Mocedá

La principal organización lliderada pol conceyal Abel Pardo, espulsáu d’UPL, yá nun forma parte del organigrama de la Unión del Pueblo Leonés. Alredor de 50 mozos de Lleón, El Bierzu, Uviéu y Salamanca, van conformar la nueva organización, según informó’l partíu lleonesista.

Web d’UPL

La Conseyería d’Educación y Ciencia d’Asturies convocó apocayá’l Certame de Poesía y Dibuxu que dende va quinca años convoca pa los alumnos de tol sistema educativu asturianu. Nesta ocasión y coincidiendo col añu Internacional de la Diversidá Biolóxica los poemes y dibuxos presentaos han tar venceyaos a esta temática.

Los premios van entregase dientro de los actos de la XXXI Selmana de les Lletres Asturianes, el día 6 de mayu na Casa la Cultura de Mieres del Camín. La entrega de premios ta organizada pola Conseyería d’Educación a comuña col C.P. Aniceto Sela de Mieres, centru escoyíu esti añu pa la celebración del Día de les Lletres.

Nel concursu pue participar tol alumnáu d’Educación Infantil, Primaria, Secundaria y Bachilleratu que curse l’asgnatura d’asturianu o gallego-asturianu embaxo les siguientes bases:

PRIMERA.- Pue participar tol alumnáu d’asturianu y de gallego-asturianu dende 4 y 5 años d’Educación Infantil a 2u Cursu de Bachilleratu.
SEGUNDA.- Los escolinos y escolines d’Educación Infantil de 4 y 5 años y 1er Ciclu de Primaria, han participar con un dibuxu inspiráu na “Diversidá Biolóxica d’Asturies”, coincidiendo col “Añu Internacional de la Diversidá Biolóxica”. Los otros ciclos han participar con poesíes escrites n’asturianu o en gallego-asturianu y ser inédites.
TERCERA.- La temática de los poemes ha tar averada a la “Diversidá Biolóxica d’Asturies”, coincidiendo col “Añu Internacional de la Diversidá Biolóxica”. El llargor ye llibre. Los rapacinos y les rapacines que participen nel 2u y 3er Ciclu d’Educación Primaria podrán dibuxar el testu presentáu y sedrá valoráu por parte del Xuráu.
CUARTA.- Daránse tres premios por caún d’estos siete ciclos establecíos: Educación Infantil, 1er Ciclu, 2u Ciclu y 3er Ciclu de Primaria, 1er Ciclu y 2u Ciclu d’ESO y Bachilleratu. Fadráse mención especial a los centros de los alumnos y alumnes ganadores del CERTAME con un diploma acreitativu.
QUINTA.- El Xuráu tará formáu por persones averaes al mundu de la narrativa, les artes plástiques y de la educación.
SESTA.- Los trabayos podrán presentase, pol autor o autora o pol centru educativu, al Coordinador d’Enseñanza de la Llingua Asturiana, Plaza d’España, nu 5, pisu 2u, 33007 – Uviéu, hasta’l día 3 d’abril 2010, nun sobre zarráu nel que s’escribirá: XV CERTAME DE POESÍA Y DIBUXU “Diversidá Biolóxica d’Asturies”. Nel sobre meteránse: los dibuxos o les poesíes que llevarán TÍTULU, NOMATU, CICLU y CENTRU del autor o autora, y la PLICA na que s’escribirá la rellación de los y les autores cola so verdadera identidá.
SÉTIMA.- El fallu del Xuráu fadráse públicu na “XXXI Selmana de les Lletres Asturianes”. Los premios del CERTAME daránse’l día 7 de mayu de 2010, na Casa la Cultura de Mieres del Camín, nel actu organizáu pola Conseyería d’Educación y Ciencia y el C.P. “Anicetu Sela” de Mieres del Camín, nel que se celebrará l’homenaxe escolar al Día de les Lletres Asturianes.
OCHAVA.- La participación nel CERTAME supón tar d’alcuerdu coles bases establecíes. Al fallu del Xuráu nun se podrá retrucar.

Yá ta abiertu’l plazu p’apuntase a la espicha de primavera qu’entama la organización nacionaliega moza, Darréu, cola collaboración del Entame Sidreru. La escpicha va tener llugar nel chigre Amador, de Santa Bárbola, en Samartín del Rei Aurelio, dende les 20:30 hores.

