Lliteratura

Un cursu celebráu estos meses atrás nel Centro Montañés de Buenos Aires), por Ugo José Rodino y baxo’l títulu ‘Curso Literatura, Región y Lengua, Bibliografía descriptiva’ tuvo espaciu pal estudiu de les lliteraturaes del norte de la Península Ibérica. Ente los conteníos lliteratures del catalán, gallegu, euskera, asturianu y aragonés, asina como la lliteratura cántabra en castellán y con variantes dialectales; y les lliteratures d’estos territorios en castlelán.

Nel cursu, hubo tiempu tamién pal estudiu de les lliteratures del restu de la península, asina como de dellos países llatinoamericanos.

L’escritor corverán Berto García asoleya’l so nuevu poemariu “Inercia” cola editorial Trabe. Esti ye’l quintu poemariu del autor corverán, el cuartu cola editorial qu’agora dirixen Samuel Castro y Esther Prieto.

Berto García ñaz en Les Vegues (Corvera), en 1975. Esti ye’l quintu poemariu que da a imprenta l’autor, depués de trés editaos nesta mesma editorial, Trabe: Ensin otra sida (2005), Treslallende (2007), escritu a medies con Carlos Suari, y Manual contra’l vacíu (2008), Premiu Fernán-Coronas 2007, y de Cuando’l mundu debala(Academia de la Llingua Asturiana, 2011), Premiu Llorienzu Novo Mier 2009.

Tien amás bien d’obra espardío peles revistes lliteraries del país, como El Canciu’l Cuélebre, Lletres Asturianes, Lliteratura, Formientu, Lletres Lliterariu o Entellunu, y nes antoloxíes Pa[i]saxes y Cuando la memoria fala. Tien feches les tornes, na estaya de la lliteratura infantil, pa la editorial Cumio, de los llibrosFlorenta, la gata poeta y Les fábules de Leonardo da Vinci. L’autor ye mayestru d’Educación Infantil, amás d’espertu en Llingua Asturiana.

Pese a la so mocedá, Pablo Solares Acebal, autor maliayés ñacíu en 1992, va ver yá la so segunda novela nel mercáu. Esti mozu escritor en castellán, que presentó “6 de Noviembre” l’añu pasáu, vuleve al mercáu con “Explosión en el corazón del diablo”, asoleyada por por Seleer. Tará nes llibreríes a partir del mes de xunu, pero na rede yá pue vese’l trailer del llibru. La obra estrémase en dellos segmentos temporales y ta ambientada nes llocalidaes asturianes de Villaviciosa, Uviéu y Xixón. Amás, l’autor dedica una parte de la so novela a falar alredor del fallecimientu de la so madre por neglixencia médica nun hospital de Xixón en 2009.

Na obra, les hermanes Rosas, pertenecientes a una familia de clas alta y propietaries de la finca Rosalinda, alleguen pa curiar de la so tía nel so llechu de muerte. Por embargu lo que diba ser una duce tarde de domingu conviértese nun viaxe nel que se despinten los sos secretos. A pesar de los sos esfuercios por intentar borrar el pasáu, el diañu va siguir presente nes sos vides pa recorda-yos los sos pecaos.

La novela entama con un fragmentu del llibru IX de Paraísu Perdíu de John Milton y esti diañu, el descritu por Milton nel sieglu XVIII, ye’l mesmu personaxe que ta presente na novela de Solares-Acebal. Coles mesmes, “Explosión en el corazón del diablo” entemez xéneros como’l misteriu, el suspense y el culebrón y, al igual que na so predecesora, nun falta’l realismu máxicu.

La Conseyería d’Educación, Cultura y Deporte vien de convocar los premios lliterarios en llingua asturiana pal añu 2013: la 34.ª edición del Premiu “Xosefa Xovellanos” de novela; la 19.ª edición del Premiu “Xuan M.ª Acebal” de poesía; la 19.ª edición del Premiu “Máximo Fuertes Acevedo” d’ensayu; la sesta edición del Premiu “María Josefa Canellada” de lliteratura infantil/xuvenil; y la quinta edición del Premiu “Alfonso Iglesias” de cómic.

