Lorient 2005

Dominique Dupuis va dexando ablucáu al públicu perillí per ú pasa col so vigulín. Protagonista de dellos conciertos a lo llargo de la selmana en Lorient, sorprende al so públicu munches nueches nel stand de la delegación de L’Acadie col so fiddle virtuosu.

Depués de participar el llunes na recepción que se-y ufiertó a les delegaciones nel Ayuntamientu de Lorient y d’actuar el pasáu miércoles nel Palacio de Congresos xunta Patrick Rimes y Patsy Reid, la virtuosa canadiense entá tuvo tiempu asgaya d’animar el stand de l’Acadie, ya inclusu de pasar pol stand asturianu a contribuyir a la fiesta que cada nueche s’entama nelli. Y pa la nueche d’esti vienres 12 d’agostu va repetir cunta Abnoba y Roland et les Waljacks una nueche vraeramente interesante nel Cabaret asitiáu nel Espace Marine del puertu lorientés.

>foto2>Les actuaciones de Dominiuque son tan intenses como lo ye la so capacidá pa camudar de rexistru col vigulín nes sos manes y amuesense tan virtuoses como animaes nuna conesión permanente col públicu qu’amás de sofitase na so calidá musical failo nun saber estar nel escenariu que combina con milenta sonrises que dexen bien a les clares la so concentración.

Un bon exemplu de la so calidá musical pue ser esta pequeña grabación de la so actuación del miércoles nel Palacio Congresos de Lorient.

La segunda de les nueches máxiques afitaba l’ésitu que ta teniendo esta edición 2005 del Festival de Lorient. Un ésitu de públicu y participación perimportante pala economía del festival y pala continuidá del mesmu. Y un ésitu artísticu nel qu’Asturies ta calteniendo un simbólicu puxu, contribuyendo dafechu a l’animación ente’l públicu.

La segunda nueche máxica dexaba afitáu l’ésitu de taquilla del Festival esti añu depués de qu’entamare l’espectáculu a les diez y media de la nuechi d’esti miércoles pasáu. El día enantes otru llenu de públicu ya dexare nidiu qu’esti añu va ser el de la recuperación económica del Festival de Lorient, colos díes soleyeros qu’acompanguen a la bona organización y el meyor trabayu artísticu de les delegaciones invitaes.

Una nueche más que máxica

La nueche máxica ye ensin dubies y dende l’aniciu del Festival hai trenta y cinco años la más importante de les cites de la programación. Esti martes y el miércoles pudo siguise un espectáculu braeramente impresionante que ye obligáu pa cualaquier que venga per primera vegada a Lorient nestes feches d’agostu.

La cadarma del espectáculu ye siempre la mesma, pero paez nun repetise en cada ocasión. Un sólu con un arpa, como’l martes, o la intepretación de una tonada, cuando Mari Luz Cristobal anda perende, o’l canciu galés tan averáu al de nueso, ya inclusu un coru, son escoyíos davezu pa entamar y dar pasu darréu a una banda de gaites, seya irlandesa o bretona. Porque a la banda escocesa, que suel venir acompangada como toles demás de danzantes col traxe tradicional, dexase-y la parte central pa qu’interprete “Verdes montañes” y esos grandes hits de la música scottish que tanto presten equí en Lorient dende siempre.

El casu ye que la nueche máxica cuntó con eses interpretaciones clásiques de la man de Pitlochry&Blair Atholl Pipe Band, Keltika Highland Dance Team, Youghal Pipe Band, Cork Pipe Band, Cibeal Dancers, Roisin Chambers, Dowlais Male Voice Choir, Andy Gibbs y la Bagad de Lorient. Y xunta elles la de los representantes asturianos y gallegos que salieron una nueche más en comuña a danzar nel estadiu de Lorient, onde se cellebren cada festival estes nueches máxiques: la Banda de Gaites de Villaviciosa y el Grupu de Danza Xuno, por Asturies, y les Bandes de Gaites Xarabal y Manxadoira xunta’l Grupu de Danza A Ponte Vella por Galicia.

Tres d’un pequenu descansu, la nueche continúa cola apaición nel centro l’estadiu de la totalidá de les bandes y grupos participantes que tres de desfilar y colocase en formación tornen a mirar pala gran pantalla na que dende’l primer momentu van viéndose motivos de cada país participantes, dende castiello d’Escocia a imáxenes de la Bretala más tradicional, ensin escaecer los escudos y banderes de cada país celta participante. Y nesi mesmu instante, apágase la proyeición y entamen los fuegos artificiales colos que se fina cada nuechi. Hasta la siguiente que sedrá esti xueves, la cuarta, y la quinta y cabera, que vendrá’l vienres y que dirá hasta l’añu 2006, añu de l’Australia.

Ente los miembros de la delegación asturiana que desfilaben en Lorient esti domingu había ún mui especial: Esteban, un neñu de venti meses que baila “La Villa” como pocos y que aguantó un desfile de más d’una hora camudándose en protagonista cimeru del mesmu.

Esteban ye’l fíu de la direutora del grupu Xuno, Nati, y ta ya fondamente avezáu a desfilar vestíu de porruanu como fizo esti domingu en Lorient. Pero lo que más-y presta ye danzar “La Villa” y cualaquier danza prima, como amuesó en Lorient una vegada que finó’l desfile. L’estadiu quedaba-y pequenu a esti rapacín que de xuru veremos ensin tardar muncho emplegándose a fondu nel ámbitu de la cultura tradicional.

Esteban aguantó, acompangáu unes vegaes pela so má y otres pela so güela, un recorríu perllargu qu’atraviesa tol centru de la villa de Lorient, con munches paraes pa tocas y danciar los grupos pa disfrute del públicu qu’enllena les aceres.

La delegación asturiana ta entamando con bon pie la so presencia nel Festival de Lorient. Depués d’atropar los dos primeros puestos del vieyu Macallan, anguaño nomáu Trodéu McCrimmon, el grupu de dances Xunu y la Banda de Gaites de Villaviciosa gusten enforma al públicu nel Desfile del Domingu. N’Asturnews mesmo y nel especial sobro el Festival Intercélticu de Lorient 2005 qu’ufierta nun portal especial Asturnews puen vese abondes semeyes de la participación asturiana nel festival de festivales.

La Gran Parada de les naciones celtes, el desfile que nel primer domingu de festival acueye al públicu más numberosu peles cais de Lorient y enllena l’Estadiu la ciudá, vió brillar a la delegación asturiana que desfilara con preste y gayola. El grupu de dances Xunu y la Banda de Gaites de Villaviciosa gustaron enforma pela mañana al públicu de Lorient y pela nueche nel estadiu afitaron la so actuación dientru la Nueche intercéltica.

Magar amenazó l’orbayu delles vegaes, a lo postrero foi una xornada soleyera y el cansanciu de los miembros del grupu Xuno y de la Banda de Gaites pudo combatise nel estadiu participando de l’altor d’otres delegaciones como la invitada per primera vegada dende’l Líbano: una especial banda de gaites con muncha animación que fizo vibrar al estadiu lorientés.