Lliteratura

La Editorial Asturiana Pintar-Pintar xestiona dende hai unos díes l’espaciu tienda del Centru Niemeyer: a partir d’esti mes de xineru fadrase cargu del programa educativu del Centru Niemeyer y de la so llibrería.

Como adelantuya ficieren anuncia de que van ufiertar visites escolares sobre les esposiciones programaes, que van ellaborar les correspondientes guíes didáctiques que van poder descargase per internet, que tamién tienen previsto incorporar el so programa de Creactividades, y que na llibrería, amás de celebrar presentaciones de llibros propios y d’otres editoriales, van cuntar con una cuidada selección de llibros ilustraos, non puramente infantiles, en diversos idiomes, y tamién colos llibros rellacionaos cola programación del propiu Centru.

Nesti 2013 que remata celébrase en tol mundu’l 150 aniversariu del nacimientu del poeta K. P. Kavafis. Por esa razón, en Saltadera publiquen la poesía completa del poeta griegu traducida al asturianu por Xosé Gago, inaugurando la colección «Llibros del Campo de los Patos». Una edición que nun cuenta con nenguna ayuda, nin pública nin privada.

El viniente viernes día 20 d’avientu a les 19,30 h, nun acto organizáu conxuntamente por Saltadera y la Conseyería de Cultura na Biblioteca Pública del Fontán, n’Uviéu, queremos celebrar un «Homenaxe a Kavafis», nel que vamos presentar la nuesa edición billingüe, LOS 154 POEMES de Kavafis.

Va tar con nós el traductor, Xosé Gago, residente habitual en Barcelona y especialista mundial na figura del poeta alexandrinu.

El Salón d’Actos del Centru de Cultura Antiguu Institutu de Xixón va acoyer esti martes 17 d’avientu a les 12,30 la entrega de los IV Premios María Elvira Muñiz a la promoción de la llectura nel Conceyu. Los galardonaos son Paco Abril Berán y el Colexu Públicu Asturies.

Anguaño l’IV Premiu María Elvira Muñiz de Promoción de la llectura va ser apurríu a Paco Abril Berán na so Modalidá A de reconocencia a una persona, entidá o empresa por tola so trayectoria creativa, investigadora, divulgadora, educadora, etc. o por iniciatives especialmente destacaes a favor del llibru y la llectura. Con esti galardón reconozse so trayectoria a favor del llibru y la llectura. Dende 1972 en qu’empecipia un suplementu infantil na prensa local, hai de desenvueltu una continua actividá como escritor, bibliotecariu y contador d’hestories que delles xeneraciones pudieron esfrutar.

Na Modalidá B de reconocencia pa una iniciativa singular desenvuelta per un centru educativu del conceyu de Xixón en favor de la llectura, el Xuráu alcordó premiar al C. P. Asturies pol so proyectu La Biblioteca Olímpica, pola orixinalidá na ellaboración del proyectu auniendo deporte y llectura. El Xuráu del IV Premiu María Elvira Muñiz de Promoción de la Llectura, compuestu por José Luis Álvarez, Fernando García Albella, Francisco García Pérez, Humberto Gonzali y Marcu Menéndez y Patricia Menéndez Benavente como Secretaria de Xuráu.

La convocatoria d’estos premios alcordose nel marcu del pactu ciudadanu “Xixón pola Llectura”, que representa a los distintos axentes que trabayen nel conceyu de Xixón/Xixón a favor del llibru y la llectura (nos campos de la creación, la edición, la comunicación, les llibreríes, les biblioteques, la enseñanza, les asociaciones, empreses,…).

L’oxetivu d’estos premios ye sirvir d’estímulu a les iniciatives más destacables dientro d’esti ámbitu fundamental de la cultura. Determinóse tamién que los premios llevaren el nome de la profesora María Elvira Muñiz Martín, en reconocencia a la exemplar trayectoria profesional y a les cualidaes humanes d’esta estudiosa y catedrática de lliteratura, qu’arimó a munches xeneraciones d’alumnos xixoneses el so amor polos llibros y la so pasión pola llectura. La dotación del premiu establecer en: 1.000 euros pa la modalidá A. Llote bibliográficu por valor de 1.000 euros pa la modalidá B (la selección bibliográfica realizar el mesmu centru educativu).

El serviciu de Normalización Llingüística de la Comarca de la Sidra, en collaboración col Conceyu de Villaviciosa, pon en marcha otra vuelta los talleres de llectura n’asturianu que se vienen desenvolviendo dende los últimos dos años.