Bases completes

“El ríu y la memoria, antoloxía poética de la escritora valdesana Nené Losada Rico (1921-2009)”, preparáu por Taresa Lorences, con un estudiu de la obra de Losada y una antoloxía de la so poesía, como regalu pal Día del Llibru n’asturianu 2013 yá ta disponible en PDF na sección «Descarga de publicaciones» de la páxina web de Política Llingüística.

Nené Losada Rico (1921-2009) dexó tres de sí una considerable producción poética en castellanu y n’asturianu, recoyida en seis poemarios y diverses antoloxíes. A lo llargo de la so trayectoria, Nené Losada esperimentó una evolución nel tratamiento de la obra, dende una primer etapa más anclada na tradición popular, hasta otra posterior qu’entama dica los años ochenta, caracterizada nel planu formal por abandonu de la rima y l’adopción del versu llibre, y nel aspectu temáticu por un intimismu líricu que se resuelve con gran intensidá en poemes de factura breve y condensada.

Descarga’l llibru de baldre

La Conseyería d’Educación, Cultura y Deporte va convocar nel presente añu 2013 tres llínies de sovención pa impulsar l’usu del asturianu y del gallego-asturianu, eliminando les partíes pa usu del asturianu pa empreses y p’asociaciones. Les sovenciones pa la edición de llibros acaben d’abrir convocatoria pa empreses editoriales y tienen como finalidá “ampliar el círculu de llectores y l’ámbitu d’espardimientu de la lliteratura asturiana”. La partida d’esti añu ye de 100.000 euros. L’añu pasáu entregáronse 84.480 euros nesta llinia.

Esti añu convocaránse ayudes tamién pa la edición musical a empreses dedicaes a la producción de la música n’asturianu y en gallego-asturianu, que se realice en diversos soportes físicos o dixitales; y pa la promoción del asturianu o’l gallego-asturianu nos medios de comunicación. Van poder solicitar estes subvenciones les empreses titulares de medios de comunicación d’ámbitu asturianu, yá seyan empreses periodístiques, radiofóniques, televisives o d’internet, que produzan espacios onde s’utilice l’asturianu o’l gallego-asturianu.

Convocatoria completa nel BOPA

Güei, xueves 16 de mayu, Ediciones Trabe entama otra vuelta los Xueves Lliterarios na vinoteca La Consistorial col alcuentru ente dos “pesos pesaos” de la lliteratura asturiana: Xulio Arbesú y José Ángel Gayol. L’actu va celebrase ente les 20:00 y les 22:00 hores na Plaza’l Sol, 1, d’Uviéu.

La Conseyería d’Educación, Cultura y Deporte vien de convocar los premios lliterarios en llingua asturiana pal añu 2013: la 34.ª edición del Premiu “Xosefa Xovellanos” de novela; la 19.ª edición del Premiu “Xuan M.ª Acebal” de poesía; la 19.ª edición del Premiu “Máximo Fuertes Acevedo” d’ensayu; la sesta edición del Premiu “María Josefa Canellada” de lliteratura infantil/xuvenil; y la quinta edición del Premiu “Alfonso Iglesias” de cómic.

Bases completes

Una presentación del númberu 11 de la revista Formientu va celebrase’l sábadu 4, a les 18 hores, na Feria del Llibru y del Discu n’asturianu n’Avilés, asitiada na Antigua Pescadería Municipal. Plaza de Santiago López, númberu 1.

La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. Con esta nueva entrega ábrese una etapa nueva, pasando de dos a un solu númberu al añu, pero con más páxines, de 30 a más de 70, y con una edición más curiada.

Esti númberu cunta con testos de Denis Soria, Vítor Suárez, Cristina Menéndez, Belarmino Álvarez, Noemí Rodríguez, Alfredo Huergo, Blanca Fernández, Daniel Fernández, Abel Aparicio, Xurde Álvarez, Ismael Carmona, Félix Iglesias, Xosé B. Álvarez, Laura Marcos, Andrés Astur y una crítica lliteraria de Javier Cubero.

Amás estrénase la sección “Cuando… yera autor mozu” dedicada nesti casu a Pin de Pría. Na sección búscase dar la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión ye “Llibertá”, asoleyáu por Pin de Pría con 23 años.

El sábadu 4 de mayu a les seis y media la tarde va producise la presentación del poemariu en gallego-asturia u “Al xeito del tambor”, d’Ana Vega en LlibrUviéu, feria asitiada na Plaza Trascorrales de la capital asturiana.