Lliteratura

La Conseyería d’Educación, Cultura y Deporte vien de convocar los premios lliterarios en llingua asturiana pal añu 2014 La Conseyería d’Educación, Cultura y Deporte vien de convocar los premios lliterarios en llingua asturiana pal añu 2013: la 35.ª edición del Premiu “Xosefa Xovellanos” de novela; la 20.ª edición del Premiu “Xuan M.ª Acebal” de poesía; la 20.ª edición del Premiu “Máximo Fuertes Acevedo” d’ensayu; la 7ª edición del Premiu “María Josefa Canellada” de lliteratura infantil/xuvenil; y la 6ª edición del Premiu “Alfonso Iglesias” de cómic.

La convocatoria asoleyose a lo llargo d’esta selmana santa y los interesaos na convocatoria de dalgún de los concursos van tener de plazu hasta’l próximu 12 de setiembre pa participar.

Convocatoria nel BOPA de los premios

Esti miércoles 23 d”abril, a partir de les 19 hores y con motivu de la celebración del Día del Llibru, la editorial Suburbia ediciones ufre na FNAC de Parque Principáu en Siero un recital de poesía que va cuntar cola participación de Sofía Castañón, Xandru Fernández, Alba González Sanz, Vanessa Gutiérrez, Aníbal Menchaca y Pablo Texón.

Carmen Ruiz-Tilve foi anunciada esta selmana santa como la ganadora del l V Premio Timón pa escritores asturianos en castellanu convocáu pola asociación cultural L’Arribada, según alcuerdu d’un xuráu integráu por Aurora García Rivas, David M. Rivas, Carlos Espina Alonso y Xuan Xosé Sáncehz Vicente, y presidíu por Humberto Gonzali.

L’autora, uvieína nacida en 1941, ye Llicenciada en Filoloxía y Doctora pola Universidá d’Uvieu, onde exerció tola so actividá profesional y foi Catedrática de Didáutica de la Llingua y la Lliteratura. La so tesis de llicenciatura versó sobre «El premio de novela Ciudad de Oviedo» y la so tesis de doctoráu foi un estudiu sobre «La obra narrativa de Dolores Medio», dambos trabayos dirixíos pol profesor Martínez Cachero.

Miembru correspondiente del Real Institutu d’Estudios Asturianos, el 4 de septiembre de 2002 foi nomada Cronista Oficial d’Uviéu. Tien publicaes les noveles Crisantemos para todos (1994); La Edad de Oro (1995); Galería de Espejos (1998); Una Semana fuera del Calendario (2000); y Cuentos Encadenados (2001).

Carmen Ruiz-Tilve ye tamién autora de numberosos llibros y artículos, ente los que destaquen los referíos a Asturies y Uviéu, como La vida comercial de Oviedo (1924-1935) a través de Nosotros los Rivero (1989); Dolores Medio (1991); La mujer asturiana en el trabajo tradicional (1993); El Fontán, guía para nostálgicos (1995); Alrededor de El Carbayón. El Campo se hace ciudad (1996); De plazas y plazuelas. Historia menor de siete espacios del Oviedo intramuros (1996); Fuentes y caños de Oviedo y su concejo (1997); Pliegos de Cordel (1995-1997), con prólogu de Manuel F. Avello (1997); Oviedo, en el Camino de Santiago (1999); Oviedo en el Camino de Santiago, testos de la edición pa neños (1999); Nuevos Pliegos de Cordel (1997-1999), con prólogu de José Manuel Vaquero (2000); Terceros Pliegos de Cordel (2000-2001), con prólogu de Graciano García (2002); Un espacio de siempre: Trascorrales, en Miquel Barceló (catálogu de la esposición d’Obres de la Colección Masaveu) (2003); L’Uviéu de los años de posguerra, en Antonio García Oliveros, les palabres y los llibros (2003); El Nadal en Oviedo. Notas a «Nosotros, los Rivero», en Cincuenta años de «Nosotros, los Rivero» (2003); El Oviedo de Dolores Medio a través de «Nosotros, los Rivero» (2003); La naturaleza de Besullo en «La dama del alba» de Alejandro (2003); Oviedo de cerca. Una ciudad para vivir (2003); Leer con la naturaleza, llibru entedisciplinar pa neños acerca de la bayura natural asturiana, con testos de Carmen Ruiz-Tilve ya illustraciones d’Ana Belén Rico (2004); Pliegos de cordel de comer y beber (2008).

Dende 1995 firma una columna baxo’l títulu xeneral de “Pliegos de Cordel” nel periódicu La Nueva España, na que se pulsa la vida pasao, presente y futuro de la capital asturiana, con más de 700 títulos. Dende 2002 publica amás un artículu mensual col títulu xeneral de “El tiempo vuela” nel mesmu mediu.

