Lliteratura

Al igual que vien faciendo dende 2012, l’asociación L’Arribada ye la responsable anguañu de perfacer, baxo la denomación d’Arcu Lliterariu, la programación de les xornaes lliteraries del Festival Arcu Atlánticu. Y esti añu dedicaránse a Galicia estes xornaes nes que va haber como yá ye vezu presentación de llibros, conferencies, tertulies y actividaes teatrales y cinematográfiques.

Una gran parte de les actividaes entamaes dientro del Arcu van tar ocupaes pola lliteratura de Galicia. Asina, fadráse un repasu a la nómina d’autores del país vecín que tuvieren títulos de la so obra traducíos a la llingua asturiana, como ye’l casu ente más otros de Carlos Casares, Xosé Luis Méndez Ferrín, Álvaro Cunqueiro, Xosé Neira Vilas, Paco Martín, Xabier P. Docampo, Ánxel Fole o Úrsula Heinze.

Xunta ello destacará’l recuerdu al escritor Eduardo Blanco Amor, personalidá clave na lliterara en gallegu, y que va llega-yos a los visitantes del Arcu Lliterariu per aciu de dos novedaes importantes; una en forma de llibru y otra como llargumetraxe.

La Casona del Bravial acoyía’l martes 19 de mayu a les 7 la tarde la presentación del llibru de Milio Rodríguez Cueto “L’últimu volador”. Nesti llibru, editáu por Vtp, recuéyense cuentos y escritos variaos que s’espublizaron nel suplementu Cultura del diariu asturianu La Nueva España ente los años 2000 y 2004. Estos testos van dende’l relatu costumista al fantásticu, dende lo sentimental a lo humorístico, siempre emplegando como mediu d’espresión la llingua asturiana.

Milio Rodríguez Cueto ye llicenciáu en Literatura Hispánica, y entamó a ser conocíu a mediaos de los 80 a traviés de distintes publicaciones. Tien nel so haber premios como’l Fuertes Acevedo d’ensayu de 1992 con Vistes lliteraries, l’Edebé de Lliteratura Xuvenil de 2000 con Mími al volante, el Xuan María Acebal de poesía del añu 2000 con Flores de cementeriu, el Premiu Asturianu de la Crítica de 2005 con La piedra de la culebra o’l María Xosefa Canellada de lliteratura infantil y Xuvenil de 2012 con Carne de melandru.

Esta presentación inxértase dientro de la programación que se ta llevando a cabu esti mes nel conceyu de Samartín n’homenaxe al llabor editorial de Vtp, sobre’l que se pue visitar una esposición na Casona del Bravial hasta’l próximu día 22 de mayu. Amás, y dientro del apartáu de lliteratura infantil, el pasáu día 6 tuvo llugar la presentación d’otru llibru de la editorial, nesti casu ¡Pa la cama!, de la escritora María Luz Pontón. Nel actu l’autor vtuvo acompañáu por Gema Suárez Torre, conceyal de Cultura de Samartín del Rei Aurelio, y por Hugo Cortina, responsable de la Oficina de Normalización Llingüística del conceyu.

Esti sábadu 9 de mayu a les 20 hores, el salón d’actos del Centru Valey de Piedrasblancas, en Castrillón, va acoyer una edición más del festival poéticu “Pallabra nel mundu” nel qu’esti añu va tener un fondu protagonismu la llingua asturiana. Esti ye un festival que se celebra al mesmu tiempu en numberoses ciudaes del mundu.

Nel actu tendrá especial protagonismu l’asturianu, lleéndose poemes na nuesa llingua, asina como una intervención del presidente d’Iniciativa pol Asturianu, Inaciu Galán, y de la conceyala de Cultura, María Esther García López.

Nel marcu de la 36 Selmana de les Lletres, van presentase tolos llibros ganadores de los premios lliterarios convocaos pola Conseyería de Cultura nel pasáu añu 2014. El primeru en ser presentáu va ser “L’aire ente la rama, d’Ángeles Carbajal. Premiu «Xuan María Acebal» de Poesía, esti llunes, 4 de mayu, a les19.30 hores, na Capiella de los Dolores (Grau).

