Lliteratura

El Serviciu de Normalización Llingüística de la Comarca de la Sidra, en collaboración col Área de Cultura del Conceyu de Colunga, acaba d’abrir el plazu pa la inscripción nun nuevu taller de llectura nel Conceyu de Colunga. Los talleres de llectura n’Asturianu de la Comarca celébrense tamién en Nava y en Villaviciosa y por ellos yá pasaron autores de la calidá de Vanessa Gutiérrez, Xandru Fernández o Miguel Rojo.

La inscripción nel taller, que ta abierta hasta’l 22 de marzu, ye gratuita dafechu y podrá facese na biblioteca Pedro Caravia, de Colunga o poniéndose en contactu col Serviciu de Normalización Llingüística de la Comarca de la Sidra, nel teléfonu 985718413 na sede de la Mancomunidá en Paraes (Nava). A partir d’abril entamarán a celebrase les sesiones, que consisten na llectura d’una obra de lliteratura asturiana y la celebración d’un alcuentru col autor o autora de la mesma.

La edición d’esti añu del concursu “Amor pola llingua” de Xunta Moza, cuntó con un númberu altu de participantes y, según espliquen dende la entidá “añu tres añu, tamos viendo cómo l’apegu idiomáticu crece ente los falantes más mozos”. Si bien cada edición nueva del concursu va ganando más participantes, nesta cuarta edición disparóse la cifra y lleguóse a 68 concursantes con un total de 132 eslóganes, poemes, declaraciones y sentires. El ganador foi Moises Cima pola frase: “Métime la llingua hasta’l gargüelu, déxame sentir les tos palabres bien dientro de mi”.

El día internacional de la Llingua Materna foi declaráu pola UNESCO nel añu 2000 como reconocimientu a los mozos muertos nuna manifestación en defensa de los derechos llingüísticos del bengalí, en Dhaka (Bangladés) nel añu 1952. Dende Xunta Moza espliquen que “nun podemos más que sentinos identificaos cola mocedá falante de la llingua bengalí y con toles comunidaes onde hai llingües minoritaries en situación de subordinación”. Ye por ello que quieren aprovechar esti día “pa recordar la necesidá de preservar toles llingües, independientemente del so númberu de falantes, y remarcar la importancia de les mesmes nel patrimoniu común de la humanidá”.

Asina les coses, Xunta Moza sumóse a la celebración internacional convocando esti concursu d’amor al idioma maternu, que nun ye otra cosa, recuerden “que la denuncia de bona parte de la mocedá asturiano de la situación de desamparu na que s’atopa cuando quier facer una vida «normal» n’asturianu”. Pa ello, celebróse un conciertu de punk-rock n’asturianu col grupu moscón Misiva, acabante de presentar el so segundu discu de llarga duración Gran Mentira, nel CSOA La Madreña d’Uviéu, el pasáu vienres 22 de febreru. Amás de l’actuación de Misiva, nel actu diose a conocer la persona ganadora de la cuarta edición del concursu.

Moises Cime recibió un llote de llibros y de dellos materiales de la organización (camisetes, discos, etc.), amás de ser susceptible d’usa l’eslogan ganador en campañes futures de la organización.

Esti xueves día 21 de febreru na Consistorial (Plaza’l Sol, 2) d’Uviéu, a les 20:00 hores, celebraráse un diálogu poéticu con Esperanza Medina, presentando’l so poemariu “No recuerdo un invierno tan frío como éste”, asoleyáu pola editorial Trabe.

La Fundación Cultural Benéfica Fernández Lema, creada pola iniciativa y xenerosidá de Dolores Fernández Lema, convoca la edición d’esti añu del so premiu lliterariu, al que pueden presentase obres n’asturianu y en castellán. El Premiu al ganador pa la modalidá en llingua asturiana ta dotáu con 2.500 euros, mientres que’l de castellán tien un premiu de 5.000 euros. Les obres han tener un máximu de 20 folios din-A4 mecanografiaes a una sola llana y con un tamañu mínimu de fonte de 12 puntos.

