Lliteratura

El Conceyu de Cangas y l’Academia de la Llingua Asturiana (ALLA) entamen una edición especial del Día de les Lletres Asturianes en Cangas, el vienres 19 d’abril. El teatru Toreno va ser l’escenariu d’esta celebración presentanda pola presidenta de l’ALLA esti vienres pasáu. Ana Cano, recordó que’l Día de les Lletres Asturianes celébrase’l primer vienres del mes de mayu y que “nun puede sacase del Teatru Campoamor d’Uviéu”. Sicasí, anguaño a propuesta del Conceyu de Cangas el Día de les Lletres va tener una celebración previa.

L’actu va empezar cola presentación de la reedición del llibru Vocabulariu de Cangas al cargu del so autor Jesús Feito Calzón. Amás, l’actriz asturiana María Cotiello va facer un recital de dellos poemes que se recueyen en Lletres Lliterariu, “un adelantu en primicia de la presentación que se va realizar el Día de les Lletres n’Uviéu”, aseguró la presidenta de l’Academia. Pa pesllar l’actu, Carlos Alba “Cellero” va representar la obra Llázaro de Tormes.

L’alcalde cangués, José Luis Fontaniella, estimó’l xestu de l’Academia d’aceptar la collaboración del Conceyu pa llevar a cabu una edición especial del Día de les Lletres Asturianes en Cangas y destacó que puede suponer “l’entamu de distintes actuaciones y actividaes nel conceyu pa estes celebraciones”.

El Conceyu Bimenes ta acabante convocar el XVI Concursu de Cuentos pola Oficialidá del Asturianu. Los cuentos que se presenten al certame han de tar redactaos n’asturianu y nun pasar de les diez fueyes, mecanografiaes a doble espaciu y per una sóla cara.

El plazu de presentación de trabayos fina’l 31 de mayu. L’apertura pliques tendrá llugar el 3 de xunetu y la entrega premios fadráse’l 12 de xunetu, nel trescursu d’una xornada lliteraria. L’importe económicu de los premios ye: 600 € pal primeru, 450 € pal segundu y 300 € pal terceru.

Los cuentos, de los qu’hai que presentar l’orixinal, trés copies y una copia más en versión informática, han d’unviase a la direición que vien darréu: Conceyu de Bimenes. Martimporra, s/n. 33527 – Bimenes.

Dende la organización del concursu recuerden que “ye de destacar el compromisu del Conceyu Bimenes de caltener esti certame lliterariu, y l’esfuerzu qu’ello-y supón, magar qu’esti añu, a diferiencia de los anteriores, nun va cuntar col sofitu nin de la Conseyería d’Educación, Cultura y Deporte nin de la Obra Social y Cultural de Caxastur”.

L’Atenéu Obreru de Xixón foi l’espaciu escoyíu por Iniciativa pol Asturinau y Ástura pa celebrar l’Homenaxe a Pachín de Melás nel so 75 cabudañu. Col salón d’actos del Atenéu enllenu, recordóse la figura d’esti escritor en llingua asturiana nun actu presentáu por Inaciu Galán y nel que participaron Xuan Pandiella, d’Ástura, y persones del mundu la cultura como Sabel Tuñón, Monchu Iglesias, Javier Cubero o Xelu Neira, de la Tertulia Pachín de Melás.

El momentu más emocionante llegó cola intervención de la última fía viva de Pachín, Pilar Robles, que foi entrevistada nel actu sobre la vida de Pachín. Darréu entregóse a los representantes de la familia un ramu flores n’alcordanza de la figura del escritor xixonés.

Sentir l’actu completu n’Ivoox

Les Biblioteques de Llangréu (La Felguera, Sama y Ciañu) y l’Área de Cultura del so Conceyu preparen una nueva edición del so programa “Llangréu, un llibru abiertu”, que cada añu vienen faciéndose pola mor del Día del Llibru. Pa esta ocasión acutóse un llugar especial pal cómic, con una conferencia del dibuxante y hestorietista Ruma Barbero, que va acompañar otra cita tradicional nestes feches nel conceyu llangreanu, como ye’l so XI Concursu de Marcapáxines.

