Lliteratura

Ayeri xueves la Casona del Bravial de Blimea acoyó la presentación de les últimes novedaes de la editorial Asturtoons, los títulos “Una mascota pa Carola” d’Enrique Carballeira, “El misteriu del Vassilius Destounis” de Jorge Fernández” y “El misteriu de les histories que s’escribíen soles” de Xavier Frías Conde.

Nel actu de presentación participaron los escritores Enrique Carballeira y Jorge Fernández, que tuvieron acompañaos pola conceyal de Cultura de Samartín del Rei Aurelio, Gema Suárez Torre, y por Hugo Cortina, el responsable de la Oficina de Normalización Llingüística del conceyu. Carballeira , periodista, ilustrador y escritor de L’Infiestu ye autor d’otros llibros infantiles como “El cuélebre y el principín medranosu” o “El día de los charcos”, por citar dalgunos. Pela so parte, Jorge Fernández ye maestru y pedagogu, autor de narrativa curtia, testos teatrales y lliteratura infantil, con títulos como “El lladrón de galletes” o “Einstein y la relatividá”, ente otros.

Los autores sorrayaron el mal momentu qu’atraviesa’l mercáu editorial y la dificultá que supón caltener vivu un proyeutu d’estes carauterístiques nesta situación. Al final del actu hubo un alderique colos asistentes y los escritores firmaron exemplares de los sos libros.

Con esti actu púnxose’l ramu a la esposición “Asturtoons y les Lletres Asturianes”, que pudo visitase nesti centru cultural dende’l pasáu 5 de mayu, y na que se fizo un repasu del llabor d’esta empresa dedicada a la lliteratura infantil asturiana cuando ta a puntu de cumplir 10 años. Alredor d’esta esposición tamién se llevaron a cabu actividaes con varios centros escolares del conceyu, onde los escolinos pudieron charrar colos autores sobre estos nuevos libros.

Iniciativa pol Asturianu collabora con Musa Cafeína y Litografía Viña na convocatoria del II Concursu de Microrrellatos y Micropoemes col envís d’afalar la creatividá lliteraria. Y que nesta ocasión va incluyir al asturianu, pudiendo presentase testos na nuesa llingua, na convocatoria y na imaxe y bases del certame. El concursu tien abiertu’l plazu d’entrega d’orixinales hasta’l 15 de xunu de 2014 a les 24:00 hores.

El fallu va facese públicu a partir del 15 de xunetu de 2014 nes páxines web, Facebook y blogues de Musa Cafeína y de Litografía Viña.

Les Bases del concursu son les que vienen darréu:

La participación nel concursu supón l’aceptación de les bases que van darréu. L’incumplimientu de dalguna de les bases va dar llugar a la esclusión del participante del presente concursu.

Xeneralidaes:

Va Poder participar nel concursu cualesquier persona mayor de 18 años independientemente de la so nacionalidá y llugar de residencia. Cada participante va poder presentar un máximu de 2 testos originales Los datos que faciliten los participantes pal so rexistru tendrán de ser veraces. Cualesquier persona qu’unvie datos incorrectos o incompletos va perder el drechu a participar.

Tema y presentación de trabayos:

La tema va ser llibre, escritu en castellán o asturianu y con un máximu de 200 pallabres (microrrellatu) o 10 versos (micropoema).

Los títulos de los testos presentaos al concursu nun se van contabilizar como parte del rellatu o poema. El plazu d’almisión de los testos va entamar el día 7 de mayu y va rematar el día 15 de xunu de 2014 (inclusive). Tolos rellatos y poemes tendrán de ser unviaos en formatu Word al corréu musacafeina@gmail.com

Nel cuerpu del corréu indicarán los títulos de los testos que se presenten al concursu y los siguientes datos de contactu de los o les autores: nome y apellíos, DNI, edá, señes, teléfonu y corréu lletrónicu de contactu. Nun se van valorar aquellos trabayos con faltes d’ortografía o espresiones gramaticales incorrectes. Tampoco aquellos que contengan insultos, espresiones peyoratives, discriminatories, según enguizamientos a la violencia o amenaces. Los participantes van responder énte Musa Cafeína y Litografía Viña de l’autoría y orixinalidá del microrrellatu o micropoema colos que participaren nel concursu, asumiendo la total responsabilidá y dexando, por tanto, a Musa Cafeína y Litografía Viña indemnes frente a cualesquier reclamación que, nesti sen, pudieren efectuar terceres persones.

