Lliteratura

Un añu más, la Sociedá Popular La Regalina abre’l plazu pa presentar obres al so premiu de poesía, dedicáu a la figura del Padre Galo (1884-1939), clásicu de la lliteratura asturiana. El tiempu pa presentar orixinales fina’l 18 de xunetu. Al concursu pueden presentase poemarios en llingua asturiana, con un mínimu de 275 versos. Los trabayos han mandase a la Sociedá, que ta asitiada nel Casinu de Cadavéu, na cai Curión e/n (Valdés). El premiu ye 1.000 euros y la posibilidá de publicar el poemariu . El premiu pue quedar ermu, conociéndose’l resultáu del xuráu, el 7 d’agostu, aniversariu del ñacimientu del Padre Galo.

Los trabayos entregaránse por quintuplicáu nos llocales sociales de la Sociedá Popular “La Regalina”, o unviaránse per corréu. Dirán ensin firma, con un lema o nomatu. Nun sobre zarráu dirán les señes del autor col mesmu lema o nomatu que tenga’l poemariu.

El Xuráu dará a conocer el ganador nun actu públicu en Cadavéu, el día 7 d’agostu, aniversariu del nacimientu del Padre Galo. Los trabayos non premiaos podrán recoyese nos llocales de la Sociedá Popular “La Regalina” dientro los 30 díes posteriores al fallu.

Nos últimos años ganaron autores como Héctor Pérez Iglesias, Rubén d’Areñes, Carmen Guardado, Berto García o L.luis Fernández, ente otros.

Isabel Gutiérrez Novo (Llanes, 1980) ye la ganadora del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so decimosesta edición. El primer premiu, dotáu con 600 euros, foi pa la so obra “Hestories cruciaes”. El segundu premiu, dotáu con 450 euros, foi pal cuentu “Al serviciu de Cassius”, de Pablo Rodríguez Medina (L’Entregu, 1978), autor habitual na nómina de premiaos d’esti certame, y Raúl Castañón del Río (Uviéu, 1969) algamó’l tercer premiu, al que se-y apurren 300 euros, con “El camín de l’arcu la vieya”.

Nesta edición el xuráu tuvo compuestu polos escritores Xulio Vixil Castañón, Nacho Fonseca Alonso y Héctor Pérez Iglesias, amás de pol Alcalde Bimenes, Alejandro Canteli Rozada, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu respeutivamente.

La entrega premios fadráse nel trescursu d’una Xornada Lliteraria qu’hai entamada na Casa Cultura de Santuyano pal vienres 12 de xunetu, de magar les 19’30 hores. Na mesma, amás d’entregase los trés premios del certame, lleeráse’l cuentu ganador na voz de la so autora y presentaráse’l númberu 11 de “Formientu”, revista lliteraria na que participen escritores mui mozos, ente ellos la autora yerbata Blanca Inés Fernández Quintana.

El “Branu Lliterariu” ye una actividá de promoción y animación a la llectura de lliteratura infantil n’asturianu, organizada pola Casa de la Llingua-Serviciu de Normalización Llingüística de Corvera, que va desarrollase a lo llargo de los meses de xunetu y agostu na Biblioteca de Les Vegues.

Tala actividá, d’asistencia llibre y gratuita, consiste n’alcuentros ente escritores y tolos neños que quieran asistir; cada escritor acerca y cunta una de les sos producciones lliteraries a los rapacinos, n’alcuentros d’una hora de duración, que poles sos característiques dan en ser distintos y únicos.

Branu Lliterariu entama’l llunes 1 de xunetu cola participación de la escritora Paula Pulgar Alves, que va dar a conocer les Primeres aventures de Pulgu y Yolín. Paula Pulgar, llicenciada en Filoloxía Hispánica pola Universidá d’Uviéu y profesora d’Enseñanza Secundaria, yá tien una trayectoria como investigadora y escritora n’asturianu, con obres p’adultos como Cuentos de metru y centímetru (Ámbitu) y Calidoscopiu (Trabe) y pa neños, casu d’El mundu de Susana y Primeres aventures de Pulgu y Yolín (Asturtoons).

