Lliteratura

La Casa de Cultura de Grandas de Salime llenóse nel entamar d’abril cola presentación de la novela El Batallón Galicia, de Cristóbal Ruitiña. Amás de munchos vecinos del conceyu anfitrión, tuvo presente xente de territorios limítrofes como Ibias, Ayande, Negueira o Fonsagrada. Eduvigis Valledor, del Colexu Públicu El Salvador, presentó a los dos intervinientes y l’escritor Xosé Miguel Suárez contestualizó l’aparición de la novela nel procesu de remanecer lliterario del gallego-asturiano y describió la so estructura.

Según apuntó Xosé Miguel Suárez na so intervención, “chama el atención pra ben el feito de qu’El Batallón Galicia ten úa estructura mui trabayada. Hai úa primeira parte que se desenvolve nel presente, con un protagonista, Jaime Souto, que volve a Grandas y atópase cuas escavacióis que tán fendo nel Garabocho pra identificar os restos del comandante Moreno y os sous homes. É un arranque que ten suspense, que ta escrito con habilidá, y unde se nos apuntan dalgús dos temas sobre os que se vai volver al largo del obra.”

Suárez tamién destacó cómo fai l’autor pa mezclar realidá y ficción. “Por poñeryes un caso que me chocóu, a Jaime Souto, el protagonista, pídenye úa colaboración pral libro das festas de Grandas y cópianosla na novela, con notas a pé de páxina y todo. Nunca sabemos ben únde acaba a realidá y únde empeza a ficción, y ese xogo é importante pral interés del lector.”

Pa terminar, el tamién coordinador de la revista literaria Trabatel llamó l’atención de los asistentes sobre cómo termina El Batallón Galicia. “El final da novela, que nun yelo vou cuntar, tamén me pinta mui al xeito porque, anque sabemos cómo acaba a traxedia, deixa úa porta aberta mui poética y mui suxerente.”

Pola so parte, Cristóbal Ruitiña desplicó a los presentes cómo foi el procesu de xestación de la novela, dende qu’a mediaos de los noventa sintiera la primer vez el cantar del comandante Moreno, que na comarca fora pasando de padres a fíos, hasta qu’un día descubre qu’el so güelu formó parte d’esa mesma compañía, pasando pol entamu de les exhumaciones nel branu de 2007. Ye entós cuando nacen les preguntes que se convierten nel motor de la novela: “¿puido conecer el meu abolo al comandante Moreno?. ¿Chegaran a tratarse?. ¿El feito de qu’el meu abolo tuvera nese batallón tuvo algo que ver pa qu’acabaran vindo por Grandas?.”

De magar estes preguntes inciales, Ruitiña foi relatando les dificultaes que tuvo qu’afrontar demientres la construcción de la novela. L’autor d’El Batallón Galicia quixó treslladar a los presentes lo importante que fuera la so vinculación sentimental a los escenarios de la novela pa poder terminala. “Hasta hai ben pouco nun sabía qu’os carreiros qu’eu anduvera por detrás de Penafonte cuando neno tamén os anduvera el comandante Moreno muitos anos atrás. E un día, cuando inda nun sabía se iba ser quén a rematar a novela decidín volver a andalos, piséin a mesma terra que pisara José Moreno Torres, vín lo que probablemente vira él cuando escapaba da morte, respiréin un aire mui parecido pro sin a urxencia de saber que podía ser el último; e decidín que sí, que tía que terminar a novela, anque nun fora máis que pa qu’os futuros caminantes de todos esos carreiros souperan que por aí tamén anduvera un home chamado José Moreno Torres al que todos chamaban comandante Moreno.”

Iniciativa pol Asturianu vieno acabante convocar un concursu de micropoemes en Twitter con motivu del Día Internacional de la Poesía, nel que collaboren una decena d’editoriales asturianes y al que van poer presentase micropoemes en Twitter del sábadu 21 al llunes 23 de marzu.

Iniciativa pol Asturianu entama la primer edición del Concursu de micropoesía Cola poesía na llingua (#PoesíaLlingua) col envís de celebrar el Día Internacional de la Poesía, el 21 de marzu de 2015, y al mesmu tiempu difundir la llingua asturiana nes redes sociales.

Nel concursu pueden participar tolos usuarios de Twitter que sigan a Iniciativa pol Asturianu @IniciativaxAst nel momentu de presentar el micropoema o micropoemes n’asturianu, pudiendo usar les abreviatures habituales en Twitter, con procuru pa col bon entendimientu y bon usu de la llingua.

Nes bases afítase que van poer usase imáxenes con testos más llargos o semeyes complementaries al mesmu. Los testos han publicase en Twitter en namás un tuit qu’incluya’l hashtag o etiqueta #PoesíaLlingua.z/p>

Pueden presentase en total un máximu de 10 micropoemes por cada autor ente les 23:59 del 20 de marzu y les 23:59 del 23 de marzu de 2015. El 24 daráse anuncia del fallu del xuráu y de los resultaos populares.