Los testos presentaos han ser obres que nun fueren premiaes n’otros concursos. Amás tienen de tar llibres de cualesquier compromisu editorial previu o simultáneu.

Composición y designación del Xuráu: El xuráu va tar formáu por escritores, escritores y artistes designaos por Musa Cafeína y Litografía Viña.

La so composición va ser fecha pública al traviés del blogue, redes sociales y la web de Musa Cafeína y Litografía Viña.

Toa decisión del xuráu va ser irrevocable, pudiendo declarar el premiu ermu si tres un analís minuciosu de los microrrellatos o micropoemas recibíos, nengún tuviera la calidá abonda.

El fallu del xuráu unviaráse per corréu lletrónicu a les persones ganadores y va ser asoleyáu públicamente a partir d el 15 de xunetu de 2014.

Premios:

Van concedese dos premios pal Concursu de Microrrellatos, que van corresponder unu al meyor microrrellatu escritu en castellán y otru, al meyor microrrelatu escritu n’asturianu.

De la mesma forma, tamién va haber dos premios pal Concursu de Micropoemes (castellán/asturianu).

Los premios van consistir en la publicación d’un llibru d’artista coles obres premiaes. El llibru va ser maquetáu, ilustráu y editáu por creativos de Litografía Viña. Amás, los o les ganadores van llograr 4 exemplares del llibru. Los o les ganadores van recibir tamién un llote de la revista lliteraria Formientu.

El xuráu va valorar otorgar dalgún accésit si lo considera oportunu, ensin qu’ello implique la espublización de los testos. Un mesmu autor o autora namá puede recibir unu de los premios.

La primer presentación del llibru Transpalabr@rte / Trespall@arte y entrega de premios va celebrase en Xixón, nos llocales de Litografía Viña. Podrán facese presentaciones n’otres ciudaes d’España. La fecha y la hora d’estes presentaciones van ser determinaes pola organización del concursu. Les persones ganadores d’esti concursu comprométense a participar nes presentaciones pa les que la organización asina valore oportuno.

L’autor o l’autora ganadores cederán, temporal y gratuitamente a Musa Cafeína y a Litografía Viña los drechos editoriales de reproducción, distribución, tresformamientu, comunicación pública y cualesquier otros drechos necesarios pa la comercialización total o parcial del mesmu en cualesquier soporte y pa tol mundu. Tamién vencerá la so imaxe pal espardimientu y promoción del llibru. Esta cesión va durar el periodu máximu que la llei permita.

Musa Cafeína y Litografía Viña esímesen de toa responsabilidá polos daños que pudieren derivase del usu incorrectu o non aparente de los microrrellatos y micropoemes presentaos a concursu y espublizaos per parte de terceros.

De conformidá cola Llei Orgánica 15/99, de 13 d’avientu, de Protección de Datos de Calter Personal, informámos-y de que los datos facilitaos pa la inscripción nel Concursu de Microrrellatos y Micropoemws van ser incorporaos de forma temporal al archivu de Musa Cafeína y Litografía Viña con cuenta de xestionar y controlar la participación nesti Concursu.

La organización va tener potestá pa resolver cualesquier imprevistu ensin recoyer nestes bases.

Xosé Bolado ye’l gallardonáu col VIII Premiu Timón pa escritores en llingua asturiana o n’eonaviego, convocáu pola Asociación Cultural L’Arribada, según alcuerdu d’un xuráu integráu por Aurora García Rivas, Alberto Álvarez Peña, Miguel Rojo y Lluis Portal Hevia, y presidíu por Humberto Gonzali, que falló’l premiu esto lunes 19 de mayu. El Premiu Timón quier distinguir la trayectoria lliteraria de los escritores en llingua asturiana y n’eonaviego Pa esta edición optaben a los gallardones los/es escritores que nacieren nel añu 1.964 o antes.

