onde denunciemos los continuaos incumplimientos del Gobiernu d’Asturies y d’España pa col respetu de los drechos civiles de los usuarios d’asturianu, asina como la falta de midíes que favorezan la supervivencia del idioma, talo como se comprometió l’Estáu español na Constitución de 1978 y cola firma en 2001 de Carta Europea de les Llingües Rexonales o Minoritaries. Volvemos a recordar que la ferramienta necesaria pa entamar a solucionar estos problemes y dar la necesaria seguridá xurídica a los asturianos que tienen por llingua d’usu habitual l’asturianu, ye la reconocencia del asturianu como llingua co-oficial n’Asturies, xunto al castellán, n’igualdá de condiciones. Ye la Xunta Xeneral y les formaciones que tán n’ella, quien tienen la responsabilidá de tomar la inciativa pa que la oficialidá del asturianu seya una realidá, talo y como recomienden les organizaciones ya instituciones internacionales que dende va años vienen analizando la situación sociollingüística y llegal d’Asturies.

El Parlamentu européu va tener un Intergrupu en Llingües Rexonales pal periodu lexislativu d’anguañu que va hasta’l 2019, depués de que’l pasáu 11 d’avientu, la Conferencia de Presidentes s’apautara n’establecer l’Intergrupu en Minoríes Nacionales Tradicionales, Rexones Constitucionales y Llingües Rexonales. Esti Intergrupu sedrá una organización multipartidista empobinada a trabayar dafechamente pa promover llingües rexonales nel parlamentu européu y va empezar funcionar nesti 2015, anque entá nun se decidiere quien lu va lliderar.

Magar ye cierto qu’un Intergroupu nun tien poder lexislativu “per se” y nun puede representar al Parlamentu européu oficialmente, tá formáu pa promover intercambios de puntos de vista estremaos ente les formaciones con representación parlamentaria. Amás, tamién tienen l’efectu d’unificar nel Parlamentu européu les posiciones de los partíos que van dende la izquierda radical a los lliberales pa trabayar nun asuntu específicu. Nesti sentíu, ye altamente positivo que les families polítiques distintes d’Europa finalmente algamaran esti alcuerdu pa trabayar xuntois na promoción de les llingües rexonales d’Europa.

Esti próximu martes, 20 de xineru, a les 19,30 hores, nel local social del Atenéu Obreru de Xixón, ÁSTURA entama una conferencia sobre “Los contactos ente música popular y música culta nel repertoriu musical de la gaita asturiana”, al cargu de Juan Alfonso Fernández García “Fonsu”. L ‘actividá está dentro de la colaboración entre las entidades del Atenéu Obreru de Xixón y de ÁSTURA, para hacer una actividad mensual en torno a la promoción de la cultura asturiana.

Dende la segunda metá del sieglu XX hasta l’actualidá viénose recoyendo n’Asturies una rica colección de melodíes tradicionalmente interpretaes cola gaita. Yá a finales del sieglu XX, nel contestu políticu del desenvolvimientu del autonomismo y en plenu procesu de renovación acústica del preséu, empezar a impartir la so técnica y a codificar el so repertoriu según los cánones académicos, procesu que remata en 2006 cola inclusión de la gaita nel programa de los Conservatorios Profesionales de Música d’Uviéu y Xixón. Una música oral o folk convirtióse, pos, nuna música escrita o “d’arte”. Sicasí, y a pesar de que la inmensa mayoría d’esi repertoriu musical recoyóse de la tradición oral, esisten exemplos que, poco que s’analicen, revélennos el so raigañu cultu o, siquier, el so contactu col ámbitu de la música culta, a la que la gaita sirve nunes ocasiones d’inspiración y de la que, n’otres, toma melodíes enteres que güei etiquetamos como “tradicionales”. Esta ponencia esquiza neses melodíes y, hasta onde ye posible, trata de reconstruyir el camín por que llegaron a popularizase como melodíes de gaita. Juan Alfonso Fernández García “Fonsu” ye Llicenciáu en Filoloxía Hispánica pola Universidá d’Uviéu, Doctorando en Musicoloxía y Director del Muséu de la Gaita de Xixón dende 1997. Amás d’artículos en revistes especializaes, publicó la Guía didáctica del Muséu de la Gaita, el Cancioneru de la gaita asturiana y tien en preparación La formación del repertoriu musical de la gaita asturiana. En 1999 graba Hala, señores usías. Cantares y sones de ciegu n’Asturies (Fonoastur, Uviéu). Realiza delles collaboraciones discográfiques, como instrumentista de gaita y zanfonía, con grupos como Lliberdón, Grupu Cultural Xana, Brenga Ástur y Muyeres. Entamó y empobináu numberoses esposiciones: Preseos musicales nel arte asturiano hasta 1800 (Muséu del Pueblu D’Asturies, 2002), Músiques del mundu: el soníu de la piel (Muséu del Pueblu D’Asturies, 2007), La gaita n’Asturies (Esposición itinerante patrocinada por Cajastur, 2009-2012) y Oficios artesanales: la cestería (Comisariu. Palaciu de Valdecarzana, Avilés, 2010) son dalgunes d’elles.

La Rede Europea d’Igualdá Llingüística (ELEN), a la que pertenez Iniciativa pol Asturianu, vieno acabante d’asoleyar un informe pa la Revisión Periódica Universal (UPR) de les Naciones Xuníes no que cinca a los casos de discriminación y ataques escontra los falantes de llingües estremaes del castellán nel Estáu español, ente 2007 y 2013. El procesu pue siguise en vivo na televisión de la ONX entamando a les 9am del xueves 21.

