Lliteratura

A lo llargo del mes d’abril va tar nes llibreríes una versión en castellán de la novela ‘La Bufanda’, escrita orixinalmente n’asturianu pol periodista David Artime y espublizada por Trabe en 2010. Agora la editorial Córner vuelve asoleyala en castellán con prólogu del ex entrenador del Sporting Manolo Preciado. La obra recibió nel so momentu’l premiu de Narraciones Trabe.

La novela narra les andances d’un ultra del Sporting mientres los postreros partíos d’una temporada.

El Conceyu de Cangas del Narcea organiza’l IV Concursu de cuentos n’asturianu Otilio Álvarez Rodríguez con motivu de la celebración de la XXXIII Selmana de les Lletres Asturianes. El concursu va ser una de les actividaes principales d’esta selmana, que se celebrará como vien siendo avezao a principios del mes de mayu, y va tar dirixíu a neños y neñes del conceyu que tean cursando quintu y sestu de primaria.

Cada participante va poder presentar una obra namás: orixinal, inédita y escrita n’asturianu, siendo posible usar la variedá occidental o la estandar. Amás de participar nel concursu, les obres presentaes pueden formar parte d’una esposición y ser usaes en campañes de normalización llingüística.

Les trés obres que presten más al xuráu van ser premiaes con un llote de llibros y material escolar y los autores van ver los sos testos espublizaos na páxina web del Conceyu Cangas. El Serviciu de Normalización L.lingüística, asitiáu na Casa la Cultura, ye’l destinatariu de les obres que los escolinos tienen d’entregar enantes del 29 d’abril. Esti mesmu departamentu alvierte tamién a tolos profesores y al alumnáu interesáu nel concursu sobre la posibilidá de facese con materiales y consultar cuestiones de tipu llingüísticu.

Esti llunes 2 de marzu, a les ocho la tarde, Xavier Frías Conde tará acompañáu de la escritora en gallego-asturianu, Aurora García Rivas, pa presentar el so poemariu últimu “Al pie de la brisa”, un llibru nel que los testos apaecen na so versión orixinal n’asturianu y en castellán ya inglés. L’actu va entamar a les 20 hores nel Club de Prensa Asturiana de Xixón. La edición del llibru ta al cargu de Suburbia Ediciones.

La editorial Trabe acaba de poner nes llibreríes “Más monólogos…¡Pa echar unes rises! II Antoloxía de monólogu modernu”, un llibru que vien a ser la segunda parte de l’antoloxía del mesmu tipu asoleyada en 2008 pola mesma editorial. Nel volume preséntase al públicu llector lo más nuevo del monólogu asturianu. Unos pocos años dempués d’aquella primer antoloxía el monólogu modernu ye un xéneru con una llarga esperiencia, a lo qu’ayudaron iniciatives como’l Premiu Pepe Campo de monólogos, los circuitos d’actuaciones nos teatros y chigres del país y la presencia nos medios, como’l programa “La risión”, na TPA.

Nesti volume nuevu va atopase’l llector con un xéneru afitáu, con autores con muncha personalidá a los que se puede estremar d’otros namás con lleer un par de los sos monólogos. Ye esta una antoloxía na qu’apaecen monologuistes de toa triba. Unos especializaos nel xéneru, como Carlos Alba (que presenta testos de trés de los sos personaxes), otros escritores avezaos d’otros xéneros, como Sixto Cortina o José Luis Piquero, que decidieron metese per caminos nuevos nel so llabor de lliteratos, y en dalgunos casos actores que dieron el pasu a la xera lliteraria, como Lluis Antón González, Sara García o Silvino Torre. Completen esti volume Alberto Suárez, Azucena Álvarez, Montserrat Garnacho, Carlos Briansó y Inaciu Galán, que ye l’encargáu de la escoyeta de los testos y del entamu del volume.

Suburbia Ediciones pon nes llibreríes “Cuando ensamen les abeyes”, la nueva novela de Nicolás Bardio, que fai’l númberu 2 de la colección quemando cromo. Cuando ensamen les abeyes ye una novela d’aventures y política-ficción que xuega cola pregunta clásica: “¿qué pasara si…?”. Nesti casu, la acción trescurre nuna modernidá ficticia onde Asturies ye un reinu independiente con colonies n’América. Una d’eses colonies, la islla de Santolaya, entama una guerra pola independencia y n’ella vense implicaos asturianos de los dos llaos del Atlánticu, espíes, un embaxador francés… y un vieyu poema d’Antón de Marirreguera nel que s’escuende la clave p’atopar una ayalga escondida.