En 2010 donó al Muséu del Pueblu d’Asturies una coleición compuesta por un total de 215 llibros, que pasa a formar parte del fondu que’l muséu tien sobre escuela y enseñanza. La mayoría son manuales escolares, editaos ente 1889 y 1971, y dos coleiciones de revistes de pedagoxía: «La Escuela Práctica», editada en Ciudadela (Menorca) ente 1896 y 1899, y «La Escuela en Acción», suplementu de «El Magisterio Español», ésta última comprendida ente los años 1934 y 1936. Anteriormente yá depositara nesti muséu les semeyes costumbristes del so padre, Francisco Ruiz-Tilve.

A la edición de 2014 del Premio Timón presentárense, amás de la de Carmen Ruiz-Tilve, les candidatures de Fulgencio Argüelles, Luis Arias Argüelles-Meres, Diego Carcedo, Ángeles Caso, Aurelio González Ovies, Pepe Monteserín, Tino Pertierra, José María Ruilópez, Pedro de Silva y Paco Ignacio Taibo II.

Los ganadores anteriores del Premio Timón fueron Luis Fernández Roces (2010), Juan Méjica (2011), Fernando Menéndez (2012) y Gonzalo Suárez (2013).

El gallardón del V Premio Timón, consistente nuna obra del escultor y ceramista xixonés Jesus Castañón, entregaráse’l 27 de setiembre mientres la cellebración de La Vagamar 2014.

Tres de la presentación del cuentu “La hestoria L’Anguleru”, n’Avilés, ediciones Trabe vuelve a la Villa del Adelantráu con una de les aventures más risonderes y emocionantes d’esti entrañable personaxe asturianu. La cita ye esti vienres 11 d’abril a les 12 de la mañana na Llibrería del Centru Niemeyer, onde va preséntase’l cuentu L’Anguleru. Suaños de Navidá cola presencia d’Ana María Fueyo Llaneza, directora xeneral de Política Llingüísitica.

Nesta ocasión, va cuntase cola collaboración de de Bradley Samore, profesor d’inglés, nativu de la Florida, Estaos Xuníos. Esti nuevu profesor estadounidense, conocíu como Brad, ye unu de los grandes amigos de L’Anguleru nel otru llau d’Atlánticu: ” Como tol mundu sabe, L’Anguleru pasa l’añu curiando de les angules y les anguiles nel Mar de los Sargazos, mui cerca de la Florida, onde vivi Brad”. Sigún se fai anuncia na convocatoria del actu, “esti nuevu profesor d’inglés, amigu de la cultura asturiana, va aprovechar pa visitar en Selmana Santa a L’Anguleru nel so barcu L’Angulina, llevándo-y delles provisiones y ayudar unos díes col so trabayu neses misterioses y máxiques agües del Mar de los Sargazos”.

Nel Niemeyer, Brad va tar acompañáu del maestru d’infantil Vitu (Víctor Raúl Pintáu Rei); dambos van cuntar a los neños y neñes una de les munches emocionantes aventures de L’Anguleru. Tres el cuentacuentos, Tamara Saiz, directora del Colexu Públicu Xovellanos de Panes, va desenvolver un taller de maruxos sobre’l personaxe. Esta propuesta didáctica va incorporar de forma natural trés de les llingües que más-y gusten a L’Anguleru: l’asturianu, el castellán y l’inglés, convirtiendo l’actividá nuna novedosa acción educativa de calter trillingüe.

Va Rematar l’actu cola entrega a los neños y neñes de dalguna llambiotada o pequenu detallín prestosu, que va apurrir Fernando González, de l’Asociación Cultural Garabuxada. Aprovechando que Brad va viaxar a la Florida nestes feches, los pequeños van poder llevar mensaxes a esti nuevu profesor americanu, por que esti apurrir a L’Anguleru esta Selmana Santa. Los mensaxes pueden escribise n’asturianu, inglés y castellán, pudiendo ser correxíos, si dalgún neñu lo demandare, por Brad, Vitu o Tamara.

Esti domingu 30 de marzu a les 19:30 hores, nel CMI El Llano celebrose la entrega de los premios del concursu ¿Qué cuentes? organizáu pola asociación Abierto hasta el Amanecer, cola collaboración d’Iniciativa pol Asturianu y la revista Formientu, nel qu’Alejandra Sirvent (Pravia, 1980) foi la ganadora de la estaya d’asturianu del concursu lliterariu col rellatu “Solombres”. La ganadora del premiu na estaya d’asturianu va ver vista la so obra asoleyada na revista Formientu, amás de recibir el domingu llibros y dellos otros regalos.

