Mocedá

El Día de la Mocedá Revolucionario 2009 entama’l vienres que vien, 9 d’ochobre, con delles actividaes a partir de les 17:00 hores en Xixón. Na casa sindical van facese les xornaes internacionalistes, teatru, charra-alderique sobre la revolución y la proyeición del documental “Ochobre’l 34, memories d’un país” de produción propia de Darréu.

La primer xornada del DMR’09 acaba con una espicha en L’Ayalga- Llar d’Andecha onde va acturar un grupu folk. El programa del DMR’09 complétase cola xornada del sábadu 10, col manifestamientu y la octava edición del festival “Asturies nun escaez”.

El VIII Conciertu “Asturies nun escaez” va celebrase’l sábadu como conmemoración de la Revolución de 1934 y homenaxe a los y les revolucionaries d’entós. El preciu de les entraes ye de 14€ anticiapada y 17€ na puerta, pudiendo mercase en Llaviana: Cervecería Bulldog; L´Entregu: La Yenda; Llangréu: Sidreria Alonso, Tom Malory, Totem Tattoo, B12, L´Aquelarre, L´Espumeru Planta 14;Xixón: Barucu, L´Ayalga, Astuera. Noreña: Los Riegos, Llar d´Andecha. La PolaSieru: H2, Diañu. Uvieu: Llibreria Paraxuga. Mieres: Café-bar La Habana, El Monasterio, shakesbeer; Ribeseya: Chigre´l Corquieu o Villaviciosa: La Bodega II.

Les primeres doscientes persones que merquen una consumición nel eventu van tener un discu de regalu del grupu “Adizión Etílika”.

El DMR’09 nun ta esentu de polémica, yá que la organización de mocedá Darréu denunció “la represión y les torgues que dende fai unos meses venimos sufriendo dende parte del Ayuntamientu de Llangréu, y de los d’otros conceyos, de cara a organizar el Día de Mocedá Revolucionario 2009 DMR’09, qu’esti añu amás coincide col 75 aniversariu de la revolución obrera de 1934”. La mocedá independentista quier informar “a tola mocedá asturiano” de la situación que, según cuenten, fízo-yos pasar l’Ayuntamientu de Llangréu nestes feches, “chando p’atrás un proyeutu y un eventu que nos últimos 3 años venía cellebrandose en Llangréu, con un ésitu inegable y ensin dengún tipu de problema”. Pa la organización ye “esti ésitu movilizaor y organizativu” lo que fizo al PSOE “reprimir esti eventu”.

Páxina web del DMR ’09

La editorial La Cruz de Grau y Xareos! Xestión Cultural van presentar el númberu 5 de la revista de lliteratura moza Formientu nel Salón del Llibru Asturianu de Xixón, que se celebra esti añu nel Paséu de Begoña.

L’actu va celebrase esti sábadu, 22 d’agostu, a les 18:30 hores, cola presencia del director de la revista, Inaciu Galán y González, l’editor Cesar García Santiago, la coordinadora del conseyu de redaición, Laura Marcos y dellos de los autores qu’espublicen nesti númberu.

Nesti númberu apaecen testos de Rubén Rey Menédez, Javier Cubero de Vicente, Benxa Pérez, Héctor Pérez Iglesias, Inacio Rodríguez-Solar, Jorge Fernández García, Berto García, Laura Marcos Domínguez, Fran Melero «Frantxu», Verónica Canel y Miquel Martí i Pol tornáu por Iván Cuevas.

Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño. En 2008 Ediciones La Cruz de Grau asumió la xestión editorial de Formientu.

El Viceconseyeru de Promoción Cultural y Política Llingüística d’Asturies, Jorge Fernández León, y el Delegáu Xeneral de “la Caixa” p’Asturies y Cantabria, Carlos Serrano, presentaron apcoyá’l nuevu Carné Xoven d’Asturies, xestionáu n’esclusiva pola entidá financiera acordies col pautu robláu col Gobiernu d’Asturies, con una duración de cuatro años. Al actu asistió tamién el Direutor del Institutu Asturianu de Mocedá, Guillermo Martínez Suárez.

El Carné Xoven vien funcionando n’Asturies dende 1988, y la formalización del nuevu pautu con “la Caixa” va permitir ameyorar el serviciu a los mozos. La robla del presente pautu tien como oxetivos: ameyorar el desendolcu del Programa, aumentar la so penetración ente los mozos asturianos, algamar unos mayores índices d’aceptación, y continuar proporcionándo-yos un serviciu del que yá se beneficiaron n’Asturies, dende la so puesta en marcha, más de 140.000 mozos y del que se beneficien al añu al rodiu de 1.500.000 mozos españoles y más de 4.000.000 mozos europeos.