Na folixa cultural l’Ensame Sidreru entamará delles actividaes alredor de la bebida asturiana más célebre. El preciu de l’actividá ye de 20 euros. P’apuntase hai que llamar al teléfonu 696 106 907.

Xuventú Asturianista (Mocedá del PAS-Unión Asturianista) posicionóse güei alredro del autu del Tribunal Constitucional, que decidió refrendar la Llei d’Usu. La organización cree que “ye un avance dempués de munchos años de reivindicación llingüística y qu’esto ocurre dellos años dempués de l’aprobación la única base llegal de la llingua asturiana, la Llei d’Usu y Promoción”, que recuerden “consiguióse gracies al alcuerdu del PAS col entós presidente d’Asturies, Sergio Marqués”.

Xuventú Asturianista diz nun entender les declaraciones de la señora Migoya, Conseyera d’Alministraciones Públiques nes que comentó que “l’Alministración siempres admitió escritos n’asturianu” cuando “hai que recordar qu’esta Llei foi pisotiada de contino pol PSOE y ninguneada por IU” y que los gorbiernos d’estes formaciones “lleven 12 años ensin da-y desenrrollu normativu, que permita la so aplicación”.

Xuan Pandiella, voceru de la organización, comentó nun entender “como una persona asina, miembru del PSOE y del Gobiernu, tan hostil al reconocimientu de los drechos llingüísticos de los asturianos, tenga mieu a dicir la verdá, cuando tovía va un par de meses un ciudadanu foi humilláu por usar l’asturianu énte l’Alministración”.

Dende Xuventú Asturianista feliciten al ciudadanu afectáu pol incumplimientu de Llei d’Usu, Xurde Blanco, pol autu del TC que-y da la razón, y esperen “que sirva esta decisión p’algamar l’estatus xurídicu que requier la llingua asturiana: la oficialidá”.

Esti sábadu 6 de marzu cúmplense 72 años de la muerte de Pachín de Melás, y la Xuventú Asturianista y el Partíu Asturianista convoquen una concentración a les 12.30 na cai Avelino González Mallada, frente a la vieya cárcele del barriu xixonés d’El Coto n’homenaxe y n’alcordanza al lliteratu Milio Robles Muñiz, más conocíu col nomatu “Pachín de Melás”.

Dende la Xuventú Asturianista recuerden asina la muerte d’esti escritor asturianista nel añu 1936 y la de “los demás represaliaos na hestoria d’Asturies pola defensa de la democracia, el progresu social y económicu y la identidá asturiana”. Pa la mocedá del PAS esti actu ha sirvir pa “pa lluchar escontra l’escaezu de los nuesos paisanos y del so exemplu de sacrificiu”. L’actu consistirá nel recordatoriu de la so vida (a mou biográficu) y na llectura de poemes del autor.

“Pachín de Melás” foi un patriota asturianu (del llamáu “rexonalismu asturianu”, xunto figures como Evaristo Valle) que, deteníu tres la entrada en Xixón de les tropes del bandu nacional cuando la Guerra Civil Española, morrió n’estrañes circunstancies un 6 de marzu 1938 na cárcele d’El Coto. Tratóse d’un granible y popular escritor de teatru, poesía y narrativa n’asturianu y en castellán que amosó coles sos obres conexón col Pueblu; comprometíu cola cultura asturiana y coles condiciones de vida de los obreros d’aquel entós (cosa que-y valió destierru pa Sama) participó n’innumberables periódicos de la dómina pidiendo nellos ente otres coses l’autonomía p’Asturies, collaborando na fundación de la Federación Asturiana de Fútbol, etc. Yera un verdaderu amante del so país; ente munches de les sos acciones como tala, destaca la del 1 de setiembre 1936 cuando arriesgó la so vida pa salvar los restos de Xovellanos de la quema y voladura de la ilesia de San Pedro onde s’atopaben, en plena Guerra Civil Española.

El presidente del Conseyu de la Mocedá del Principáu d’Asturies, Paulino Feito, fizo públiques ayeri les crítiques a les actuaciones y omisiones del Gobiernu d’Asturies, que según el llider mozu demuestra que “les polítiques de mocedá son lo que menos-y esmolez a Areces nesti momentu de crisis económica”.