Con ello ábrese de nuevu la inscripción pa les persones que quieran participar na actividá, que consiste na llectura mensual d’una obra de lliteratura asturiana actual complementada con un alcuentru col autor de la mesma, nel que los participantes pueden comentar y indagar nel sentíu del llibru.

Estos alcuentros tendrán llugar na sala d’actos del Centru Cultural Capistrano de Villaviciosa, y los interesaos pueden apuntase directamente na biblioteca del conceyu, o bien poniéndose en contactu col Serviciu de Normalización Llingüística de la Comarca de la Sidra, nel teléfonu 637897356 o bien per mail, dirixéndose a normasturarrobalacomarcadelasidra.com.

L’alcuentru previstu pal miércoles 18 d’avientu, a les 18 hores, tará dedicáu a “Unos fatos que morrieron por una apuesta y otres histories series”, de Jorge Fernández García.

Esti p´roximu miércoles 18 d’avientu, a les 19.,30 hores, na cafetería Rei Castu del Hotel Reconquista d’Uviéu, va tpresentase la que ye la quinta novela de Pilar Sánchez Vicente, “Luciérnagas en la memoria”, nun actu nel que va intervenir, amás de l’autora, Rubén Vega García, doctor n’Hestoria Contemporanea y especialista en Memoria Histórica.

Na presentación proyectaráse’l vídeu tráiler que pon banda sonora a la novela. “Luciérnagas en la memoria” ye un periplu al traviés de la hestoria de dos estaos, España y Arxentina, al traviés d’Asturies y Tucumán, xuníes al traviés de los protagonistes: dos hermanos tráxicamente separtaos pola Guerra Civil.

El XII Concursu de Narraciones Curties Conceyu Llaviana, entamáu pola Oficina de Normalización Llingüística, yá tien ganadores. El xuráu, formáu por María García Fernández, Constantino Manuel Blanco González, Pablo Xuan Manzano Rodríguez, y Mónica Rodríguez Riesgo, decidió dar el primer premiu, dotáu con 400 euros, a Sergio Buelga Casas pol rellatu El cachu pan; el segundu premiu, dotáu con 150 euros, correspondió a Yose Álvarez-Mesa pola narración Onde Mundu.

La llibrería-galería xixonesa Cornión va ser l’escenariu esti vienres de la presentación del llibru ‘Pincelaes’, d’Iris Díaz Trancho. Amás, al mesmu tiempu que de la inauguración d’una esposición coles ilustraciones de Miguel Pérez Iñesta pa esta obra que vieno acabante asoleyar Ediciones Trabe.

‘Pincelaes’ tien el so orixe nel espaciu de mesmu nome del programa de RPA ‘Paraísu Natural’ protagonizáu por Díaz Trancho ente los años 2008 y 2009, nel que la profesora y escritora xixonesa fizo venti pincelaes de dellos llugares del mundu, al traviés de referencies históriques y culturales, como Valparaíso, que se recuperen agora de la mano d’Esther García, editora de Trabe, correxíos y ameyoraos, como un cuadernu de viaxes.

La presentación va desenvolvese esti vienres 13 d’Avientu, a les 19 hores, na Llibrería-galería Cornión, na cai La Mercé númberu 45, y l’actu va presentalu’l tamién profesor y escritor Pablo Texón.

La Tertulia Malory de L’Entregu, va entregar esti vienres 13 d’avientu, a les cinco y media de la tarde, el premiu al meyor llibru n’asturianu del 2012, nun actu públicu que se va celebrar nel pub Tom Malory de L’Entregu, onde dende fai 15 años la tertulia vien axuntando selmanalmente. La obra ganadora d’esta segunda edición del premiu ye la novela gráfica La Chelita, del dibuxante xixonés Ruma Barbero.

El xuráu tuvo formáu polos escritores Xulio Arbesú, José Luis Rendueles, Solina Turbón, Pablo Rodríguez Medina, Roberto Corte, David Fernán, Chechu García y Henrique G. Facuriella, que fallaron el premiu nuna sesión especial de la tertulia celebrada en L’Entregu’l 1 de payares del 2013.

El gallardón consiste nuna ilustración d’Alfonso Zapico y una medaya d’oru conmemorativa, amás de mercar venti exemplares de La Chelita pa ofrecer como regalu protocolariu nos actos organizaos o onde participe la Tertulia Malory.

Ruma Barbero (Somio, Xixón, 1971) Llicenciáu en Belles Artes pola Universidá de Salamanca. Pertenez a los grupos de folk Felpeyu y Los Citriquinos. Nel mundu del cómic diose a conocer na revista escolar El Maguillo y en El Llapiceru. Participó na editorial Cactus Comics onde asoleyó Los Aguarones, xunto con Xosé Antón García Sampedro “Son”. Nel añu 2003 algama’l primer premiu del Concursu de comics de la Comarca de la Sidra pol trabayu Marcianaes, títulu qu’usa pa la tira cómica que asoleya nel selmanariu Les Noticies nel periodu del 2004 al 2010.

