Lliteratura

Esti llunes 29 d’avientu a les 18 hores tenía llugar la presentación del llibru “El Anguleiro. Soños de Navidá” na Biblioteca As Quintas de A Caridá (El Franco).

El llibru ye la versión en fala o gallego-asturiano del nomáu “L’Anguleru. Suaños de Navidá” y na presentación participaron Víctor Raúl Pintado Rey (autor de los testos), Aurora Bermúdez Nava (traductora al gallego-asturiano), Sandra Rúa Peláez (representante de l’AMPA que participó nel proyectu) y Fernándo González (miembru de la’Asociación Cultural Garabuxada de L’Arena, que creó y popularizó a L’Anguleru).

Esti miércoles conocíuse’l determín del xuráu del XII Concursu de cuentos curtios de Cangas del Narcea, formáu pola Conceyala de Cultura, Dña. Marta Fernández; por una responsable de la Rede de Normalización Llingüística nos Conceyos, Dña. María García; por profesoras especialistas en llingua asturiana que fan el sou ļļabor na zona occidental: Dña. Marta López ya Dña. Laura Marcos; por escritores: D. Xuan Santori ya D. Elías Veiga ya, p’acabar, pola responsable del Serviciu de Normalización Ļļingüística del Ilmu. Conceyu de Cangas del Narcea, Dña. Mónica Rodríguez Riesgo, alzándose ganadores d’esta edición última: na categoría d’occidental, el bualés Miguel Rodríguez Monteavaro, ļļingüista ya escritor que participóu cono cuentu Roma de moda; ya’l xixonés Francisco Ramón Álvarez González, periodista, traductor ya escritor que participóu cono cuentu Les flores del capitán Richardson.

El currículu d’estos homes da yá bona cuenta de la calidá de los trabayos presentaos al concursu, destacada polos miembros del xuráu, que se felicitanon de siguir contando con trabayos tan bonos, amás de pol espoxigue de la literatura na variante occidental.

Esta selmana aconceyábase’l xuráu calificador del XIII Concursu de Narraciones Curties Conceyu Llaviana, formáu por Dña. María García Fernández, D. Pablo Xuan Manzano Rodríguez, Dña. Carla Domínguez Díez y Dña. Mónica Rodríguez Riesgo, y decidía entregar un primer premiu de 400 € a Dña. Laura Marcos Domínguez pola narración La Santa Fesoria y un segundu premiu de 150 € a D. David Fernández Fernández pola narración Vivir suañando.

L’Academia de la LLingua Asturiana vieno acabante de facer anuncia d’un actu d’homenax que se fadrá na alcordanza del profesor D. MIGUEL RAMOS CORRADA, vicepresidente de l’ALLA, y que va tener llugar mañana miércoles 17 d’avientu, a les 7 de la tarde, na sala de conferencies del Antiguu Institutu Xovellanos, na cai Xovellanos 21, de Xixón. L’actu va cuntar ente otros cola Conseyera d’Educación, Cultura y Deporte del Gobiernu del Principáu, Ana Gozález Rodríguez, y el Rector de la Universidá d’Uviéu, Vicente Gotor.

L’Actu d’alcordanza de Miguel Ramos Corrada entamáu pola Academia de la LLingua va ser una presentación del llibru “Estudios lliterarios y otros trabayos”, obra que recueye’l so llabor como másimu especialista de la lliteratura asturiana. Xunta la Conseyera d’Educación, Cultura y Deporte del Gobiernu del Principáu, Ana Gozález Rodríguez, y el Rector de la Universidá d’Uviéu, Vicente Gotor, van participar nel actu’l COnceyal d’Educación, Cultura, Mocedá y fiestes del COnceyu de XIxón, Carlos Rubiera, el direutor de la UNED n’Asturies, Mario Menéndez Ferández, y la presidenta de l’Academia de la Llingua Asturiana, ana María Cano González.

