Lliteratura

Un añu más el Gobiernu d’Asturies entregó los sos Premios Lliterarios n’asturianu, los máximos gallardones institucionales del país, ya Iniciativa pol Asturianu denuncia que se fizo “ensin presencia institucional d’importancia”. Dende esta organización entrúguense “¿ónde ta’l Presidente Javier Fernández nun actu de la importancia d’estos Premios?”. La organización denuncia que “amás de nun tar el Presidente d’Asturies, como ye vezu, esti añu nin siquiera se cuntó cola asistencia de la Conseyera de Cultura”. Entrúguense tamién “sí dalguién podría xustificar que’l Ministru de Cultura nun asistiera a los Premios Nacionales de Lliteratura, equivalente estatal d’estos gallardones”, espliquen.

Iniciativa pol Asturianu denunció al traviés d’una nota de prensa “qu’esti nun ye’l primer menospreciu de la Conseyera de Cultura a los gallardonaos con estos Premios”, recordando que yá a finales de 2012 “llegó media hora tarde a la presentación de les obres ganadores d’estos premios na so anterior edición y nun participó del actu”. El Gobiernu d’Asturies, que rebaxó de 12.000 a 4.000 euros la cuantía de los premios, “habría facer un esfuerciu por promocionar la lliteratura asturiana cola presencia d’una mayor representación institucional”, reducida nesta ocasión a la presencia d’un viceconseyeru.

Iniciativa pol Asturianu felicitó tamién a los gallardonaos y sumóse a la so reivindicación, fecha nel actu, d’oficialidá pa la llingua asturiana, y de que nes convocatories de los Premios Nacionales de Lliteratura, puedan participar obres n’asturianu, como -recuerden- “pasa col restu de llingües oficiales del estáu”.

Nel actu, el viceconseyeru Alejandro Calvo faló de «los esfuercios que fai’l Gobiernu d’Asturies pa garantizar la presencia del asturianu nel sistema educativu cola nueva Llei LOMCE» o que «ye debío a lleis como ésta lo dificulta’l reconocimientu del asturianu como llingua oficial» no que pa Iniciativa pol Asturianu “ye una verdadera tomadura de pelo a los asturianos”, pues la única forma de garantizar esa continuidá del asturianu na educación y n’otros ámbitos ye pa esta organización “la declaración d’oficialidá, a la que la FSA-PSOE, partíu de gobiernu, vien negándose”. Nesi sen recuerden que “ye esa falta d’estatus d’oficialidá del asturianu lo que provoca que la Llei Wert nun considere al asturianu, non al revés”. La organización demanda al gobiernu asturianu que «nun malipule a la xente».

La recoyida de los Premios Lliterarios 2013 conviértese nun actu reivindicativu de los escritores gallardonaos, que reclamaron la oficialidá y la so participación nos Premios Nacionales de Lliteratura, n’igualdá de condiciones col restu de les llingües del Estáu. Nel actu, una probe representación institucional, el viceconseyeru de Cultura, Alejandro Calvo, y la directora xeneral de Política Llingüística, Ana María Fueyo, lo qu’amuesa que los premios non solo rebaxaron la so cuantía, de 12.000 a 4.000 euros, sinón que tamién la presencia institucional.

Tolos gallardonaos ficieron referencia a la necesidá de la oficialidá del asturianu pa garantizar un futuru dignu pa la so lliteratura. Mientres que’l viceconseyeru calificó esta reclamación de “lexítima” y dixo que’l Gobiernu d’Asturies entamaría “acciones llegales pa garantizar la presencia del asturianu nel sistema educativu”.

Recoyeron los premios, Quique Faes, ganador del Xosefa Xovellanos pola novela “La vida increíble”, Milio Rodríguez Cuerto, que llevó’l Premiu María Josefa Canellada de lliteratura infantil y xuvenil por “Carne de Melandru”, José Ángel Gayol, col “Xuan María Acebal” de poesía por “El llibru de les coses”, Xulio Arbesú pol ensayu “Los deseos del dineru”, ganador del Premiu Máximo Fuertes Acevedo” y Javier Antonio Marinas, ganador del Alfonso Iglesias de cómic por “Homes”.

Un actu que va celebrase esti miércoles 30 de xineru, a les 19:30 hores, na Biblioteca Pública “Xovellanos” de Xixón va servir pa entregar los premios lliterarios n’asturianu de la Conseyería d’Educación, Cultura y Deporte, que los falló a finales d’añu. Los ganadores del añu 2012 fueron Quique Faes, José Ángel Gayol, Xulio Arbesú, Milio Rodríguez Cueto y Javier Marinas.

Nel Premiu «Xosefa Xovellanos» de novela: Enrique Faes Díaz (Quique Faes) por La vida increíble. El xuráu concedió esti gallardón al valorar que se trata d’una novela mui bien construyida, con unos personaxes claramente definíos y qu’aporta a la lliteratura asturiana nuevos horizontes temáticos.