Feito manifestó nun entender “la baxada de les partíes empobinaes a afalar la integración de les persones moces nel mercáu llaboral asturianu”. El Programa d’Empléu pa Mozos, pal que l’ACEBA alcordare un presupuestu de 12.960.000 euros, y que por embargu van quedar en 2.750.000 euros.

L’Institutu Asturianu de Mocedá baxa tamién el so presupuestu nun “drásticu” 19’7%. Nun se convocó amás, como manda la normativa, al so Conseyu Rector, cada seis meses.

Amás Feito, recuerda que’l Presidente Areces nun recibió al Conseyu nin una sola vegada dende avientu de 2004, pese a les peticiones.

L’Alcalde y la Conceyala de Cultura de Llanera censuren y torguen grave y vergoñosamente l’asamblea de Fai! un día enantes de que se cellebrare y depués de dar el preste díes enantes
L’asamblea que Fai! tinía convocada pa esti vienres 8 de xineru na Casa la Cultura de Posada (Llanera) nun pudo cellebrase arriendes de la so cancelación unillateral y ún día enantes de la so cellebración per parte del Alcalde y la conceyala de cultura. L’anulación del permisu, que fuere concedíu con tolos pilancos por qu’esti se ficiere usando la llingua asturiana, llegó a 24 hores de la cellebración de l’asamblea, que yá llevaba díes publicitada y anunciada al traviés de cartelería, distribuciones de correos y contautos personales ente xente del conceyu.

Cronoloxía de los fechos:

29 d’avientu:

-Miembros acreditaos de Fai! nel conceyu entreguen na Casa’l Conceyu la solicitú pa la confección d’un mural y un llugar pa cellebrar l’asamblea na Casa la Cultura o Casa de la Mocedá de Posada.

-L’alministración ínstalos a dir a la Casa la Cultura y entrugar si ellí hai sitiu disponible pa esi día y hora, lo que se confirma ensin problema per parte del funcionariu encargáu, qu’avisa a un compañeru pa que’l día de l’asamblea se permita l’usu d’un proyector.

– Na vuelta a la Casa’l Conceyu, confírmase-yos a los funcionarios la disponibilidá de la Casa la Cultura y entrégase la solicitú. Nesi intre espétase-yos a los militantes de Fai! que “l’asturianu nun ye cooficial y que quiciabis nun l’aceuten”. Darréu d’esto, p’asegurase consulten telefónicamente y dicen que sí, que nun hai problema. Queda afitáu l’actu, diséñase un cartelu que s’esparde pelos núcleos de población más importantes del conceyu y fáise una convocatoria pública, na que s’avisa tamién al traviés d’una llista de corréu a xente del conceyu.

4 de xineru:

– Pónense en contautu con una militante de Fai! per teléfonu dende la Casa’l Conceyu pa espetar que “la solicitú nun pue tar n’asturianu” y qu’asina nun pue quedar. Oblígase a los organizadores, con una convocatoria na cai, a tornar l’escritu al castellán. Sicasí, los militantes de Fai! en Llanera entreguen una fueya billingüe, onde, na parte superior, ta l’escritu n’asturianu y, na inferior, en castellán.

7 de xineru

– Nueva llamada per parte de los funcionarios del conceyu, que telefónicamente comuniquen que la solicitú ta denegada. Inmediatamente y énte la gravedá de los fechos demándase-yos una contestación per escrito, que devuelven col siguiente testu manuscritu y qu’esclaria mui poco: “Habló Belén Concejala con el Alcalde. (se lo deniega). Se les avisó x teléfon. 7/01/10. (denegado).

– Al tiempu, avísase de que “va a llamavos la conceyala”, xusto tres de dar un mensaxe contradictoriu del tipu “vete a vela a la Casa la Música agora” nel que la funcionaria se corrixe al “decatase de que ta de vacaciones -casualmente- esi día y el siguiente”.

– Fáise otra petición pa que, teniendo en cuenta que l’actividá ta convocada y publicitada, s’ufra un sitiu alternativu y torna a repetise la solicitú pa mural. El pidimientu ta namás n’asturianu. Avísase de que “si nun se traduz nun va ser aceutáu”, a lo que’l representante de Fai! se ñega.