El Museu del Pueblu d´Asturies presentaba esti xueves 27 a les 12 hores el llibru dixital “Comedies de sidros (1876-1932)”, edición completa de les comedies escrites por José Noval Martínez “Siero” (1856-1937) pala so representaciónnes mazcaraes d’iviernu que se celebraben a finales del sieglu XIX y principios del XX nos conceyos de Siero, Llangréu y Bimenes.

Esti volume, editáu en formatu dixital por Luis M. Iglesias Cueva, Vicente Rodríguez Hevia y Jesús Suárez López, consta de 450 páxines, va precedíu d’un estudiu introductoriu sobre les mazcaraes d’iviernu y les “comedies de sidros”, y contien 15 comedies, na so mayoría inédites, escrites y representaes ente los años 1856-1937.

La presentación tuvo al cargu de Xosé Nel Riesgo Fernández, Director de la Fundación Municipal de Cultura, Educación y Universidá Popular, Luis M. Iglesias Cueva y Vicente Rodríguez Hevia. Escritor, y Jesús Suárez López, director del Programa de Tradición Oral del Museu del Peblu d´Asturies.

La Conseyería d’Educación, Cultura y Deporte vien de fallar esti martes 25 de payares los premios lliterarios en llingua asturiana pal añu 2014: la 35.ª edición del Premiu «Xosefa Xovellanos» de Novela, que fora parar a Antón García y la 20.ª edición del Premiu «Xuan M.ª Acebal» de Poesía pala escritora Ángeles Carbajal. Primero ya diera a conocer los ganadores de la 20.ª edición del Premiu «Máximo Fuertes Acevedo» d’Ensayu, la 7.ª edición del Premiu «María Josefa Canellada» de Lliteratura Infantil/Xuvenil, y la 6.ª edición del Premiu «Alfonso Iglesias» de cómic.

Al Xosefa Xovellanos podíen presentase noveles en llingua asturiana de tema, xéneru y estructura llibres, con una estensión mínima de setenta y cinco páxines, siempres que foren inédites y non premiaes n’otros concursos. El xuráu encargáu de valorar les obrespresentaes tuvo presidíu pola directora xeneral de Política Llingüística, Ana M.ª Fueyo Llaneza, y cuntó con persones rellacionaes cola lliteratura asturiana como los escritores Pablo Rodríguez Medina, ganador de la edición anterior del gallardón, Ana Vanessa Gutiérrez, Roberto González-Quevedo y Paz Fonticiella, amás del técnicu en materia llingüística Xosé Miguel Suárez Fernández.

El xuráu decidió por mayoría conceder el Premiu a la novela titulada Crónica de la lluz y la solombra, destacando “l’habilidá pa narrar el sucesu central de la hestoria dende múltiples puntos de vista y la maestría nel manexu de rexistros llingüísticos colos que s’algama un ritmu bien llográu”. El testu presentóse col seudónimu “Escudiella”. N’abriendo la plica, l’autor ganador resultó ser Antón García.

Antón García (Tuña, Tinéu, 1960) ye poeta, narrador y traductor, amás d’estudiosu de la lliteratura asturiana. Na so obra destaquen los títulos de narrativa El viaxe (1988) y Díes de muncho (1998), colos que yá ganó’l Premiu «Xosefa Xovellanos» nes sos ediciones séptima y decimoctava. Llevó amás el Premiu «Teodoro Cuesta» de Poesía en 1995 y otros como’l de la Crítica o’l «Fernández Lema».

La so poesía completa apaeció nel volume La mirada aliella (2007). Otra manera, Antón García foi tamién fundador de les editoriales Tsibros del Frou y Ediciones Trabe, y anguaño dirixe la revista asturiana de cultura Campo de los patos.

Al Xuan María Acebal de poesía podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempres que fueren inéditos y non premiaos n’otros concursos.

