Lliteratura

La Tertulia Malory de L’Entregu va entregar esti vienres 24 d’agostu, a les cinco de la tarde, el premiu al meyor llibru n’asturianu del 2011, nun actu públicu que se va celebrar nel pub Tom Malory de L’Entregu, onde dende fai 14 años la tertulia vien axuntando selmanalmente. La obra ganadora d’esta primer edición del premiu ye’l poemariu La ñeve del cuquiellu, del escritor Xabiero Cayarga. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Roberto Corte, Chechu García y Henrique G. Facuriella, que fallaron el premiu nuna sesión especial de la tertulia celebrada en Peñamayor el 9 de xunu del 2012.

El gallardón consiste nun troféu, nuna ilustración d’Alfonso Zapico y una medaya d’oru conmemorativa, amás de mercar venti exemplares de La ñeve del Cuquiellu pa ofrecer como regalu protocolariu nos actos organizaos o onde participela Tertulia Malory.

Xabiero Cayarga (Cangues d’Onís, 1967) diose a conocer nes lletres asturianes en 1994 con El boleru de Xabel, novela que ganó’l Premiu de Narraciones de l’Academia de la Llingua Asturiana. Ye autor de los llibros de cuentos Les gatileres del cielu, Güelgues sobre’l llagu y A flor de piel. Amás, la so narrativa aparez recoyida na Antoloxía del cuentu asturianu contemporaneu, d’Ánxel Álvarez Llano, y en Muestra de nuevos narradores, de Ramón Lluís Bande. Nel 2006 publicó Trastes de bufarda, novela cola qu’abrió un silenciu editorial de cinco años, rotu nel 2011 con El sol negru de Wewelsburg(Trabe), un títulu que tien como protagonista a Marcial, un asturianu emigráu que se xunta con un grupu de neonazis que tien como base’l castiellu que da nome al llibru.

Como poeta, Cayarga ye ún de los autores asturianos más destacaos, con premios como’l Xuan María Acebal o’l Teodoro Cuesta, que recibió pela segunda vez gracies precisamente a La ñeve del cuquiellu, el so llibru de poesía más recién. La residencia, dende hai años, del autor n’Alemaña dexa un posu apalpable nel llibru, un tonu seriu, llimpiu y claru non faltu d’ironía y hasta humor, como cuando fai referencia a les ilusiones de la mocedá sobre la construcción d’una identidá nacional p’Asturies.

El salón d’actos de la Fundación José Cardín de Villaviciosa ye’l llugar escoyíu pa la celebración, esti xueves 23 d’agostu, a les siete la tarde, d’un recital del escritor Xosé Lluis Campal, a la tamién escritora, y muyer hasta la so muerte va unes selmanes, Aurora Sánchez Fernández. L’actu sedrá a les 8 la tarde.

Cartelu del actu

Esta selmana y dientro del “Veranu Lliterariu”, actividá entamada pol Serviciu de Normalización Llingüística del Conceyu de Corvera, va cuntarse na Biblioteca de Les Vegues, colos escritores Xulio Berros, Berto García y Antón García. Tolos alcuentros van facese n’horariu de 11:30 a 12:30 hores, dirixíos a neños d’ente 4 y 10 años, l’asistencia ye llibre y de baldre. N’ellos, los guah.es sienten ún de los cuentos pa neños de los autores y faen darréu con él delles actividaes al rodiu del mesmu.

Xulio Berros va falar el martes 21 del so últimu llibru, Toya yá ye grande, col que lleva a Corvera nueves hestories d’esti personaxe. Berto García, escritor corverán, va presentar el miércoles 22 los versos de Florenta, la gata poeta. L´úlitimu autor de la selmana ye Antón García, qu’aprovechando que’l Camín de Santiagu tamién pasa per Corvera, va llevar el xueves 22 les aventures d’un pelegrín valiente.

