Lliteratura

Esti martes, 7 d’ochobre, a les 19,30 hores na Sala de Conferencies del CC Antiguu Institutu de Xixón, y dientro del ciclu Asturies y les sos lliteratures de la 9º edición de la Vagamar, presentábase’l llibru LES MANES ENCESES Antoloxía (1948-2001).La obra recueye, n’asturianu y portugués, lo meyor de la poesía d’Eugénio de Andrade, el mayor poeta portugués de la segunda mitá del sieglu xx.

Andrade nació’l 19 de xineru de 1923 en Póvoa d’Atalaia, conceyu de Fundão, na Beira Baixa. Depués de residir en delles ciudaes de Portugal, fixa por razones de trabayu la residencia n’Oporto, onde muerre’l 13 de xunu de 2005.

Poeta de la condición humana y del amor, musical y sensual, la so poesía fala del esplendor del cuerpu en conxunción cola naturaleza, de la inocencia y la pureza, pero tamién de l’allegría del deséu, intensu y ardiente. La so obra caracterízase pol usu d’un llinguaxe lluminosu y elemental, sobre’l que construye la so voz, un dicir sutil y depuráu. Los sos versos tán traducíos a numberosos idiomes, siendo’l poeta portugués contemporaniu que llogró mayor repercusión internacional.

Eugénio de Andrade participó nuna Selmana de les Lletres Asturianes, vinculándose d’esa manera a una tierra y a una llingua que lu acoyeron como si formara parte de la tradición propia. D’Andrade n’asturianu publicáronse tres llibros de la mano del tamién poeta y narrador Antón García: Memoria d’outru ríu (1985), Contra la escuridá (1988) y Poemas (1988). Nel actu intervinieron los escritores Antón García, Miguel Rojo, Pablo Antón Marín Estrada y Marta Mori.

Una versión en llingua asturiana que ta preparando Ediciones Terrier de la obra de J.R.R. Tolkien, EL Hobbit, coincidiendo cola presencia nos cines de la tercer parte de la saga cinematográfica d’esti llibru, va ser la novedá cimera de los llanzamientos que van entamar a producise en cuantes que se resuelvan les subenciones pala edición en llingua asturiana nesti entamu de la seronda. La edición n’asturianu de la obra de Tolkien tien como traductor a Miguel Gallego, cola revisión d’Andrés Fernández, y a Carlos Argüelles como responsable de les illustraciones que van facer compaña a esta nueva edición de la hestoria que precedió a El Señor de los Aniellos.

L’entamu nel pasáu Día d’Asturies d’una páxina oficial en Facebook foi l’anuncia pública de qu’Ediciones Terrier ta trabayando nuna edición d’El Hobbit en llingua asturiana, que va a espublizase nes Navidaes pero que va poer reservase nes llibreríes dende’l mes de payares.

obra de J.R.R. Tolkien va amestar una nueva llingua a la bayura na que s’atopa tornáu, dando entamu al mundu d’El Señor de los Aniellos, y lleváu al cine con munchu ésitu durante los caberos años.
Páxina en Facebook del llibru

Al cumplise de recién el 50 cabudañu de la so muerte, el Seminariu de Filoloxía Asturiana (SFA) de la Universidá d’Uviéu y el Real Institutu d’Estudios Asturianos (RIDEA) van celebrar a fines del próximu mes d’ochobre dos xornaes d’estudiu dedicaes a la figura del filólogu Manuel Menéndez García (1909-1962), autor de la perconocida monografía “El Cuarto de los Valles. Un habla del occidente asturiano”.

Les dos xornaes van llevar el títulu de «Manuel Menéndez y l’Asturias occidental mediu sieglu depués». Les sesiones van facese na Facultá de Filosofía y Lletres y na sé del RIDEA na Plaza Porlier d’Uviéu, y tendrán secciones dedicaes a la dialectoloxía, etnografía y historia, con una sesión específica d’homenaxe al filólogu.

Les Xornaes van zarrase cola presentación d’un volume onde se recueyen importantes materiales inéditos de la so obra investigadora.

Nesti mes de setiembre cúmplense diez años del Aula de les Metáfores, de la que ye director el profesor Leopoldo Sánchez Torre, miembru del Seminariu de Filoloxía Asturiana. Esti aula de les Metáfores ye una biblioteca poética que tien sé na Casa la Cultura de Grau y que nació nel 2004 gracies a les donaciones bibliográfiques del poeta Fernando Beltrán. Un añu tres d’otru crez coles aportaciones particulares y colectives y con motivu del décimu aniversariu, l’Aula edita una Memoria d’Actividaes que pue consultase na so páxina web.