– La conceyala, -que casualmente ruempe de sópitu, ente la gravedá de la crisis alministrativa xenerada, el so periodu de descansu vacacional y entra pela puerta de la Casa’l Conceyu- llama telefónicamente a los representantes de Fai! pa dicí-yos qu’aconceyaron “ella y l’alcalde” y que la solicitú ta “denegada”. Diz entós, nuna clara postura censora, “qu’ellos tienen que tar informaos de lo que va facese nos sos llocales y que se-y tien que facer un escritu nel que se diga de qué se va falar, de qué va tratar l’asamblea y cómo va ser y qué va dicir el mural que se faiga”.

– D’urxencia, y como última midida, Fai! entrega un nuevu escritu nel que se fala brevemente de los motivos polos que públicamente se va cellebrar l’Asamblea, asina como pa poné-y final con un mural qu’afale la participación y la implicación de la población de Llanera nes problemátiques del so conceyu. El testu ye entregáu y la téunica municipal informa de qu’ella, l’alcalde y la conceyala van aconceyar pa decidir finalmente.

– Pa finar, a les 14.30, trancando yá les dependencies públiques, confirmen la denegación de la solicitú per cuarta vegada consecutiva. Entrúguense les razones y nin siquiera s’aporten contestaciones per escrito, nin s’informa oralmente de les razones qu’impiden el derechu a la llibre reunión en dependencies públiques.

VALORACIÓN DE Fai!

– A la corporación del conceyu de Llanera, gobernáu por José Avelino Sánchez, y la so conceyala de “Cultura” y Muyer, María Belén Rodríguez López, del Partido Popular, molésta-yos que nes instalaciones públiques se desendolquen actividaes que “nun controlen”.

– Esti tipu de fechos constata qué ye lo qu’entienden la inmensa mayoría de políticos por llibertá d’espresión, d’aconceyamientu, por usu de dependencies públiques, por non discriminación llingüística, por xestión eficaz, por tresparencia, por tratu dignu al ciudadanu, por “democracia”: apartar pa otru llau lo que molesta, esbillar lo políticamente correuto y les actividaes que-yos interesen y que nun faigan rescamplar la so xestión asturianófoba y corrupta.

– Queda claro que determinaes ideoloxíes nun tan bien vistes por dicha corporación cuando se censura un actu que pretendía promover l’asociacionismu y l’autorganización nel conceyu, seguramente al decatase de que los principios de la nuesa organización nun tan mui averaos a los del partíu que gobierna.
– Con esto Fai! pide a tolos ciudadanos y especialmente a los vecinos de Llanera’l so sofitu pa poder articular a pesar de toles torgues un movimientu que saque a la lluz los verdaderos problemes del conceyu y los d’Asturies en xeneral.
Desiximos una vegada más una esplicación al alcalde de Llanera y a la conceyala de Cultura y Muyer de por qué se dexó en manes de la Casa de la Cultura la concesión del local pa celebrar l’asamblea pero depués se denegó dicha concesión ensin motivu dalu.
– Afirmámonos na necesidá de facer esti tipu d’actividaes trabayando dende les bases de los conceyos, dexando mui claro que naide nin nada va facer qu’arrenunciemos a da-y la palabra a la xente y al pueblu de Llanera. Fai! yá trabaya pa llograr una nueva convocatoria pa esti mesmu conceyu ensin inxerencies nin censures.

Diego Asenjo, secretariu xeneral de les Mocedaes Socialistes d’Uviéu (JSO/MSU) retrucó a les acusaciones feches pola asociación Fai! dempués d’una mesa redonda celebrada dientro del alcuentru d’organizaciones moces Alderique, del Conseyu de la Mocedá d’Uviéu.

Asenjo recueye nuna entrada del so blogue delles opiniones alredor de l’asturianu, ente les que destaca’l reconocimientu de que, anque la so postura personal “ye favorable a la oficialidá del asturianu”, el políticu mozu defiende “la posición del PSOE y de les Mocedaes Socialistes”, yá que diz, “esta ye la mio obligación como representante n’Uviéu de la Organización xuvenil”.

Según Asenjo, estudiante de Drechu na Universidá d’Uviéu, la postura de la FSA-PSOE ye la de “cumplir la Llei d’Usu y Promoción del Asturianu” anque camienta “habría aplicase al 100%”. Asenjo diz tener defendida la oficialidá del asturianu “al traviés de los mecanismos democráticos internos del PSOE y JSA”.

