Lliteratura

Un actu presentáu pola escritor Vanessa Gutiérrez y una mesa redonda colos autores y coloquiu, servirán pa presentar esti martes 16 d’ochobre los llibros ganadores de los Premios Lliterarios n’asturianu 2011 de la Conseyería de Cultura d’Asturies. L’actu va facese nel Salón d’actos de la Biblioteca d’Asturies “Ramón Pérez d’Ayala”, allugáu na Plaza Daoiz y Velarde, 11, n’Uviéu, de magar les 19:30 hores. Los premios inclúin esti añu categoría de novela, poesía, ensayu, cómic y lliteratura infantil.

Ente los participantes nel actu, Xandru Fernández ganador del últimu Premiu «Xosefa Xovellanos» de novela por “El príncipe derviche”; Xosé Anxelu Gutiérrez Morán, ganador del Premiu «Xuan María Acebal» de poesía por “Un ciertu desorde”; Lluis Portal que se fizo col Premiu «Máximo Fuertes Acevedo» d’ensayu pola obra “Cipriano Folgueras. Una gloria d’Asturies”; Paquita Suárez Coalla, ganadora del Premiu «Mª Josefa Canellada» de Lliteratura Infantil y Xuvenil por “Camín de lletres: d’Asturies a Nueva York”; ya Isaac del Rivero, Premiu «Alfonso Iglesias» de Cómic pol so cómic “Doña Berta”, nel qu’adapta esta obra de Clarín al cómic y n’asturianu.

L’actu organízalu la Conseyería d’Educación, Cultura y Deporte.

Como cada añu, anque cola partida cada vegada más amenorgada polos recortes presupuestarios, el BOPA asoleya la resolución de les sovenciones a la edición de llibros en llingua asturiana y gallego-asturianu.

De los 84.480 euros de la partida pa la edición de llibros, Ediciones Trabe lleva 33.100 euros, pa la edición de trece llibros d’autores como Xulio Arbesú, Antón García, Ana Veiga o Iris Díaz Trancho.

La siguiente editorial con más llibros sovencionaos ye Suburbia Ediciones, con cinco volúmenes y 12.280 euros, pa obres d’autores como Adolfo Camilo Díaz, Milio Mariño o Tangueiro.

Siguen nel llistáu Publicaciones Ámbitu con cuatro llibros y 11.161 euros pa obres de Ramón d’Andrés, Cristobal Ruitiña o Mariluz Pontón.

Asturtoons, Impronta y Pintar-Pintar lleven ayudes pa la edición de dos llibros caúna, y con ayudes pa namás un llibru queden Espublizastur, Tierra, Seronda, Saltadera y De la Piedra Producciones.

Resolución d’ayudes nel BOPA

Con ilustraciones de Nanu González sal a les llibreríes la obra ganadora del IV Premiu «María Josefa Canellada» de Lliteratura Infantil y Xuvenil del Gobiernu d’Asturies. «A ye p’Asturies». D’esta manera, que nun ye otro qu’una declaración d’intenciones, entama Paquita Suárez Coalla’l llibru Camín de lletres: d’Asturies a Nueva York, una moderna crónica, ordenada alfabéticamente, de la nueva emigración asturiana: cosmopolita y moderna.

Cada lletra del alfabetu asturianu ye una estampa distinta na qu’una nena, fía d’asturiana, va contando la so vida en dos espacios distintos: l’Asturies de les vacaciones del veranu y la Nueva York del restu l’añu.

Escrita nun asturianu natural y pulío, esta pequeña obra d’arte ye adaptable a la reciella d’estremaes edaes.

Paquita Suárez Coalla (Grullos, Candamu, 1965), asturiana afincada en Nueva York dende cuantayá, onde da clases d’español na Universidá, publicó en 2001 La mio vida ye una novela. Testimonios de las mujeres del campo de Asturias y dos años más tarde la so primer obra de creación, el llibru de rellatos Pa nun escaeceme, al que siguió El día que nos llevaron al cine y otros cuentos, entrambos los dos traducíos al castellanu y al inglés. Ye también coordinadora de l’antoloxía d’escritores latinos residentes en Nueva York Aquí me tocó escribir.

Pueden presentase orixinales a esti concursu del 4 al 24 d’ochobre de 2012. El concursu tien dos categoríes, microrrellatos y haikus, pudiendo presentase obres n’asturianu o en castellán. Les bases completes pueden consultase na páxina web de la Conceyalía de Cultura de Xixón.

Bases completes del concursu

El Club de Prensa Asturiana de LNE de Xixón acueye la presentación de la torna al asturianu de los escritos d’Andreu Nin sobre la cuestión nacional. Esti actu va ser el llunes 1 d’ochobre a les 20 hores, y na mesa van intervenir Boni Ortiz Cabello, Moisés Cima Fernández, que fizo al torna de la obra, y Javier Cubero, que pon l’entamu a esta edición asoleyada por Espublizastur.

Apocayá’l Club camudó la so sede, allugándose agora na Sala Cultural Monte de Piedá, de CaxAstur, na plaza del Monte de Piedá númberu 2. Al llau de la cai del Institutu, en Xixón.

Asturies escaez a la so xente más brillante con una facilidá que sorprende. Eso-y pasó a ún de los artistes más bonos que diera esta tierra allá per finales del sieglu xix y los primeros años del xx: l’escultor uvieín Cipriano Folgueras. Ñacíu n’Uviéu, estudió en Madrid y Roma y viaxó per Italia y Francia, onde entró en contactu colos artistes de vanguardia, ente otros Rodin, y supo dir escaeciendo la escultura de trazu románticu pa xubise a un realismu incipiente, que-yos dio sonadía a delles de les sos escultures más consiguíes: Orestes persiguíu poles furies, Celta o Astur, Los primeros pendientes, El sacamueles… Sobre la so obra escribe Lluis Portal nesti volume que resultó ganador del XVII Premiu d’Ensayu «Máximo Fuertes Acevedo» y qu’agora ve la lluz.