Al día siguiente tocará-y a “Cápsules de tiempu”, de Carlos González Espina, Premiu «M.ª Josefa Canellada» de Lliteratura Infantil/Xuvenil, a les 19.30 hores nel Centru Municipal Integráu Atenéu de la Calzada (Xixón).

L”‘arume de la tierra”, d’Enrique Carballeira, Premiu «Alfonso Iglesias» de Cómic, presentarase esti miércoles, 6 de mayu, a les 19.00 hores na Biblioteca d’Asturies (El Fontán, Uviéu).

“Caleya Sésamu. El papel de la televisión na tresmisión interxeneracional d’una llingua2, de Damián Barreiro, Premiu «Máximo Fuertes Acevedo» d’Ensayu, presentaráse esti Xueves, 7 de mayu, a les 12.00 hores. na Feria del Llibru y Discu n’Asturianu (na Antigua Pescadería Municipal, Avilés).

Y pa finar, el mesmu xueves ta prevista tamién la presentación de “Crónica de la lluz y la solombra”, d’Antón García, Premiu «Xosefa Xovellanos» de Novela, a les 19 hores, nel Centru Social de Tuña (Tinéu).

Con motivu de la XXXVI edición de la Selmana de les Lletres Asturianes, la editorial xixonesa VTP fai un repasu del so llabor a traviés d’una esposición que se va poder visitar na Casona del Bravial de Blimea dende’l 4 al 22 de mayu, de llunes a vienres n’horariu de 9 a 13 h. La veterana empresa editorial, dirixida dende’l so entamu por Concha Prieto y Milio Rodríguez Cueto, cuenta con un ampliu catálogu de llibros qu’abarca munchos xéneros y grupos d’edaes, desendolcando un llabor perimportante nel espardimientu de la llingua y la cultura asturiana. Por ello, la muestra quier ser un homenaxe a tol trabayu d’estos años, y nella ufiértase una esbilla de los sos llibros, autores y xéneros más destacaos.

La esposición va complementase cola presentación de dos llibros de la editorial, la primera d’elles va tener llugar el próximu miércoles 6 de mayu na Casona del Bravial, onde se va presentar el llibru de la escritora María Luz Pontón “Pa la cama” a un grupu d’escolinos de primaria del Colexu Rei Aurelio de Sotrondio. Per otru llau’l día 19 de mayu va presentase’l llibru de Milio Rodríguez Cueto “L’últimu volador” nun actu que va tar abiertu a toles persones que tean interesaes.

Con estes actividaes, entamaes pola Conceyalía de Cultura de Samartín a traviés de la so Oficina de Normalización Llingüística, pretende averase la lliteratura asturiana a persones de toles edaes, poniendo en valor el trabayu que desendolquen empreses y escritores nel espardimientu y conservación de les nuestres lletres.

Los actos qu’entamen esti sábadu 2 de mayu de la Selmana de Les Lletres y que van siguir demientres tola selmana, van tener un actu más el domingu 3 de mayu. Educa Niemeyer programa’l cinecuento n’asturianu “La mio hermana ye una mofeta” de la escritora Berta Piñán y la ilustradora Fracesca Assirelli: “Naide m’avisara primero, naide me dixera nada, pero dende’l principiu, dende que nació y yo la vi, supi que la mio hermana yera una mofeta”.

El próximu sábadu, 2 de mayu, va empezar la Selmana de les Lletres Asturianes qu’entama y empecipia la Conseyería de Cultura con visites en llingua asturiana al Muséu de Belles Artes d’Asturies. Esi mesmu día, a les 19.00 hores, va celebrase n’a Caridá el “Homenaxe ás nosas lletras”, un actu nel que se van lleer testos lliterarios en gallego-asturianu. Tamién se va presentar el sestu númberu de “Trabate-Revista Eonaviega de Lliteratura”, que se va regalar a los asistentes. L’actu va cerrar con un conciertu de la Banda de Gaites “El Trasno”.

