Lliteratura

Esti xueves, 7 de xunu, l’Atenéu Obreru de Xixón va acoyer la presentación del primer llibru de la editorial Impronta, “Catálogo de asombros”, de Javier Almuzara. Marina Lobo ye l’alma d’esti proyectu nuevu de la que fuere directora de Llibros del Pexe a lo llargo de venti años. Nesta nueva andadura tamién tien previsto asoleyar dalgunos llibros n’asturianu. El primeru sedrá una edición billingüe, n’asturianu y castellán, de Xosé Bolado, “La bona intención”.

La marcha d’Impronta yá puede siguise dende Facebook (http://www.facebook.com/ImprontaEditorial), páxina na que la editorial va dir colgando fragmentos de los sos llibros y cola que va caltener al día a los sos siguidores.

Otros autores que van asoleyar nos meses vinientes son Alfonso López Alfonso, José Luis García Martín y Rodrigo Olay.

El diariu La Nueva España entama esti domingu, 10 de xunu, una colección de veintitrés llibros escritos por asturianos asturianos dende’l sieglu XVII a los nuesos díes. Una colección a precios baxos, 2’95 euros caún, que va poder mercase xunto col periódicu de los domingos. Dos de los títulos tarán dedicaos a la poesía n’asturianu, los protagonizaos por Xuan María Acebal y por Teodoro Cuesta. La colección va entamar con «Nosotros los Rivero», la novela de la escritora uvieina Dolores Medio que ganó’l premiu «Nadal» nel añu 1952.

Ente les obres, La Rexenta, de Leopoldo Alas Clarín, que va zarrar la colección. L’ensayu tendrá’l so llugar coles Cartes del viaxe d’Asturies, de Gaspar Melchor de Xovellanos y obres de Ceán Bermúdez o Fermín Canella.

Completen la colección Alejandro Casona con «La dama del alba», Armando Palacio Valdés, con «José», Ramón Pérez de Ayala, Valentín Andrés Álvarez, Félix de Aramburu, Julián Ayesta, Juan Ochoa, Faustino González-Aller, Ángel González, Alfonso Camín y Corín Tellado, de la que va distribuyise «El regreso de Guy».

La Fundación Nueva Asturies acaba d’editar Monsacru, un llibru qu’encloya una colección d’estudios sobre lliteratura asturiana y española. La edición va presentase esti xueves, 7 de xunu, nel Club de Prensa de La Nueva España en Xixón, a les 8 la tarde, cola presencia del autor.

Yá tá la venta’l nuevu llibru d’Inaciu Galán, “Nel, el coríu que nun sabía nalar”. Ye’l primer llibru d’esti autor empobináu a la reciella. Una historia onde conocemos al coríu Nel, un personaxe mui especial que tendrá que superar dalgunos mieos pa poder vivir con normalidá na so llaguna nel parque, col restu de collacios. El llibru tien 24 páxines, ente les qu’hai dos d’exercicios. Ta ilustráu en color con dibuxos d’Enrique Carballeira.

Pue atopase nes llibreríes asturianes o pidiéndolu direutamente a la editorial nel corréu: asturtoons@gmail.com

La editorial asoleyó un audiovisual promocional que puede vese en YouTube.

Aconceyáu’l Xuráu del Concursu d’Investigación de Recoyida de material toponímico oral, que convoca l’Academia de la Llingua Asturiana correspondiente al añu 2012 apautóse en premiar el trabayu tituláu Toponimia de la parroquia de Proaza. Conceyu de Proaza, del que son autores Antonio Alonso de la Torre y Francisca Iglesias Álvarez. El Xuráu taba formáu por Ana María Cano González como presidenta, Xosé Lluis García Arias como vocal y Alfonso Martín Caso faciendo de secretariu.

Dientro d’esta estaya, concediéronse tamién un primer accésit al trabayu Toponimia de la parroquia de L’Arteosa (Piloña), d’Aurina González Nieda y Jerónimo González Cueto, y dos segundos accésits correspondientes a los trabayos Toponimia de les parroquies de Riañu (Llangréu) y La Pasera (Noreña), de Xabiel Fernández García, y al estudiu La parroquia casina de Caliao. Material toponímico de la totalidá d’esta collación de Xulio Llaneza Fernández

Asina mesmo, el Xuráu del Concursu de Teatru, compuestu por Miguel Ramos Corrada como presidente, Xosé Ramón Iglesias Cueva como vocal, faciendo de secretariu Adolfo Camilo Díaz, premió nesta convocatoria la obra titulada Pa L’Habana, de la que ye autor l’escritor candasín Xurde Fernández Fernández.

L’escritor de Tinéu, Antón García ye’l ganador del VI Premiu Timón, convocáu por L’Arribada p’autores en llingua asturiana y n’eonaviegu, según alcuerdu d’un xuráu aconceyáu güei en Xixón y formáu por Alberto Álvarez Peña, Carlos Espina, Vicente García Oliva, Aurora García Rivas y Humberto Gonzali. Pa esta edición, optaron a los gallardones escritores que nacieren nel añu 1962 o anteriormente. La distinción consiste nuna obra del escultor y ceramista xixonés Jesus Castañón, que s’entregará mientres la celebración de L’Arribada 2012, nel viniente mes de setiembre.

