Lliteratura

Con motivu de les Fiestes de San Roque del Carbayedo, a facer n’Avilés del 17 al 20 d’agostu del 2012, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiende del Serviciu de Promoción Cultural de la Conceyalía de Cultura, entama’l sestu concursu de micro-rellatos n’asturianu “L’Horru del Carbayedo”.

Nel concursu pueden participar cualesquier escritor en llingua asturiana, como muncho con trés rellatos, que nun pueden pasar de les 500 pallabres. La temática ye llibre. El plazu pa presentalos piésllase a les 14 hores del día 1 d’agostu. La presentación namás pue facese per corréu lletrónicu, unviando los rellatos en formatu word a: avvelhorreo@yahoo.es. Los trabayos dirán encabezaos per un títulu y firmaos namás con un nomatu. Nel corréu lletrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.

Daránse dos premios: primeru, de 400 euros y troféu; segundu, de 200 euros y placa. Los dos premios nun pueden recayer nel mesmu autor/a.

El concursu “Cenciella”, convocáu polaAsociación Juvenil Naurenia y qu’almitía rellatos mesmo en castellán que n’asturianu, aconceyó en Noreña’l 13 de xunu de 2012. Compuestu por Hugo Córdoba, Carmen Cuesta, Rodrigo Olay y Pablo X. Suárez, dieron por ganadores a Íñigo Arza (Barakaldo, 1985) cola obra Click na modalidá tradicional, mientres que Vítor Suárez (Uviéu, 1988), blogueru y activista, vicepresidente d’Iniciativa pol Asturianu ganó’l gallardón na categoría de rellatu vía Twitter.

La entrega de premios va facese con un actu, el vienres día 29 de xunu de 2012 a les ocho la tarde, na Casa de Cultura Severo Ochoa de Noreña.

La Universidá d’Uviéu y KRK Ediciones llograron el premiu del Ministeriu d’Educación, Cultura y Deporte al meyor llibru editáu en 2011 na sección Obres Xenerales y de Divulgación, pol quintu tomu de la Obra completa del hestoriador Juan Uría Ríu, que lleva por títulu “Edad Moderna y Contemporanea”. El tercer tomu d’esta colección dedicada a estudios sobre Uviéu, yá foi reconocíu en 2009 col Premiu Nacional d’Edición Universitaria.

El catálogu dixital bibliográficu, que se pue consultar na páxina web de Política Llingüística, incorpora dende estos díes les referencies de les 155 publicaciones asoleyaes nel añu 2009 y les 167 del añu 2010 en llingua asturiana y en gallego-asturianu.

Catálogu dixital

La Conseyería d’Educación, Cultura y Deporte ta acabante espublizar les bases de los premios lliterarios n’asturianu pa esti añu 2012. La cuantía de los mesmos, que xubiere n’ediciones anteriores hasta los 7.000 euros, vese amenorgada anguaño hasta los 4.000, lo que supón una baxada de cuasi’l 50% nes cuantíes. Esti añu convóquense los premios de novela, poesía, lliteratura infantil y cómic. Les bases completes pueden consultase nel BOPA.

Bases completes

El Conceyu de Carreño convoca la XXIII edición del so concursu lliterariu marineru, nel que van poder participar toos el escritores, mayores de 16 años, que presenten el so trabayu orixinal ya inéditu yá seya n’asturianu o en castellán. Los premios son de 3.000 euros pal primeru y 1.000 pal accésit.

El plazu d’almisión de los trabayos remata a les 14 hores del 31 d’agostu.

La unviada ha facese per corréu postal al Conceyu de Carreño, Cai Santolaya 1-3, 33460, Candás.

Bases completes del concursu

La revista Lletres Lliterariu, que ñació como númberu especial de Lletres Asturianes y lleva cuatro años como publicación dixebrada, asoleyó’l pasáu mes de mayu un númberu nuevu. Nesti cuartu númberu l’Academia sigue col enfotu de contribuir a festexar la virtualidá estética del nuesu idioma, que dende hai sieglos vien dándonos obres de calidá induldable. Nesti volume puen atopase obres de poesía, narrativa, teatru y tornes.

Esti númberu cuatro inclúi poemes de Xuan Porta, Lauren García, Marta Mori, Xurde Fernández, Cristina Menéndez Martín, David Fernández, Roberto González-Quevedo, Xicu Monteserín, Manuel Asur, Ricardo Saavedra Fernández-Combarro, Marisa López Diz, Irma González-Quevedo Pedrayes, Inaciu Galán y González, Xe M. Sánchez, Mª José Fraga Suárez, Helena Trexu Fombella, Abel Aparicio González, Berto García, Ángeles González Fuentes, Carmen Uría Araujo, Pachu Menéndez, Ánxel Álvarez Llano, Mª Esther García López y Santi Fano, qu’ilustra amás esti volume.