Reconoz amás, que pa él, “el tema del asturianu nun ye cuestión cultural sinón social, de defensa de los drechos llingüísticos d’aquelles persones que tengan nel asturianu la so llingua vehicular”. Amás Asenjo nun reconoz ún de los argumentos más utilizaos pol PSOE y el PP, “la esistencia de demanda”, yá que, diz “nun importa cuántes persones falen l’asturianu y que la obligación d’un gobiernu ye mirar polos drechos de les minoríes sociales”.

Asenjo niega que s’amordace a les que persones que falen asturianu” dende’l Gobiernu, yá que “exercen el so drechu a manifestase a menudu, y cuando son miles los estudiantes qu’escuyen l’asturianu como asignatura nos institutos”.

El dirixente socialista confírmase na so opinión de que “ún de los problemes que teníen los grupos a favor ye la falta de persones series que defendan les sos idees”, volviendo a criticar la campaña de la pita de la XPDLLA, que pa él “resta credibilidá a lo que se pretende defender”.

Camienta Asenjo que “si se diere una imaxe de seriedá podríen convencer a muncha más xente de la lexitimidá de los sos argumentos, incluyendo a muncha xente del PSOE”, anque niega tener dicho “persones importantes del PSOE”, pues según diz “lo fundamental nun partíu ye convencer a más xente ensin que tenga que ver la so supuesta importancia dientro del llamáu ‘aparatu’”.

Asenjo comenta amás que ta participando del cursu d’asturianu organizáu pol Conseyu de la Mocedá d’Uviéu.

Diego Asenjo (JSO): “El problema de la oficialidá débese a que los sos defensores nun tienen representantes serios”

Otru añu más la llingua asturiana va tar presente en Mercaplana, al traviés de la Oficina Municipal de la Llingua de Xixón, dende’l vienres pasáu y hasta’l 4 de xineru de 2010. Con delles actividaes permanentes, como la esposición del cuentu: “Les coses que-y presten a Fran”. Con actividaes pa xugar y pintar; una mazcarada mitolóxica, el requexu la llectura o’l xuegu les pareyes.

Amás, los díes 19 y 26 d’avientu de 2009 y 2, 3 y 4 de xineru de 2010, a les 18:30 la tarde, va celebrase l’actividá “¿Sabes lo que ye un Luthier?”, onde los neños van poder construyir instrumentos musicales.

Del 20 al 30 d’avientu, l’espaciu de la Oficina de la Llingua va acoyer tamién “XIXÓNPOLIS”, un xuegu “pa mercar Xixón” al estilu del célebre Monopoly. El xuegu ye neños d’11 años y va facese de magar les 18:30.

La Oficina de la Llingua de Xixón ta asitiada en Mercaplana dientro del pabellón númberu 1.

El representante de Juventudes Socialistas (FSA-PSOE) nun alderique celebráu pol Conseyu de la Mocedá d’Uviéu esta fin de selmana, Diego Asenjo, comentó nuna mesa sobre’l tema qu’”El problema de la oficialidá débese a que los sos defensores nun tienen representantes serios. Si fueren persones series les que defendieren la oficialidá podríen llegar a convencer a xente importante del PSOE” .

L’actu, qu’entamó col alderique sobre la oficialidá cunto con representantes de Fai!, Xunta Moza, Bloque por Asturies, Nuevas Generaciones, Área de Mocedá d’IX y les yá mencionaes Juventudes Socialistes.

L’alderique foi probablemente’l más intensu de los fechos nes Xornaes y xiró alredor de la posición de los partíos mayoritarios escontra l’idioma d’Asturies. Nesi sen, la representante de Fai! entrugó per dos vegaes, ensin topar respuesta nos partíos mayoritarios, el por qué “lo que val pa gallegos y valencianos nun casu, o pa catalanes y vascos n’otru, nun val pa les asturianes y asturianos”. Al tiempu, recriminó a la xente d’IX y BpA “les sos eternes promeses incumplíes de non pertenencia a un gobiernu que nun sofite a la oficialidá”.

Diego Asenjo yá tuviere dellos comentarios sobre l’asturianu nel pasáu, calificaos por munchos como desafortunaos y hasta “insultantes” pal colectivu asturianista. Asturnews ufre un enllaz a los sos comentarios, espublizaos nel blogue personal del políticu mozu.

Otru de los comentarios sobre l’asturianu nel blogue de Diego Asenjo (JSA)