Lliteratura

Esti llunes vieno acabante d’asoleyase’l determín del xuráu del Concursu de Rellatos curtios y Poesía Carmen Ruíz-Tilve Arias de la Facultá de Profesoráu de la Universidá d’Uviéu apautándose en concede-y a Inaciu Galán el primer premiu de la seición de Poesía en Llingua Asturiana pol so poema “regatu”. Na seición de Microrrelatu n’Asturianu algamó’l primer premiu Alicia Cortina Dávila con “L’Abellugu maternu” y el segundu premiu foi pa Naomi Suárez González por “Tarantula”.

Los premios nos que s’aconceyó’l xuráu según se recueyen na so acta son los que vienen darréu:

Poesía en Asturianu Primer premio: Inaciu Galán y González.“Regatu” Segundo premio: Desierto. Microrelato en Asturianu Primer premio: Alicia Cortina Dávila. “L’Abellugu maternu” Segundo premio: Naomi Suárez González. “Tarantula” Poesía en Castellano Primer premio: Adoración Diego de Oliveira.“Yo sin ti” Segundo premio: Iván Mallada Álvarez.. “Haiku a una mirada” Microrelato en Castellano. Primer premio: Patricia Álvarez Fernández. “Recordando sus ojos” Segundo premio: Covadonga Rodríguez Juan. “Agua”.

El xuráu tuvo compuestou polos siguientes profesores del Área de Didáctica de la Llingua y la Lliteratura Xosé Antón González Riaño, Eva María Iñesta Mena, Marta Mori de Arriba, Mª Rosario Neira Piñeiro y Julián Pascual Díaz, faciendi de Secretariu’l Decanu de la Facultá, Juan Carlos San Pedro Veledo.

El sábadu 2 d’agostu a les 20 hores, na carpa Arcu Lliterariu nel Puertu Deportivu, fadráse la presentación del llibru Nos prietos abilsos, de Carlos X. Blanco, y editáu por Suburbia Ediciones. Trátase d’una colección de rellatos de terro, na que so autor presenta una obra orixinal dientro d’un xéneru que nun ye habitual na narrativa asturiana, con un estilu amenu y directu que nos conduz pelos mundos del fantásticu.

Carlos X. Blanco Martín nació en Xixón, nel añu 1966. Ye doctor en Filosofía pola Universidá d’Uviéu y profesor en Ciudad Real, autor d’ensayos políticos sobre Asturies y la so identidá y tamién d’artículos académicos y collaboraciones en libros.

El conceyu de Corvera vieno desenvolviendo desde hai unos años un programa de fomentu de la llectura de lliteratura infantil n’asturianu con dellos programes ente los que s’alcuentra esti “Veranu Lliterariu”, actividá va desenvolviese dende esta semana con alcuentros con autores na Biblioteca de Les Vegues. Sedrá tolos llunes de los meses de xunetu y agostu, entamando pol prósimu llunes día 7 qu’empicipiará con Carla Perucho.

“Veranu Lliterariu” ye una actividá de promoción y animación a la llectura de lliteratura infantil n’asturianu qu’entama la Casa de la Llingua-Serviciu de Normalización Llingüística de Corvera, que va desendolcar nos meses de xunetu y agostu na Biblioteca de Les Vegues. Los alcuentros van facese tolos llunes n’horariu de les 11:30 a les 12:30 horas. L’actividá, d’asistencia llibre y gratuita, consiste n’alcuentros ente escritores y tolos/es neños/es que quieran asistir; “cada escritor acerca y cuenta una de les sos producciones lliteraries a los rapacinos, n’alcuentros d’una hora de duración, que poles sos característiques dan en ser distintos y únicos”, sigún despliquen dende la Biblioteca.

Esta ye la tercer edición del “Veranu Lliterariu”, nel que sacando l’escritor candasín Xurde Fernández y l’escritor corveranu Berto García, que yá tuvieron presentes n’ediciones anteriores de Veranu Lliterariu, tolos demás autores estrénense dafechu.