L’Aula de les Metáfores de Grao inició les sos actividaes el martes 29 de marzu de 2005 cola presencia del poeta asturianu Antonio Gamoneda y del fundador d’esti espaciu destináu a la difusión de la poesía, el tamién asturianu Fernando Beltrán. A lo llargo de los meses que vinieron darréu l’Aula foi ufreindo una variada programación na que s’inclyó un ciclu cinematográficu de filmes dedicaos a la esperiencia vital de distintos poetes, llectures públiques de poemes, un taller lliterariu coordináu por Fernando Menéndez y diverses actividaes con escolinos y estudiantes d’Enseñanza Secundaria.

Web del Aula

Esti vienres 12 de setiembre fina’l plazu de presentación de trabayos a los premios lliterarios en llingua asturiana pal añu 2014: la 35.ª edición del Premiu “Xosefa Xovellanos” de novela; la 20.ª edición del Premiu “Xuan M.ª Acebal” de poesía; la 20.ª edición del Premiu “Máximo Fuertes Acevedo” d’ensayu; la 7ª edición del Premiu “María Josefa Canellada” de lliteratura infantil/xuvenil; y la 6ª edición del Premiu “Alfonso Iglesias” de cómic. Cada premiu tien una dotación de 3.000 euros.

Esti 12 de setiembre finaliza’l plazu pa presentar orixinales a los cinco premios lliterarios que’l Gobiernu d’Asturies convoca nel presente añu 2014 cola mira d’arriquecer y prestixar la llingua y cultura asturianes.

El Premiu «Xosefa Xovellanos» de Novela (trixésima quinta edición) ye pa obres de tema, xéneru y estructura llibres que tengan una estensión mínima de setenta y cinco páxines a espaciu doble.

El Premiu «Xuan M.ª Acebal» de Poesía (vixésima edición) empobínase a obres de tema, xéneru y estructura llibres que tengan una estensión mínima de quinientos versos.

El Premiu «Máximo Fuertes Acevedo» d’Ensayu (vixésima edición), ye pa obres de tema, xéneru y estructura llibres que sían inédites y tengan una estensión mínima de cincuenta páxines escrites a espaciu doble.

El Premiu «María Josefa Canellada» de Lliteratura Infantil y Xuvenil dedícase a obres de lliteratura infantil o xuvenil (con independencia de que sían noveles, compilaciones de cuentos, poemarios o obres de teatru) una y buenes sían inédites y tenga una estensión mínima de doscientos cincuenta versos pa la poesía y de trenta páxines a espaciu doble pa los demás xéneros.

Y el Premiu «Alfonso Iglesias» de Cómic (sesta edición) ye pa obres d’estilu, tratamientu y tema llibres, pudiendo abarcar el desarrollu d’una historia única o un conxuntu d’histories, y con una estensión mínima de cincuenta páxines.

La Fundación Juan Muñoz Zapico, de CCOO, yá abrió otru añu más la convocatoria del XI Concursu de Microrellatos mineros Manuel Nevado Madrid al que podrán presentase escritores de cualquier nacionalidá, siempre y cuando que les obres presentaes tean escrites n’asturianu o en castellán, seyan orixinales y ensin asoleyar y nun fueren premiaes enantes en nengún otru concursu. Pue presentase un máximu de dos microrrellatos por cada autor o autora, teniendo que falar el conteníu de dalgún aspeutu (motivos temáticos, personaxes, argumentu o ambientación) venceyáu col mundu de la minería de cualquier país.

La estensión nun podrá perpasar les 40 llinies en lletra de cuerpu 12 y tipu Times New Roman o asemeyada, pudiendo ocupar el microrrellatu un máximu d’una páxina en formatu foliu o DIN-A4 por dambes cares. Les obres hai que les unviar per corréu postal a: Fundación Juan Muñiz Zapico (Concursu de Rellatos Mineros Curtios “Manuel Nevado Madrid”) cai Santa Teresa 15, CP 33005 Uviéu.

El plazu d’entrega d’orixinales acaba’l día 21 d’ochobre de 2014. La organización nomará al xuráu competente, presidíu pol caderalgu Benigno Delmiro Coto. El xuráu nun conocerá los nomes de los/les autores o autoras, namás el títulu de los rellatos y l’acuñu del autor. Del fallu del xuráu, al que nun se podrá retrucar, daráse conocencia pública’l 4 d’avientu de 2012 coincidiendo cola fiesta minera de Santa Bárbola.