La mala suerte acompañó a esti artista, que fue emponderáu y que recibió encargos públicos y privaos, pero del que malapenes se caltienen de pies unes poques obres: el Valdés Salas sedente del patiu del edificio históricu de la Universidá d’Uviéu, La vilba de Santander o’l panteón de los marqueses de San Xuan de Nieva nel cementeriu avilesín de La Carriona… Les más d’elles desapaecieron bien na Guerra Civil, bien nes telarañes del tiempu. L’autor quier con esti llibru rescatar del escaezu a un escultor d’importancia, y devolve-yos a los asturianos, si non les sos obres, sí la so memoria y l’alcordanza.

Lluis Portal Hevia (Villaviciosa, 1964) ganó per dos veces el Premiu Uviéu de Teatru coles obres Oh 36! (2007) y Poison (2008). Pelegrinos del abismu y El club de los valientes son dos noveles xuveniles, que-y fixeron algamar los premios de l’ALLA y d’Asturnews. Amás, tien escrites obres biográfiques (Francisco Balbín, Xiquín de Villaverde), etnográfiques (Secretos de Pandenes) y el llibru de cuentos Trófimo y Radamés.

L’Atenéu Obreru de Xixón acueye güei, martes 25, la presentación del llibru ‘La bona intención / La buena intención’, de Xosé Bolado, asoleyáu pola editorial de nueva creación Impronta, qu’entama asina la edición de llibros n’asturianu cola colección “Carta blanca”. Al cargu de la editorial ta la ex directora de Llibros del Pexe, Marina Lobo.

La presentación, que va cuntar col autor y col poeta Pablo Texón, va entamar a les ocho la tarde nel llar social del Atenéu Obreru, asitiáu na cai Cuadonga númberu 7, primeru izquierda, en Xixón.

Na reseña de contraportada esplícase sobre la obra que “ye una sutil aventura introspectiva. Les ventanes qu’abre esti llibru allumen un espaciu que ye personal pero que ye’l de cualesquier. El llector va realizar nes sos páxines un viaxe al corazón de les hores y les coses, al infrayable y firiente cursu de los díes, a los inevitables daños y engaños que’l pasu y el pesu del tiempu aveza a dexar en nós. Somos en verdá una suma de negaciones y afirmaciones y nada como les pallabres pa interpretar los nuesos propios silencios”.

CCOO tien abierta entá la convocatoria del Concursu de Microrellatos mineros Manuel Nevado Madrid al que pueden presentase a esti concursu escritores de cualquier nacionalidá, siempre y cuando que les obres presentaes tean escrites n’asturianu o en castellán, seyan orixinales y ensin asoleyar y nun fueren premiaes enantes en nengún otru concursu. Pue presentase un máximu de dos microrrellatos por cada autor o autora, teniendo que falar el conteníu de dalgún aspeutu (motivos temáticos, personaxes, argumentu o ambientación) venceyáu col mundu de la minería de cualquier país.

La estensión nun podrá perpasar les 40 llinies en lletra de cuerpu 12 y tipu Times New Roman o asemeyada, pudiendo ocupar el microrrellatu un máximu d’una páxina en formatu foliu o DIN-A4 por dambes cares. Les obres hai que les unviar per corréu postal a: Fundación Juan Muñiz Zapico (Concursu de Rellatos Mineros Curtios “Manuel Nevado Madrid”) cai Santa Teresa 15, CP 33005 Uviéu.

El plazu d’entrega d’orixinales acaba’l día 22 d’ochobre de 2012. La organización nomará al xuráu competente, presidíu pol caderalgu Benigno Delmiro Coto. El xuráu nun conocerá los nomes de los/les autores o autoras, namás el títulu de los rellatos y l’acuñu del autor. Del fallu del xuráu, al que nun se podrá retrucar, daráse conocencia pública’l 4 d’avientu de 2012 coincidiendo cola fiesta minera de Santa Bárbola.

Va dase un primer premiu de 600 euros, y dellos accésits.

Los poetes habituales nes “Timbes Poétikes”, recitales underground celebraos per tol país, van tar esta fin de selmana de minxira. El vienres 21 de setiembre, a les 22:30 hores, tarán n’Eljudá, na Plaza les Campes, en La Pola Siero, mientres que’l sábadu tarán n’Uviéu, a les 21 hores, y dientro del CSOA La Madreña, allugáu nel 32 de l’avenida Xeneral Elorza.

Nesta ocasión va cuntase cola actuación de Charo de la Varga, Victor X. y Gustavo Giménez (poesía y música, Zaragoza, Xixón), el Colectivo Patata (Microteatru, A Coruña), Saúl Pushkin (Poesía, A Coruña), Artista Incógnita (Poesía, A Coruña) y Dj’s Residentes.

El Centru Sociocultural de Les Vegues acueye ‘Expolliteraria’, una amuesa qu’axunta una esbilla de poemes de distintos autores asturianos, xunto a una esposición d’artes plástiques feches tamién por artistes asturianos. Ente los autores Ana Vanessa Gutiérrez, Antón García, Berta Piñán, Pachín de Melás y Xandru Fernández. Pue visitase hasta’l día 28 ente les 10 y les 14 hores.

Nel Centru Social de Tresona ta abierta al mesmu tiempu la esposición ‘La Lliteratura nel tiempu’.