L’Asociación Cultural L’Arribada ta acabante convocar un concursu de haikus al que cada autor pue presentar una d’estes creaciones por cauna de les semeyes d’arreglos ikebana espublizaes pola organización nel so blogue. El concursu tien abiertu’l plazu hasta’l 10 de setiembre. Los haikus han mandase per corréu lletrónicu, entregándose los premios el día 15 de setiembre na ceremonia de pieslle de la Vagamar de L’Arribada 2012, nel mesmu actu de la entrega de los Premios Timón d’esti añu, que tará acompañáu pola Coral Asturiana de Xixón.

Nel concursu podrán participar toles persones que quieren y tengan dieciocho o más años. Cada concursante podrá escoyer como máximu cinco semeyes de les dolce espublizaes, y podrá concursar con un haiku por semeya y en llingua asturiana, gallego-asturianu o castellán indistintamente.

Cada concursante podrá llograr como máximu trés premios. Los premios consistirán nel reglu del arreglu floral ikebana al que correspuenda’l haiku col que fuera ganador. Estos arreglos ikebana tarán numberaos y espuestos nel Patiu del Centru de Cultura Antiguu Institutu de Xixón dende’l 11 al 15 de septiembre y podrán ser visitaos polos concursantes y por toles persones que lo deseen.

Cada concursante mandrá un corréu por haiku, encabezáu col númberu de semeya a la que correspuende y firmáu con nome y apellíos o con númberu de teléfonu, a la dirección larribada@gmail.com ente’l 15 d’agostu y el 10 de setiembre, dambos inclusive.

El Xuráu tará formáu por trés persones escoyíes pola directiva de L’Arribada. Los premios sedrán recoyíos polos interesaos o por daquién na so representación. Si nun hubiera naide en dalgún de los casos, quedarán a criteriu de la directiva de L’Arribada.

Semeyes de los arreglos nos que se tienen de basar los haikus

El día 10 de xunetu, nel camping Las Gaviotas de Santa María del Mar / El Puertu (Castrillón) celebróse’l I Recital de Poesía de la Mar «Peña Lladrona», entamáu pola asociación que lleva’l nome d’esta peña castrillonense. Esti llibru, asoleyáu agora por Trabe, ye’l resultáu de xunir testos y fotografíes marines (obra de Xuacu Álvarez Suárez), nuna amestadura bien interesante y guapa. Diez son los autores que recitaron ellí los sos versos, cuando n’asturianu cuando en gallego-asturianu y siempre acompañaos pola música interpretada por Celia González y Hervé Perechón: Xosé Ramón Martín Ardines, Sabela Fernández, Humberto Gonzali, Iván Iglesias, Ignaciu Llope, Ánxel Nava, Esther Prieto y Javier Cayado Valdés.

Ediciones Trabe ta acabante convocar el Premiu «Montesín» de Lliteratura Xuvenil 2012, nel puen participar toles persones interesaes, soles o en grupu, ensin llende d’edá, con obres de lliteratura xuvenil en llingua asturiana, yá seyan noveles, recopilaciones de cuentos, poemes o obres de teatru. Los trabayos presentaos nun tendrán menos de trenta páxines DIN A-4 o foliu mecanografiaes a doble espaciu per una sola llana (1.800 caracteres). Han ser inéditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos espublizaos.

El premiu tien una dotación de 1.500 euros en conceptu de drechos d’autor y la so publicación dientro de la colección Pesllera de la editorial convocante. El xuráu pue partilu, conceder accésit, recomendar la publicación d’otres obres o dexalu desiertu según aconseye la calidá de los trabayos presentaos.

Les obres han mandase, per corréu postal o en mano, en cuatro copies a Ediciones Trabe, S. L., U. Cai Foncalada, 10 2u A, 33002 d’Uviéu, enantes de les 24 hores del día 31 d’agostu de 2012, faciendo constar la siguiente lleenda: Premiu «MONTESÍN» de Lliteratura Xuvenil 2012. Puen presentase de dos xeitos: firmando col nome, dirección y teléfonu o baxo plica, quier dicise, figurando dientro d’un sobre zarráu los datos del autor y fuera’l títulu de la obra presentada y l’alcuñu col que se presenta, d’habelu.

