Lliteratura

Esti xueves 13 de payares a les 19,30 hores ta anunciada la presentación del llibru Faciendo tiempu n’Ítaca (16 cuentos y un aquel) d’Ismael María González Arias na Llibrería La Pilarica, en Mieres del Camín.

Como se recueye na web de la editorial, “esta antoloxía de cuentos percuerre cuarenta años de producción lliteraria. Una bona manera d’alvertir cómo cambia la forma d’escribir, d’especial nuna llingua que nos años setenta tenía bien poques referencies en prosa, por nun dicir nenguna”.

Ismael María González Arias (Uviéu, 1958), xestor cultural y productor musical, escribiera’l so primer rellatu llargu bien d’años más tarde, El cuartu negociu, qu’obtuviera’l Premiu Xosefa Xovellanos 1992. El mesmu premiu que trece años después algamara con En busca de Xovellanos.

Dellos d’estos cuentos tienlos desperdigaos en distintes publicaciones, pero bona parte d’ellos permanecíen inéditos.

L’escritor Carlos González Espìna resultó ganador del Premiu «María Josefa Canellada», que con una dotación de 3.000 euros concede la Conseyería d’Educación, Cultura y Deporte del Principáu d’Asturies. A esti gallardón, qu’algama la so séptima edición, podíen presentase obres de lliteratura infantil o xuvenil, con independencia de que se tratara de noveles, compilaciones de cuentos, obres de teatru o poemarios, siempres que los testos fueren inéditos y tuvieren una estensión mínima de doscientos cincuenta versos pa la poesía y de trenta páxines a espaciu doble pa los demás xéneros.

El xuráu axuntó a les 12.00 hores del 10 de payares del 2014, na Casa la Cultura de Santoloya (Cabranes), y ente les obres presentaes, decidió por unanimidá conceder el Premiu al testu tituláu Cápsules de tiempu, destacando, según consta nel acta «la calidá del rexistru llingüísticu y el dominiu d’un estilu narrativu autorreferencial col que se desenvuelve una hestoria unitaria, pensada n’asturianu y de gran capacidá didáctica».

Carlos González Espina, llicenciáu en Lliteratura y bibliotecariu, desempeña actualmente’l so llabor na Fundación Municipal de Cultura del Conceyu de Xixón. Ye autor de bien d’artículos y reseñes en revistes especializaes, amás de publicar los llibros El Café Gijón (2001) y La Comedia Gijonesa (2001). Foi fundador, con Marina Lobo, de Llibros del Pexe, una de les primeres editoriales de llibros n’asturianu. Nella centróse sobre manera na traducción a esta llingua d’obres de lliteratura infantil y xuvenil, anque tamién firmó títulos como El curiosu alcuentru de don Quixote y la Princesa del Arbeyu (2005). El so últimu trabayu pal públicu infantil ye Falar ensin parar (2014).

La Tertulia Malory, de L’Entregu, escoyó como meyor llibru n’asturianu de tolos editaos nel 2013 la novela Carne de melandru, del escritor Milio Rodríguez Cueto. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 24 d’ochobre del 2014. El xuráu destacó nel acta del fallu «la maestría del artificiu narrativu que constrúi Rodríguez Cueto a la hora de contar a les xeneraciones más nueves l’ambiente, los valores y les rellaciones personales d’un tiempu col que la mayoría d’ellos cuenta que nun tien nada que ver».

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu’l 21 de payares.

Esta ye la tercer vez que’l grupu concede esti premiu, l’añu anterior resultó ganadora La Chelita, novela gráfica de Ruma Barbero. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

Los organizadores consideren que ye «pernecesariu» un premiu d’estes característiques nel ámbitu de la lliteratura asturiana tanto poles posibilidaes de visibilidá y proyección social que-y pue dar a la creación lliteraria como pola contribución al prestixu del asturianu como llingua.

“Carne de melandru”, ye una novela curtia cola que l’autor ganó yá nel añu 2012 el V Premiu «Maria Josefa Canellada» de lliteratura infantil y xuvenil que convoca la Conseyería d’Educación, Cultura y Deporte del Gobiernu d’Asturies. Nesti relatu, ambientáu na posguerra española, el protagonista ye un rapacín fíu d’un presu republicanu, que descubre, en dos díes, el valor de la vida, la sinrazón de la muerte, la cobardía y la traición. Acompañen el testu ilustraciones d’Alberto Álvarez Peña.

