Lliteratura

La editorial xixonesa Suburbia Ediciones prepara delles presentaciones de los sos llibros más nuevos. El martes 15 de xineru presentaráse “El Xaretón del Embeligru” de Milio Mariño na Casa de Cultura d’Avilés a les 20 hores, llevándolu darréu a la Fnac, el xueves 24 de xineru, de magar les siete la tarde.

El xueves 31 de xineru va facese la presentación d’“Ensin bones referencies”, de Xosé I. Pidal Montes na Fnac, a les 19 hores.

El Conceyu de L.lena, en collaboración cola Conseyería de Cultura, convoca la 50 edición del Concursu Internacional de Cuentos “L.lena”. Ta abiertu a cualesquier tema, siempres que seya inéditu. Ha presentase enantes del 31 de xineru de 2013, na Casa Cultura de La Pola.

Bases completes del concursu

La Oficina de Normalización Llingüistica de Llaviana dio anuncia yá de los ganadores del XI Concursu de Narraciones Curties Conceyu de Llaviana, que cunta col sofitu de Conseyería d’Educación, Cultura y Deporte. Pablo Rodríguez Medina resultó ganador col testu “L’alemán”, mientres que’l puestu segundu foi pa Paula Pulgar Alves pol rellatu “Asia Box”. El premiu ta dotáu con 400 euros pal primeru y 150 pal segundu puestu.

El xuráu formáronlu María García Fernández, Constantino Manuel Blanco González, Pablo Xuan Manzano Rodríguez y Mónica Rodríguez Riesgo.

Suburbia Ediciones tien nes llibreríes el llibru de rellatos de Milio Mariño “El xaretón del embeligru”. Son trece rellatos, escritos nun asturianu cenciellu y candial, nos que l’autor, con retranca y mui bon humor, apurre una güeyada particular de la vida de cutio y de les chifladures que nos aforfuguen y nun nos atrevemos a dexar salir, pol aquello de que nun vayan pensar que, daveres, tamos chiflaos.

Un llibru apináu de realismu, comicidá, más la güeyada crítica qu’aveza gastar Mariño en tola so obra, tanto periodística como de ficción.

Milio Mariño foi collaborador del selmanariu Les Noticies y ye habitual articulista d’opinión nel diariu La Nueva España. Tien ganao bien de premios lliterarios tanto en castellanu como n’asturianu.

Xulio Arbesú Rodríguez resultó ganador de la decimoctava edición del Premiu d’ensayu en llingua asturiana Máximu Fuertes Acevedo, que concede añalmente la Conseyería d’Educación, Cultura y Deporte d’Asturies.

El xuráu que concedió esti gallardón, embaxo la presidencia de la directora xeneral de Política Llingüística, Ana María Fueyo, cuntó cola participación de el escritores Lluis Portal Hevia (ganador de la edición anterior), Roberto González-Quevedo y el Caderalgu d’Hestoria Medieval de la Universidá d’Uviéu, Javier Fernández Conde. El premiu ta dotáu con 4.000 euros.

Ente les obres presentaes, el xuráu decidió por unanimidá conceder el Premiu al testu tituláu “Los deseos del dineru”, destacando l’usu axilosu de la llingua, l’actualidá de la tema y la forma d’harmonizar narración y xéneru ensayísticu. El testu ganador foi presentáu baxo’l nomatu Rockefellerín.

Xulio Arbesú ye un veteranu escritor en llingua asturiana, destaca la so obra narrativa y ensayística. Ente les sos obres publicaes tán Misión Pelayo, novela xuvenil galardonada col Premiu de Llectures pa Rapazos de l’Academia de la Llingua Asturiana; Un raposu en Tresmonte, novela ganadora del Premiu Llorienzu Novo Mier de l’ALLA; Potestas, novela hestórica cola que ganó en 2002 el Premiu Xosefa Xovellanos de novela convocáu pola Conseyería de Cultura; la edición de cuentos titulada Cuentos pa neños; El pisu d’enriba, novela cola que volvió ganar el Premiu Xosefa Xovellanos en 2006; y El destín treshumanu, ensayu col que ganó este mesmu premiu Máximu Fuertes Acevedo d’ensayu na so edición de 2009. Amás tien publicáu en castellán l’ensayu La informatización del transporte.

Con Espankin, asoleyada por Suburbia Ediciones, Adolfo Camilo Díaz torna a la novela negra, probablemente‘l xéneru que meyor manexa y pol que se dio a conocer. Espankin ye la crónica de la cayida nos infiernos de Gloria, maestra de clase media con una vida perfecta. L’accidente d’una de les sos alumnes y la apaición d‘unes semeyes van facer que la so vida se ximielgue porque ¿quién y por qué quier face-y dañu?

Adolfo Camilo Díaz, narrador, ensayista, dramaturgu, músicu… posee una de les voces más orixinales del panorama lliterariu asturianu. Nel añu 1985 ganó’l premiu Xosefa Xovellanos cola novela Añada pa un güeyu muertu (reeditada por Suburbia Ediciones), experimentó cola novela negra en Miénteme, dime la verdá (1989) y cola novela xuvenil (Blugás, 1993). Diariu de viaxe (1996), Imago (2007) y Advenimientu (2009) son les otres tres noveles del autor premiaes col Xosefa Xovellanos. Suyes son tamién les obres de teatru Psicokiller (1993), País. Una traxicomedia asturiana (2004) y Wulf (2005); esta última Premiu de Testos Teatrales Alejandro Casona 2005.