Xosé Bolado nació n’Uviéu en 1946. Académicu de la Llingua, profesor de lliteratura y estudiosu de la lliteratura asturiana y poeta, ye autor de la Antoloxía poética del Surdimientu (1989). Como antólogu y críticu lliterariu ye autor tamién del prólogu, les notes y la bibliografía de “Escritores en Llingua asturiana” (1992), de la colección “Grandes autores asturianos” de la editorial Hércules-Astur, de dos llibros de Rosario Acuña y del fascículu “Lliteratura asturiana contemporania”‘ de la Historia de Asturias de La Nueva España. Tien publicaos diversos trabayos y artículos sobre l’actual panorama de les lletres asturianes. Publicó tamién los siguientes llibros de poesía n’asturianu; Conxura contra la decadencia (Llibros del Pexe, 2002), Na estación de los relevos (Llibros del Pexe, 2006) y La bona Intención (en formatu billingüe, Impronta Editorial, 2012),

Fue presidente del Atenéu Obreru de Xixón, onde fundó la colección poética Deva, y primer director de la revista creativa de l’Academia de la Llingua Lliteratura. Los ganadores anteriores del Premiu Timón fueron, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012) y Miguel Rojo (2013).

Esti gallardón, consistente nuna obra del escultor y ceramista xixonés Jesus Castañón, entregaráse’l 27 de setiembre mientres la cellebración de La Vagamar 2014.

Cola mestría y axilidá d’un avezáu contador de cuentos, Milio’l del Nido pasó negro sobre blanco dellos cuentos nun llibru editáu per primer vez nel añu 2001, que foi recibíu perbién pol públicu llector y qu’algama con esta la cuarta edición. Milio Rodríguez, Milio’l del Nido (Uviéu, 1944), persona inquieta y activa, foi fundador del grupu folclóricu Los Urogallos nel añu 1974, que más tarde habría d’axuntase col Colectivu Riscar, surdiendo d’ello l’Andecha Folklor d’Uviéu.

A mediaos de los años ochenta del sieglu pasáu entama a contar cuentos con Manolo de la Cabén, col que percuerre Asturies, España y Portugal. Gran parte d’esos cuentos conformen esti volume y el publicáu nel 2005, Y qué quies, si tengo oreyes.

Amante del deporte, tuvo muncho que ver col espolletar del Club Balonmano Ciudad Naranco d’Uviéu, del que tamién dexó por escrito la crónica de los sos años meyores (ente 1979 y 1984) nel llibru Histories del Balonmano Ciudá Naranco (2007). Cocineru de profesión y de devoción demientres dellos años tuvo un programa gastronómicu na TPA, Recetes con cuentu, del que tamién hai una versión impresa (2008). Dende hai más d’un añu podemos velu toles selmanes presentando’l programa de deportes tradicionales La bolera, de la TPA.

Por encargu de la Biblioteca-Museo de El Toboso, Mª Esther García López tornará al asturianu el capítulu 61 de la segunda parte del Quixote, que tendrá que tar fecho anantes d’acabar el mes d’ochobre. El próximu añu, 2015, celébrase’l IV Centenariu de la publicación de la II Parte de la maxistral obra ” Don Quixote de La Mancha” de D. Miguel de Cervantes Saavedra.

Dende la Biblioteca-Muséu Cervantina, onde cuenten con una coleición de más de 600 ediciones distintes del Quixote, en 60 idiomes distintos, ilustraciones, ediciones, formatos, alfabetos; entamaron un proyectu pa consiguir el mayor Quixote políglota, el Quixote con más llingües del mundu.

Dirixiríronse a Esther García pa que collaborara cola traducción al asturianu p’arriquecer asina esti proyeutu tán guapu: consiguir un Quixote nel mayor númberu d’idiomes o llingües qu’enxamás esistiera, ” Don Quixote de La Mancha políglota”. Nel Muséu Cervantín de El Toboso, yá cunten con una adaptación en bable del Quixote (2005), con testos escoyíos pa neños y traducíu por esta escritora al asturianu ya ilustráu por Netu.

El proyeutu consiste en realizar de forma manuscrita, el capítulu 61 de la segunda parte; la norma ye faelo n’asturianu. Tán intentando que tolos capítulos de la II parte, 74 en total, se manuscriban nun idioma distintu, pa consiguir l’oxetivu que se proponen.

“ Unviáronme unos folios, onde tengo que faer la escritura. Tamién unes normes básiques pa consiguir una uniformidá al rematar la obra. Y únviennos unes fueyes d’inscripción de los participantes pa realizar un llibru con toos aquellos que formaron parte d’esti proyeutu.

El ilustrador Ernesto García del Castillo, (Netu) va arriquecer coles sos ilustraciones esti proyectu universal.