Tres la celebración dela V Fiesta de les asociaciones de Xixón, qu’organiza’l Conseyu de Mocedá de Xixón, dende Xuventú Asturianista, organización moza del Partíu Asturianista, camienten que “ye una bona idea crear espacios d’axuntamientu ente mozos cola fin de que s’integren y participen nos diversos movimientos culturales, políticos, vecinales…”, col envís, comenten, “de tratar temes d’actualidá que mos afecten a los mozos xixoneses y asturianos”.

Sicasí, “paez ser que pal Conseyu de la Mocedá de Xixón y pa los organizadores esto nun ye una prioridá, y dedíquense a homenaxear los 50 años d’una dictadura que nun reconoz drechos individuales, llibertá d’espresión, drechos pa homosexuales…”. Xuventú Asturianista ve una contradicción nesta celebración del CMX, yá que’l so presidente, Jordán Suárez, ye afiliáu del PSOE y candidatu nes sos llistes nes últimes elecciones, “y esti partíu amuesa arguyosu dalgunes de les cuestiones qu’en Cuba tán prohibíes dafechu”.

Por ello, Xuventú Asturianista denuncia “la organización d’una fiesta n’honor d’un réxime que nun reconoz los mínimos drechos” y piden que “se faiga un festival acordies a los problemes reales de la mocedá, que pal señor Areces son ‘lleendes urbanes’ “.

XA camienta que “ye bono almirar otros países”, pero non “da-y reconocencia a unu onde hai un dictador y non democracia nin llibertá”.

Por último, la mocedá del PAS pide al Conseyu de la Mocedá de Xixón que reflexone “sobre cuálos son los problemes actuales de la xunventú asturiana y que se dexe de celebrar l’aniversariu d’una dictadura”. Amás piden qu’esta fiesta de le asociaciones “nun se convierta nuna romería hipersubvencionada pol Ayuntamientu de Xixón”.

Dempués de la celebración de la “I Folixa Nacional Asturies Enxamás Vencida” nel CSOA La ReFLEXón, espaciu cultural llibre murniamente trancáu pola autoridá esti mes, costitúyese una asamblea en Xixón de la organización d’esquierda soberanista, con un garapiellu de xente que llevaba unos meses trabayando y participando en Fai!.

Dende Fai! saluden “esti entamu de l’asamblea de Xixón, fechu que creyemos necesariu y, poro, sofítase con ilusión esti proyeutu pa que dende la ciodá más poblada del país s’entame a emitir un mensaxe alternativu de construcción nacional y tresformación social”. Pa ello, Fai! en Xixón entama asoleyando una tirada de 2.000 pegatines “col enfotu de presentase énte la sociedá del Conceyu y afitar el so espaciu a tola xente interesao en collaborar y averar el costazu coles idegues que mos axunten”.

Fai! Xixón fúndase col enfotu de facer un movimientu republicanu asturianista, soberanista, ecoloxista, feminista, antifascista, antirracista y a favor del socialismu, de les llibertaes sexuales y afectives y pol accesu de la mocedá a una vivienda digna, poro, faciendo mientes tamién al movimientu “okupa”, como alternativa a la especulación y los precios de la vivienda.

Güei, dos de xunu, a partir de les once la mañana, el Salón d’Actos del Centru Municipal Integráu de Pumarín Xixón-Sur, va acoyer l’actuación del grupu musical infantil Xentiquina, que lleva en funcionamientu dende 1987 embaxo la dirección de Nacho Fonseca, acádemicu de l’Asturiana y maestru nel Colexu Públicu de Llieres (Siero).

Les mocedaes d’Unidá Nacionalista Asturiana organizacen esti sábadu 30 demayu la I Xornada Internacionalista dientro los actos que se tán faciendo n’Asturies pa conmemorar la declaración de soberanía de la Xunta Xeneral en 1808. Asina, “col enfotu en remembrar tala fecha”, esta organización entama una serie de charres en Candás y Xixón baxo’l lema “El nacionalismu del sieglu XXI”.

Con estes actividaes UNA-Mocedá quier recordar los hestóricos fechos de 25 de mayu de 1808 “cuando la Xunta Xeneral d’Asturies supo rispir pol sentimientu d’esti pueblu declarándo-y la guerra al exércitu napoleónicu invasor por mandáu de la sociedá asturiana”. La organización convocante recuerda como “Asturies se declaró un país soberanu: creación del Exércitu Defensivu Asturianu, declaración de guerra a Francia, unvíu d’embaxadores a Inglaterra, poder llexislativu, creación de la bandera nacional,…”.

