Lliteratura

El comerciu de Samartín pon “La llingua nel escaparate”. La Conceyalía de Cultura y la Oficina de Normalización Llingüística de Samartín del Rei Aurelio acaben d’entamar una nueva campaña pa fomentar la lliteratura n’asturianu con motivu de la XXXIV Selmana de les Lletres Asturianes. Baxo l’eslogan “La llingua nel escaparate” y dende’l 29 d’abril al 3 de mayu 85 comercios de L’Entregu, Sotrondio y Blimea van tener espuestos nos sos escaparates un mínimu de dos llibros n’asturianu.

A tolos establecimientos participantes va entregáse-yos un cartel col eslogan de la campaña, cartel nel que tamién s’incluyen instrucciones pa que la xente interesao pueda participar nella, yá que van poder ganar un llote de llibros n’asturianu si durante esa selmana respuenden d’un mou correutu a les entrugues que se van facer dende la páxina de facebook de la Oficina de Normalización Llingüística del conceyu rellacionaes con toos esos llibros.

Con esta campaña búscase convertir al conceyu de Samartín nun gran escaparate de la nuestra lliteratura, mostrando asina l’arguyu de tener una amplia nómina d’obres y autores d’indiscutible calidá. Por too ello, durante esa selmana van tener cabida nos escaparates títulos de tolos xéneros y pa toles edaes, una bona muestra cola que se pretende dar a conocer a la xente la lliteratura que se fai n’Asturies, animándolos asina a que llean y disfruten d’estos llibros.

Ver semeyes de los escaparates colos llibros

Güei, llunes 29 d’abril a les 19:30 hores en Grau entamen los actos de la XXXIV Selmana de les Lletres Astuianes. Sedrá na Capiella los Dolores col rectial “El nome de las cousas. La voz de Nené Losada”, cola participación de los poetes Antón García, Taresa Lorences y Esther García y l’actuación musical de Rafa Lorenzo. L’actividá faise en collaboración cola Fundación Aula de les Metáfores.

Porgrama completu d’actividaes

El vienres 17 de mayu a les 7 la tarde nel Centru Valey de Piedrasblancas va celebrase un recital poéticu-musical. Ta abiertu’l plazu pa mandar poemes y participar. Los organizadores animen a “da-y la máxima presencia posible a la poesía n’asturianu” y animen pa ello a mandar a administracion@valeycentrocultural.org una ficha d’inscripción qu’ha mandase cubierta xunto colos dos poemes propuestos pa la llectura. El plazu ta abiertu hasta’l 30 d’abril.

Han incluise nome completu y apellíos, llugar de nacimientu y de residencia, dirección de corréu lletrónicu, teléfonu de contactu, blogue o páxina web (si lu tienes) y currículu lliterariu curtiu.

La Casa Cultura de Crevillent, nel País Valencianu, celebró esti 23 d’abril el Día del Llibru cola llectura d’El Quixote en numberoses llingües, ente les que tuvo l’asturianu. Nel actu participó l’alcalde de Crevillent, César Augusto Asencio, alumnos de los colexos del conceyu y personalidaes de la llocalidá.

El xueves 25 d’abril van desenrrollase nel marcu de la Folixa del Llibru, dos actividaes gratuites na Sala d’Arte del Centru Sociocultural de Les Vegues. A les siete la tarde va presentase’l llibru “Arraianos”. Con él, la editorial asturiana Hoja de lata recupera pal públicu en castellán esti clásicu de Xosé Luís Méndez Ferrín, ex presidente de la Real Academia Galega, y autor de culto en llingua gallega.

Arraianos treslládanos a la frontera difusa ente la Galicia interior y el norte de Portugal, territoriu de bruxes, del agua y la piedra de les casones solariegues.

En diez relatos Ferrín llévanos al so universu particular, inquietante como la borrina que cubre a los protagonistes d’estes histories. La Raya ye la llinia invisible que separta a los habitantes d’España y Portugal, tierra enllena d’historia de contrabandu, lluches de poder, caciquismu y sometimientu a les autoridaes.

La narrativa de Ferrín destaca pola riqueza del so llinguaxe, clásicu, precisu, esquisitu, y pola capacidá enorme del autor pa componer atmósferes qu’envuelven al llector. Ferrín foi quien a crear un mundu fantásticu particular, presente nestos relatos. El realismu máxicu llatinoamericanu tien un esponente firme al otru llau del Atlánticu. Delles veces propuestu pal Premiu Nobel de Lliteratura.

Arraianos ye una de les obres más valoraes de Ferrín y, de fechu, foi Premiu Nacional de la Crítica 1992 y ye llectura obligatoria en secundaria.

Por cuestiones de salú, l’autor nun puede tar presente nel actu; sicasí, la editorial, representada por Daniel Álvarez Prendes, va proyectar un documental sobre l’autor. Na presentación, el responsable de la Casa de la Llingua va facer una introducción a la narrativa de Ferrín traducida al asturiano.

A les ocho la tarde va proyectase “El tercer home” dobláu al asturianu por Gonzali Producciones.

”El tercer home” ye una película de cine negro, del añu 1949 y con una duración de 104 minutos. Dirixida por Carol Reed y protagonizada por Orson Welles, recibió bien de premios (como l’Oscar a la meyor fotografía) y crítiques afalagadores, siendo ún de los filmes clásicos del xéneru.

Inspirada na novela homónima de Graham Greene, la película preséntanos un escritor de noveles policíaques que llega a Viena nel añu 1947, cuando la capital austríaca ta ocupada poles fuerces de los aliaos. Va en busca d’un amigu de la infancia y el mesmu día que llega paez ser que l’amigu muerre atropelláu; entós, l’escritor decide investigar les causes del crime.

Con motivu de la celebración de la XXXIV Selmana de les Lletres Asturianes, la Conseyería d’Educación, Cultura y Deporte y el Aula de Les Metáfores organicen en Grau el llunes 29 d’abril un actu poéticu-musical a les 19:30 hores na Capiella los Dolores de Grau y con entrada llibre.

La XXXIV Selmana de les Lletres Asturianes nesta ocasión va tar dedicada a la escritora Nené Losada Rico (Ḷḷuarca, 1921-2009). La obra y la figura de l’autora de Valdés, una de les poetes más reconocíes de la nuesa lliteratura, va ponese en valor con una serie d’actividaes a lo llargo de tola selmana en delles lacalidáes asturianes.

L’Institutu d’Enseñanza Secundaria Virxe de Cuadonga de L’Entregu va acoyer dende’l 29 d’abril al 3 de mayu una esposición sobre los escritores de Samartín del Rei Aurelio. Na muestra incluyénse 10 paneles onde se fai un repasu de la biografía, obra y testos de distintos autores del conceyu como Xulio Arbesú, Pablo Rodríguez Medina, Chechu García o Manuel Asur, ente otros.

Amás, a lo llargo de la selmana l’alumnáu del centru va trabayar cuestiones rellacionaes colos conteníos d’esta esposición, y van ser ellos mesmos los que busquen y ellaboren información complementaria a la qu’ufierten los paneles. Asina, cartelos ellaboraos por ellos mesmos sobre estos autores van sirvir de complementu a la propia esposición.

Esta muestra forma parte del programa d’actividaes entamáu dende la Conceyalía de Cultura de Samartín del Rei Aurelio y la Oficina de Normalización Llingüística en collaboración con distintos centros educativos pa celebrar la XXXIV Selmana de les Lletres Asturianes.

Esti llunes, 22 d’abril, van entamar les celebraciones por mor del Día del Llibru n’Avilés. Sedrá a les 19:30 con una conferencia de Santiago Caravia, xefe de la estaya de bibliografía asturiana na Biblioteca d’Asturies, que falará de los retos y perspectives que tienen per delantre les biblioteques públiques asturianes.

El martes 23 a les 19:30, Miguel Solís Santos, escritor y miembru de l’ALLA, dará llectura a al conferencia “La xeneración del surdimientu de la llingua: una güeyada dende dientro”, mientres que’l miércoles, a la mesma hora, l’investigador y miembru del RIDEA, Xosé Lluis Campal, dará a conocer la figura del poeta avilesín Bernardo Guardado.

Amás, los díes 25 y 26 van presentase los llibros “Los jinetes del águila” y “Margaritas de Parma”.

En payares pasáu abriérense les convocatories de los Premios Timón qu’entama l’Asociación Cultural L’Arribada. Son el VII Premiu Timón p’autores en llingua asturiana y n’eonaviegu, el IV Premio Timón p’autores asturianos en llingua castellana (pa esta edición, opten a los gallardones los escritores que nacieren nel añu 1963 o antes) y el I Premiu Timón de Cultura Asturiana destináu a asociaciones, sociedaes y fundaciones con sé na nuestra comunidá autónoma que tengan como fin la conservación y promoción de la identidá cultural del país.

Estes candidatures puen presentales una persona o un colectivu nes señes de corréu electrónicu de l’asociación: larribada@gmail.com. Ta a piques de zarrar el plazu de presentación, el día 2 de mayu a les 12 hores.

Los gallardones consisten nuna obra del escultor y ceramista xixonés Jesus Castañón pa cada premiu, y sedrán entregaos mientres la cellebración de La Vagamar 2013.

Hasta güei les candidatures presentaes son:

I Premiu Timón de Cultura Asturiana – Sociedá Humanitarios de Samartín, Fundación Belenos, Asociación Cultural San Tirso del Eo, Tertulia Cultural El Garrapiellu, Fundación Caveda y Nava, Sociedad Popular y Cultural La Regalina, Xunta pola Defensa de la Llingua Asturiana y Asociación Cultural “Ensame Sidreru” .

VII Premiu Timón – Lurdes Álvarez, Pablo Ardisana, Manuel Asur, Sabel de Fausta, Esther Prieto, Miguel Rojo, Miguel Solís Santos, Xosé Bolado, Milio Rodríguez Cueto, Adolfo Camilo Díaz, Ignaciu Llope, Ismael González Arias, Taresa Lorences, Lluis Xabel Álvarez, Gonzalo Suárez, Esther García López, Alberto Cobreros Gil, Cristina Muñiz Martín, Esther Prieto, Ismael María González Arias, Francisco Xavier Frías Conde, Sabel de Fausta y Ánxel Álvarez Llano.

IV Premio Timón – Fulgencio Argüelles, Carmen Gómez Ojea, Carmen Ruiz-Tilve, Pilar Sánchez Vicente, Pepe Monteserín, Francisco Álvarez Velasco, Fernando Beltrán, José Luis Argüelles y Juan José Plans.

Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011) y Antón García (2012); y del Premio Timón, Luis Fernández Roces (2010), Juan Méjica (2011) y Fernando Menéndez (2012).

Güei, miércoles 17 va facese una presentación del númberu 11 de la revista Formientu, incluyendo recital y una charra sobre Iniciativa pol Asturianu. Sedrá na “Escuela llar” del Colexu Horacio Fernandez Iguanzo en La Foz (Morcín) a les ocho la tarde. Na mesma van participar escritores de la revista. L’actu va presentalu Inaciu Galán, director de Formietu, periodista y escritor.