Iniciativa pol Asturianu retuitiará tolos micropoemes presentaos y los 10 d’autores estremaos qu’acumulen un mayor númberu de retuiteos dientro de les feches afitaes van ser los ganadores de los premios populares.

Habrá un primer premiu popular y trés primeros premios del xuráu, amás de diez finalistes ente los votos populares, contabilizaos al traviés del númberu de retuiteos de cada poema. Los premios van entregase nel actu que va celebrase nel Conseyu de la Mocedá de Xixón, el 25 de marzu de 2015 a les 19 hores, cuando se lleerán los poemes.

Hasta agora sumáronse al patrociniu del concursu Algamar Producciones, Asturtoons Editorial, Ediciones Trabe, La Sidra, Pintar-Pintar Ediciones, Revista Formientu y Suburbia Ediciones, a los qu’Iniciativa pol Asturianu quier dar el máximu agradecimientu por facer posible los premios d’esti concursu entamáu, como toles actividaes de l’asociación, ensin nengún tipu d’ayuda pública.

El Conceyu Bimenes vieno acabante convocar el XVIII Concursu de Cuentos pola Oficialidá del Asturianu. Los cuentos que se presenten al certame han tar redactaos como davezu en llingua asturiana y nun pasar de les diez fueyes, mecanografiaes a doble espaciu y per una sóla cara. El plazu pa la presentación de trabayos fina’l 9 de mayu y l’apertura pliques tendrá llugar el 9 de xunu, día nel que tamién se dará anuncia de la fecha d’entrega premios.

L’importe económicu de los mesmos ye: 600 € pal primeru, 450 € pal segundu y 300 € pal terceru. Los cuentos, de los qu’hai que presentar l’orixinal, trés copies y una copia más en versión informática, han d’unviase a la direición que vien darréu: Ayuntamientu Bimenes. Martimporra, s/n. 33527 – Bimenes. Ye de destacar el compromisu del Conceyu Bimenes en caltener esti certame lliterariu y l’esfuerzu qu’ello-y supón, yá qu’esta edición, como nes dos anteriores, nun cuenta con nengún sofitu económicu esternu.

La escritora cabraliega Esther Prieto ye la ganadora del IX Premiu Timón pa escritores en llingua asturiana y eonaviego convocáu pola Asociación Cultural L’Arribada, según alcuerdu d’un xuráu formáu por Vicente García Oliva, David M. Rivas, Xuan Pandiella y Humberto Gonzali, actuando como secretaria Mayte González.

L’autora, nacida n’Arenas en 1960, ye llicenciada en Filoloxía Hispánica pola Universidá d’Uviéu. Ente los títulos qu’integren la so obra espublizao destaquen los llibros de poesía Edá de la memoria (1992) y La mala suerte que ganó en 1998 el premiu Teodoro Cuesta. En 2001 llogra’l XXII Premiu Xosefa de Xovellanos cola novela Güelu Ismail. Creadora tamién d’obres de lliteratura infantil, apaez nes principales antoloxíes poétiques asturianes y, con dos cuentos, na antoloxía Muyeres que cuenten (1994).

Esther Prieto ye la responsable de la edición lliteraria de la obra de dos autores de postguerra, Llorienzu Novo Mier (1991) y Cuno Corquera (1993) y autora de Gramática d’asturianu. Guía de consulta rápida. Trabaya na editorial Trabe en calidá de codirectora.

A la edición de 2015 del Premiu Timón presentárense, amás de la d’Esther Prieto, les candidatures de Lurdes Álvarez, Cristina Muñiz Martín, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano.

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014).

El gallardón del Premiu Timón, consistente nuna obra del escultor y ceramista xixonés Jesus Castañón, entregaráse en setiembre mientres la cellebración de la décima edición de L’Arribada.

Esti sábadu 28 de febreru, l’asociación Iniciativa pol Asturianu va entamar dellos actos d’homenaxe a la lliteratura asturiana n’Uviéu, coincidiendo con dellos aniversarios de les lletres de nuyeso. A les 11 hores nel Cementeriu San Salvador d’Uviéu, va celebrase un Homenaxe al autor clásicu cimeru de les Lletres Asturianes, l’escritor Xuan María Acebal, en cumpliéndose’l 200 aniversariu del so nacimientu. Nesti actu, al qu’Iniciativa convida a tolos amantes de la so lliteratura, lleeránse poemes del autor y diránse unes pallabres alredor de la so figura, xunto al llugar onde descansen los sos restos, no que quier ser un homenaxe a la lliteratura asturiana.

