Lliteratura

El vienres 27 nel patiu del Centru de Cultura Vieyu Institutu y de magar les 18:30 hores va presentase “Celtismu nel sieglu XXI”, por Ignaciu Llope. Darréu Alberto Álvarez Peña va presentar el llibru “Mitoloxía de los santos n’Asturies, Raigaños paganos nel cristianismu”. La tarde va pesllase cola conferencia “Relatos de plantas y setas, gastronomía y micogastronomía de Asturias e Inglaterra” por Kenneth David Pettit y José Manuel Guardo, cola proyección de “La Campa Torres. La cultura de los castros” y la conferencia “El Cantábrico en la Edad del Hierro”, por Jesús Francisco Torres.

El sábadu, na Terraza del Pabellón del Bioma Boreak, del Xardín Botánicu Atlánticu, a partir de les doce, va celebra l’actu caberu, la Xermandía 2012, alcuentru poéticu nel Xardín Botánicu, na que van intervenir los rapsodes vascos Javier Arnaiz, María Ángeles Pérez Ondiviela, Santiago Liberal y Carmen Martínez, y los poetes asturianos Lurdes Álvarez, Miguel Allende, Esther Prieto y Juan Acebal, acompañaos pol harpista Daniel G. de la Cuesta.

El periodista y escritor Xurde Morán sigue cola presentación del so llibru nuevu, una edición ampliada y tornada al castellán del esitosu llibru Camín de Xixón a Cuadonga, qu’asoleya agora la editorial Gran Enciclopedia Asturiana. Esti xueves 26 preséntalu a les siete y media la tarde nel Centru Comercial Los Fresnos, en Xixón.

El poemariu “Sem título” ye’l llibru últimu del escritor portugués João Afonso Machado, que va presentase en Xixón en rigurosa esclusiva. Sedrá mañana martes 24, a les 19 hores, nel patiu del Centru de Cultura Vieyu Institutu, dientro los actos de la xornada dedicada a la lliteratura de Portugal.

João Afonso Machado tien escrito tamién, ente más otros, O morgadio de Pindela (1999), Eles nunca saberão! (2003), Caldeiras de Queiroz de Borba (2003), A correspondência (1886-1916) entre o 2º Visconde de Pindela e António Feijó (2007) y De uma família de mareantes (2010).

Sobre Sem título diz l’autor nel so blogue “Escrever poesia creio ser um impulso. Publicá-la é uma aventura, seguramente. Porque, de quem arrisca, fica a exposição – a poesia é o que há de mais pessoal… – e a submissão a uma critica fácil e, por regra, impiedosa. Este livro faz-me medo, em suma. / Mas está quase nas bancas. O que Deus quiser acontecerá. / Uma palavra de gratidão para o Daniel Gouveia, meu editor, para a Isabel Mendes Ferreira, inigualável poetisa que o prefaciou, e para a minha querida sobrinha Margarida de Saldanha, a quem pedi desenhasse a capa. / Acresce, a poesia soa melhor no tempo frio. Ainda por cima… Mas um congresso em Gijon, onde o livro deverá ser apresentado, apressou a edição. Quase em cima das férias balneares.“

L’asociación cultural «Alejandro Casona» de Cangas del Narcea organiza esti vienres a les ocho y media la tarde un recital poéticu nel Teatru Toreno de la villa. Nel actu participarán once poetes, ente los que tarán les poetes n’asturianu Marisa López Diz, y Esther García López. Nos descansos va actuar el Cuartetu de Cuerda del Conservatoriu «Julián Orbón» d’Avilés.

Por cuenta de la celebración en Xixón del Festival del Arcu Atlánticu, la rede municipal de biblioteques de Xixón edita ocho guíes de llectura, que se van distribuyir impreses nel intre de dichu eventu, pero que yá tán accesibles en formatu pdf dende la web del conceyu.

Una invitación a enfusase na hestoria, les tradiciones, l’arte, la lliteratura, la música, el paisaxe… de los nuesos vecinos atlánticos.

Descarga les guíes de llectura de baldre

El Conceyu de Carreño, al traviés de la Conceyalía de Cultura, convoca la XXIII edición del concursu de rellatos de temática marinera, nel que va poder concursar cualesquier escritor mayor de 16 años, que presente’l so trabayu orixinal ya inéditu, n’asturianu o en castellán y en prosa. La estensión de los trabayos de creación nun va devasar los venticinco folios en DIN A4 a una cara, mecanografiados a doble espaciu en lletra tipu Times New Roman tamañu 12.

Los orixinales, de los qu’han mandase seis copies, van unviase roblaos con nomatu, y acompañaos de plica o sobre zarráu colos datos concursante y un resume del so currículu. Daránse dos premios de 3.000 y 1.000 euros.

El plazu d’almisión de los exemplares va rematar a les 14 hores del 31 d’Agostu de 2012. La unviada va facer por corréu al: Conceyu de Carreño, Cai Santolaya 1-3, 33430, Candás (Asturies), especificando nel sobre “XXIII CONCURSU DE RELLATOS DE LA MAR, Conceyu de Carreño”.

Esti martes 17 de xunetu a les 12,30 hores, na sala de recepciones de la Casa Conceyu xixonesa, van presentase les Xornaes Lliteraries que L’Arribada entama dientro del Festival Arcu Atlánticu. Ente otres persones, cúntase cola asistencia d’Humberto Gonzali (coordinador de les xornaes), Alberto Álvarez Peña ( presidente de la Asociación Cultural L’Arribada), Antón Caamaño (del grupu de teatru Nun Tris), Carlos Espina ya Illán Gonzali (de Gonzali Producciones), amás de col conceyal de Cultura, Carlos Rubiera, el director de la FMCEyUP, Xosé Nel Riesgo, y el xerente del Xardín Botánicu Atlánticu de Xixón, Jesús Martínez Salvador.