Na estaya de prosa espublízase “El silenciu”, de Berto Cobreros, “Cuentos pequeñinos” de Vicente García Oliva, “La bona intención” y “Una onza de chicolate”, de Xosé Bolado, “Chicolate”, de Xurde Fernández, “Fuzzy logic”, de Xe M. Sánchez, “Cuidáu cola tragancia”, de Xulio Arbesú, “Col meyor vistíu”, de Cristina Menéndez Martín, “Pyrus communis”, d’Inaciu Galán y González, “A moza d’Agapito”, d’Aurora García Rivas, “El falante”, “La lletra” y “La llingua tarazada”, d’Ánxel Nava, “Milagros”, de Marisa López Diz, “Acuicultura” d’Helena Trexu, “Les llarasques de felechu”, de Xosé Ramón Lozano Cuervo, “Diariu”, de Carlos Rubiera Tuya y “La ferrería”, de Lluis Muñiz Antuña.

No que cinca a les tornes, Héctor Xil torna un testu en prosa de Jonathan Swift y Xaviel Vilareyo a José Luis Garci. Esti autor asoleya tamién un testu de teatru que pieslla esti númberu, baxo’l títulu “La igua”.

L’Arribada entama na Semana Negra d’esti añu un actu dedicáu a la novela negra n’asturianu, en forma de tertulia onde participarán los escritores Roberto González-Quevedo, Vicente García Oliva y Xuan Xosé Sánchez Vicente, y que va moderar l’escritor Humberto Gonzali.

Estos trés autores escribieron obres de referencia dientro del xéneru del hard-boiled y na nuestra llingua. SonSangre na braña (2012), de González Quevedo, con una trama d’implicaciones internacionales xunto a sospeches inquietantes nuna sociedá marcada pola crisis; L’Aire de les castañes (1989, reeditada en 2008), de García Oliva, que recueye la investigación del asesinatu de Piñerina, un trasuntu lliterariu del conocíu personaxe xixonés Rambal; y La muerte amiya de nueche (1983, reeditada en 2011), de Sánchez Vicente, una historia onde s’examina’l papel de les instituciones polítiques mientres, de deducción en deducción, los personaxes Oscar Abel Piñera y El Meruca van caminando hacia’l descubrimientu del asesín.

Philip Roth, Premiu Príncipe d’Asturies de les Lletres 2012, tuvo traducíu al asturianu primero qu’a nenguna otra llingua penínsular. Nel añu 2011 Ediciones Trabe sacó al mercáu “Adiós, Columbus” na so torna al asturianu. Nella, Philip Roth yá apunta dos de los grandes temes recurrentes de la so obra: el sexu y el xudaismu, al tiempu qu’entama otru de los sos vezos más acusaos: utilizar sabiamente’l yiddish. La obra, rellanzada agora pola editorial, ta vertida al asturianu por Xabiero Cayarga.

Ambientada nos años cincuenta, na mesma ciudá –Newark– na que l’autor naciera y na mesma universidá a la qu’elli acudía (Rutgers), fai un acedu y cínicu repás del pasu de l’adolescencia a la vida adulta al traviés de dos mozos, Neil y Brenda, nun mundu marcáu pola so condición de xudíos y pol sexu nunos tiempos difíciles pal so desarrollu en llibertá.

Philip Roth (Newark, Nueva Jersey, 1933) tien ganaos los cuatro grandes gallardones de les lletres norteamericanes (el «National Books Critics Circle», el «PEN-/Faulkner», el «National Book» y el «Pulitzer»)

El xuráu del concursu “Entre línes”, de rellatu curtiu futboleru, convocáu pol Unión Club de Ciares aconceyó estos díes formáu pola escritores David Artime, Xandru Fernández, Antón García y Vicente García Oliva y el secretariu del club, Miguel Lozano.

Resultaron ganadores los rellatos: “Zapatos de gamuza blanquiazul” d’Igor Paskual, “Footballet” de Mar Álvarez y “Música antiguo” de Pablo Texón.

Amás, fueron finalistes “And you want to travel wind”, “Palabra de brujo”, “Bola de romero”, “Cosidita al pie”, “Skye”, “Orsay”, “Bestiario local”, “El ascenso” y “De los campos de Tapiola a las playas de Gijón”.

Los ganadores van recibir un cestu futboleru-cultural, formáu por una soscripción a la revista Panenka, camiseta personalizada y bufanda del Ciares y un llote de llibros donaos pola Llibrería Paradiso. Amás los rellatos va espublizalos bien llueu Suburbia Ediciones.