La escritora y académica camienta que “ye un honor que pensaren en mi y poder participar nesta obra universal” y diz tar “bien ilusionada col proyeutu”.

esti llunes 5 de mayu, dientru de los actos de la Selmana de les Lletres va celebrase, a les 19.30 hores na Capiella de los Dolores de Grau, un recital embaxo’l títulu “La poesía asturiana nueva”, que va cuntar cola participación de los poetes Sofía Castañón, Vanessa Gutiérrez y Pablo Texón y l’actuación musical de Marisa Valle Roso.

Nel actu, fadrase entrega de los diplomes dell Premiu de Poesía Selmana de les lletres, p’alumnáu de Primaria y Secundaria del conceyu de Grau, en collaboración cola Fundación Aula de les Metáfores.

El Gobiernu d’Asturies ta preparando una Llei de Biblioteques dende va tiempu pa ser a algamar una normativa que fomente la llectura y perdifina’l sistema bibliotecariu d’Asturies. Y según vieno acabante d’espublizar nuna nota de prensa la Xunta pola Defensa de la Llingua Asturiana (XDLA) “ye de reseñar que l’añu pasáu más de tres millones d’usuarios pasaron per estos equipamientos culturales. Por eso, la Xunta pola esixe a l’Alministración pública “que tenga en cuenta que n’Asturies existe una realidá llingüística propia con una lliteratura importante, polo que la Llei de Biblioteques nueva tien que ser fundamental pa visibilizala”.

Pa la XDLA nun cai embaxo que la Conseyería de Cultura “informó d’esta llei nueva aprovechando les celebraciones del Día del Llibru, que volvieron dexar de llau al nuestru idioma y les sos lletres. Otra manera, nesi día, la conseyera Ana González fixo un llamáu pa que la sociedá lleera”.

La XDLA espera que yá que ta a la vuelta de la esquina la celebración de la Selmana de les Lletres Asturianes, Gonzalez tamién faiga un llamáu asemeyáu y pida a la sociedá que fale y llea n’asturianu. Na rueda de prensa de presentación de la Selmana, diz la XDLA, “ella polo menos nun faló n’asturianu, colo que ta dando un exemplu nefastu pa la normalización del idioma. Mesmamente, prestaríanos ver a la conseyera de Cultura en tolos actos lliterarios de la Selmana y mercando llibros n’asturianu el día 9 de mayu, Día del Llibru Asturianu. De xuru que sería un xestu simbólicu qu’ayudaría a promocionar la llectura na nuestra llingua”.

Per otru llau, nun se pue escaecer el texíu empresarial y el númberu d’editoriales que nacieron gracies a la lliteratura n’asturianu. Pa la XDLA “ye’l momentu de que los xestores públicos aconceyen colos responsables d’estes empreses pa escuchar les sos necesidaes y pruyimientos. La mesma viceconseyera del Gobiernu español, Soraya Sáenz de Santamaria, viaxó de Madrid a Barcelona pa reunise col sector editorial en catalán esti 23 d’abril. Mentanto, el nuestru Executivu actuó como si’l mercáu del llibru n’asturianu –y los puestos de trabayu que xenera- nun existieren”.

Suburbia Ediciones asoleya Contra’l Silenciu, el númberu 13 de la so colección de poesía Males Tierres. Con esta obra, cuya esbilla y compilación débense al tamién poeta Berto García amuésase un completu panorama de tola poesía espublizada en llingua asturiana dende los tiempos del Surdimientu fasta anguaño. Nella apaecen tolos poetas en llingua asturiana xunto cola mención a toles sos obres espublizaes.

De cada ún d’ellos Berto García seleccionó un poema y en pallabres del compilador:”Esti llibru ye una cenciella pero, al empar, completa esbilla de poesía del Surdimientu, cola qu’afitar que l’asturianu tien una puerta abierta al futuru. Esta compilación quier ser una referencia, un puntu d’arrinque pa quien s’avere a la poesía en Llingua Asturiana; un escaparate onde poder ver lo meyor de la creación na poesía llariega y qu’afale l’enclín por siguir conociendo y andando’l camín de la poesía contemporánea n’asturianu. Frutu d’un llargu procesu d’afondamientu tienes, agora nes tos manes llector, una amuesa d’esta estaya de la lliteratura, na nuesa llingua, nos últimos trenta años.”

Trabe ya tien espardíu peles llibreríes el cómic col qu’Alfonso Zapico algamara’l V Premiu «Alfonso Iglesias» de Cómic y qu’amuesa bien a les clares la calidá d’esti dibuxante y narrrador gráficu que ta poniendo al cómic asturianu y español a un altor del que había tiempu nun se facía alcordanza.