Milio Rodríguez Cueto (Xixón, 1962) ye profesor de Llingua Española y Lliteratura, amás d’escritor y editor. Como narrador, diose a conocer nel añu 1990 cola obra Diálogu de la llingua o los gochos llinguateros. Esti llibru, escritu como una parodia de los diálogos renacentistes, destaca pol tonu satíricu y la ironía cola que se denuncien dellos escesos del academicismu. Esi tonu polémicu apaez n’obres posteriores, tanto d’ensayu (Vistes Lliteraries), como de narrativa (Románticu, 1992), o nos artículos a mediu camín ente los dos xéneros publicaos en Les Noticies y La Nueva España.

Otres obres del autor son Aventures (1997), L’últimu volador (2004), Véndese pisu (2006) o El final de la historia (2010), en cuantes a narrativa, mentes que nel terrén del ensayu pueden citase Vistes lliteraries (1993), Manual de llingua asturiana (1994), Asturias : paisajes humanos, paisajes industriales (1997), El velatoriu de Blancañeve (1999) o Asturias 25 miradas (2003). Na mayoría de los sos testos ta presente una crítica ensin concesiones a los aspectos más risibles del asturianismu y de la sociedá asturiana en xeneral, amás d’un humor intelixente que fai de Rodríguez Cueto un casu aparte na lliteratura asturiana de los nuestros díes. Ye tamién autor de traducciones de Stevenson, Sade, Shakespeare y Oscar Wilde, ente otros.

​La Xunta pola Defensa de la Llingua Asturiana, como ye vezu, organiza un cursu d’asturianu (nivel aniciu) nel conceyu d’Uviéu nesta seronda. El cursu entama’l martes 11 de payares, nel local del Conceyu Abiertu, La Gascona, 12, baxu A, n’Uviéu. y tien un total de 40 hores de duración, tando dirixíu sobre manera a persones adultes. Nél, los alumnos y alumes van poder deprender el bon usu del idioma tanto a nivel escritu como oral.

L’horariu va ser de 19’00 a 21’00 hores, los martes y xueves. El preciu de la matrícula completa y materiales ye de 20 euros pa los socios, y de 30 euros pa los non socios. Toles persones interesaes puen apuntase llamando al 985 22 95 53 / 679 65 09 98 o bien mandando un mail a la dirección: uvieuarrobaexunta.org.

La XDLA ye una entidá acreitada pola Conseyería d’Educación pa la formación permanente del profesoráu.

Esti próximu xueves, día 6 de payares, a les seite y media la tardi, nel llocal social del Atenéu Obreru de Xixón (na Cai Covadonga, 7 – 1u Izda.), tendrá llugar la presentación de cinco llibros infantiles en llingua asturiana, espublizaos pola Editorial Impronta. Na presentación van tar los autores: Leonardo Borque (Bernardo Lodares), autor de Teba; Alfonso López Alfonso, autor de Valentín y el monte d’azucre; Carlos González Espina, autor de Falar ensín parar; ya Irene Riera, autora de Queridu día y Hai que tomar midíes.

Los llibros que se presenten tienen histories bien guapes que cuntar y a les que van averanos caún y caúna de los y les autores:

Teba

La guerra ente españoles traxo munches desgracies y necesidaes. La fame fue namás qu’una de les consecuencies d’aquella guerra terrible. En mediu d’esi tiempu d’escuridá y medrana, emociónanos la pequeña historia d’una perra que nun entendía de guerres y sí de fidelidá. «A lo meyor yá te lo contaron, pero va bastantes años hubo una terrible guerra ente españoles. Lo malo de les guerres no son solo los que muerren nos campos de batalla, sinón la desgracia que vien dempués…» Bernardo Lodares / Carmen Fernández.

Valentín y el monte d’azucre

Al protagonista d’esti cuentu encánta-y escuchar histories pero présta-y más contales. Pa convencer a la madre de que les coses que siempre anda inventando discúrreles él solu, escribe’l cuentu de Valentín y el monte d’azucre. «Cerca de casa de los mios guelos hai un monte que tengo muncha gana de xubilu. Ye tan blancu que delles veces abúltame que ta fechu d’azucre…» Alfonso López Alfonso.