El Conceyu de Mieres anunció que’l xuráu del Premiu Teodoro Cuesta, integráu por Esther Prieto, María Antonio Pedregal, Vicente García Oliva, Ismael González Arias y Xuan Bello, y actuando como presidente Manuel Ángel Álvarez y secretariu Jesús Fernández, dambos ensin voz nin votu, aconceyó estos díes, decidiendo por unanimidá conceder el premiu d’esti añu al poemariu “En campu abiertu”, presentáu baxu’l seudónimu Lescar. Abierta la plica correspondiente resultó ser la so autora Ángeles Carbajal. El premiu ta dotáu con 3000 € y ta patrocináu pol Conceyu de Mieres y la Conceyalía d’Educación, Cultura y Deporte del Gobiernu d’Asturies.

Ángeles Carbajal (Argüelles, Siero, 1959) Ye Llicenciada n’Hestoria del Arte pola Universidá d’Uviéu. Collaboró en revistes Lliteraries como Reloj de Arena y Clarín.Pertenez a l’asociación lliteraria “Voces del Chamamé” y en delles ocasiones foi xuráu de concursos lliterarios y d’artes plástiques.

Realizó ilustraciones pa publicaciones, participó en publicaciones colectives y espublizó’l llibru La Caligrafía de la Distancia, colección Cuaderno del Bandolero – Xixón 1993 y La sombra de otros días, Editorial López y Malgor – Uviéu 2002.

Dende va dellos años dirixe talleres de llectura y creación lliteraria p’adultos promovidos pola Obra Social y Cultural de Caxastur y tamién pol Conceyu d’Uviéu.

“Ensin bones referencies” ye’l primer llibru espublizáu n’asturianu pol autor Xosé I. Pidal Montes, conocíu por ser miembru y cofundador de los colectivos Versoadictos y Versos Llibres, asina como pola so presencia nes Timbes Poétiques organizaes polos poetes mozos más conocíos del panorama asturianu como Pablo X. Suárez y Rubén d’Areñes.

Ensin bones referencies, asoleyáu por Suburbia Ediciones, ye un reflexu de veces íntimu, de veces realista, hasta’l llímite que reflexa sin vendes el clima de trabayu duru, reivindicaciones y drogues de la cuenca minera na que creció l’autor.

El pasáu mes de xunu la editorial Pintar-Pintar daba anuncia de que’l llibru La mio hermana ye una mofeta qu’editaren n’asturianu y darréu en castellán, con testu de Berta Piñán ya ilustraciones de Francesca Asirelli, diba asoleyase n’alemán pola Editorial Ellerman. Nel mesmu la mofeta conviértese nuna “stinktier”, y la señorita Luisi pasa a ser “Frau Luisi”, pero lo que nun camuda ye l’ésitu del llibru. N’asturianu recibiera’lPremiu Críticu de les Lletres Asturianes na categoría de lliteratura infantil y n’alemán yá ta nes llibreríes.

Según espliquen na editorial, la venta de llibros a Iberoamérica y Estaos Xuníos y la venta de drechos a países con otros idiomes, como ye esti casu, “ye la salida que nos queda a pequeñes editoriales como Pintar-Pintar pa poder sobrevivir nestos tiempos nos que les llibreríes españoles tán vacíes y les biblioteques nun cuenten con dotación pa mercar les nueses novedaes”.

Aprovechen esta bona noticia “pa reclamar mayor atención por parte de les instituciones culturales asturianes, públiques y privaes, porque en circunstancies adverses como les actuales, bono sedría que s’entendiera la importancia, tanto cultural como económica, de valorar “lo d’equí, lo nueso”, entá más, cuando fuera yá lo tán faciendo”.

Entrúguense cuántos conceyos asturianos regalen anguaño llibros infantiles por cuenta de les fiestes navidiegues, y cuántos d’esos llibros son llibros editaos n’Asturies.

Esti miércoles 19 d’avientu, el Centru de Referencia de la Cultura y la Llingua Asturiana Casa de los Alberti, va acoyer la presentación de La Chelita, novela gráfica de Ruma Barbero. Ruma Barbero, llicenciáu en Belles Artes y miembru del grupu folk Felpeyu, ta acabante publicar la novela gráfica La Chelita, una novela desenvuelta a partir de les vivencies y los testimonios de cooperantes internacionales y veteranos de la guerrilla salvadoreña. La Chelita ye un trabayu sobre’l final de la guerra y el desarme n’El Salvador en 1992 que tamién ufierta una perspectiva sobre la situación actual del país centroamericanu.

Ruma Barbero investigó, dende la distancia, pa conocer lo que pasó va 20 años y lo que pasa anguaño n’El Salvador, un país asoláu pola violencia de les maras, pero tamién d’una policía militarizao. Barbero editó La Chelita con Tierra Llibros, y distribúi la novela de manera independiente y directa. Vamos tener oportunidá de disfrutar d’ello, charra, proyección y firma exemplares, el miércoles 19 d’avientu a les 20:00 hores na Casa los Alberti de Ciañu.