Un xuráu presidíu por Ana M.ª Fueyo Llaneza, directora xeneral de Política Llingüística, y del que formaben parte los escritores Pablo Texón y Sofía F. Castañón; y el filólogu de la Dirección Xeneral de Política Llingüística, Luis Casteleiro, decidió por unanimidad conceder el premiu al poemariu tituláu L’aire ente la rama, destacando, según consta nel acta, «la voz personal y madura con que se va construyendo un poemariu harmónicu y de gran intensidá rítmica». Abierta la plica, l’autora ganadora resultó ser Ángeles Carbajal.

Ángeles Carbajal (Argüelles, Siero, 1959) ye llicenciada n’Hestoria del Arte pola Universidá d’Uviéu. Collaboradora de la revista Clarín y directora de talleres lliterarios entamaos pol Conceyu d’Uviéu o Caxastur, ye autora de los poemarios en castellán La caligrafía de la distancia (1993) y La sombra de otros días (2002), y del poemariu n’asturianu En campu abiertu, col que llogró nel 2012 el Premiu «Teodoro Cuesta» de Poesía que convoca’l conceyu de Mieres.

La Tertulia Malory de L’Entregu, va entregar esti vienres 21 de payares, a les cinco y media de la tarde, el premiu al meyor llibru n’asturianu del 2013, nun actu públicu que se va celebrar nel pub Tom Malory de L’Entregu, onde dende fai 16 años la tertulia vien axuntando selmanalmente. La obra ganadora d’esta tercer edición del premiu ye la novela xuvenil Carne de melandru, del autor Milio Rodríguez Cueto.

El xuráu tuvo formáu polos escritores Xulio Arbesú, José Luis Rendueles, Solina Turbón, Pablo Rodríguez Medina, Roberto Corte, David Fernán, Chechu García y Henrique G. Facuriella, que fallaron el premiu nuna sesión especial de la tertulia celebrada en L’Entregu’l 24 d’ochobre del 2014, onde destacaron «la maestría del artificiu narrativu que constrúi Rodríguez Cueto a la hora de contar a les xeneraciones más nueves l’ambiente, los valores y les rellaciones personales d’un tiempu col que la mayoría d’ellos cuenta que nun tien nada que ver».

El gallardón consiste nuna ilustración d’Alfonso Zapico y una medaya conmemorativa. Esta ye la tercer vez que’l grupu concede esti premiu, l’añu anterior resultó ganadora La Chelita, novela gráfica de Ruma Barbero.

Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu. Los organizadores consideren que ye «pernecesariu» un premiu d’estes característiques nel ámbitu de la lliteratura asturiana tanto poles posibilidaes de visibilidá y proyección social que-y pue dar a la creación lliteraria como pola contribución al prestixu del asturianu como llingua.

Carne de melandru, ye una novela curtia cola que l’autor ganó yá nel añu 2012 el V Premiu «Maria Josefa Canellada» de lliteratura infantil y xuvenil que convoca la Conseyería d’Educación, Cultura y Deporte del Gobiernu d’Asturies. Nesti relatu, ambientáu na posguerra española, el protagonista ye un rapacín fíu d’un presu republicanu, que descubre, en dos díes, el valor de la vida, la sinrazón de la muerte, la cobardía y la traición. Acompañen el testu ilustraciones d’Alberto Álvarez Peña.

Milio Rodríguez Cueto (Xixón, 1962) ye profesor de Llingua Española y Lliteratura, amás d’escritor y editor. Como narrador, diose a conocer nel añu 1990 cola obra Diálogu de la llingua o los gochos llinguateros. Esti llibru, escritu como una parodia de los diálogos renacentistes, destaca pol tonu satíricu y la ironía cola que se denuncien dellos escesos del academicismu. Esi tonu polémicu apaez n’obres posteriores, tanto d’ensayu (Vistes Lliteraries), como de narrativa (Románticu, 1992), o nos artículos a mediu camín ente los dos xéneros publicaos en Les Noticies y La Nueva España. Otres obres del autor son Aventures (1997), L’últimu volador (2004), Véndese pisu (2006) o El final de la historia (2010), en cuantes a narrativa, mentes que nel terrén del ensayu pueden citase Vistes lliteraries (1993), Manual de llingua asturiana (1994), Asturias : paisajes humanos, paisajes industriales (1997), El velatoriu de Blancañeve (1999) o Asturias 25 miradas (2003). Na mayoría de los sos testos ta presente una crítica ensin concesiones a los aspectos más risibles del asturianismu y de la sociedá asturiana en xeneral, amás d’un humor intelixente que fai de Rodríguez Cueto un casu aparte na lliteratura asturiana de los nuestros díes. Ye tamién autor de traducciones de Stevenson, Sade, Shakespeare y Oscar Wilde, ente otros.