Como tolosaños va dase un primer premiu de 600 euros, y dellos accésits.

Bases del concursu;

1. Podrán presentase a esti concursu escritores de cualquier nacionalidá, siempre y cuando que les obres presentaes tean escrites en castellanu o n’asturianu, seyan orixinales y ensin asoleyar y nun fueren premiaes enantes en nengún otru concursu. Pue presentase un máximu de dos microrrellatos por cada autor o autora.

2. El conteníu tendrá que falar necesariamente a dalgún aspeutu (motivos temáticos, personaxes, argumentu o ambientación) venceyáu col mundu de la minería de cualquier país.

3. La estensión nun podrá perpasar les 40 llinies en lletra de cuerpu 12 y tipu Times New Roman o asemeyada, pudiendo ocupar el microrrellatu un máximu d’una páxina en formatu foliu o DIN-A4 por dambes cares. 4. Les obres hai que les unviar per corréu postal a: Fundación Juan Muñiz Zapico (Concursu de Rellatos Mineros Curtios “Manuel Nevado Madrid”) c/ Santa Teresa 15, CP 33005 Uviéu.

5. Los concursantes tienen qu’unviar un sobre onde dientro apaecerá: · El o los dos microrrellatos · El sobre de la plica col alcuñu y títulu o títulos na so portada; amás dientro, tienen qu’apaecer tolos datos personales del autor o autora (nome y alcuñu, apellíos, señes, númberu del DNI o equivalente, títulu del microrrellatu o microrrellatos, teléfonu y, si tien, corréu electrónicu).

6. El plazu d’entrega d’orixinales acaba’l día 21 d’ochobre de 2014.

7. La organización nomará al xuráu competente, presidíu pol caderalgu Benigno Delmiro Coto. El xuráu nun conocerá los nomes de los/les autores o autoras, namás el títulu de los rellatos y l’acuñu del autor.

8. Del fallu del xuráu, al que nun se podrá retrucar, daráse conocencia pública’l 4 d’avientu de 2014 coincidiendo cola fiesta minera de Santa Bárbola.

9. Premios: · Primer Premiu 600 € (300 € en metálicu, más un llote de llibros y un grabáu de Manuel Calvo por un valor total de 300 €). · Accésit asturianu 350 € (200 € en metálicu, más un llote de llibros por valor de 150 €), para obres presentaes en llingua asturiana. · Accésit Testimoniu Históricu 250 € (100 € en metálicu más un llote de llibros por valor de 150 €), para obres que falen de fechos reales (biográficos, sindicales o sociopolíticos); siempre en rellación con conteníos históricos o acontecimientos socedíos nel entornu familiar o llaboral mineru. · Accésit mocedá 250 € (100 € en metálicu más un llote de llibros por valor de 150 €), para obres presentaes por autores de menos de veintiséis años. Para presentase a esti Accésit, los menores de veintiséis años tendrán que lo mentar xunto al alcuñu del microrrellatu.

TOLOS RELLATOS CURTIOS QUE SE PRESENTEN CONCURSEN PAL PRIMER PREMIU, INDEPENDIENTEMENTE DE QUE TAMIÉN OPTEN A UN ACCÉSIT.

Tolos y toles premiaos o premiaes van recibir un diploma conmemorativu onde va figurar el so microrrelatu impresu.

10. Los premios podrán dexase ermos si, a xuiciu del xuráu, nengún rellatu axuntare los méritos necesarios.

11. Igualmente, los rellatos premiaos, y una escoyeta fecha ente los rellatos presentaos asoleyaránse na forma que camiente más afayadiza la Fundación Juan Muñiz Zapico.

12. Participar nesti certame lleva inxerío aceutar perdafechu estes Bases.

El salón d’actos de l’Asociación de vecinos El Hórreo, asitiáu nel 16 de la cai Dr. Marañón, n’Avilés, va acoyer esti llunes 25, alredor de les 19:30 hores, la entrega de los gallardones del VIII Concursu de micro-rellatos n’asturianu “L’Horru del Carbayedo”, qu’esti añu tienen por ganador a Inaciu Galán, col rellatu tituláu “8:43” y por segundu clasificáu a Luis Manuel Suárez con “Soledá de luxe”.

Tolos rellatos, premiaos y non premiaos, presentáronse estos díes al públicu nuna esposición al aire llibre nel Parque’l Carbayedo. A les 18 hores, enantes de la entrega de premios onde tarán presentes los ganadores, el grupu de teatru asturianu “Garapiellu” va poner n’escena “De filandón”, una obra de teatru costumista asturianu.

