Lliteratura

L’autor bualés Miguel Rodríguez Monteavaro (Bual, 1990) presenta el sábado 14 de setembre el sou novo poemario, Todos os tristes de mayo. El acto vei celebrarse en Uvieo, nel local del Conceyu Abiertu del Llar Solidariu (Caye La Gascona, 12) ás 19:30 horas.

Miguel Rodríguez Monteavaro publica agora Todos os tristes de mayo, poemario en gallego-asturiano que, na súa versión en asturiano (Tolos tristes de mayu), ganara en 2012 el XIX Premiu Fernán Coronas «Padre Galo» de Poesía. Despóis del sou primeiro llibro, Trenta razóis pra nun medrar (Trabe, 2010), el poeta occidental muda a voz y madura a súa visión poética con este novo achegamento á realidá cultural na que vive.

A presentación vei tar conducida pol poeta Pablo Texón, que vei falar sobre a lliteratura nova asturiana y sobre a trayectoria poética de Rodríguez Monteavaro en relación á poesía contemporánea. A nota musical ha a tar posta polos pandereteiros Xosé Fernández «Ambás» y Ramsés Ilesies, que van dar paso al recital poético nel que van participar dellas voces da cultura asturiana acompañadas pol violín de Dolfu R. Fernández.

Este acto é aberto pra todos os públicos y é a primeira das presentacióis que se van llevar a cabo al llargo d’Asturias nos seguintes meses.

El Club de Prensa de la Nueva España acoyía esti martes 3 de setiembre la presentación de la tesis doctoral de Xuan Santori sobre el papel de los escritores en llingua asturiana contemporáneos y la so visión de la realidá lliteraria y llingüística, espublizada por Trabe col títulu de “El surdimientu y la lliteratura n’asturianu: normalización y estandarización”.

La obra revisa el procesu históricu de recuperación y respetu de “la glotodiversidá nel Estáu”, plantiando’l procesu necesariu de recuperación llingüística lleváu alantre en dos ámbitos: el corpus y l’estatus. Esto ye, la estandarización o normalización del corpus del idioma, per un lláu, y la normalización social de la llingua pel otru. Estos procesos que “proponíen l’anovación pal idioma foron asumíos en primeres polos escritores que, axuntaos alredor de la marca Surdimientu, fueron los primeros destinatarios y al tiempu, responsables del avance na normalización y na estandarización”.

Na obra, según asoleyaba la editorial, la novedosa metodoloxía estadística “enancha los llímites del conocimientu llingüísticu y supón pal asturianu un cambiu de paradigma: de ser una llingua más a investigar, a convertise nun modelu exemplar d’análisis sociollingüísticu aplicable a cualesquier otra llingua minorizada del mundu. A lo llargo d’esta obra van dir revelándose pa cualesquier observador de forma nidia y apasionante tanto los reblagos concretos como les claves sociales y llingüístiques y qu’afalaron el pasu del asturianu a la modernidá”.

Conclusiones bien interesantes

Les conclusiones del trabayu que presenta Santori de la mano de Trabe son bien interesantes pa ser a entender el procesu mencionáu. Sigún recueye l’autor “el cultivu del asturianu lliterariu desenvolvióse progresivamente nos caberos 30 años, dende unes cifres d’autores y publicaciones anecdótiques nos años 70 del siegu xx, hasta una producción estraordinaria –na perspectiva histórica– consolidada en cuantes a númberos y proporciones d’autores, obres y modalidaes lliteraries cultivaes y comparable en dellos casos a les que se dan n’otros idiomes minorizaos del Estáu”. Amás, el trabayu dexa afitao que “los escritores asturianos son d’orixe xeográficu y llingüísticu intensamente central y de calter urbanu, en tou casu non rural, qu’encaxen en cuantes a posición socoeconómica na media d’Asturies. Son una muestra representativa y proporcional de la población global. Hai ente los escritores presencia fonda nel sector del funcionariáu y en concreto y notablemente na enseñanza, que ye l’ámbitu natural y axial de la lliteratura surdimentista: trátase d’un elementu definitoriu que va denominase como «lliteratura profesoral». Esti perfil apunta sicasí dalgún problema: el primeru y más notable ye la non incorporación d’escritores nuevos nin siquier nuna intensidá comparable a la que se dio colos nacíos nos años 60 y 70 del sieglu pasáu. Esta mengua apréciase nel númberu de muyeres escritores, que ye mui baxu (18%) y el nivel d’incorporación nun apunta pa una representatividá mayor, xunto col aniciu na creación lliteraria de los nacíos de magar los años 80, que ye perbaxa”