L’escritor y periodista Enrique Carballeira ye’l ganador de la sesta edición del Premiu Alfonso Iglesias de Cómic en Llingua Asturiana, que con una dotación de 3.000 euros concede la Conseyería de Cultura del Principáu d’Asturies. El xuráu encargáu de valorar les obres presentaes axuntóse na mañana de güei, baxo la presidencia de la directora xeneral de Política Llingüística, Ana María Fueyo Llaneza, y tuvo formáu pol dibuxante Neto, l’escritor y guionista Chechu García y el técnicu en materia llingüística Luis Casteleiro.

A esti gallardón podíen presentase cómics d’estilu, tratamientu y tema llibres, escritos en llingua asturiana y con una estensión mínima de cincuenta páxines, siempre que fueren inéditos y non premiaos n’otros concursos.

Ente les obres presentaes, el xuráu decidió por unanimidá conceder el Premiu al cómic tituláu L’arume de la tierra, destacando, como consta nel acta, “l’usu de los recursos propios del llinguaxe del cómic, la calidá gráfica y el manexu de los tiempos narrativos al serviciu d’una hestoria con tresfondu actual”. El testu presentóse col seudónimu Mozer. N’abriendo la plica, l’autor ganador resultó ser Enrique Carballeira Melendi.

Enrique Carballeira (L’Infiestu, 1970) ye periodista, escritor, diseñador y ilustrador. Collaborador habitual d’Onda Cero Radio y del diariu El Comercio, ye autor d’un bon númberu de llibros pa públicu infantil, mesmo qu’obres de cómic, cuentos p’adultos y humor gráfico, ámbitu esti nel que destaca la publicación selmanal de la tira «Les coses de Nardo y Quina», que vien apaeciendo de manera continuada dende va venti años nos periódicos El Nora y El Fielato. Amás d’ello, nos últimos años punxo en marcha diversos proyectos editoriales, talleres d’escritura, d’ilustración y de llingua asturiana, mesmo que proyectos audiovisuales y d’animación.

L’axencia de comunicación B. Alto Creativos acaba de sacar a la cai’l segundu númberu de la segunda época de la revista Brixel, una publicación añal dedicada , principalmente, a la lliteratura escrita n’asturianu, anque ensin dexar de llau a autores y testos relevantes de la lliteratura universal. Nesti sen, Brixel garra, como revista añal, el relevu del suplementu lliterariu del mesmu nome que, ente xunu del 2010 y xineru del 2012 se publicara col periódicu Les Noticies con una periodicidá mensual.

Esti segundu númberu abre con un artículu de Manuel Campa n’alcordanza del poeta Felipe Prieto, fallecíu en xunetu d’esti añu, y sigue con una entrevista a la escritora Consuelo Vega, que vien de publicar el llibru de rellatos Más espeso que l’agua. Ente los artículos de fondu, destaquen los dedicaos a la poesía de Kavafis (qu’escribe Henrique G. Facuriella) y d’Eugénio d’Andrade (al cargu de Raquel Fernández Menéndez), poesía qu’hai poco editó n’asturianu la editorial Saltadera (Xosé Gago foi’l traductor de Los 154 poemes de Kavafis, mentes qu’Antón García fixo la escoyeta y la versión asturiana de l’antoloxía Les manes enceses, dedicada al poeta portugués).