Antón García (Tuña, 1960) ye escritor, editor, traductor y críticu lliterariu. Fundó les editoriales Trabe y Tsibros de Frou. Autor d’una importante obra lliteraria onde destaquen los títulos de narrativa El Viaxe (1987), El pelegrín valiente (1993) y Díes de muncho (1998); los poemarios Estoriu (1984), Los díes repetíos (1989), Venti poemes (1998) y La mirada aliella (2007); les traducciones Memoria d’outru ríu d’Eugenio de Andrade (1985), Contra la oscuridá d’Eugenio de Andrade (1988), Cuentatrapos de Víctor Carbajal (1989) o Los otros feriantes d’Álvaro Cunqueiro (1999); asina como, ente otros, los estudios y ediciones La Xudit. Xuan González Villar (1990), El cuentu asturianu (1860 – 1936) (1992), El cuentu asturianu tres la guerra (1998), Lliteratura asturiana nel tiempu (1993), Poesía asturiana y traducciones. Fernán Coronas (1993), Cartes a la catedral d’Uviéu y otros poemes. Ángeles López Cuesta (1994), Obra Poética. Xuan María Acebal (1995) y Obra Asturiana. Marcos del Torniello (1996)

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010) y Vicente García Oliva (2011).

La selmana que vien va fallase’l VI Premiu Timón, p’autores en llingua asturiana y n’eonaviegu. Pa esta edición, optaron a los gallardones escritores que ñacieren nel añu 1962 o enantes. La distinción consiste nuna obra del escultor y ceramista xixonés Jesus Castañón, que s’entregará mientres la celebración de L’Arribada 2012.

Les candidatures presentaes esti añu inclúin a Manuel Asur, Sabel de Fausta, Joaquín Fernández García, Antón García, Miguel Solís Santos, Ignaciu Llope, Miguel Rojo y Ánxel Álvarez Llano .

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010) y Vicente García Oliva (2011).

Esti vienres 8 de xunu a les siete la tarde, na FNAC de Parque Principáu, en Siero, Suburbia Ediciones va presenta el llibru “La cueva de la diosa” d’Arturo Somoano. Nel actu van tar, amás del propiu autor, Aique Rodríguez y la editoria Silvia Cosio.

Un añu más, la Sociedá Popular La Regalina abre’l plazu pa presentar obres al so premiu de poesía, dedicáu a la figura del Padre Galo (1884-1939), clásicu de la lliteratura asturiana. El tiempu pa presentar orixinales fina’l 12 de xunetu. Al concursu pueden presentase poemarios en llingua asturiana, con un mínimu de 275 versos. Los trabayos han mandase a la Sociedá, que ta asitiada nel Casinu de Cadavéu, na cai Curión e/n (Valdés). El premiu ye 1.300 euros y la posibilidá de publicar el poemariu . El premiu pue quedar ermu, conociéndose’l resultáu del xuráu, el 7 d’agostu, aniversariu del ñacimientu del Padre Galo.

Los trabayos entregaránse por quintuplicáu nos llocales sociales de la Sociedá Popular “La Regalina”, o unviaránse per corréu. Dirán ensin firma, con un lema o nomatu. Nun sobre zarráu dirán les señes del autor col mesmu lema o nomatu que tenga’l poemariu.

El Xuráu dará a conocer el ganador nun actu públicu en Cadavéu, el día 7 d’agostu, aniversariu del nacimientu del Padre Galo. Los trabayos non premiaos podrán recoyese nos llocales de la Sociedá Popular “La Regalina” dientro los 30 díes posteriores al fallu.

Nos últimos años ganaron autores como Héctor Pérez Iglesias, Rubén d’Areñes, Carmen Guardado, Berto García o L.luis Fernández, ente otros.

La editorial andaluza Origami, fundada apocayá, presenta ‘Esto no rima’, una antoloxía de poesía social. Los drechos d’autoría de los participantes y del antólogu y un porcentaxe de la editorial, destínense a beneficiu del Comedor Social Paris 365 d’Iruña. La Llibrería La buena letra de Xixón, asitiada nel 12 de la cai Casimiro Velasco, va acoyer una presentación esti sábadu 2 de xunu a les ocho y cuartu la tarde, cola participación d’autores asturianos y lleoneses, como Sofía Castañón, Fran Allegre, David González y Abel Aparicio.

Esti poemariu ñaz ente los meses de mayu y xunu de 2011 de la mano del lleonés Abel Aparicio, el so coordinador. Según Aparicio, l’oxetivu de la obra ye “denunciar por aciu la poesía la situación actual na qu’atopamos, onde los dirixentes políticos nos que depositamos el nuesu enfotu al traviés del votu nes urnes son incapaces d’arreglar la situación”.

L’entamu cuerre a cargu d’Isaac Rosa, y la obra incúi poemes ya ilustraciones d’autores como Gsus Bonilla, Casilda García Archilla, Adrián Arias o l’asturiana Sofía Castañón, amás de los yá citaos.