Xuntu a otres cunclisones d’interés, el trabayu tamién dexa afitao que “la llingua materna ye definitoria pa la opción lliteraria n’asturianu. Los autores tienen mui mayoritariamente l’asturianu como llingua materna y nella, la variedá amestada. L’asturianu y la so lliteratura exercen una atracción pa un 18% d’escritores que tienen otra llingua materna”.

Poeta, profesor y ensayista..

Autor de llibros de poemes como Les inconveniencies de la especie (Premiu Teodoro Cuesta 1999) y Según cumple’l día (Premiu Elvira Castañón 2007); y de la referencial Antoloxía de poesía épica anglo-saxona (1999), Xuan Santori, que nos años 2005 y 2008 yera reconocíu col Premiu de la Crítica d’Asturies poles narraciones La heredá y La fábrica de lluz (apocayá traducida al castellanu), yá publicare un primer ensayu filolóxicu en 2006: Milenta voces: visiones del Surdimientu. Tres d’aquel primer acercamientu, ve agora la lluz nun tomu cercanu a les seiscientes páxines esti nuevu y llamativu estudiu, que tien como oxetu’l papel xugáu polos escritores pa la estandarización y normalización de la llingua asturiana.
Entrevista a Xuan Santori sobre la so tesis en 2011

Comisiones Obreres vieno acabante d’abrir la convocatoria del Concursu de Microrellatos mineros Manuel Nevado Madrid que cumple so décimu aniversariu y al que pueden presentase escritores de cualquier nacionalidá, siempre y cuando que les obres presentaes tean escrites n’asturianu o en castellán, seyan orixinales y ensin asoleyar y nun fueren premiaes enantes en nengún otru concursu.

Pue presentase un máximu de dos microrrellatos por cada autor o autora, teniendo que falar el conteníu de dalgún aspeutu (motivos temáticos, personaxes, argumentu o ambientación) venceyáu col mundu de la minería de cualquier país. La estensión nun podrá perpasar les 40 llinies en lletra de cuerpu 12 y tipu Times New Roman o asemeyada, pudiendo ocupar el microrrellatu un máximu d’una páxina en formatu foliu o DIN-A4 por dambes cares. Les obres hai que les unviar per corréu postal a: Fundación Juan Muñiz Zapico (Concursu de Rellatos Mineros Curtios “Manuel Nevado Madrid”) cai Santa Teresa 15, CP 33005 Uviéu.

El plazu d’entrega d’orixinales acaba’l día 21 d’ochobre de 2013. La organización nomará al xuráu competente, presidíu pol caderalgu Benigno Delmiro Coto. El xuráu nun conocerá los nomes de los/les autores o autoras, namás el títulu de los rellatos y l’acuñu del autor. Del fallu del xuráu, al que nun se podrá retrucar, daráse conocencia pública como tolos años el 4 d’avientu coincidiendo cola fiesta minera de Santa Bárbola.

Estiua añu, como’l pasáu van dase un primer premiu de 600 euros, y dellos accésits.