Pela so parte, Raquel Friera destaca la importancia que tuvo la primer edición d’El Principín n’asturianu (de la que se cumplieron yá 30 años), Rosario Hernández Catalán fai repasu de los festivales teatrales de más sonadía nel espaciu rural y Juan Carlos Aparicio, na sección d’artes plástiques, mira pa la colección pictórica tan importante que foi axuntando la familia Masaveu. En cuantes al articulismu lliterariu, hai que destacar los testos de Xosé Bolado y Sibisse Rodríguez, mentes que, nel terrén de la creación, la revista ufre cuatro cuentos de José Luis Rendueles y dellos poemes del gallegu Eusebio Lorenzo Baleirón, que traduz Antón García.

Nun se puen escaecer tampoco les entrevistes al escritor Xurde Álvarez (que ta acabante de publicar la novela Si’l temblor niega’l fríu) y a Marina Lobo, responsable de la editorial Impronta. La revista complétase cola sección de crítica lliteraria, onde se reseñen con procuru dellos de los títulos más relevantes que se publicaron n’asturianu a lo llargo de los últimos doce meses, tanto de narrativa como de poesía o teatru, ensin escaecer la lliteratura infantil o’l cómic.

La publicación, de la que s’imprimieron 5.000 exemplares, pue garrase de baldre nes biblioteques públiques d’Uviéu (El Fontán), Xixón (Xovellanos y Antiguu Institutu), Avilés (Casa de Cultura), Mieres, Llangréu, Samartín del Rei Aurelio, Llaviana y La Pola Siero, amás d’en llibreríes y quioscos de toa Asturies. Tamién se pue consultar per internet na dirección http://www.balto.es/p/brixel.html.

Más información

Esta selmana vieno acabante de convocase’l XIII Concursu de narraciones Curties n’Asturianu Conceyu de LLaviana que tien les bases que vienen darréu:

1. Los trabayos, de temática llibre, han de redactase n’asturianu estándar, y han de tener una estensión mínima de cinco fueyes y una estensión máxima de venti fueyes.

2. Los relatos han d’entregase por cuatriplicáu, mecanografiaos en DIN A4, a doble espaciu y per una sola llana.

3. Les obres, ensin firma, van presentase con pseudónimu. Esti va apaecer na plica adxunta, en sobre cerráu, nel que va constar el nome completu del autor/a, DNI, señes, teléfonu de contactu y currículum.

4. Cada participante va poder presentar una obra como máximu.

5. Los ganadores de la edición anterior del concursu nun van poder participar nesta edición.

6. Los cuentos tienen de ser inéditos, non premiaos n’otros concursos lliterarios y ensin tar suxetos a compromisos d’edición.

7. Les obres van presentase en: OFICINA DE NORMALIZACIÓN LLINGÜÍSTICA DE LLAVIANA XIII CONCURSU DE NARRACIONES CURTIES N’ASTURIANU CONCEYU LLAVIANA CASA ARMANDO PALACIO VALDÉS, 33987 ENTRIALGO, LLAVIANA.

8. El plazu d’almisión de trabayos acaba’l viernes 28 de noviembre de 2014 a les 14:00 hores.

9. Toles obres presentaes sedrán propiedá del Conceyu Llaviana, que se reserva’l derechu de la publicación, citando, nesi casu, la procedencia.

10. Establécense los premios siguientes:

11. La entrega de premios va tener llugar nel mes de diciembre.

12. Cualquiera de los premios va poder declarase desiertu.

13. El xuráu va tar integráu por: dos representantes de la Conceyalía d’Educación, Política Cultural y Participación Ciudadana; un/a representante de la Rede de Normalización Llingüística nos Conceyos; una persona en representación de l’Academia de la Llingua Asturiana.

14. Les decisiones y el fallu del xuráu van ser inapelables. La participación nesti concursu conlleva l’aceptación d’estes bases.