Nesti mesmu sen y con un calter un daqué más divulgativo, Iniciativa va siguir colos actos treslladándose a la Plaza La Escandalera d’Uviéu, de magar les 12,30 hores. Ellí celebraráse un actu tituláu LLIBROS POR PALLABRES, un homenaxe a los 175 años de llibru n’asturianu, una fecha que tuvo llugar en 2014 y que nun cuntó con nengún tipu de reconocencia per parte de les alministraciones.

Siigún fai anuncia l’asociación na so páxina web, va instalase una muria y puestu informativu d’Iniciativa pol Asturianu na Plaza La Escandalera, onde la xente que s’avere al actu podrá escribir una pallabra n’asturianu na “Muria de les pallabres” regalándo-y un llibru la organización. Una actividá pensada col envís de promocionar les lletres asturianes y la llectura na nuesa llingua.

Dende Iniciativa pol Asturianu animen a pasar pel puestu a dexar la so pallabra n’asturianu na Muria de les pallabres y a facese con un llibru n’asturianu.

(G-A)El escritor bualés Miguel Rodríguez Monteavaro (Bual, 1990) fai el xoves día 12 de febreiro a presentación del llibro Poemas pr’amantes y paquidermos, qu’al final de 2014 publicóu cua editorial Trabe. Este acto vei ferse nel Local Cambalache (La Cuesta la Noceda, Uvieo) ás 20:00h. y a entrada é de baldre.

Este é el terceiro llibro del bualés, que xa confirma a súa presencia na lliteratura en gallego-asturiano como úa voz característica, non xa como úa promesa. Despóis de Trenta razóis pra nun medrar (Trabe, 2010) veu el llibro Todos os tristes de mayo (Trabe, 2013), que cua súa versión en asturiano (Tolos tristes de mayu [Trabe, 2014]) ganóu el Premio de Poesía Fernán Coronas 2012.

Agora preséntase “Poemas pr’amantes y paquidermos”, úa reflexión acerca d’aquello qu’imprime a sociedá nel carácter individual de cada persona, hasta el punto de considerar búa ou mala xente a daquén solo pol feito de tomar certas decisióis. Este llibro forma parte das novas corrientes lliterarias polas que vei discurrindo el gallego-asturiano, variedá llingüística en pleno esplendor artístico. A publicación ta dentro da colección Pontiga de poesía da editorial Trabe y ten, como puntos fortes estralliterarios, as imaxes orixinales, de portada y del autor, da fotógrafa Svetlana Poutilina y un testo de solapa del poeta Sergio G. Camblor.

Na presentención, Rodríguez Monteavaro vei contar con Samuel Castro, diseñador y editor, responsable da editorial Trabe y con úa esposición dixital de fotografías de Svetlana Poutilina.

Tamén vei haber un recital de poesía, nel qu’han participar Iris Díaz Trancho y Pablo Texón Castañón, y que vei vei tar acompañao cua música del alcordión de Marga Lorences. Pra zarrar el acto, ún dos pratos fortes ha a ser el concerto del novo grupo de música asturiana formao por Pepín de Muñalén, Odón García y Nel Suárez. Este trío é toda úa novedá nel panorama da música folk del país que ta dando os sous primeiros pasos como formación, anque cada ún dos músicos ten úa amplia carreira profesional.

Nesta presentación ha a tar tamén presente outra nova publicación del poeta pra este ano: a traducción al asturiano del sou anterior llibro, Tolos tristes de mayu (Trabe, 2014), con fotografías d’Andrés Rodríguez Monteavaro y testo de solapa de Pablo X. Suárez. Prevénse varias presentacióis d’estos llibros qu’agora se publican de cara á primavera, como é habitual cuas edicióis de Rodríguez Monteavaro.

Xixón va abegullar esti vienres 23 de xineru la presentación de “Circunscripción de la garrapata”, d’ Aníbal Menchaca, que fai ya’l númberu 4 de la colección “males tierras” de la editorial Suburbia que sigue enfotada nel llanzamientu de valores nuevos nel mundu de la poesía. “Circunscripción de la garrapata” va presentase esti vienres 23, a partir de les 20 hores. na llibrería “EL bosque de la Maga Colibrí”, na Avenida Rufo García Renduelñes, 9) de XIxón.

Aníbal Menchaca (1981) ye pernomáu como autor de les bandes sonores de los curtiumetraxes Humo (2011), pola que se llevó’l Premiu AMES a La Meyor Banda Sonora y Pera (2013) que tamién dirixió. Tamién collaboró con diverses bandes asturianes ente les que s’alcuentra Xera. Circunscripción de la garrapata ye’l so primer poemariu.