Los alcuentros van facese tolos llunes de xunetu y agostu n’horariu de les 11:30 a les 12:30 hores. El calendariu de participación de les y los escritores ye’l que s’indica darréu:

Llunes 1 de xunetu:

Paula Pulgar Alves

Llunes 8 de xunetu:

Alberto Álvarez Peña

Llunes 15 de xunetu:

Inaciu Galán

Llunes 22 de xunetu:

ACD

Llunes 29 d’agostu:

Sidoro Villa Costales

Llunes 5 d’agostu:

Xurde Fernández Fernández

Llunes 12 d’agostu:

Aránzazu Prado García-Jove

Llunes 19 d’agostu:

RRV

Llunes 26 d’agostu:

Berto García García<

Esti vienres día 21 de xunu, a les 19:00 hores nel Club de Prensa de La Nueva España preséntase’l llibru “Cuadernu de rayes” de Miguel Allende, asoleyáu por Trabe Ediciones. Nel actu van participar Alfonso López Alfonso, Manuel González Orviz, Esther Prieto y l’autor.

El premiu del V Certame Lliterariu en Patsuezu ‘Guzmán Álvarez’, convocáu pol Club Xeitu, recayó na obrar ‘Cartas na nieve’, d’Ernesto García del Castillo “Neto”. La obra ye un conxuntu de cartes en prosa, escrites por un personaxe llamáu Xandro a la so amada, de nome Rosina, al traviés de les cualos faise un percorríu llíricu dende l’aldega asturiana de Fontes de Corbeiro hasta San Miguel de L.laciana. Con paraes na vienta del Chabolu de Vallao y el Puertu de L.leitariegos, l’autor esmuz al traviés de les sos llínees alcordances y escenarios de la hestoria d’estes contornes.

El xuráu del certame, nesta ocasión formáu por Severiano Álvarez, Eduardo Carbajo y Manuel Gancedo, escoyó esta obra ente les presentaes a la convocatoria en base a la so presentación temática, trama argumental y riqueza de vocabulariu. El premiu, dotáu con 200 euros y diploma acreitativu obra del pintor Manuel Sierra, va apurrise como yá ye costume nel Recital de Patsuezu que va tener llugar la primer fin de selmana d’agostu nel Mercau Tsacianiegu. La obra premiada va asoleyase nel boletín del Club Xeitu, que va salir a la cai nes próximes selmanes.

Esti vienres 7 de xunu a les ocho la tarde va presentase’l númberu 4 de Trabatel. Revista eonaviega de lliteratura, qu’asoleya la Conseyería de Cultura. Sedrá na sala “El Pajar” del Complexo Cultural As Quintas, n’A Caridá (El Franco). Al peslllar l’actu va tocar el grupu Os Folkgazáis Trío.

Tarán presentes la directora xeneral de Política Llingüística, Ana María Fueyo, y l’alcaldesa d’El Franco, Cecilia Pérez Sánchez.

Con motivu de les Fiestes de San Roque del Carbayedo, a facer n’Avilés del 16 al 19 d’agostu del 2013, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiende del Serviciu de Promoción Cultural de la Conceyalía de Cultura, y baxo’l patrociniu del Conceyu d’Avilés, entama’l VII Concursu de Microrrellatos n’asturianu “L’Horru del Carbayedo” pa testos en llingua asturiana d’hasta 500 pallabres. La temática ye llibre, pero la redaición tendrá que respetar les normes ortográfiques y gramaticales marcaes pola Academia de la Llingua Asturiana. El plazu pa presentalos piésllase a les 14 hores del día 1 d’agostu.

La presentación namás pue facese pel corréu lletrónicu, unviando los rellatos en formatu WORD a: avvelhorreo@yahoo.es. Los trabayos dirán encabezaos per un títulu y firmaos namás con un nomatu. Nel corréu lletrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.

Daránse dos premios: primeru, de 400 euros y troféu; segundu, de 200 euros y placa. Los dos premios nun pueden recayer nel mesmu autor/a. El 5 d’agostu un xuráu formáu por reconocíes personalidaes de la cultura asturiana determinará los trabayos ganadores. El llunes, 19 d’agostu, los/les autores lleerán los rellatos premiaos y recoyerán los premios, a les 20:00 hores, nel Salón d’Actos de la AA. VV. El Hórreo (C/Dr. Marañón, 16, baxu).