El calendariu de participación d’autores nel Veranu lliterariu corverán ye’l siguiente:

Llunes 7 de xunetu: Carla Perucho

Llunes 14 de xunetu: Xuan Carlos Crespos Lanchas

Llunes 21 de xunetu: María Xesús Guillón

Llunes 28 de xunetu: Esther García

Llunes 4 d’agostu: Xurde Fernández Fernández

Llunes 11 d’agostu: Berto García

Llunes 18 d’agostu: Marisa López Diz

Llunes 25 d’agostu: Alberto Menéndez

El vienres 26 de setiembre, mientres la Vagamar 2014, l’Asociación Cultural L’Arribada va entamar un homenaxe al xesuita y escritor Federico González-Fierro Botas. Nacíu n’Uviéu (30 de payares de 1942), cursó los sos estudios nel Institutu de Bachilleratu Alfonso II, diplomóse en Llingües Clásiques (Llatín y Griegu) y doctoróse en Teoloxía y en Ciencies Polítiques y Socioloxía cola tesis doctoral titulada “La formación sindical impartida por Centrales representativas en España, 1976-1992”. Llicencióse tamién n’Hestoria siendo profesor d’Historia social. Foi espertu en llingua y lliteratura ruses y profesor visitante en delles universidaes de l’antigua Xunión Soviética y de l’actual Federación Rusa.

Cura obreru nos años 60 y 70 del sieglu XX, trabayando d’empleáu manual de fábriques, carteru y otros en Cataluña, Galicia y per Europa. Nesi tiempu collabora con delles organizaciones obreres, sobremanera en materia de formación de los sos militantes. En 1996, fai un manual de formación sindical. Viaxa en numberoses ocasiones a la Xunión Soviética onde surde’l so interés pola cultura rusa. Destináu pola so orde a Xixón trabaya como profesor na Fundación Revillaxixéu, onde sedría xefe d’estudios ya inxerta nel curriculu del centru educativu Llingua y Cultura Asturiana.

Con motivu de les Fiestes de San Roque del Carbayedo, a facer n’Avilés del 21 al 25 d’agostu del 2014, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiende del Serviciu de Promoción Cultural de la Conceyalía de Cultura, entama’l VIII CONCURSU DE MICRO-RELLATOS N’ASTURIANU “L’HORRU DEL CARBAYEDO” que tien les BASES que vienen darréu:

1- Pue participar cualquier escritor/a en llingua asturiana, como muncho con dos rellatos. 2- Los rellatos nun puen pasar de les 500 pallabres. La temática ye llibre, pero la redaición tendrá que respetar les normes ortográfiques y gramaticales marcaes pola Academia de la Llingua. 3- El plazu pa presentalos piésllase a les 14 hores del día 1 d’agostu.

4- La presentación sólo pue facese per Corréu Electrónicu, mandando los rellatos en formatu WORD a: avvelhorreo@yahoo.es. Los trabayos dirán encabezaos per un TÍTULU y firmaos namái con un NOMATU/pseudónimu. Nel corréu electrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.

Daránse dos premios: primeru, de 400 euros y troféu; segundu, de 200 euros y placa. Los dos premios nun pueden recayer nel/na mesmu/a autor/a. El 5 d’agostu un xuráu formáu por especialistes en llingua asturiana y conocedores de la cultura asturiana determinará los trabayos ganadores.

El llunes, 25 d’agostu, los/les autores lleerán los rellatos premiaos y recoyerán los premios, a les 19:30 hores, nel Salón d’Actos de la AA. VV. El Hórreo (C/Dr. Marañón, 16, baxu). Tolos rellatos presentaos, premiaos o non, van esponese al públicu al aire, nel prau la fiesta (Parque del Carbayedo), los díes que dure ésta.

El Xuráu entenderá de cualquier dulda o problema que xurda. Nun se puen retrucar les sos decisiones.