Falar ensin parar

Ente ser un poco charrana o quedase cola pallabra na boca, la protagonista d’esti cuentu tienlo mui claro. A otros da-yos por axuntar caxigalines inútiles, pero ella quier más axuntar pallabres.Carlos González Espina / Ilustraciones: Marina Lobo

Queridu día

L’ánimu que se precisa pa facer frente al nuevu día ye’l mesmu que fai falta pa entamar una aventura. Sábelo bien la neña d’esti cuentu: cualquier viaxe, el más cortu o la vuelta entera alredor del mundu, empiecen de la mesma manera, con un pequeñu pasu. Llevantase de la cama y entamar un día nuevu ye dalgo bien costoso munches veces, como toos sabemos. Pero un esfuerzu como esi siempre tien premiu, sobre too si lo facemos col mesmu bon ánimu de la neña que protagoniza esti cuentu.Irene Riera / Ilustraciones de Lara González Lobo.

Hai que tomar midíes

La imprecisión con que falamos de munches coses nun-y gusta nada a la protagonista d’esti cuentu, seguramente una gran científica del futuru, que se pon a discurrir nueves maneres pa midir como se debe coses tan importantes como los besos, los abrazos, les esmoliciones, los disgustos, les allegríes… Nun sé si vos dais cuenta de lo poco preciso que ye la xente pa falar de munches coses. Pero eso nun val pa la protagonista d’esti cuentu: ella siempre mide bien les sos pallabres. Si toos ficiéramos lo mesmo, díbamos entendenos muncho meyor. Irene Riera.

Nes xornaes «Manuel Menéndez y l’Asturies occidental mediu sieglu depués», entamaes pola Universidá d’Uviéu (cola organización del Seminariu de Filoloxía Asturiana) y el Real Instituto de Estudios Asturianos (RIDEA), presentáronse trés llibros nuevos, con importantes aportaciones a la llingüística y filoloxía asturianes.

La primera de les obres yera “El Cuarto de los Valles (textos inéditos). III. Toponimia, refranes y conjuros” de Manuel Menéndez (con introducción y edición de Ramón d’Andrés Díaz y Taresa Fernández Lorences). La célebre tesis doctoral de Manuel Menéndez, El Cuarto de los Valles. Un habla del occidente asturiano, lleída na Universidá Central de Madrid en 1957, publicóse póstuma nos años 1963 (volume I) y 1965 (volume II), n’edición acuriosada por Emilio Alarcos. Dellos materiales d’esta tesis quedaran daquella inéditos. Y agora, cola publicación d’esti volume III, dispónse finalmente de la obra entera. Esti volume ta formáu por testos dialectales (refranes y conxuros) y por una llista alfabética de topónimos, con comentarios del autor y amestadures de los editores.

El segundu de los trabayos espublizaos ye otra obra de Manuel menéndez “Palabras y cosas de Bermiego, Quirós (1950-1961)”, en edición de Xulio Viejo Fernández. Nel añu 2011, nuna mudanza familiar, atopóse un entemez de materiales del fallecíu llingüista Manuel Menéndez García (1909-1962), con un lletrerín que dicía «contiene notas sobre Bermiego». Tratábase de 56 fueyes a mano, 19 fichas de datos lingüísticos de la fala de Quirós y 5 fueyes con notes y dibuxos, qu’abarcaba dende 1950 a 1961. Arriendes d’ello, había una carta a Fritz Krüger de 1954 con informes léxicos d’Asturies y Quirós; encuestes dialectales feches a estudiantes del Seminariu d’Uviéu; y 289 fiches d’información llingüística de Quirós. Too ello formaba parte d’un futuru trabayu al que l’autor yá se refería col títulu de Palabras y cosas de Bermiego. El llingüista quirosanu Xulio Viejo, director de la Revista de Filoloxía Asturiana, iguó la edición de tou esti material, acuriosándolo en cuatro partes: «Palabras y cosas de Bermigo (Quitós)», «Etnografía», «Descripción lingüística» (fonética, fonoloxía, morfoloxía) y «Vocabulario». Una perdocumentada introducción de Viejo arredondia esti llibru que pue considerase un auténticu y afortunáu descubrimientu pa la llingüística asturiana.Finalmente, vieno acabente d’espublizase tamién la “Poesía popular de Asturias (1888-1889) de Ake Munthe, n’edición de Juaco López Álvarez & Jesús Suárez López.