Bases del concursu 1. Podrán presentase a esti concursu escritores de cualquier nacionalidá, siempre y cuando que les obres presentaes tean escrites en castellanu o n’asturianu, seyan orixinales y ensin asoleyar y nun fueren premiaes enantes en nengún otru concursu. Pue presentase un máximu de dos microrrellatos por cada autor o autora. 2. El conteníu tendrá que falar necesariamente a dalgún aspeutu (motivos temáticos, personaxes, argumentu o ambientación) venceyáu col mundu de la minería de cualquier país. 3. La estensión nun podrá perpasar les 40 llinies en lletra de cuerpu 12 y tipu Times New Roman o asemeyada, pudiendo ocupar el microrrellatu un máximu d’una páxina en formatu foliu o DIN-A4 por dambes cares. 4. Les obres hai que les unviar per corréu postal a: Fundación Juan Muñiz Zapico (Concursu de Rellatos Mineros Curtios “Manuel Nevado Madrid”) c/ Santa Teresa 15, CP 33005 Uviéu. 5. Los concursantes tienen qu’unviar un sobre onde dientro apaecerá: · El o los dos microrrellatos · El sobre de la plica col alcuñu y títulu o títulos na so portada; amás dientro, tienen qu’apaecer tolos datos personales del autor o autora (nome y alcuñu, apellíos, señes, númberu del DNI o equivalente, títulu del microrrellatu o microrrellatos, teléfonu y, si tien, corréu electrónicu). 6. El plazu d’entrega d’orixinales acaba’l día 21 d’ochobre de 2013. 7. La organización nomará al xuráu competente, presidíu pol caderalgu Benigno Delmiro Coto. El xuráu nun conocerá los nomes de los/les autores o autoras, namás el títulu de los rellatos y l’acuñu del autor. 8. Del fallu del xuráu, al que nun se podrá retrucar, daráse conocencia pública’l 4 d’avientu de 2013 coincidiendo cola fiesta minera de Santa Bárbola. 9. Premios: · Primer Premiu 600 € (300 € en metálicu, más un llote de llibros y un grabáu de Manuel Calvo por un valor total de 300 €). · Accésit asturianu 350 € (200 € en metálicu, más un llote de llibros por valor de 150 €), para obres presentaes en llingua asturiana. · Accésit Testimoniu Históricu 250 € (100 € en metálicu más un llote de llibros por valor de 150 €), para obres que falen de fechos reales (biográficos, sindicales o sociopolíticos); siempre en rellación con conteníos históricos o acontecimientos socedíos nel entornu familiar o llaboral mineru. · Accésit mocedá 250 € (100 € en metálicu más un llote de llibros por valor de 150 €), para obres presentaes por autores de menos de veintiséis años. Para presentase a esti Accésit, los menores de veintiséis años tendrán que lo mentar xunto al alcuñu del microrrellatu. TOLOS MICRORELATOS QUE SE PRESENTEN CONCURSEN PAL PRIMER PREMIU, INDEPENDIENTEMENTE DE QUE TAMIÉN OPTEN A UN ACCÉSIT. Tolos y toles premiaos o premiaes van recibir un diploma conmemorativu onde va figurar el so microrrelatu impresu. 10. Los premios podrán dexase ermos si, a xuiciu del xuráu, nengún rellatu axuntare los méritos necesarios. 11. Igualmente, los rellatos premiaos, y una escoyeta fecha ente los rellatos presentaos asoleyaránse na forma que camiente más afayadiza la Fundación Juan Muñiz Zapico. 12. Participar nesti certame lleva inxerío aceutar perdafechu estes Bases.

L’asociación cultural Ensame Sidreru ye la ganadora del I Premiu Timón de Cultura Asturiana convocáu por L’Arribada p’asociaciones, sociedaes y fundaciones con sé n’Asturies, que tengan como fin la conservación y promoción de la identidá cultural del país y qu’empleguen la llingua asturiana nes sos actividaes, según alcuerdu d’un xuráu aconceyáu güei en Xixón y formáu por Mayte González, David M Rivas, Carlos Espina, Aurora García Rivas y presidíu por Humberto Gonzali.