Esti prósimu vienres, 27 de xunu, entregaránse los premios del XVII Concursu de Cuentos pola Oficialidá del Asturianu, que convoca’l Conceyu Bimenes. L’actu, abiertu al públicu, va tener llugar na Sala de Conceyos del Ayuntamientu yerbatu, en Martimporra, de magar les 18’00 hores, y nel trescursu del mesmu fadráse una llectura pública del cuentu ganador na voz del so autor, Pablo Rodríguez Alonso (Xixón, 1979), que participó nel certame cola obra “L’invitáu” y que va llevar los 600 euros empobinaos pa esti primer premiu.

El segundu premiu, dotáu con 450 euros, foi pal cuentu “El foriatu”, d’Elisabet Felgueroso López (Llangréu, 1980), y Francisco Álvarez González (Xixón, 1970) algamó’l tercer premiu, al que se-y apurren 300 euros, con “Una nueche en La Belle Alliance”.

L’escritor Miguel Rodríguez Monteavaro (Bual, 1990) torna otra vuelta publicar un poemario cola editorial Trabe y 2failo col título Poemas pr’amantes y paquidermos. Este é el terceiro llibro del bualés, que xa confirma a súa presencia na lliteratura en gallego-asturiano como úa voz característica, non xa como úa promesa” como asolea la nota de prensa na qu’esti día s’asoleyaba l’anuncia de la publicación.

Na mentada nota de prensa desplicábase también que “despóis de Trenta razóis pra nun medrar (Trabe, 2010) veu el llibro Todos os tristes de mayo (Trabe, 2013), que cua súa versión en asturiano (Tolos tristes de mayu) ganóu el Premio de Poesía Fernán Coronas 2012. Agora publícase Poemas pr’amantes y paquidermos, úa reflexión acerca d’aquello qu’imprime a sociedá nel carácter individual de cada persona, hasta el punto de considerar búa ou mala xente a daquén solo pol feito de tomar certas decisióis. Este llibro forma parte das novas corrientes lliterarias polas que vei discurrindo el gallego-asturiano, variedá llingüística en pleno esplendor artístico. A publicación ta dentro da colección Pontiga de poesía da editorial Trabe y ten, como puntos fortes estralliterarios, as imaxes orixinales, de portada y del autor, da fotógrafa Svetlana Poutilina y un testo de solapa del poeta Pablo X. Suárez”.

Sigún informaba la editorial esti día “prevénse varias presentacióis del llibro qu’agora se publica de cara al outono, como é habitual cuas edicióis de Rodríguez Monteavaro. A os actos de presentación de Trenta razóis pra nun medrar y de Todos os tristes de mayo foran máis de cen personas y contaran cua participación de cerca de vente personaxes da cultura asturiana. Nestas futuras presentacióis ha a tar tamén presente outra nova publicación del poeta pra este ano: a traducción al asturiano del sou anterior llibro, Tolos tristes de mayu (Trabe, 2014), que salirá á lluz nos próximos meses”.

La xixonesa Iris Díaz Trancho ye l’autora la obra ‘El convidáu real’ qu’ecsribió pa la so representación na ceremonia d’apertura del IX Alcuentru Medieval, que va tener llugar na localidá de L’Entregu, el próximu 18 de xunetu, nel marcu de les fiestes de La Llaguna, entamaes pola Sociedá de Fiestes y Cultura L’ Entregu. La obra va ser interpretada nel actu de coronación del Rei Aurelio, figura qu’anguaño va tar representada pol cocineru y presentador de televisión Christian González.

Con ésti son yá nueve los guiones teatrales de corte medieval y/o referente a la figura del Rei Aurelio qu’escritores, na so mayoría del conceyu, publicaron en llingua asturiana dende l’añu 2006 pa conmemorar cada edición del Alcuentru Medieval.