En 1886, el filólogu suecu Åke W:son Munthe, con 26 años, llegó a Cangas del Narcea pa recoyer información del asturianu pa la so tesis doctoral, cosa que fixo con informantes de Pousada de Rengos y Vil.louril de Bimeda; publicóse depués, en 1887, col títulu de Anteckningar om folkmålet i en trakt av vestra Asturien (Anotaciones sobre el habla popular de una zona del occidente de Asturias). Pero tamién recoyó cantares populares pa un estudiu del folclor de la zona, publicáu n’entregues nos años 1888 y 1889, col títulu Folkpoesi från Asturien. Depués de 125 años, ve la lluz esti trabayu col títulu Poesía popular de Asturias, onde se recueyen romances, coples, cantares y cantares de neños. Fixo la traducción María Nilsson, de la Universidá d’Iowa, y iguaron la edición Juaco López y Jesús Suárez.

Facebook del Seminariu de Filoloxía Asturiana

“A partir del día 4 de los santos (4/XI/2014) tódalas personas que tean interesadas en participar no XII Concursu cuentos curtios del Conceyu Cangas, pueden ponese al l.labor de preparar los sous orixinales”. Asina entama la convocatoria de la edición de 2014 d’esti pernomáu concursu n’asturianu occidental que lleva ufriendo un bon número de cuentos calidables nestos caberos años.

Sigún asoleya la oficina de Política Llingüística d’esta fastera occidental, “el concursu cuentos, que fai estiañu la súa edición doce, premia las meyores obras escritas n’asturianu estándar ya occidental ya a él puede presentase cualisquier persona mayor de 16 años. Las obras han tener cinco fueyas cumo mínimo ya venti a lo máximo, han ser orixinales, anónimas ya tar escritas a espaciu doble en formatu DIN A-4”.

El plazu pa presentar orixinales acaba’l día 5 del mes muertu comu lo nomen pela zona y el xuráu, que se xuntará a mediaos del mes, “ya vei tar formáu pola responsable del Serviciu de Normalización L.lingüística, por personal del Aria de Cultura del Conceyu Cangas, por un/a representante de la Rede de Normalización L.lingüística nos Conceyos ya por maestros/as ya escritores/as en l.lingua asturiana, vei dar a conocer ente esi mes ya’l siguiente el sou determín a los ganadores”.

Mañana vienres, 17 d’ochobre a les 17 hores na Biblioteca de La Pola, entama la temporada de los ‘Cuentos de Raitanín’. Ésti ye un programa de dinamización llectora cola mascota de les biblioteques de L.lena. Son sesiones de Cuentacuentos con talleres pa niños de 3 a 10 años.

El 24 d’ochobre será en Villayana y el vienres día 31 nel Centru de Llectura La Casona de Campumanes.

Mañana, 10 d’ochobre de 2014, ábrese la convocatoria de los Premios imón 2015 entamaos pola Asociación Cultural L’Arribada. Les candidatures, razonaes, puen ser presentaes por una persona o un colectivu nes señes de corréu electrónicu de l’asociación: larribada@gmail.com, hasta’l 10 de xineru de 2015. Los Premios Timón destínense a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones los/es escritores que nacieren nel añu 1.965 o antes.

Trátase del IX Premiu Timón, p’autores en llingua asturiana y n’eonaviego, y del VI Premio Timón, p’autores asturianos en llingua castellana.

Igualmente, prémiase tamién a asociaciones, sociedaes y fundaciones con sede n’Asturies que tengan como fin la conservación y promoción de la identidá cultural de nueso, per aciu del III Premiu Timón de Cultura Asturiana.

P’alcordar los gallardones l’asociación convocará trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de la décima edición de L’Arribada.

Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014); del Premio Timón, Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013) y Carmen Ruiz-Tilve; y del Premiu Timón de Cultura Asturiana l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).