Nesta edición primera taben nominaos, amás de la entidá ganadora, Sociedad Humanitarios de San Martín, Fundación Belenos, Asociación Cultural San Tirso del Eo, Tertulia Cultural El Garrapiellu, Fundación Caveda y Nava, Sociedad Popular y Cultural La Regalina, y Xunta pola Defensa de la Llingua Asturiana.

El xuráu quier destacar los trabayos de l’asociación premiada na difusión de la sidra y de los elementos culturales que-y son propios, faciendo reconocencia especial a una de les sos actividaes, la publicación dende l’añu 2003 de la revista mensual La Sidra, iniciativa editorial billingüe que llegó esti mes al númberu 116 y vien recoyendo, en más de cien páxines y con tiraes de miles d’exemplaes, noticies d’actualidá, reportaxes, información d’echadores y concursos, entrevistes a llagareros y hosteleros, recetes y tou aquello que se venceya al mundu sidreru.

El gallardón del premiu consiste nuna obra del escultor y ceramista xixonés Jesus Castañón, que s’entregará mientres la cellebración de La Vagamar 2013, el viniente sábadu 28 de setiembre, nun actu onde tamién van entregase’l VII Premiu Timón pa escritores n’asturianu y eonaviego, ganáu por Miguel Rojo, y el IV Premio Timón pa escritores asturianos en castellanu, llográu por Gonzalo Suárez.

Según l’Asociación de Llibreros del Principáu d’Asturies (ALPA), na rexón queden cerca de 200 llibreríes, una trentena d’elles n’Uviéu. La desapaición de la emblemática llibrería Santa Teresa d’Uviéu, que va díes cerró les sos puertes tres ochenta y cinco año d’hestoria, vieno a dar otra vuelta la voz d’alarma nel sector dexando un gran vacíu na capital asturiana.

El sector viose sacudíu nestos tiemposw caberos por dos crisis: la qu’afecta a la situación económica y la que sufre específicamente la industria editorial por mor de los cambeos tecnolóxicos: la competencia d’Internet. A ello hai de sumar tamién la vienta de llibros en grandes superficies comerciales y el surdimientu de bancos d’intercambiu de llibros de testu.

L’Asociación Cultural L’Arribada va ser la responsable de les Xornaes Lliteraries del II Festival Arcu Atlánticu, que se desarrollará en Xixón ente’l 26 de xunetu y el 4 d’agostu, y que nesta edición ta dedicáu a la ciudá de Nantes. Pola mor d’ello, l’escritor Jules Verne conviértese nuna figura central de bien d’actividaes mientres la selmana na que s’ofrecerá información sobre la lliteratura francesa y asturiana, xunto con propuestes venceyaes nos ámbitos del cine, el teatru y la música.

Dos xornaes analizarán el tratamientu de la obra verniana nel séptimu arte y les traducciones d’ésta al asturianu, en concretu de los títulos “L’eternu Adán”, “Los solevaos del Bounty” y “La vuelta al mundu n’ochenta díes”. Una tercera xornada enfotaráse en dar a conocer la vida y el patrimoniu creativu d’esti autor per aciu d’un averamientu al Musée Jules Verne. Amás d’ello, la organización de les xornaes abrió dos espacios n’internet onde espublizar conteníos sobre Verne y dar anuncia de los actos entamaos alrodiu d’él nel Festival; la bitácora Jules Verne en Xixón y una páxina homónima en facebook,

El restu les xornaes axunta un programa ampliu formáu por tertulies lliteraries, presentaciones de llibros d’autores franceses, asturianos y vascos, proyecciones de filmes de realizadores asturianos y películes doblaes o sotitulaes na nuesa llingua, conciertos, actuaciones teatrales, un cursu de declamación y la II Xeremandía nel Botánicu (alcuentru de poetes y rapsodes d’Asturies y País Vascu), ente más otro. La mayoría de les actividaes van facese en carpes allugaes n’El Muelle (Puertu Deportivu de Xixón) y nel Centru de Cultura Antiguu Institutu.