Los participantes han de presentar les sos obres por sestuplicao, faciendo constar, según correspuenda, pa concursar al Premiu de Relatu Curtiu “Fernández Lema, Añu 2013, Modalidá en Llingua Castellana” o Premiu de Relatu Curtiu “Fernández Lema, Añu 2013, Modalidá en Llingua Asturiana”. Pa cualquier esclaración, los interesaos puen empobinase al teléf. de la Casa de Cultura de L.luarca-Valdés: 98 547 05 78. La presentación pue realizase hasta’l 15 de marzu de 2013, inclusive

Bases completes del concursu

Un añu más, la casa natal del Padre Galo, en Cadavéu, nel conceyu de Valdés, acueye la Xunta d’Escritores y otros profesionales. Les actividaes van entamar a les diez de la mañana cola presencia de Daniel González Suárez y Balbino Suárez Cortina, conceyales de Valdés, Xosé Ramón Iglesias Cueva, miembru de l’Academia de la Llingua Asturiana, Ana Fueyo (Directora Xeneral de Política Llingüística y José Modesta Vallina Ibáñez, alcalde de Valdés. Darréu, Rafa Lorenzo, Dani García y Fred Bougovin van ufrir a los asistentes una actuación poético-musical.

A les 11:00 hores, va tener llugar la primer mesa d’alderique, que va tratar sobre cine y llingua asturiana, cola participación d’Humberto Gonzali, escritor, Inaciu Iglesias, empresariu, Pedro Gilthoniel, organizador d’actividaes cine-forum, Santiago Rodríguez, bibliotecariu de Tinéu y René Baizán, productor de cine.

A les 11:30 va celebrase otra mesa titulada “La llingua asturiana y el teatru”. Nesta ocasión, l’alderique protagonizalu Andrés Presumido, director de teatru, Esther García López y Xosé Ramón Iglesias Cueva, escritores y miembros de l’Academia de la Llingua Asturiana, Manuela Busto Fidalgo, bibliotecaria de Castropol, Alberto Rodríguez, actor y presentador de “De folixa en folixa”, y Dora Méndez García, directora de la revista “Cosiquines de Cadavedo”.

La tercera y última mesa d’alderique va ser a partir de les 13:00 hores, y va tratar sobre “La llingua y la cultura asturiana” en xeneral y nel ámbitu llocal en particular, falando de la forma de tresmitila a les nueves xeneraciones, cuntando cola participación de Félix Menéndez González, bibliotecariu d’A Veiga, Carmen Guardado, escritora y profesora de primaria y llingua asturiana, Norberto Díaz Martin, director y profesor de colexu de Muñás, Javier Antonio Mainas, premiu “Alfonso Iglesias” de cómic, José Manuel Fernández Pérez, pregoneru de la fiesta de “La Regalina”, Dani García de la Cuesta, investigador y músicu tradicional, Rafa Lorenzo, cantautor, y Xosé Nel Riesgo, escritor y director de la Fundación Municipal de Cultura de la Universidá Popular de Xixón.

A les 13:45 falarásedel Festival Vaqueiru na braña d’Aristébanu y de la fiesta de “La Regalina” con Mary Rico, faciendo darréu alcordanza de les figures de los escritores Padre Galo, Casimiro Cienfuegos, Román Suárez Blanco y Nené Losada. Los participantes van despidise a les 14:20 hores.

La presentación de la obra ganadora del Premiu d’Ensayu y Investigación “Fierro-Botas” del Conceyu de Xixón, “La botella de Xixón. Oríxenes y desendolcu hestóricu de la botella de sidra d’Asturies”, d’Inaciu Hevia Llavona va presentase esti xueves 14 de febreru a les 19:30 hores nel Salón de Recepciones de la Casa Conceyu, cola presencia del conceyal de Cultura, Carlos Rubiera.

“La botella de Xixón. Oríxenes y desendolcu hestóricu de la botella de sidra d’Asturies” ye la obra ganadora del quintu premiu Fierro Botas, y ye un trabayu d’investigación al rodiu d’un elementu cimeru de la cultura asturiana, como ye la botella de sidra, sobre’l qu’hai pocos estudios fechos. Inaciu Hevia Llavona (Xixón, 1965) ye etnógrafu y collaborador d’estremaes publicaciones especializaes onde tien asoleyaos dellos artículos, principalmente de tema hestóricu y etnográficu dende va más de quince años.

El premiu, concedíu por mayoría del xuráu, quixo premiar lo novedoso del tema, rescamplando sobre manera la conxugación que l’autor fai ente’l patrimoniu cultural y etnográficu, la cultura popular y la industria; asina como l’apueste que fai por dar al mundu una mayor conocencia de Xixón y d’Asturies.