Tolos rellatos presentaos, premiaos o non, van esponese al públicu al aire llibre, nel campu la fiesta (Parque del Carbayedo), los díes qu’éstes duren.

El Conceyu Bimenes tien abiertu’l plazu pa presentase al XVI Concursu de Cuentos pola Oficialidá del Asturianu. Los cuentos que se presenten al certame han de tar redactaos n’asturianu y nun pasar de les diez fueyes, mecanografiaes a doble espaciu y per una sóla cara. El plazu de presentación de trabayos fina’l 31 de mayu. L’apertura pliques tendrá llugar el 3 de xunetu y la entrega premios fadráse’l 12 de xunetu, nel trescursu d’una xornada lliteraria. L’importe económicu de los premios ye: 600 € pal primeru, 450 € pal segundu y 300 € pal terceru.

Los cuentos, de los qu’hai que presentar l’orixinal, trés copies y una copia más en versión informática, han d’unviase a la direición que vien darréu: Conceyu de Bimenes. Martimporra, s/n. 33527 – Bimenes.

Dende la organización del concursu recuerden que “ye de destacar el compromisu del Conceyu Bimenes de caltener esti certame lliterariu, y l’esfuerzu qu’ello-y supón, magar qu’esti añu, a diferiencia de los anteriores, nun va cuntar col sofitu nin de la Conseyería d’Educación, Cultura y Deporte nin de la Obra Social y Cultural de Caxastur”.

El Ciclu de Pallabra sigue nel Centru Niemeyer d’Avilés con Ángeles Mastretta y Vanessa Gutiérrez. La entrada ye gratuita hasta completar l’aforu, previa retirada de convidada. Ángeles Mastretta (Puebla, México, 1949) graduóse en Periodismu na Facultá de Ciencies Polítiques y Sociales de la UNAM. En 1985 asoleyó la so primer novela, Arráncame la vida (Seix Barral, 1992), cola que se fizo col Premiu Mazatlán en Méxicu y se convirtió nun verdaderu fenómenu editorial, tanto nel mundu de fala hispana como en socesives traducciones a quince llingües. Ana Vanessa Gutiérrez (Urbiés, Mieres, 1980) ye presentadora del magazine cultural Pieces na Televisión Pública Asturiana (TPA), y dirixe y presenta’l programa Entrelíneas dedicáu a la lliteratura en Punto Radio Asturies. Amás, ye colaboradora habitual en secciones d’opinión del periódicu El Comercio. Ente los sos llibros de poemes Onde seca l’agua (2003), La danza de la yedra (2004) –Premiu Teodoro Cuesta- y Passà el temps desfant la memoria (2006), l’ensayu El país del silenciu (2007) y, en narrativa, Les palabres que te mando (2006) y La cama (2008)

Ediciones Trabe celebra’l próximu miércoles 29 de mayu a les 7 la tarde na Casona del Bravial de Blimea un actu que va sirvir pa recordar los sos ventiún años de trayeutoria. L’actu, que ta abiertu a toes aquelles persones que quieran asistir, va contar cola presencia de la codireutora de Trabe n’actualidá, Esther Prieto, y cola d’Antón García, escritor y fundador de la editorial nel añu 1992 y el so direutor hasta l’añu 2007. Xuntos van facer un repás del trabayu lleváu a cabu nestos años, asina como de les obres y autores más representativos d’esta emblemática editorial asturiana.

Nel actu van tar acompañaos pola conceyala de Cultura de Samartín del Rei Aurelio, Gema Suárez Torre, y por Hugo Cortina, responsable de la Oficina de Normalización Llingüística del conceyu. Amás, ente les persones qu’asistan al actu van sortiase varios llibros editaos por Trabe.

Esta charra-alcuentru supón un complementu a la esposición qu’a lo llargo d’esti mes de mayu se pue visitar na Casona del Bravial na que s’ufierta una amplia visión del trabayu d’esta editorial y el so importante llabor na defensa de la llingua y la cultura asturiana, con casi 700 títulos nel so haber y varies colecciones abiertes de narrativa, poesía, ensayu, investigación, cómic, arte, diccionarios o lliteratura infantil y xuvenil. Esti bon facer llevólos a recibir nel añu 2012 el Premiu Andrés Solar que concede la Xunta pola Defensa de la Llingua Asturiana como reconocimientu a la so trayeutoria.