Programa completu del Festival Atlánticu y les Xornaes Lliteraries

L’escritor tinetense Miguel Rojo ye’l ganador del VII Premiu Timón, convocáu por L’Arribada p’autores en llingua asturiana y n’eonaviego, según alcuerdu d’un xuráu aconceyáu güei en Xixón y formáu por Xurde Morán, Roberto González-Quevedo, Antón García, Aurora García Rivas y Humberto Gonzali.

Pa esta edición, optaron a los gallardones escritores que nacieren nel añu 1.963 o anteriormente. La distinción consiste nuna obra del escultor y ceramista xixonés Jesus Castañón, que s’entregará mientres la cellebración de L’Arribada 2013, el viniente sábadu 28 de setiembre.

Miguel Rojo (Zarracín, Tinéu, 1957) ye un escritor qu’escribe n’asturianu y n’español. Afáyase ente los más destacaos representantes de la lliteratura del Surdimientu y tien obra publicao en cuasi tolos xéneros. Ye autor de Histories d’un seductor. Memories d’un babayu , novela que llogró ún de los mayores éxitos de ventes de la lliteratura asturiana. Doctor en bioloxía, dedícase a la enseñanza como profesor d’institutu.

En 1988 consiguiera’l Premiu Xosefa Xovellanos de novela con Asina somos nós . El so llibru siguiente foi una colección de relatos titulada Tienes una tristura nos güeyos que me fai mal (1989). Tien escrito tamién lliteratura infantil y poesía. Ún de los sos relatos llevóse al cine nel curtiumetraxe Xicu’l topeiru, de Gonzalo Tapia.

En 2005 y 2008 algamó’l Premiu de la Crítica d’Asturies en Poesía y Lliteratura Infantil respectivamente, polos llibros LLaberintos y El viaje de Tin y Ton.

Obra n’asturianu Narrativa Asina somos nós. SPPA, 1989 (Premiu Xosefa Xovellanos); Tienes una tristura nos güeyos que me fai mal. Llibros del Pexe, 1989; Histories d’un seductor (memories d’un babayu). Trabe, 1993 (Premiu Narraciones Trabe); Prosa ya versu. Atenéu Obreru de Xixón,1999; Cuentos pa un turista blancu. Ámbitu, 2006; Dir pa escuela (coordinador). Ámbitu, 2008; La ponte y otros cuentos. Suburbia, 2009; Asina somos nós. Trabe, 2011 (2º Edición) Infantil Telva y los osos. Trabe, 1994; Telva y el fueu. Trabe, 1998; ¿De qué tará fecha la Lluna?. Editorial Pintar-Pintar, 2008; El viaxe de Tin y Ton. Editorial Pintar-Pintar, 2008; Raitán, el papu coloráu. Editorial Trabe, 2010; El dinosauriu, el príncipe, la nena y la so ma. Editorial Pointar-Pintar, 2010 Poesía Buscador d’estrel.las. Editora del Norte, 1996 (Premiu Fernán Coronas); Bilbao: estación terminal. Ambitu, 2001; Llaberintos. Trabe, 2006 (Premiu de la Crítica 2005); Territorios. Edición billingüe. Llibros del Pexe, 2007; El Paséu /El Paseo. (Edición bilingüe asturianu-español) Ediciones Seronda, 2011 Obra n’español Narrativa Historias del más acá. Trabe, 1999; Historias de un seductor (memorias de un gilipollas). Tal y Cual, 2002; La senda del cometa. Laria, 2007; La hoja del ginkgo biloba. Editorial Difácil, 2010 Infantil Raitán, el petirrojo. Everest, 2003; ¿De qué estará echa la Luna?. Editorial Pintar-Pintar, 2008; El viaje de Tin y Ton. Editorial Pintar-Pintar, 2008 (Premio de la Crítica 2008); El dinosaurio, el príncipe, la niña y su mamá. Editorial Pintar-Pintar,2010 Poesía Territorios. (Edición bilingüe asturianu-español). Llibros del Pexe, 2007; El Paséu /El Paseo. (Edición bilingüe asturianu-español) Ediciones Seronda, 2011 Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011) y Antón García (2012).