Col envís de qu’estos fechos “nun queden nel escaezu” y pa construyir “una Asturies socialmente xusta y nacionalmente llibre”, la UNA va entamar nel llocal social d’esta organización en Candás y nel llocal sindical de la CSI en Xixón les siguientes actividaes:

Na presentación de la I Xornada Internacionalista, en Candas (Carreño) 10:30 hores, el voceru de la estaya internacional d’UNA-mocedá va facer la presentación de les mesmes, pa dar pasu al candidatu de la UNA a les elecciones europees del 2009, Daniel Fernández Blanco.

Dempúes una charra-alderique baxo’l titulu . “El nacionalismu asturianu. Historia, presente y futuru” , onde’l músicu Xune Elipe y el filólogu Cesareo García van repasar el nacionalismu asturianu dende Conceyu Bable hasta anguaño. Dempués abriráse un alderique ente los asistentes.

María Pastora Cardona, directora del Comité Permanente de Defensa de los Derechos Humanos en Santander, integrante del Colectivu de Colombianos Refuxaos n‘Asturies va ser la encargada d’abrir la siguiente ponencia, “Colombia o el facismu en democracia”. Onde va esponer la situación socio-política na que vive’l país onde ye constante la persecución de sindicalistes, polos aparatos represivos del Estáu, pol fechu defender los intereses de los trabayadores. P’acabar, una espicha internacionalista onde van tar convidaos diferentes colectivos.

Pela tarde, nel llocal sindical de la CSI en Xixón, a les 17:30 hores, Raimundo Viejo Viñas, profesor de la Universitat Pompeu Fabrá de Barcelona va disertar sobre “Nacionalismos nel Estáu español. El nacionalismu catalan”. Raimundo Viejo ye Doctor en Ciencies Polítiques y de l’Alministración, na so charra va facer un recorríu de los nacionalismos esistentes nel Estáu español, centrando’l so discursu políticu nel casu catalán.

L’Asociación Asturiana d’Amigos del Pueblu Saharaui sedrán los encargaos de zarrar esta xornada con una ponencia onde analizarán la situación socio-política na que s’alcuentra’l pueblu saharaui, col’l titulu “Sahara, un pueblu en llucha”.

El Viceconseyeru de Promoción Cultural y Política Llingüística del Principáu, Jorge Fernández León, presentó estos díes n’Uviéu la vixésima edición del Programa de promoción de xóvenes creadores Culturaquí ´09, que cuenta con un presupuestu de 152.000 euros n’ayudes económiques. Nel actu tamién intervinieron el Director del Institutu Guillermo Martínez Suárez, y el Director de la Obra Social y Cultural de Cajastur, José Vega, entidá patrocinadora d’esti programa, asina como representantes d’instituciones collaboradores y ganadores de la edición pasada.

Los oxetivos prioritarios del programa Culturaquí, del que se beneficiaron dos mil artistes asturianos dende la so puesta en marcha, va yá dos décades, son promover la creación artística de los xóvenes nes diferentes modalidaes que conformen les artes plástiques, la lliteratura, la imaxe y la música, fomentar la participación de los xóvenes con inquietúes artístiques, y esparder estes manifestaciones culturales tanto nel Principáu como n’otres comunidaes autónomes coles que se realicen intercambeos, asina como n’espacios europeos concertaos pa la mentada fin.

Por tercer edición consecutiva puen participar artistes asturianos o residentes n’Asturies d’hasta 35 años y tamién descendientes hasta’l segundu grau d’emigrantes asturianos, lo que contribúi a una internacionalización del programa ensin arrenunciar a les bases d’asturianía sobre les que se sofitó’l plan dende la so creación.

Ente les convocatories tán:

La “Muestra de Artes Plásticas”. A esta XX edición pue presentase toa propuesta artística: pintura, escultura, semeya, dibuxu, grabáu, instalaciones, videoinstaciones, ente otres propuestes. Tema, técnica y materiales son de llibre designación del artista participante. Son seleccionaos un máximu de 7 artistes que reciben un premiu en metálico de 4.500 euros y formen parte d’una esposición colectiva qu’abre les sos puertes na Sala Borrón nel mes d’ochobre que vien y ye oxetu d’una itinerancia per estremaes comunidaes autónomes y países. Nel marcu d’esta Amuesa fállase tamién el Premiu “Asturias Joven de Artes Plásticas” dotáu con 10.000 euros y una esposición individual na Sala Borrón.

Y los concursos:

De maquetes pa grupos Pop y Rock Realizáu en collaboración con Cadena Ser, 40.Principales Asturies, ta dirixíu a grupos o solistes interpretes de música Pop y Rock. Selecciónense dos maquetes ganadores y los sos autores reciben un premiu de 6.000 euros, que conlleva facer dellos conciertos y la grabación d’un CD y d’un vidéu promocional.