Nel añu 2009 gana’l premiu Alfonso Iglesias de Cómic en Llingua Asturiana por Manzajú, afitándose como ún de los grandes del mundu de la viñeta asturiana.

Anguaño pueden vese los sos trabayos nel blog «Fundición Príncipe de Astucias» y nel fanzine dixital «Aguantando Cachones».

L’Asociación de Llibreríes del Principáu d’Asturies presentó ayeri les actividaes enmarcaes nel Día de les Llibreríes, que se va celebrar a lo llargo d’esti vienres 29, nun actu nel que participaron el viceconseyeru de cultura, Alejandro Calvo, y el presidente de l’Asociación, Luis Martín. Martín incidió en que’l sector ta viviendo una crisis “bien dura, pero reversible” debíu en gran midida al descensu de les vientes, la piratería de llibros electrónicos, el zarru de llibreríes y la falta de compra institucional. Y Calvo adelantó que’l Principáu destino 300 mil euros a mercar llibros nesti añu 2013 y que nel 2014 incluyirá una partía pa llibros n’asturianu.

Martín tamién llamó a les instituciones a “salir de la babayada na que tamos metíos” y pidió qu’animen a lleer “percima de too” porque “nos llibros tán toles respuestes”.

Per tercera vegada celebrase’l Día de les Llibreríes a nivel nacional, lo que sirvió pa que’l presidente d’a Asociación asturiana asegurara que toles llibreríes del Principáu (unes 200 de les que 80 tan acomuñaes) van participar na xornada. Mientres el día va haber distintes actividaes como un descuentu del 5% nos llibros, paseos lliterarios per ciudaes, creación de marcapáxines, llectures programaes y cuentacuentos ente otres.

Alejandro Calvo, pela so parte afondó na situación del sector llibreru. Aseguró qu’anque’l sector ta en crisis, dende’l Principáu son optimistes col futuru del llibru en papel. El viceconseyeru dixo qu’en 2013 destináronse 300.000 euros a la compra de llibros per parte del Principáu. Nos Presupuestos de 2014, adelantró que se va incluyir tamién un fondu pa la compra de llibros n’asturianu. Lleer más: El sector del llibru ta viviendo una crisis “bien dura pero reversible” pol descensu de vientes y la piratería

Los premios del XVI Certame Lliterariu “César Feito” de Tinéu conociéronse esti vienres y foron a parar a Ainhoa García, Inés García Asensio y Cristina Rodríguez Garrido que van recibir los premios el próximu xueves 5 d’avientu a les 11 hores nel Cine Marvi, nuna gala que va cuntar con actuaciones del profesoráu de la Escuela Municipal de Música y del Grupu de Teatru de Persones Mayores de Tinéu.

El xuráu de la decimosesta edición del Certame Lliterariu “César Feito”, integráu pola filóloga Mónica Rodríguez Riesgu y los escritores Ignaciu Llope y Elías Veiga, fixo públicu esti vienres el fallu d’esti concursu lliterariu que’l Conceyu Tinéu convoca añalmente pa promocionar la creatividá lliterario y artístico n’asturianu ente los neños y adolescentes qu’estudien o moren nel conceyu,

Nesta ocasión, el Xuráu alcordó conceder tres premio por categoría y trés accésits. El primer premiu na categoría A (hasta 8 años) recai en Ainhoa García, del colexu públicu El Pascón, pol cuentu “La castaña trabaya”. El primer premiu de la categoría B (9 a 12 años) ye pa Inés García Asensio, del colexu públicu Verdeamor, pol so cuentu “El gatu”, y na categoría C (13 a 16 años), la ganadora ye Cristina Rodríguez Garrido, estudiante del institutu Conceyu de Tinéu, por “Los negocios del Señor Gatu”.

El xuráu destacó la orixinalidá y calidá de los trabayos presentaos según el nivel sorprendente de participación, con 129 trabayos presentaos a los trés categoríes.

La directora xeneral de Política Llingüística, Ana Fueyo Llaneza; l’Alcalde de Tinéu, José Ramón Feito, y la conceyala delegada de cultura, Purificación Pla van apurrir los premios el próximu xueves 5 d’avientu a les 11 hores nel Cine Marvi, nuna gala que va cuntar con actuaciones del profesoráu de la Escuela Municipal de Música y del Grupu de Teatru de Persones Mayores de Tinéu.