Esti xueves, 14 de febreru, a les siete y media la tarde, l’Atenéu Obreru de Xixón, asitiáu na cai Cuadonga 7, 1u esquierda, va acoyr la presentación del llibru “La hora de Asturias en el siglo XVIII”, d’Álvaro Ruiz de la Peña, doctor en Filoloxía Española y profesor titular de lliteratura española de los sieglos xviii, xix y xx, amás de director del “Instituto Feijoo de Estudios del Siglo XVIII”. La presentación del actu va correr a cargu del tamién profesor Gabriel Santullano, autor de numberosos llibros y artículos la hestoria moderna y contemporanea d’Asturies.

El llibru nun pretende ser una hestoria sistemática de l’Asturies ilustrada, sinón más bien un ensayu (“ensayu impuru” llamar l’autor), dende’l puntu de vista orixinal que s’adopta al analizar les tensiones culturales y sociales que se producen n’Asturies a lo llargo del sieglu. La estratificación social n’Asturies, el poder de la Ilesia y les devociones populares, les fiestes y l’ociu, la llectura, les biblioteques y los llibreros y mercaderes de llibros, la educación primaria y secundaria, los alboreceres de la Ilustración nel Principáu, la figura de Xovellanos (vista dende una posición oxetiva y non haxográfica), la cultura de les élites y la producción lliteraria y artística, les figures epigonales de principios del sieglu XIX, y otres temes, son trataes dende una perspectiva múltiple nun puzzle neñ que les sos pieces harmonicen en función de les demás. Una abondosa documentación y bibliografía sofiten esta obra, qu’aspira a la meyor conocencia de l’Asturies qu’empecipia’l camín de la modernidá.

La presentación de la obra ganadora del Premiu d’Ensayu y Investigación “Fierro-Botas” del Conceyu de Xixón, “La botella de Xixón. Oríxenes y desendolcu hestóricu de la botella de sidra d’Asturies”, d’Inaciu Hevia Llavona va presentase esti xueves 14 de febreru a les 19:30 hores nel Salón de Recepciones de la Casa Conceyu, cola presencia del conceyal de Cultura, Carlos Rubiera.

“La botella de Xixón. Oríxenes y desendolcu hestóricu de la botella de sidra d’Asturies” ye la obra ganadora del quintu premiu Fierro Botas, y ye un trabayu d’investigación al rodiu d’un elementu cimeru de la cultura asturiana, como ye la botella de sidra, sobre’l qu’hai pocos estudios fechos. Inaciu Hevia Llavona (Xixón, 1965) ye etnógrafu y collaborador d’estremaes publicaciones especializaes onde tien asoleyaos dellos artículos, principalmente de tema hestóricu y etnográficu dende va más de quince años.

El premiu, concedíu por mayoría del xuráu, quixo premiar lo novedoso del tema, rescamplando sobre manera la conxugación que l’autor fai ente’l patrimoniu cultural y etnográficu, la cultura popular y la industria; asina como l’apueste que fai por dar al mundu una mayor conocencia de Xixón y d’Asturies.

Los alumnos del Institutu Emilio Alarcos de Xixón participen nesti concursu que s’alluga nel Plan de Llectura, Escritura ya Investigación (PLEI) y al que pudieron presentase cartes d’amor n’asturianu, castellán, inglés y francés. La entrega de premios sedrá’l 14 de febreru.

Daniel Fernández, voceru de Compromisu por Xixón, informó que se solicitó al Conceyu de Xixón habilitar na Biblioteca d’El Natahoyo un espaciu pa llibros n’asturianu na nueva estantería doble qu’instalaron na mentada biblioteca, y la respuesta foi positiva, agora hai un espaciu más destacáu pa la lliteratura asturiana. La formación política “agradez al Ayuntamientu’l so apueste pol asturianu na Biblioteca d’El Natahoyo” y encamienta a apostar pola normalización del asturianu dientro de tolos ámbitos social y cultural, yá que ye un elementu enriquecedor y la so potenciación na mayoría de los casos nun supón gastar nin un euru más, namás voluntá política”.

Pa Compromisu por Xixón tamién rescampla “la dexadez institucional a tolos niveles respecto al asturianu” y recordaron que “esiste una obligación llegal pola que toles Alministraciones Públiques han fomentar l’usu del asturianu y l’usu de la toponimia oficial, que casi siempres s’escaez nel caxón”.