El concursu lliterariu ¿Qué cuentes…? tuvo por ganador de la estaya de castellán a José Manuel Romero Santos.

Una serie de colectivos culturales ciudadanos sofiten la iniciativa de convocar el primer Concursu de Videopoesía “República de la Poesía”: el Colectivu Artísticu Musa Cafeína, l’Atenéu Obreru de Xixón, la Sociedá Cultural Xixonesa, el Espaciu Cultural La Manzorga y el Colectivu Versos Llibres.

Tratase de que, a partir de la obra poética, la vida y los enclinos políticos de Machado, cualquier persona col so móvil, cámara dixital o cualesquier otru dispositivu afayadizu, traduza les imaxes poétiques o escenes de la vida del poeta n’imaxes que puedan proxectase, faciendo de la orixinalidá, l’usu estéticu de les nueves tecnoloxíes y la palabra, un argumentu y una forma d’espresión.

El próximu día 31 de marzu remata’l plazu pa presentar les candidatures al Premiu Internacional de Poesía Xovellanos, El Meyor Poema del Mundu. Hasta’l momentu recibiéronse casi mil poemes procedentes de 28 países, ente los que destaquen España, Arxentina, Cuba, México y Uruguai como los países que presenten más candidatures.

Esti xueves 6 de marzu, a les 19 hores va presentase na Fnac la reedición del llibru “Misión Pelayo” de Xulio Arbesú.

La reedición de ‘Misión Pelayo’, la novela juvenil de Xulio Arbesú “que marcó un antes y un depués na lliteratura xuvenil en llingua asturiana”, ye una de les novedades lliteraries del caberu 2013. La novela foi espublizada orixinariamente pola Academia de la Llingua nel 2002.

El Conceyu d’Estorga y l’Asociación Cultural Faceira entreguen esti sábadu 1 de marzu los gallardones del so primer Certame Lliterariu Astúrica, un premiu de rellatu y poesía qu’organicen dende Lleón con intención d’aportar a tol dominiu llingüísticu asturlleonés, dende Asturies a Miranda del Douro. Ente los cinco ganadores d’esta primer edición, hai trés xóvenes asturianos, Inaciu Galán, Naomi Suárez ya Irma González-Quevedo.

Nel apartáu de prosa, la zamorana Mª José Zurrón fízose col primer premiu por “Llobu”, el segundu premiu lleva la firma del escritor y periodista xixonés, Inaciu Galán, col rellatu “Cartes nel horru”. El tercer premiu en rellatu va entregase esti sábadu a la profesora y música Naomi Suárez, de La Pola Siero, por “El conciertu”.

Na estaya de poesía quedó ermu’l primer premiu. En segundu llugar la obra “Al Reinu Maravellozu” de Thierry Alves, autor residente en Francia, pero orixinariu de Miranda del Douro, comarca de llingua asturlleonesa en Portugal. El tercer premiu foi pa Irma González-Quevedo, d’Uviéu, trabayadora del ámbitu sanitariu y escritora n’asturianu con fuertes venceyos cola comarca lleonesa del Altu Sil.

L’actu d’entrega va celebrase esti sábadu 1 de marzu a les 19 hores na sala Ergástula d’Estorga, onde va cuntase cola presencia de Mercedes González Rojo, conceyala de cultura; Fernando Álvarez Balbuena, Héctor García Gil y José Alfredo Hernández Rodriguez como miembros del xuráu, Ricardo Chao y Abel Aparicio como secretariu y vicepresidente de Faceira respectivamente, y una actuación final del grupu de folk lleonés Tarna.

El Serviciu de Normalización Llingüística de L.lena, entama un concursu de cuentos pa enseñanza primaria de les escueles de L.lena. El consursu que tienpor títulu “Trapiando” tien como temática la nieve y los deportes de nieve. Asina, enmárcase dientro de les actividaes que festexen el 60 aniversariu de la estación d’esquí Valgrande-Payares.

El concsurru al que solo se podrán presentar cuentos en llingua asturiana, tanto na variante propia de L.lena como na variedá normativa, va dirixíu tol alumnáu de la etapa de primaria de toles escueles de L.lena. Distínguese tres categoríes coincidiendo colos tres ciclos de: de 6-8 años, de 8-10 y de 10-12. Establécense 2 premios por categoría, que van consistir en lotes de llibros y música.

El plazu d’entrega de los cuentos ye hasta’l 31 de marzo. El fallu daráse a conocer nun actu del que se dará anuncia debidamente. El tribunal del xuráu cuenta colos maestros de llingua asturiana de les escueles del Conciyu, con un mienbru de l’Academia de la Llingua Asturiana, otru de la Rede de Normalización Llingüística nos Conceyos y una persona en representación de la Estación d’Esquí Valgrande-Payares.