ACD llega a Corvera con una trayectoria amplia y reconocida como novelista, ensayista, dramaturgu, músicu y xestor cultural; ganador en distintes ocasiones del Premiu “Xosefa Xovellanos”, la so obra narrativa inclúi obres tan celebraes de la lliteratura infantil y xuvenil en llingua asturiana como son Blugás y Khaos. Pa detrás, tamién tradució a Jules Verne al asturiano, como foi’l casu de L’eternu Adán.

Va participar nel Branu Lliterariu cola que foi la so última incursión dientro de la lliteratura infantil n’asturianu, El misteriu del neñu esborráu, llibru publicáu por Ediciones Trabe nel añu 2010 y onde ACD narra la hestoria d’un neñu llamáu Xuan que desapaeció al traviés d’un televisor de plasma.

Branu Lliterariu ye una actividá de promoción y animación a la llectura de lliteratura infantil n’asturianu, organizada pola Casa de la Llingua-Serviciu de Normalización Llingüística de Corvera, que va desenrrollase a lo llargo de los meses de xunetu y agostu na Biblioteca de Les Vegues.

Tala actividá, d’asistencia llibre y gratuita, consiste n’alcuentros ente escritores y tolos neños que quieran asistir; cada escritor acerca y cuenta una de les sos producciones lliteraries a los rapacinos, n’alcuentros d’una hora de duración, que poles sos característiques dan en ser distintos y únicos. Talos alcuentros lliterarios van facese tolos llunes de xunetu y agostu n’horariu de les 11:30 a les 12:30 hores.

Con “Tres cierves psicopompes” Xosé Nel Riesgo, escritor y númberu dos de Carlos Rubiera, como director de la Fundación de Cultura de Xixón, ta acabante facese col Premiu Fernánde Lema de rellatu na categoría de llingua asturiana, dotáu con 2.500 euros. En castellán ganó la obra “Egoísmo altruista”, de José Manuel Moreno Pérez, con un premiu de 5.000 euros.

La fundación premió tamién a los escolinos Ainara Álvarez García y Rosa María Méndez Menéndez, del colexu «San Miguel» de Trevías; Iván Campoamor Pérez y Marta Gayo Gayol, del CRA «Álvaro Delgado»; Nerea Rodríguez Méndez y Silvia Pérez García, del colexu «Padre Galo» de L.luarca; Alexia Fernández Feito y Lucas Manuel Fernández Menéndez, del colexu «Ramón Muñoz» de L.luarca, y María Sol Suárez Alonso-Buenaposada y Estela García Suárez, del colexu «José García Fernández», con 450 euros a caún. El xuráu tuvo formáu por Inmaculada Urzainqui Miqueleiz, José Luis Roca Martínez, Álvaro Ruiz de la Peña, José Antonio Pérez Sánchez, Félix Ferreiro Currás, Mar Madera Coto y Ánxel Álvarez Llano.

La organización va tar presentándose a los asturianos en Madrid esti xueves 4 de xunetu, a partir de les 19 hores. Sedrá nel Centru Asturianu de Madrid, asitiáu na cai Farmacia, 2, a pocos metros de la Gran Vía, nel centru de la ciudá. Nel actu va presentase tamién la revista Formientu, cola presencia d’autores mozos y de Xosé Bolado, escritor y miembru de l’Academia de la Llingua Asturiana.

Nel actu va participar tamién Inaciu Galán y González, director de la revista Formientu y presidente d’Iniciativa pol Asturianu.

Formientu ye una revista asturiana ñacida en 2006 que publica la obra d’autores n’asturianu de menos de 30 años, buscando una anovación continua y un relevu xeneracional na lliteratura asturiana. Esta “cantera” lliteraria lleva asoleyada la obra de más de 80 autores nestos años.