El programa, concentráu nos díes 22, 23 y 24 d’abril, inclúi tamién cuentacuentos, presentaciones de llibros, cine infantil y club de llectura. Na mañana del día 23 va celebrase una llectura pública na Plaza Merediz de La Felguera na que la tema principal de los testos escoyíos va ser “Lliteratura y cine”, un actu que va cuntar con un acompañamientu musical al cargu de los alumnos del Conservatoriu del Valle’l Nalón.

Programa completu.

Llunes, 22 d’abril

– 10.30 h. Cuentacuentos. Narración: Bibliotecaries de La Felguera. Collaboren: Escueles Infantiles “Pinin” y “Parque Nuevu”. Casa de Cultura “Alberto Vega”.

– 11.00 a 14.00 h. Trueque de llibros. Casa de Cultura “Escueles Dorado”.

– 11.30 h. Cuentacuentos. Narración: Bibliotecaries de Riañu. Collabora: Escuela Infantil “Garabatos”. Casa de Cultura “Federico García Lorca ”.

– 12.00 h. Charra: “El procesu creativu del cómic en llingua asturiana”, al cargu de Ruma Barbero. Casa de los Alberti.

Martes, 23 d’abril

– 12.00 h. Lliteratura y cine. Llectura pública na plaza Merediz de La Felguera (frente a la Casa de Cultura “Alberto Vega”).

Llectura pública de testos rellacionaos cola lliteratura y el cine. Ganador y premios del 11u concursu de Marcapáxines (celebráu nes biblioteques públiques de Llangréu). Música al cargu d’alumnos del Conservatoriu del Valle’l Nalón. Plantíu d’un árbol. Llangreanos nel Mundu.

– 16.00-19.00 h. Trueque de llibros. Casa de Cultura “Federico García Lorca”.

– 17.30 h. Cine. Kerity, la Casa de los Cuentos. Cine Felgueroso.

– 19.30 h. Presentación del llibru: Narciso Ibáñez Menta, el hombre de las mil caras, al cargu de la so autora Graciela Beatriz Restelli. Casa de Cultura “Escueles Dorado”.

Miércoles, 24 d’abril

– 10.30 h. Cuentacuentos. Narración: Bibliotecaries de Sama. Collaboren: Escueles Infantiles “Rapacinos” y “Travesures”. Casa de Cultura “Escueles Dorado”.

– 11.00 h. Talleres sobre’l llibru. Muséu dela Siderurxa d’Asturies. Collabora Conservatoriu Valle’l Nalón.

– 16.00–19.00 h. Trueque de llibros Casa de Cultura “Alberto Vega”.

– 20.00 h. Club de Llectura Carreteres secundaries, d’Ignacio Martínez de Pisón. Casa de Cultura “Federico García Lorca”.

Mientres tola selmana va poner en marcha una Campaña d’animación a la llectura en llingua asturiana.

Les asociaciones culturales “Versos Libres” y “Encadenados”, qu’axunten a un importante grupu de siguidores y escritores de poesía, entamen una nueva cita de los sos Alcuentros poéticos nel Vieyu Institutu de Xixón, que va llevar al salón d’actos del centru cultural xixonés al poeta Miguel Rojo güei vienres, 5 d’abril, a les 20’00 hores.

L’actu va tar presentáu pol traductor y poeta arxentín Ricardo Pochtar, quien va introducir el recital poéticu del autor cuartanu Miguel Rojo, que va repasar la so obra poética con especial dedicación a la so última obra, El paséu/El paseo (Ediciones Seronda, 2011. Edición billingüe).

Miguel Rojo (Tinéu, 1957), ye autor de delles obres de narrativa, tantu n’asturianu como en castellán (novela, cuentos, lliteratura infantil y xuvenil), y publicó los siguientes llibros de poesía: Buscador d’estrel.las (Editora del Norte, 1996. Premiu Fernán Coronas), Bilbao: estación terminal (Ámbitu, 2001), Llaberintos (Trabe, 2006. Premiu de la Crítica 2005), Territorios (Llibros del Pexe, 2007. Edición billingüe) y la citada El Paséu /El Paseo.