Inaciu Galán, de Xixón y ganador del primer premiu, ye periodista, presentando dellos espacios na TPA, escritor y presidente de l’asociación Iniciativa pol Asturianu. El so llabor lliterariu llévalu alantre cola dirección de la revista Formientu. Ganador d’una riestra de premios, esti añu fízose col I Concursu de Microrrellatos y Poesía Carmen Ruíz-Tilve Arias o’l I Certame Lliterariu Astúrica, ente otros.

El ganador del segundu premiu, Luis Manuel Suárez, d’Avilés, ye profesor y xunto a Marisa López Diz, parte del dúu musical Mestura, que tien nel mercáu dellos discos pa neños y p’adultos, talos como “Agua del norte”, “Poemes de carambelu” o’l más recién, “A terra esqueicida”, en gallego-asturianu, una de les delles llingües nes que, xunto al asturianu, canta’l so grupu.

Les Xornaes Lliteraries nel Arcu Atlánticu dedíquense esta tarde de martes, dende les 19 hores a revisar el Drácula de Bram Stoker na Carpa Arcu Lliterariu, allugada nel Puertu Deportivu de Xixón.

Bram Stoker (1847-1912) ye un novelista y escritor irlandés conocíu pola so novela Drácula (1897). Ye autor tamién, ente más otro, del llibru de relatos Dracula’s Guest and Other Weird Stories. El primeru d’estos, tituláu en castellanu El invitado de Drácula, tuvo adaptación n’audiullibru radiofónicu que podemos sentir nuna grabación del ciclu Historias de RNE qu’empobinara l’escritor, periodista y locutor xixonés Juan José Plans.

Na mesma carpa, a les 19:45 hores tendrá lgar un averamientu a la figura de Jonathan Swift n’asturianu y “Los viaxes de Gulliver” y a les 20 hores ufriráse una ESBILLA DE CINE ASTURIANU cola proyección de los curtimetraxes Septiembre de Julio de la Fuente, No hay nadie de Jorge Dopacio y José Luis Velázquez, Fémina domus de Jim-Box, Bisarmes de Pablo A. Quiroga y Francisco Martínez y A fiya del xastre, de Marisa López Diz, y de los documentales Eu son quen fun de Melania Fraga y A bruxa de Brañavara d’Illán Gonzali y Berto Peña.Estos títulos tán asoleyaos por Gonzali Producciones nel DVD Esbilla 2012.

20:30 Patiu, Centru de Cultura Antiguu Institutu TEATRU Monólogu modernu Sindo: Tengo casería L’avilesín CarlosAlba Cellero ye cuentacuentos, monologuista, actor y periodista. Da vida al personaxe de Sindo, ufiertando con él una animación teatral distinta, afitada na comedia popular.

La vienta de llibros menguó alrodiu d’un 9’7% demientres 2013 n’España, hasta algamar un total de 2.708 millones d’euros de facturación dmientres esti periodu añal, polo qu’esta cayida traduzse nuna perda de 291 millones, según amuesa l’Analís del Comerciu del Llibru n’España, presentáu esti llunes pola Federación de Gremios d’Editores d’España (FGEE), qu’ensin embargu asitia nel 8% el xorrecimientu de les cifres de negociu de la vienta d’ediciones dixitales. El sector editorial atropa una cayida del 19 per cientu nos últimos diez años.

Ente los motivos qu’espliquen el descensu al respective de 2012, loseditores destaquen los efectos globales de la crisis económica, el descensu y supresión de les ayudes a les families pa l’alquisición de llibros de testu (que pasaren de 300 millones del cursu 2008-2009 a 80 nel cursu 2014-2014) y dellos otros factores.

Amás, faen referencia a la cayida del preciu de los llibros, un amenorgamientu del 2’4 per cientu al respective de 2012, pasando’l preciu mediu d’un exemplar de 14,52 a 14,18 euros; y tamién a la piratería (con perdes d’alredor de 302 millones d’euros).

Dientro de la programación del Veranu Lliterariu de Corvera, esti llunes día 14, celebrárse un alcuentru del escritor Xuan Carlos Crespos Lanchas colos sos pequeños llectores, de 11.30 a 12.30 hores na Biblioteca de Les Vegues, cola asistencia llibre y gratuita como davezu.

El Veranu Lliterariu de Corvera ye un programa d’actividaes qu’entama la Casa de la Llingua-Serviciu de Normalización Llingüística de Corvera.