Esti vienres a les ocho la tarde, Paquita Suárez Coalla va presnetar la versión en castellán del so llibru El día que nos llevaron al cine (Nueva York: Campana 2011), na Capiella los Dolores de Grau.

El vienres pasáu enllenóse’l salón d’actos de la Casa Cultura de Santuyano p’acoyer la cellebración d’una Xornada Lliteraria. Nel trescursu de la mesma entregáronse los premios del “XV Concursu de Cuentos pola Oficialidá del Asturianu” a Héctor Pérez Iglesias, Rubén d’Areñes y Quique Faes, escritores qu’algamaren el primer, segundu y tercer premiu respeutivamente. Xulio Vixil, miembru permanente del xuráu, punxo la so voz pa lleer el cuentu ganador, énte l’ausencia d’Héctor Pérez, que nun pudo averase hasta Bimenes por motivos llaborales. Tamién se presentó’l llibru “Poemes del últimu salvaxe”, de Daniel García Granda, y cuntóse col acompañamientu musical de Sergio Catalán Nava y Karina Gutiérrez Vallina, qu’interpretaren delles pieces del so repertoriu de música tradicional a lo llargo la velada.

Fueron dos los momentos más emotivos de la tarde. Per un llau, l’alcordanza que Xulio Vixil fizo del fallecíu José Emilio González Aller, alcalde de Bimenes hasta va poco más d’un mes, del que destacó’l so sofitu al certame lliterariu y l’enfotu que ponía na defensa del nuestru idioma. Emotivu foi tamién el reconocimientu que l’Ayuntamientu Bimenes-y fizo a la moza yerbata, de namás que 18 años, Blanca Inés Fernández Quintana, a la que-y apurrió una placa conmemorativa polos recientes ésitos algamaos nel que tovía ye namás que l’entamu de la so carrera lliteraria. Blanca Fernández ta acabante de llegar de Huelva, ciudá na que recoyó’l primer premiu na modalidá de Bachilleratu del “XIV Concurso de Narraciones Breves Fernando Belmonte”, un certame en castellán nel que participen decenes de persones de tol Estáu español y de Sudamérica. Esta autora asoleyó amás apocayá dalgunos de los sos primeros testos na revista Formientu.

La Tertulia Malory, de L’Entregu, escoyó como meyor llibru n’asturianu de tolos editaos nel 2011 el poemariu “La ñeve del cuquiellu”, del escritor Xabiero Cayarga. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Roberto Corte, Chechu García y Henrique G. Facuriella, que fallaron el premiu nuna sesión especial de la tertulia celebrada en Peñamayor el 9 de xunu del 2012. El xuráu destacó nel acta del fallu «la claridá de los versos, la frescura y el tempo poéticu, a la par que s’atoparon nel llibru munchos momentos de llectura rellumantes».

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu nuna fecha tovía ensin determinar. Amás, el colectivu lliterariu con sé en L’Entregu va mercar venti exemplares de la obra pa ofrecer como regalu protocolariu nos actos organizaos o onde participe la Tertulia Malory.

Esta ye la primer vez que’l grupu concede esti premiu, col que los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu. Los entamadores consideren que yera «pernecesariu» un premiu d’estes característiques nel ámbitu de la lliterartura asturiana tanto poles posibilidaes de visibilidá y proyección social que-y pue dar a la creación lliteraria como pola contribución al prestixu del asturianu como llingua.

El premiu al meyor llibru del añu ye un pasu más nel trabayu de la Tertulia Malory nel terrén de la normalización social del asturianu y enmárcase nel desarrollu de proyectos como la revista Reciella Malory, de la que salieron hasta la fecha cinco númberos. Entrambes iniciatives cumplen colos fines de la tertulia, qu’inclúin l’usu del asturianu como vehículu d’espresión cultural y la difusión de los productos culturales fechos na llingua propia.

Xabiero Cayarga (Cangues d’Onís, 1967) diose a conocer nes lletres asturianes en 1994 con El boleru de Xabel, novela que ganó’l Premiu de Narraciones de l’Academia de la Llingua Asturiana. Ye autor de los llibros de cuentos Les gatileres del cielu, Güelgues sobre’l llagu y A flor de piel. Amás, la so narrativa aparez recoyida na Antoloxía del cuentu asturianu contemporaneu, d’Ánxel Álvarez Llano, y en Muestra de nuevos narradores, de Ramón Lluís Bande. Nel 2006 publicó Trastes de bufarda, novela cola qu’abrió un silenciu editorial de cinco años, rotu nel 2011 con El sol negru de Wewelsburg(Trabe), un títulu que tien como protagonista a Marcial, un asturianu emigráu que se xunta con un grupu de neonazis que tien como base’l castiellu que da nome al llibru.

Como poeta, Cayarga ye ún de los autores asturianos más destacaos, con premios como’l Xuan María Acebal o’l Teodoro Cuesta, que recibió pela segunda vez gracies precisamente a La ñeve del cuquiellu, el so llibru de poesía más recién. La residencia, dende hai años, del autor n’Alemaña dexa un posu apalpable nel llibru, un tonu seriu, llimpiu y claru non faltu d’ironía y hasta humor, como cuando fai referencia a les ilusiones de la mocedá sobre la construcción d’una identidá nacional p’Asturies.

Entrevista con Xabiero Cayarga asoleyada en 2011 onde fala del poemariu premiáu agora