Iris Díaz Trancho, docente y escritora, ye graduada n’Educación Infantil y Post-graduada col títulu d’Esperta en Filoloxía Asturiana. Anguaño imparte clases de llingua asturiana na Educación Primaria nel Colexu Públicu Lloréu, en Xixón. Ente les sos publicaciones destaca ‘Vivu nuna casa malva’, ‘Mio ma, la pirata’ o ‘La Neña de les trences al revés’, en lliteratura infantil y xuvenil; o ‘Pincelaes’ y ‘Nome’, en narrativa; amás d’otres publicaciones que se recueyen en recopilatorios y artículos varios.

‘El convidáu real’ ye la primer incursión nel xéneru de la dramaturxa d’esta escritora, polo que supunxo un nuevu retu personal y profesional na so esitosa carrera lliteraria, empecipiada en 2005 cola publicación del relatu infantil ‘La caxa de cristal’. La obra ta escrita en clave d’humor a partir de les apaiciones del tresnocháu Rei Aurelio al momentu actual.

El Festival Arcu Atlánticu 2014 va desarrollase ente’l 25 de xunetu y el 3 d’agostu. Dientro d’él, l’Asociación Cultural L’Arribada entama unes Xornaes Lliteraries qu’axunten 32 actos.Nesta edición la lliteratura y la cultura d’Irlanda van ser la exa central de la programación, qu’empieza’l domingu 27 de xunetu y termina’l sábadu 2 d’agostu y les Xornaes Lliteraries allugaránse en trés espacios: la Carpa Espaciu Pallabres nel Puertu Deportivu, qu’incluyirá tamién la llibrería, onde se fadrán les más de les actividaes; el patiu del Centru de Cultura Antiguu Institutu, qu’acoyerá l’espaciu representativu teatral; y el Muséu Casa Natal de Xovellanos, onde habrá un homenaxe a la lliteratura irlandesa en llingua gaélica.

Ente los participantes destaca la presencia del actor, director d’escena y ensayista dublinés Denis Rafter, el xueves 31 de xunetu, onde pela mañana dará una clase maxistral y pela tarde tará nun alcuentru pa falar de la so esperiencia artística, pa dempués intervenir na tertulia De Samuel Beckett al teatru n’asturies, en compaña de los asturianos Andrés Presumido, Boni Ortiz y José Antonio Lobato.

Falaráse de les obres d’autores irlandeses que tán traducíes a la nuesa llingua. Asina, analizaránse dellos títulos d’escritores como Oscar Wilde, Maria Edgeworth, James Joyce, John Millington Synge, Seamus Heane o Jonathan swift, y per aciu d’un audiullibru fadráse alcordanza del más famosu de los personaxes creáu por Bram Stoker.

Nos siete díes de les xornaes proyectaránse curtimetraxes, documentales y películes, habrá actuaciones musicales, recitales, representaciones teatrales (el teatru tien una presencia especial esti añu), conferencies y varies presentaciones. Ente éstes últimes afayamos la del llibru La fuga del náufrago, de Miquel Silvestre, un autor que dio la vuelta al mundu y percorrió más de noventa países na so Ruta de los Exploradores Olvidados. Precisamente, l’orixe d’esti ambiciosu proyectu históricu y viaxeru atópase n’Irlanda, onde l’autor descubrió’l rastru de Francisco de Cuéllar, sobreviviente de l’Armada Invencible.

Pablo Rodríguez Alonso (Xixón, 1979) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y que tien un premiu, dotáu con 600 euros. L’autor algamó esti primer premiu cola so obra “L’invitáu”, mentantu que’l segundu premiu, dotáu con 450 euros, foi pal cuentu “El foriatu”, d’Elisabet Felgueroso López (Llangréu, 1980), y Francisco Álvarez González (Xixón, 1970) algamó’l tercer premiu, de 300 euros, con “Una nueche en La Belle Alliance”.

El xuráu tuvo compuestu nesta ocasiónpolos escritores Xulio Vixil Castañón, Héctor Pérez Iglesias ya Isabel Gutiérrez Novo, amás de pol Alcalde Bimenes, Alejandro Canteli Rozada, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu.