Lliteratura

El Centru de Cultura Vieyu Institutu de Xixón va acoyer el vienres 3 de mayu a les 20.00 hores un recital d’Humberto Gonzali. L’autor, ñacíu en Figareo, Mieres, en 1961, ye xestor cultural. Foi profesor de llingua asturiana y coordinador de la IV Xunta d’Escritores Asturianos celebrada en Lluanco en 1998. Impulsor del eventu lliterariu L’Arribada que se celebra tolos años en Xixón dende 2006, tamién preside’l Círculu Lliberal d’Asturies.

Como narrador, tien asoleyao los llibros de relatos Anatomíes de la mañana(1995) ya Histories escabroses (2002). Y como poeta, los poemarios Augua d’invocación (1988), Poemes en prosa (1992), Hábitat azul (1995), Ámbitu elemental (1997), Del país de la caliza (1997), Les esferes del tiempu (1998), De nueche y agua (2000), Tiempu de nós (2001) y Decenariu (2005). Tamién ye responsable de traducciones del francés y el catalán al asturianu.

L’actu va presentalu Aurora García Rivas con música de Dani García de la Cuesta.

Les Oficines de Coordinación Cultural y Llingüística d’Ozcos-Eo y del Parque Histórico del Navia van repartir de baldre obres lliteraries escrites en gallego-asturianu. Ye la cuarta edición d’esta actividá de lliberación de llibros que se fai na zona eonaviega.

Nel facebook de la Mancomunidá Ozcos-Eo y na páxina web del Parque Histórico del Navia www.parquehistorico.org, fízose públixa yá una llista colos llugares distribuyíos per tolos conceyos d’esta zona onde van poder atopase llibros de baldre.

La idea ye qu’en lleendo’l llibru se mande la información sobre’l llugar onde se posa a les direcciones: culturalylinguistica@oscos-eo.net y cultural@parquehistorico.org .

La presentación de la edición conmemorativa El ríu y la memoria, antoloxía poética de Nené Losada, al cargu de Taresa Lorences, va servir pa inaugurar la Feria del llibru y del discu n’asturianu n’Avilés, que va tar abierta hasta’l domingu 5 de mayu, de xueves a sábadu: de 11 a 14; y de 17 a 21 hores y el domingu de 11 a 19 hres, na Antigua Pescadería Municipal.

Esti mesmu xueves a les 19:30 hores va facese la oresentación de llibros de la editorial Asturtoons: •El día de los charcos, d’Enrique Carballeira, •Mio ma ye un dragón coloráu, de Xavier Frías Conde y •Nel, el coríu que nun sabía nalar, d’Inaciu Galán.

El vienres, 3 de mayu, produciráse a les siete la presentación del llibru Carne de melandru, de Milio Rodriguez Cueto (Vtp Editorial), y a les ocho la del llibru La Chelita. El Salvador, 1992, novela gráca de Ruma Barbero editada por Tierra Llibros.

El sábadu 4 de mayu a les 12 habrá sesión de cuentacuentos y a la una la tarde la presentación del llibru Un corte de pelo, selección de poemes de Raymond Carver cola traducción de Pablo Texón (Suburbia Ediciones).

A les seis será momentu pa la presentación del númberu 11 de la revista de lliteratura moza Formientu, a la que-y siguirá la del llibru Aramar en el bosque de las letras / Aramar nel bosque das lletras, de Silvia Méjica (Ojo x hoja Editora), rematando con un Alcuentru Muyeres y lletres, con Sofía Castañón y Vanessa Gutiérrez.

La xornada cabera entamará a les 12 con sesión de cuentacuentos. Darréu fadránse xuegos tradicionales infantiles, col Grupu de Deporte Rural «6 Conceyos». A les 12:30 habrá una actuación d’Anabel Santiago, n’homenaxe a la escritora Nené Losada Rico.

A les 13:30 habrá una presentación de POITIER (Soporte de gaita), un inventu revolucionariu nel mundu de la gaita, de Pablo Carrera.

Pela tarde piésllase la Feria cola presentación a les 17 hores del Mapa lliterariu asturianu, a les 18 del Refraneru temáticu asturianu, de Xandru Martino Ruz (editorial Picu Urriellu) y a les 18:30 cola presentación del llibru Cuentos colloraos de la tradición oral asturiana, d’Alberto Álvarez Peña (editorial Picu Urriellu).

A les 19:30 hores, el Salón d’Actos del Campus d’Humanidaes de la Universidá d’Uviéu va acoyer la presentación de los cinco llibros ganadores de los premios lliterarios 2012 de la Conseyería de Cultura. Un actu que ta dientro de la Selmana de les Lletres Asturianes y que va presentar Vanessa Gutiérrez, con mesa redonda colos autores y coloquiu.

Premios 2012.

•Premiu «Xosefa Xovellanos» de novela: La vida increíble, de Quique Faes.

•Premiu «Xuan María Acebal» de poesía: El llibru de les coses misterioses, de José Ángel Gayol.

•Premiu «Máximo Fuertes Acevedo» d’ensayu: Los deseos del dineru, de Xulio Arbesú.

•Premiu «M.ª Josefa Canellada» de Lliteratura Infantil y Xuvenil: Carne de melandru, de Milio Rodríguez Cueto.

•Premiu «Alfonso Iglesias» de Cómic: Homes, de Javier Antonio Marinas García.

Esti xueves 2 de mayu, dientro del marcu de la Folixa del Llibru, van facese dos actos na Sala d’Arte del Centru Sociocultural de Les Vegues, toos dos de calter gratuitu y d’asistencia llibre: a les 19 hores, presentación del últimu númberu de la revista lliteraria Formientu; y a les 20 hores, presentación de la novela El príncipe derviche, de Xandru Fernández.