Premiu «Xuan María Acebal» de poesía: José Ángel García Fernández (José Ángel Gayol) por El llibru de les coses misterioses, poemariu que, al dicir del xuráu, «basándose na memoria y el viaxe, apurre l’ecu personal de les voces ayenes».

Premiu «Máximo Fuertes Acevedo» d’ensayu: Xulio Arbesú por Los deseos del dineru, obra de la que’l xuráu quixo destacar «l’usu áxil de la llingua, l’actualidá del tema y la forma d’harmonizar narración y xéneru ensayísticu».

Premiu «María Josefa Canellada» de lliteratura infantil/xuvenil: Milio Rodríguez Cueto, pola novela Carne de melandru. El xuráu alcordó por unanimidá la concesión del premiu a esta obra al valorar «que se trata d’una novela de gran profundidá narrativa y bien resuelta que recupera la memoria histórica d’una manera adecuada a la edá a la que va dirixida y abre caminos nuevos na lliteratura xuvenil n’asturianu».

Premiu «Alfonso Iglesias» de cómic: Javier Marinas por Homes, que ye, n’opinión del xuráu, una obra de gran valor didácticu que destaca pol tratamientu dixital de les imáxenes.

Laura Marcos Domínguez, col cuento tituláu “Abril, xunetu”, y Julio González Rodríguez, pol cuentu “Nara, un viaxe nel tiempo” son los ganadores del X Concursu de cuentos curtios organizáu pol Conceyu de Cangas del Narcea. La entrega de premios va celebrase na conmemoración añal de la Selmana de les Lletres Asturianes, en mayu. El Conceyu de Cangas organizará un actu públicu nel que se fadrá una llectura de los cuentos gallardonaos.

“Abril, xunetu”, el cuentu de la mierense Laura Marcos, participaba na categoría d’asturianu estándar. Trátase d’un cuentu en formatu epistolar basáu nuna hestoria real tresmitida a l’autora por un descendiente de los protagonistes y ta ambientáu na Segunda Guerra Mundial. Nél, l’antisemitismu y les tribulaciones d’una probe xudía emigrada en Francia que pasó per un campu de concentración son pieces fundamentales.

El cuentu de Julio González, “Nara, un viaxe nel tiempo”, ye una hestoria ente fantástica y mítica que fai un repás pel orixe del nome del pueblu del autor, Naraval, en Tinéu, trespasando les fronteres del tiempu y l’espaciu. Julio González escribió’l cuentu na variedá occidental del asturianu y ye’l ganador nesta categoría.

“Asturcones” ye un llibru de David de San Andrés (enantes David González), que recueye un llabor d’esbilla de los poemes de 31 poetes asturianos. Ente los autores, con poemes, cuatro caún, en daglunos casos n’asturianu y n’otros en castellán, Miguel Rojo, Santiago Bertaultt, Marcos Canteli, Sofía Castañón, Pablo Cortina, el propio David de San Andrés, Jordi Doce, Pelayo Fueyo, Sibisse Rodríguez, Ana Vega, Pablo X. Suárez, Lara Ríos y Rosario Hernández Catalán, ente otros. La obra edítaa Canalla Ediciones.

La Conseyería d’Educación, Cultura y Deporte falló a finales d’añu los premios lliterarios en llingua asturiana pal añu 2012: la 33 edición del Premiu «Xosefa Xovellanos» de novela, que ganó Quique Faes; la 18 edición del Premiu «Xuan M.ª Acebal» de poesía, col que se fizo José Ángel Gayol; la 18 edición del Premiu «Máximo Fuertes Acevedo» d’ensayu, ganáu por Xulio Arbesú; la quinta edición del Premiu «María Josefa Canellada» de lliteratura infantil/xuvenil, otorgáu a Milio Rodríguez Cueto; y la cuarta edición del Premiu «Alfonso Iglesias» de cómic, que tuvo como ganador a Javier Marinas. Toos ellos van entregase na tarde del miércoles 30 de xineru, na Biblioteca Pública “Xovellanos” de Xixón.

Nel Premiu «Xosefa Xovellanos» de novela: Enrique Faes Díaz (Quique Faes) por La vida increíble. El xuráu concedió esti gallardón al valorar que se trata d’una novela mui bien construyida, con unos personaxes claramente definíos y qu’aporta a la lliteratura asturiana nuevos horizontes temáticos.

Premiu «Xuan María Acebal» de poesía: José Ángel García Fernández (José Ángel Gayol) por El llibru de les coses misterioses, poemariu que, al dicir del xuráu, «basándose na memoria y el viaxe, apurre l’ecu personal de les voces ayenes».