La Cátedra Ángel González presenta la primer revista científica sobre poesía contemporanea española mañana miércoles, 21 de xineru, a les 11 hores na sala de prensa del Edificiu Históricu. Ellí va tener llugar la presentación de la primer revista científica internacional sobre poesía española contemporanea que va llevar por nome Prosemas.

El vicerrector d’Estensión Universitaria y Comunicación, Vicente Domínguez, y la directora de la Cátedra, Araceli Iravedra, van ser los encargaos de presentar el primer númberu de la nueva publicación, qu’inclúi un monográficu sobre la obra del poeta asturianu.

Ediciones Trabe estrena 2015 cola edición billingüe (asturianu/castellanu) de los 32 cuentos que Miguel Rojo escribiera nes páxines d’El Comercio y de La Voz de Avilés, motivu pol que la recopilación Lleva xunta’l títulu de “L’Amor Suicida” la denominación de «cuentos d’encargu». Conocíu sobremanera como poeta y narrador, los últimos trabayos de Miguel Rojo yeren los poemarios Territorios (2007) y El paséu (2011) y ye l’autor de la novela más vendida de la narrativa asturiana del Surdimientu, Histories d’un seductor (Memories d’un babayu).

Los trenta y dos cuentos qu’inclúi Miguel Rojo nesti volume fueron saliendo nes páxines d’El Comercio y de La Voz de Avilés, d’ehí la denominación de «cuentos d’encargu». L’universu ficcional que l’autor remana nestes páxines ye bien ampliu; nél hai espaciu pa lo fantástico y lo costumista, pa lo metalliterario y lo dramático. D’igual manera, quien narra va cambiando de cuentu en cuentu de la primer persona a la tercera, del narrador masculín a la voz femenina que nos cuenta… Nun hai tema dengún que-y seya ayenu a Miguel Rojo, que s’amuesa equí como un escritor de mirada aliella y que ye a trescribir les coses del mundu y de la vida cola maestría y la pureza del narrador avezáu.

Miguel Rojo (Zarracín, Tinéu, 1957), ye un escritor de reconocíu prestixu nes lletres asturianes, tien yá una llarga trayectoria lliteraria mesmo n’asturianu qu’en castellanu. Conocíu sobremanera como poeta y narrador, los sos últimos poemarios son Territorios –ed. billingüe– (2007) y El paséu (2011). Autor de la novela más vendida de la narrativa asturiana del Surdimientu, Histories d’un seductor (Memories d’un babayu) –1993–, que cuenta tamién con versión castellana, al igual que la mayoría de les sos publicaciones infantiles: De qué tará fecha la lluna (2008) o El viaxe de Tin y Ton (2008). En castellanu destaquen, amás del relatu Raitán el petirrojo (2003), les noveles La senda del cometa (2007) y La hoja del Ginkgo biloba (2010).

Esti sábadu pasáu, 10 de xineru, zarrose’l plazu pa presentar candidatures a los Premios Timón 2015, entamaos pola Asociación Cultural L’Arribada, y que destínense a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones los/es escritores que nacieren nel añu 1.965 o antes. Trátase del IX Premiu Timón, p’autores en llingua asturiana y n’eonaviego, y del VI Premio Timón, p’autores asturianos en llingua castellana.

Igualmente, prémiase tamién a asociaciones, sociedaes y fundaciones con sede n’Asturies que tengan por fin la conservación y promoción de la identidá cultural de nueso, per aciu del III Premiu Timón de Cultura Asturiana.

Les candidatures presentaes son les que siguen:

IX PREMIU TIMÓN (autores n’asturianu y n’eonaviegu):Lurdes Álvarez, Cristina Muñiz Martín, Esther Prieto, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano.

VI PREMIO TIMÓN (autores asturianos en castellano): Fulgencio Argüelles, Pilar Sánchez Vicente, Francisco Álvarez Velasco, Pepe Monteserín, José María Ruilópez, Carmen Gómez Ojea, Herme G. Donis, Tino Pertierra, Aurelio González Ovies, Francisco García Pérez, José Luis Campal, Paco Abril, Luis Arias Argüelles-Meres, Fernando Fonseca, Ricardo Labra, Javier Lasheras, Pedro de Silva, José Luis Argüelles, Juan Cueto, Olvido García Valdés y Ángel García Prieto.

III PREMIU TIMÓN DE CULTURA ASTURIANA: Fundación Belenos, Asociación Cultural San Tirso del Eo, Fundación Nueva Asturies, Fundación Caveda y Nava, Iniciativa pol Asturianu y Asociación pola recuperación de los Sidros y les Comedies “El Cencerru” de Valdesoto.

P’alcordar los gallardones l’asociación va conovcar trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de la décima edición de L’Arribada.

Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014); del Premio Timón, Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013) y Carmen Ruiz-Tilve; y del Premiu Timón de Cultura Asturiana l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).