Les organizaciones Iniciativa pol Asturianu y Ástura entamen un actu d’alcordanza a la memoria d’Emilio Robles Muñiz, conocíu pol nomatu de Pachín de Melás, unu de los autores en llingua asturiana más populares del sieglu XX. Esti mes pasáu cumpliéronse 75 años de la so muerte na cárcele d’El Coto en Xixón y dende Iniciativa pol Asturianu ven más necesario que nunca reconocer la so figura “yá que les entidaes públiques nun faen un res pola so memoria nestos díes”. La última fía viva de Pachín y otros familiares confirmaron yá la so presencia nel actu.

Dende dambes organizaciones, creen que ye un personaxe “que nun pue ser escaecíu pola so importante aportación a a la lliteratura y a la llingua y cultura asturianes”, y por ello convidamos a tolos ciudadanos que quieran participar a facelo asistiendo al actu y lleendo un poema o otru testu de Pachín que-yos preste.

Amás de la familia, ta confirmada yá l’asistencia de dalgunos escritores y otres persones de la sociedá asturiana, que van facer homenaxe al escritor xixonés. L’actu celebraráse’l vienres 5 d’abril, a les 20 hores nel Atenéu Obreru de Xixón, allugáu na cai Cuadonga, 7 1u Izq.

Mª Esther García López, Miguel Rojo y X. Anxelu Gutiérrez Morán van participar nuna timba poética esti martes 2 d’abril de magar les ocho y media la tarde. L’actu tendrá llugar nel chigre Lord Byron d’Avilés, allugáu nel 1 de la cai Palacio Valdés. La entrada ye de baldre.

L’Academia de la Llingua Asturiana asoleyó’l poemariu últimu de Ricardo Candás, “Nos díes pensatibles” dientro de la so colección «Llibrería Académica», na que fai’l númberu 46.

Esta obra, ganadora del «Concursu de Creación Lliteraria Llorienzu Novo Mier» nel añu 2010, ye un poemariu que sigue’l bagaxe atronador d’un mundu que mos supera, al traviés d’una poesía reflexiva, pensatible, sobre la mirada nubla del amor y de la tierra. Siempre Influenciáu pol llinguaxe metafóricu, el poeta percuerre un camín enllenu de ilancos y desencantu nel que convién, dacuando, parar pa echar tenrura sobre lo andao. La so pesonalísima visión pretende reconstruir un pasáu naufragáu al traviés del llinguaxe señardosu y asosegáu.

Ricardo Candás (Xixón, 1977) ye llicenciáu en Filosofía pola Universidá d’Uviéu. Escritor billingüe, algamó’l premiu de poesía «Fernán-Coronas» del añu 2005 con “Quiciás seya payares”. Como narrador asoleyó’l llibru de rellatos “Les últimes pallabres” y tien ganaos dellos premios, amás d’asoleyar davezu en revistes como Formientu o Lletres Asturianes, ente otres.

La editorial Zahorí ta acabante asoleyar “Rutas y senderos para disfrutar Asturias”, un llibru de Pilar Fernández Arteaga y Macrino Fernández Riera, nes que los autores escueyen cincuenta itinerarios que van dende la mariña asturiana al Cordal. La guía inclúi dalgunes rutes que “son accesibles pa xente de toa edá y condición física”.

El diseñu del llibru inclúi semeyes, gráficos y una riestra d’información de caún de les rutes, que faciliten al andariegu les coses.

Más información sobre’l llibru

El xueves, 4 d’abril, el “Ciclu de pallabra” del Centru Niemeyer va cumplir con una de les sos cites más destacaes, cola visita del premiu Nobel Seamus Heaney. El poeta irlandés va ser entrevistáu por Jordi Dolce -coordinador del ciclu, traductor y poeta asturianu-, nun alcuentru que se va celebrar na cúpula del centru cultural a les 20’00h. La entrada va ser llibre y gratuita hasta completar aforu, previa retirada d’invitación. Les invitaciones yá pueden retirase na recepción del Centru Niemeyer y na recepción de La Llaboral de Xixón.