Nicolás Bardio (Uviéu, 1987) ye un de los valores n’alza de la narrativa asturiana más nueva. Ye autor d’otra novela (Sol reló, 2008) y collaborador de medios como Les Noticies y Atlántica XXII, apaez amás en revistes como Estoiru o Formientu.

L’escritor y profesor de la UNED, Xavier Frías Conde, va presentar el so poemariu “Al pir de la brisa”, un llibru trillingüe nel que los poemes apaecen na so versión n’asturianu y con torna al inglés y castellán. L’actu va tener llugar el 2 d’abril a les 20 hores nel Club de Prensa de Xixón, asitiáu nel Salón del Centru San Eutiquio, xunto a la Ilesia San Pedru.

La presentación correrá a cargu d’Aurora García Rivas, cuntando con representación de la editorial Suburbia, qu’asoleya’l llibru.

Esti vienres 16 de marzu, a les ocho la tarde, el Club de Prensa Astruriana de La Nueva España organiza la presentación del llibru: “Unos fatos que morrieron por un apuesta y otres histories series”, un volume de rellatos del escritor uvieín Jorge Fernández, que tien yá nel mercáu otros llibros cola so narrativa p’adultos y pa neños.

L’autora va tar nel actu que va tener llugar esti vienres a les ocho la tarde na Casa d’Alcuentros de la Muyer (avenía de San Frechoso, 17), en Sotrondio. Van participar, xunto a ella, la conceyala de Cultura de Samartín del Rei Aurelio, Gema Suárez; Ana Jambrina Huete; Silvia Cosio; y Xulio Arbésu. Entamen l’actu l’Asociación Cauce del Nalón y Suburbia Ediciones, qu’asoleya esti poemariu.

L’Asociación d’Escritores Noveles entama esti concursu onde la tema ye llibre y la estensión de los trabayos nun va ser inferior a 100 versos nin superior a 250. va valorase positivamente’l que los trabayos tengan unidá y nun seyan una mera agrupación de poemes. Los poemarios han mandase per corréu lletrónicu a info@asociacionescritoresnoveles.es

El plazu d’entamu pa la recepción de poemarios empieza’l 1 de marzu y finlizará el día 1 de xunu de 2012. El fallu fadrá públicu en setiembre y la entrega del premiu va tener llugar nel mes de payares.

El ganador va recibir 500 € en metálicu y la publicación del poemariu. El patrocinador va apurrir 25 pal autor y el restu va distribuyilos como considere oportunu. Amás habrá un accésit que va consistir nuna estancia de dos nueches nel BAL HOTEL & SPA (2 persones) en réxime de media pensión, que va incluyir 2 circuitos termales y 2 tratamientos a determinar pol establecimientu hoteleru.

Bases completes del concursu

El llibru “Lliteratura asturiana, identidá y nación”, que contién les ponencies de la Xunta d’Escritores Asturianos 2010, celebrada los díes 11, 12 y 13 de xineru del 2010 nel Palaciu Villa Madalena d’Uviéu, tá yá nes llibreríes. Nes 230 páxines del volume análicense les rellaciones ente nación y lliteratura nel casu asturianu y cómo los aspectos identitarios afecten al fechu d’escribir nuna llingua minorizada como l’asturiana y los medios pa superar cola lliteratura esta situación de desventaya asina como l’usu que puede facer l’escritor de los temes identitarios a la hora d’escribir y buscar inspiración pal so trabayu como creador.

El llibru “Lliteratura asturiana, identidá y nación” presentóse el pasáu xueves 1 de marzu del 2012 na Biblioteca d’El Campu San Francisco d’Uviéu, cuntando cola presencia de Llucía Fernández Marqués d’Espublizastur y de Xaviel Vilareyo. El volume recueye trabayos escritos d’Helena Trexu, Javier Cubero, Ánxel Nava, Xaviel Vilareyo, Pablo Martínez Testa, Dorita García ya Inaciu Galán y termina con una amuesa poética de la Tercer Xeneración del Surdimientu (1967-1982) y con una riestra de semeyes de la Xunta de 2010.