L’informe detalla casos específicos d’ataques y discriminación escontra falantes d’aragonés, asturianu, catalán, gallegu y vascu nel periodu ente 2007 y 2013. Una delegación derepresentantes d’ELEN atenderá’l xueves 21 a la sesión de la UPR onde l’Informe de Drechos Humanos del Estáu español sedrá revisáu pol Reinu Xuníu, Sierra Lleona y Macedonia. La delegación tará lliderada pel caderalgu y vicepresidente d’ELEN Ferran Suay (Acció Cultural del País Valencià (ACPV), el vicepresidente Marcos Maceira (a Mesa pola Normalización Lingüística, Galicia), Rosa de les Neus Marco (Plataforma per la Llengua, Cataluña), Francesc Felipe, Jaume Fullana y Natxo Badenas (Escola Valenciana). L’eventu sedrá grabáu por Aurelio Lopes d’Irmandade TV. Los miembros d’ELEN pertenecientes a Iniciativa pol Asturianu informen de más de 25 casos de seria discriminación llingüística hacia los falantes d’asturianu. Los casos incluyíos nel informe son namás una parte de la discriminación que realmente asocede, yá qu’en munchos casos les víctimes d’esos abusos illegales nun informen d’ello y nun algama a les ONGs o los medios. Nel casu catalán, con más de 40 fechos constataos nos caberos 7 años, l’80% de tolos casos asocedieron n’organismos direutamente dependientes de l’alministración española. Esto ye sobremanera serio pola mor de que’l Gobiernu español ye’l caberu responsable de facer cumplir les lleis estatales, los estatutos d’autonomía y les conveiciones internacionales firmaes y ratificaes per España, que prohiben la discriminación llingüística. Los fechos amuesen que los ciudadanos falantes d’estes llingües tán nuna situación estremadamente vulnerable, yá que nun puen facer namás que denunciar los abusos que reciben a les mesmes instituciones que tán aplicando talos abusos. Nos xulgaos, que tendríen de ser garantes de los Drechos Humanos, la situación ye particularmente seria. Por exemplu, un xuez quitó-y la custodia de la so fía a un padre alegando qu’esti falába-y en catalán pa separtala de la so madre (casu 34). L’informe conclúi que les autoridaes españoles “aliten o a lo menos toleren abiertamente atitudes supremacistes ente’l funcionariáu y otros axentes y representantes.” Ye más, considerando’l gran númberu d’evidencies detallaes en diferentes árees pue concluyise que “la discriminación haza los falantes de llingües autóctones diferentes del castellán ye sistémica nel Estáu español, y que la discriminación ta institucionalizada.” “Ñidiamente, la busca de la xusticia al traviés de los (hostiles) xulgaos ta ya agotada, lo qu’afita los pegoyos p’apelar a la Corte Europea de Derechos Humanos (ECtHR) y al Tribunal de Xusticia Européu (ECJ) y posiblemente l’Haya.” afirma l’informe d’ELEN. El procesu pue siguise en vivo na televisión de la ONX http://webtv.un.org/ entamando a les 9am del xueves 21. La Rede Europea d’Igualdá Llingüística (ELEN) entamóse nel añu 2011 pa trabayar pola proteición y promoción de les llingües minoritaries y rexonales en peligru n’Europa. Hasta agora, ELEN representa a 44 llingües rexonales o minoritaries en 21 Estaos europeos. Iniciativa pol Asturianu como miembru de la Rede Europea d’Igualdá Llingüística (ELEN) collaboró cola parte sobre la la llingua asturiana nesti informe
Informe completu d’ELEN

La Dirección Xeneral de Política Llingüística entama cada añu’l Día de les Ciencies Asturianes, cola mira de fomentar dende la óptica de la llingua asturiana l’emplegu responsable de la ciencia en beneficiu de la sociedá y nesti caberu añu 2014 y col lema «El viaxe de les palabres pela rede. Los peligros del mundu dixital», les actividaes buscaben tresmitir a la xente mozo que la ciencia ye un patrimoniu común en que la so práctica y en que’l so progresu tien de participar la sociedá al completu. El llibru que recueye toles aportaciones pue descargase yá de baldre.

L’enfotu de la xornada yera tamién trabayar reconociendo y incorporando los llogros de la cultura científica y la evolución tecnolóxica y contribuyendo de manera crítica y xenerosa al so desenvolvimientu.

El llibru billingüe (asturianu y gallego-asturianu), yá disponible na sección «Descarga de publicaciones» de la web del serviciu de Política Llingüística, recueye los materiales preparaos pal V Día de les Ciencies Asturianes por miembros de los colexos oficiales d’inxenieros n’informática d’Asturies.

Esti xueves 20 de payares Nacho González de la organización Soldepaz Pachakuti va falanos de la realidá mexicana . Nacho foi l’únicu europeu nel FORU INTERNACIONAL: DERECHOS HUMANOS, MILITARISMU, PARAMILITARISMU Y INVASIONES EN LLATINOAMÉRICA que se fexo a primeros d’agosto, na ciudá capital del estáu d’Oaxaca, México, cola participación de delegaes y delegaos d’organizaciones de 17 países. México ye un país que, por desgracia, ta saliendo últimamente nos medios de comunicación a cuentu de la matanza de 43 estudiantes n’Ayotzinapa.