El xuráu tará formáu por persones relacionaes col ámbitu de la lliteratura xuvenil asturiana. Como secretariu o secretaria, con voz pero ensin votu, actuará un representante d’Ediciones Trabe. Al fallu del xuráu nun se pue retrucar. Faráse públicu enantes del día 20 d’ochobre de 2012. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d’alcuerdu col autor o autores enantes d’entamar la so edición.

Los trabayos que nun se premien volveránse a los autores, en pidiéndolos estos, nos tres meses siguientes a que se dea conocencia del fallu. Desque pase esti plazu ensin que naide los reclame pasarán a formar parte del archivu editorial.

El xuráu del VI Concursu de micro-rellatos n’asturianu “L’Horru del Carbayedo”, independiente dafechu de la organización, alcordó conceder el primer premiu, de 400 euros, al rellatu “Cleo en Cerbere”, presentáu embaxo’l nomatu de Dorothy Amieva, por Laura Marcos Domínguez, escritora de Mieres. El segundu premiu, de 200 euros, foi pa Montenegro, que resultó ser, n’abriendo la plica Marisa López Diz, escritora n’asturianu y eonaviegu de Xixón.

Tolos rellatos presentaos espublizaránse nuna esposición al aire llibre, nel campu la fiesta (Parque del Carbayedo), dende’l vienres, 17, al martes, 21. La entrega premios faise’l llunes, 20, alredor de les 20:00 hores, nel Salón d’Actos de l’Asociación de vecinos El Hórreo (Cai Dr. Marañón, 16, baxu. Avilés).

El xuráu anunció esta selmana na Casa Natal del Padre Galo (Cadavéu) que’l ganador del XIX Premiu de Poesía Fernán Coronas ye Miguel Rodriguez Monteavaro, pol poemariu “Tolos tristes de Mayu”.

El xuráu quixo destacar del les poetentes imáxenes y les figures lliteraries utilizaes, rellumantes muches d’elles, un perfectu dominiu de la llingua asturiana, unidá nel poemariu y un calterín bien estructuráu.

La Timba Poetika en Cangas del Narcea va celebrase nel Pub Bambú, asitiáu na cabeza del conceyu. Nesta ocasión van participar Pablo X. Suárez, Laura Marcos, Bitter Vitor, Cristina Menéndez, Pablo Rodríguez Medina, Inaciu Galán y Miguel R. Monteavaro. Amás, darréu habrá micro abiertu pa tolos que s’animen a compartir la so lliteratura.

Dende’l martes 7 d’agostu al martes 4 de setiembre una docena d’escritores asturianos van tar en Corvera nel marcu de l’actividá Veranu lliterariu. Alcuentros con escritores en Corvera, iniciativa que busca acercar y dar a conocer una muestra de la producción lliteraria n’asturianu dirixida al pública infantil, mesmo qu’a los sos autores.

Asina les coses, y al traviés de “Veranu lliterariu. Alcuentros con escritores en Corvera” -ye la primer vez que se fai una actividá d’estes característiques nel conceyu-, van visitar Corvera los y les escritores Sidoro Villa, Chechu García, M.ª Luz Pontón, Inaciu Galán, Jorge Fernández, Xulio Berros, Berto García, Antón García, Iris Díaz, Cristina Muñiz, Severino Antuña y Ramón Lluis Bande.

L’actividá, llibre y gratuita, ta dirixida a los/es neños/es d’ente 4 y 10 años, y va facese n’horariu de 11:30 a 12:30 hores na Biblioteca de Les Vegues, sacántenes los díes 16 y 28 d’agostu que por mor de cuestiones técniques va desarrollase nel salón d’actos del Centru Sociocultural de Les Vegues.