Premiu «Máximo Fuertes Acevedo» d’ensayu: Xulio Arbesú por Los deseos del dineru, obra de la que’l xuráu quixo destacar «l’usu áxil de la llingua, l’actualidá del tema y la forma d’harmonizar narración y xéneru ensayísticu».

Premiu «María Josefa Canellada» de lliteratura infantil/xuvenil: Milio Rodríguez Cueto, pola novela Carne de melandru. El xuráu alcordó por unanimidá la concesión del premiu a esta obra al valorar «que se trata d’una novela de gran profundidá narrativa y bien resuelta que recupera la memoria histórica d’una manera adecuada a la edá a la que va dirixida y abre caminos nuevos na lliteratura xuvenil n’asturianu».

Premiu «Alfonso Iglesias» de cómic: Javier Marinas por Homes, que ye, n’opinión del xuráu, una obra de gran valor didácticu que destaca pol tratamientu dixital de les imáxenes.

Güei, llunes 21 de xineru, a les 8 la tarde, nel Club de Prensa de La Nueva España de Xixón, allugáu nel 2 de la Plaza’l Monte Piedá, xunto a la cai del Institutu, va presentase’l llibru “Historia comparada de las mujeres. Nuevos enfoques”.

El volume asoleyóse en 2006 n’inglés pa los Estaos Xuníos, ampliada más tarde (2008) na so versión portugués y presentáu en francés nel añu 2009. Esta versión castellana, traducida directamente de la francesa “Histoire comparée deas femmes. Nouvelles aproches”, supón, en pallabres d’Anne Cova, «un mayor espardimientu de la investigación sobre hestoria comparada de les muyeres y da fe de la importancia que reviste la hestoria de les muyeres pa la hestoria comparativa. Nel planu metodolóxicu, esta obra refundia nueva lluz sobre cómo s’escribe la hestoria comparada de les muyeres. La so ambición ye contribuyir a una conocencia más amplia de les distintes historiografíes col fin de demostrar hasta qué puntu’l diálogu puede resultar granible y aguiyar otres formes d’escritura de la hestoria de les muyeres».

Como bien diz Françoise Thébaud nel prefaciu, «esta obra respuende a una entruga: ¿cómo s’escribe una hestoria comparada de les muyeres? Cuatro grandes historiadores americanes, Ann Taylor Allen, Bonnie S. Anderson, Karen Offen y Susan Pedersen, preséntennos el so itinerariu d’investigación y señalen de qué manera tantu la hestoria de les muyeres y del xéneru como la hestoria de los feminismos integren la hestoria xeneral y favorecen una percepción más afinada de les sociedaes occidentales».

Esti xueves 17 de xineru, a les siete la tarde, nel Foru Abiertu de la Llibrería Cervantes d’Uviéu, na cai Doctor Casal, 9, va facese la presentación del poemariu de Natalia Menéndez “El síndrome Kalashnikov”, asoleyáu por Ediciones Trabe. Participen nel actu, Javier Lasheras, escritor y Esther Prieto, de la editorial.

La revista Platero, asoleyada con financiación pública pa esparder la lliteratura infantil y xuvenil pelos centros docentes d’Asturies, nun inclúi nunca obres lliteraries n’asturianu. Esta marxinación de la lliteratura fecha na nuesa llingua llevó a un grupu de persones, n’especial docentes, al traviés de les redes sociales, a entamar una acción colectiva, demandando la presencia de la lliteratura asturiana nesta publicación. Pa ello ponen a disposición de la xente una cuenta de corréu, revistaplatero@hotmail.com y un modelu de corréu pa mandar al so director:

Señor director;

Na confianza de qu’estos encamientos van ser teníos en cuenta, reciban un saludu candial”

Per tercer añu consecutivu, La Semiente, el centru social de L’Entregu vuelve a celebrar La gran timba poétika de La Semiente, que volverá a axuntar a un buen garapiellu de músicos y poetes de la cuenca minera y del estranxeru. Nesta ocasión, l’eventu va tener como convidaos especiales a los poetas y performers gallegos Aurora Boreal, Saul Pushkin, Yeiko y Luis Gallego. A ellos amiéstense habituales de les timbes poétiques como Sergio Taboada, Laura Marcos, David Suárez “Suarón” o Pablo X. Suárez. Esta III Timba Poétika “l’asturgaláica” va celebrase’l vienres a les ocho la tarde.

Amás, nesta ocasión, tarán xunto a autores de la Cuenca’l Nalón como Pablo Antón Marín Estrada, Pablo Rodriguez Medina o Miguel Allende, ente munchos otros, van ser los protagonistes d’un espectáculu qu’axunta poesía y música, humor y crítica social. Habrá tamién, micro abiertu pa que cualquier de los espectadores, al mou d’una jam session, pue participar tanto colos sos testos como cola so música.