La revista Formientu fundóse nel añu 2006 con un oxetivu bien claru: publicar les creaciones lliteraries de los y les autores más mozos de la lliteratura asturiana y dales a conocer.

Esa finalidá sigue calteniéndose nel númberu 11 de la publicación, onde vuelven presentase obres de les voces más nueves de la lliteratura asturiana: Denis Soria, Vítor Suárez, Cristina Menéndez, Belarmino Álvarez, Noemí Rodríguez, Alfredo Huergo, Blanca Fernández, Daniel Fernández, Abel Aparicio, Xurde Álvarez, Ismael Carmona, Félix Iglesias, Xosé B. Álvarez, Laura Marcos, Andrés Astur y Javier Cubero.

Dalgunos d’ellos acompañarán na presentación al director de la publicación, Inaciu Galán.

Xandru Fernández (Turón, 1970) ye ún de los escritores más valoraos de la lliteratura asturiana; nesta ocasión visita Corvera pa presentar la so última novela, El príncipe derviche, cola que ganó’l Premiu Xosefa Xovellanos de novela qu’entama la Conseyería de Cultura del Principáu d’Asturies.

Autor d’obres como Los homes de bronce, Les ruines o Entierros de xente famoso, tamién tradució obres de Kafka, Thomas Mann y Nietzsche al asturiano.

El príncipe derviche ye la historia d’una bomba, sí, pero tamién ye, en palabres del escritor Antón García “un artefactu narrativu deslumbrante (…) que se construye sacándo-y el xugu a la capacidá espresiva del asturianu”.

Na presentación van participar en xunto col escritor turonés, Silvia Cosio (responsable de Suburbia Ediciones), el responsable del área de Cultura del Ayuntamientu de Corvera, Adolfo Camilo Díaz, y el técnicu de la Casa de la Llingua, Rafael Rodríguez Valdés.

L’Academia de la Llingua Asturiana (ALLA), celebra’l vienres 3 de mayu la edición XXXIV del Día de les Lletres Asturianes a les 20,30 hores nel Teatru Campoamor d’Uviéu. La entrada ye llibre. Nel actu acoyeráse como nuevu académicu correspondiente al profesor Don David Melendi Palacio, doctor n’Inxeniería Informática y profesor del área d’Inxeniería Telemática de la Universidá d’Uviéu, onde vien desendolcando’l so llabor investigador, siendo ún de los principales promotores na anovación de la llingua asturiana nes nueves teunoloxíes. El vienres ASTURNEWS ufre una entrevista con él.

Esta Xunta Estraordinaria de l’Academia de la Llingua Asturiana finará col discursu institucional de la presidenta, Dª Ana María Cano González.

L’actu, pal que la entrada ye llibre, como davezu, tará presentáu por Sonia Avellaneda y Próspero Morán, director d’ASTURNEWS y cuntará con un entamu musical a cargu del gaiteru Álvaro Cueto. Como pieslle tendrá l’actuación del cantautor Toli Morilla.

Editorial Asturtoons presentará esti xueves, 2 de mayu, nel colexu Públicu Bernardo Gurdiel de Grau el nuevu llibru en llingua asturiana, de Xavier Frías Conde, tituláu Mio ma ye un dragón coloráu. L’actividá cuntará cola participación de los neños de quintu y sestu cursu del tercer ciclu de primaria y entamará a les doce y media del mediudía. Nel actu tamién participará l’ilustrador del llibru, Enrique Carballeira.

Autor y ilustrador falarán colos neños del colexu, firmarán exemplares y presentarán esti nuevu volume de 32 páxines ilustráu a color. Mio ma ye un dragón coloráu ye una hestoria onde nun falta la intriga -y sobre too muchos sacos d’humor- qu’enllenen les páxines y determinen les situaciones nes que participen los sos protagonistes. ¿Y si descubrieses un día que to madre ye un dragón coloráu?¿Qué pasaría?

Un actu poético-musical tituláu “Biltar”, va celebrase nel Centru Niemeyer esti martes 30 d’abril a les 20.30 hores. Nel mesmu va cuntase cola participación d’Alfredo González, Pandereteres de Fitoria, Anabel Santiago, Mapi Quintana, Héctor Braga, Sofía Castañón, Pablo Antón Marín Estrada, Aurora García Rivas, Xosé Anxelu Gutiérrez Morán, Pablo Texón y Xera.

La Xunta Xeneral va recuperar esti añu la llectura institucional de testos n’asturianu, que celebró dende 2005 a 2011. L’actu tendrá llugar esti añu a les 12 la mañana de güei, martes 30 d’abril y cuntará cola llectura del presidente de la Xunta, el socialista Pedro Sanjurjo, dos miembros del gobiernu por confirmar, nueve diputaos d’ente los 45 y diez estudiantes. Amás a lo llargo la mañana van celebrase visites guiaes n’asturianu pa escolinos.

N’otres ocasiones la Xunta recibió tamién a diputaos y senadores de les cámares estatales, amás d’otres figures de la sociedá asturiana, como’l rector de la Universidá d’Uviéu. Amás, asoleyábase un llibru con testos referentes a la Selmana de les Lletres Asturianes de cada añu.

Güei, llunes 29 d’abril a les 18:00 hores inaugúrase na casona del Bravial (travesía de Goya, Blimea –Samartín del Rei Aurelio–) la esposición «Trabe, historia d’una editorial asturiana», que va tar abierta al públicu hasta’l día vienres 31 de mayu.

Nella faise un repasu, per un llau de los 21 años de vida d’esta editorial al traviés de llibros, prebes d’imprenta, cuadros etc., y per otru una una revisión del procesu técnicu de producción de llibros.

L’amuesa va tar abierta de llunes a vienres n’horariu de mañana de 9:00 a 13:00 hores.