Alfonso Zapico (Blimea, 1981) estudió Artes Plástiques y Diseñu na Escuela d’Arte d’Uviéu, y trabaya como profesional gráficu dende l’añu 2006. Tien fecho ilustraciones, diseños, animaciones y campañes pa delles axencies de publicidá, editoriales y instituciones. Amás ye ilustrador de prensa en diarios asturianos (La Nueva España, Cuenca del Nalón…). N’asturianu publicó una tira cómica, Les pites de Grau, nel selmanariu Les Noticies.

Nel añu 2012, Alfonso Zapico ganó’l Premiu Nacional de Cómic, qu’otorga’l Ministeriu de Cultura, pola so obra Dublinés. Amás, ye ganador del Prix BD Romanesque Ville de Moulins (2007) y de los premios Haxtur (2008) y Josep Toutain (2010). Amás de collaborar en delles obres colectives, tien editaos cinco títulos: La guerre du professeur Bertenev (2006), Café Budapest (2008), Dublinés (2011), La ruta Joyce (2011) y El otro mar (2013). Con Cuadernos d’Ítaca ganó’l V Premiu de Cómic «Alfonso Iglesias» del añu 2013.

El Centru Niemeyer acoyó nel añu 2013 la esposición Pasos alcontraos. Un viaxe dibuxáu d’Alfonso Zapico, onde s’amosó información sobre l’autor blimeín, planches orixinales de Dublinés y La ruta Joyce y sesiones de dibuxu en vivo nes muries de la sala.

Alfonso Zapico vive dende’l 2008 n’Angulema (Francia), na Maison des Auteurs, onde trabaya nel so últimu proyectu, La balada del norte, novela gráfica en dos tomos ambientada na revolución asturiana d’ochobre de 1934 y que’l primer volume va ver la lluz nel 2014.

L’Academia de la Llingua Asturiana aprovechó la selmana na que se celebra’l Día Mundial del Llibru pa entamar a esparder la so revista más popular y con mayor posu científicu, Lletres Asturianes, qu’aporta con esti númberu al 110. Esti númberu 110 recueye dellos trabayos d’investigación d’un total de diez autores, que los que la mayoría ya foron protagonistes de les Xornaes Internacionales d’Estudiu y Trabayu. Nellos, tóquense temes como la toponimia, l’asturianu y les nueves teunoloxíes, la etimoloxía asturiana, o l’asturianu ente les lllingües romances. Lletres Asturianes ye’l Boletín de l’Academia de la Llingua Asturiana y espubliza dos númberos añales, entamando la so hestoria nel añu 1982 y aportando nel añu 2011 a la rede Internet, con una versión dixital d’accesu llibre que pue consultase dende’l númberu 105.

Amás de les secciones que davezu s’atopen nesta revista científica,. como Reseñes Bibliográfiques, Notes y anuncies o Llibrería Asturiana, el númberu 110 presenta un total de 10 trabayos que s’averen a distintos campos de conocimientu. Miguel Metzeltin presenta una investigación sobre “L’asturianu ente les llingües romances”, mentantu que Xosé Lluis García Arias averase otra vuelta a la “Etimoloxía asturiana y etimoloxía hispánica” y Clara Elena Prieto Entrialgo afonda nel usu de “Per, por y para nel asturianu medieval” con una “guía pa nun se perder”.

Darréu, nesti númberu tamién se pue lleer a Pablo Suárez García falando sobre “La deturpación toponímica n’Asturies” a Héctor García Gil apuntando “Delles notes d’exonimia próxima” y a Xosé Bolado García escribiendo “al ritmu de los díes de la vida propia” con una interesante “mirada circunstancial sobre poesía nueva”.

Amás, Pablo Rodríguez Medina escribe sobre “Les llechares: una aproximación a la primer poética de Rubén d’Areñes”, Xuan Santori Vázquez averanos al “Determín de comportamientos xeneracionales nel Surdimientu a la lluz de pruebes paramétriques pal contraste de variables”, entesacándolo de la so recién presenta tesis. Y les nueves tecnoloxíes tienen nel trabayu d’Inaciu Galán y González “L’asturianu y les nueves teunoloxíes: datos d’una encuesta d’usos llingüísticos” que nos amuesa la realidá de la mocedá asturino na rede de redes.

Pa finar esti númberu 110, Andrés Martínez Vega escribe sobre “Los pecheros asturianos a fines de la Edad Media. Una referencia en la pobla de Siero”.