“Asturies Xoven de Poesía, Narrativa y Testos Teatrales”. Empobináu a xóvenes escritores n’asturianu o en castellanu y ta dotáu con trés premios de 5.000 euros y la espublización de les obres ganadores dientro de la Colección Texu.

El de “Nuevos Realizadores del Principáu d’Asturies”. En collaboración con Caja Asturias y l’apoyu del Festival Internacional de Cine de Xixón, pa los proyectos de curtiometraxes de tema llibre, que se desendolquen en castellanu o asturianu y nun pasen los 25 minutos de duración. Otórguense dos premios en metálico de 24.000 y 14.000 euros, respectivamente. Los proyectos premiaos estrénense nel Festival Internacional de Cine de Xixón.

“Astragal”. Fechu en collaboración col Conseyu de Mocedá de Xixón ta empobináu a proyectos artísticos específicos (instalaciones, videoinstalaciones, acciones, intervenciones y otros procesos creativos) pa la Sala d’Esposiciones del Conseyu de Mocedá de Xixón. Ta dotáu con dos premios de 6.000 euros.

Y los de más recién creación “LAB_Joven_Experimenta”. A títulu individual o al traviés d’un colectivu, pue optase a esti premiu por aciu d’un proyectu artísticu esperimental (instalaciones, instalaciones multimedia, acciones, intervenciones etc.) concibíu específicamente pa la so instalación na Sala Plataforma 1 de LABoral Centru d’Arte y Creación industrial. La so dotación ye de 30.000 euros; y el Certame “Joven de Graffiti”. Hai un primer premiu dotáu con 2.000 euros y hasta un máximu de cinco accesit.

La I Folixa Nacional “Asturies enxamás vencida” presenta l’alcuentru lliterariu “Poetes agresivos (disparen les sos obres contra los que se duermen)”, un foru onde cuatro poetes de les lletres asturianes van presentar parte de les sos obres. Unes creaciones que según los organizadores “van dar espaciu pa la reflexón poética y social fecha n’Asturies”. Los poetes escoyíos son Xandru Fernández, Sergio Gutiérrez Camblor, Xabel Vegas y Carlos Suari.

Xandru Fernández ye una de les voces más rescamplantes de la lliteratura asturiana, igual en narrativa qu’en poesía. De la so collecha más postrera destaquen “Servidume”, que-y valiera’l premiu Xuan María Acebal en 2000 y “Les vides incompletes”, llibru col que repetía premiu la seronda pasada, franciendo bien francíu un silenciu poéticu d’ocho años.

Sergio Gutiérrez Camblor asoleyó’l poemariu “A dixo a B: perversu” cola editorial Trabe y tien ganaos los premios de poesía Constantino Cabal y Elvira Castañón. Amás participó na organización de la Entamada07, un solmenón poéticu con epicentru en Siero.

Xabel Vegas, músicu conocíu pola so trayectoria mesmo en solitariu que col grupu Manta Ray, tien en “Pupiles d’Alfiler” el so campu base pa la creación lliteraria. Esti poemariu electrónicu ye la meyor opción pa lleer parte de la so última creación en forma de poemes y videopoemes.

Carlos Suari acaba de publicar “Orbayu d’alfileres”, un volume onde selecciona tola so poesía que nun punxera en papel. Amás de coescribir “Treslallende” va un par d’años, nel cibernéticu “El mio cachu tírolu” yá xuntara dalgunos poemes qu’agora resurden.

Estos “Poetes agresivos” van disparar les sos obres contra los que se duerman, dende les cinco y media la tarde d’esti sábadu 23 nel CSOA La Reflexón de Xixón.

Darréu va facese un mural reivindicativu y va celebrase un conciertu a lo llargo de tola tarde-nueche.

.

La xixonesa lliberaría Urquijo, asitiada nel númberu catorce de la cai col mesmu nome, ta acabante convocar un concursu de dibuxu empobináu a neños hasta sestu d’educación primaria, participando caún na categoría que-y correspuenda según la so edá, incluyendo una p’alumnos d’educación especial.

La tema del dibuxu ha tar centrada nun cuentu o nuna hestoria propia, pudiendo presentar un solu dibuxu cada participante, en formatu A4. La técnica ye llibre.

Xunto al dibuxu han mandase los siguientes datos: nome y edá del atuor, corréu lletrónicu o dirección postal, cursu y centru educativu.

El plazu pa presentar trabayos termina’l 5 de xunu. Los unvios han facese a Llibrería Urquijo, cai Marqués d’Urquijo 14-baxu, 33203 Xixón.