Por segundu añu consecutivu, l’Academia de la Llingua Asturiana aprovechó la selmana na que se celebra’l Día Mundial del Llibru pa entamar a esparder la so revista más popular y con mayor posu científicu, Lletres Asturianes, qu’aporta con esti númberu al 112. Esti númberu 112 recueye dellos trabayos d’investigación d’un total de 11 autores, de los que la mayoría ya foron protagonistes de les Xornaes Internacionales d’Estudiu y Trabayu que se desenvuelven cada añu n’ochobre. Nellos, tóquense temes como la toponimia,la morfoloxía nominal, l’asturianu y les nueves teunoloxíes, la etimoloxía asturiana, el mirandés o l’asturianu ente les lllingües romances. Lletres Asturianes ye’l Boletín de l’Academia de la Llingua Asturiana y espubliza dos númberos añales, entamando la so hestoria nel añu 1982 y aportando nel añu 2011 a la rede Internet, con una versión dixital d’accesu llibre que pue consultase dende’l númberu 105.

Amás de les secciones que davezu s’atopen nesta revista científica,. como Reseñes Bibliográfiques, Notes y anuncies o Llibrería Asturiana, el númberu 1102presenta un total de 10 trabayos que s’averen a distintos campos de conocimientu. Rosabel San Segundo Cachero presenta un trabayu sobre “El neutro de materia en la morfología nominal del asturiano del concejo de L.lena”; Alberto Gómez Bautista fala de “A formação de palavras em mirandês e a obsolescência linguística”; Anne-Marie Chabrolle-Cerretini filo sobre “La lengua asturiana en los textos lingüísticos francófonos” y Pablo Suárez García escribe sobre “L’arte la guerra. Sobre’l léxicu bélicu na nuesa llingua”.

Los otros trabayos d’esti númberu preséntenlos Inaciu Hevia Llavona (“Léxicu asturianu de la sidra con delles desplicaciones etimolóxiques y comentarios”), Xulio Llaneza Fernández (“Estudiu de la toponimia de Santa Bárbola (Samartín del Rei Aurelio). La hidrotoponimia (II)”): José Miguel Lamalfa Díaz (“«Cuando examen les abeyes»: Primer testu lliterariu n’asturianu y la so importancia na historia de la lliteratura”); Vicente García Oliva (“Vides paraleles (que converxen nun puntu) de don Xuan Junquera Huergo y don Xosé Napoleón Acebal”); Marta Mori d’Arriba & María Prieto Grande (“Percepciones y conciencia del asturianu en dellos estudiantes d’español pa estranxeros de la Universidá d’Uviéu: implicaciones educatives”) ya Inaciu Galán y González (“Delles aportaciones pa una hestoria de la publicidá n’asturianu”).

El profesor, escritor, críticu lliterariu y periodista Franscisco García Pérez ye’l gallardonáu col VI Premio Timón p’autores asturianos en castellanu convocáu pola asociación cultural L’Arribada, tres l’alcuerdu conocíu esta fin de selmana d’un xuráu integráu por Alberto Álvarez Peña, Carlos Espina Alonso, José Luis Valladares, Jorge Hurlé y Humberto Gonzali (presidente), actuando como secretaria Mayte González Cobos.

El xuráu pervaloró la importante trayeutoria del premiáu subrayando, ente otros aspeutos, la calidá lliterario y repercusión de los miles d’artículos y columnes sobre temes venceyaos a la Cultura publicaos, mientres bien d’años, n’estremaos medios de comunicación escrito.

Francisco García Pérez, uvieín nacíu en 1953, ye doutor en Filoloxía y catedráticu de Llingua Castellana y Lliteratura. Fundó y dirixó la revista universitaria de literatura Juan Canas y foi Secretariu Xeneral Téunicu y Direutor Xeneral de Difusión Cultural nel Conseyu Rexonal d’Asturies.

Publicó Crónicas de El Bierzo (Penthalon, Madrí, 1981), Lo que hay que oír (vtp-KRK, Uviéu, 1995), Una meditación sobre Juan Benet (Alfaguara, Madrí, 1997), Lopezdebega y Garrote Bill o las tribulaciones de un profesor de Lengua en Secundaria (Laria, Uviéu, 2005) y La lengua y la vida (Laria, Uviéu, 2012). Tradució Los caminos de la revolución, de Fred Zeller y Alain Krivine (Júcar, Xixón,1977) y foi antólogu de Cuentos asturianos. Antología para niños (Conseyu Rexonal d’Asturies, 1980) y Madrid desde el cielo (Banco Santander, 1988).

Fracisco García ta distinguíu colos premios de la Crítica de Asturias al Columnismo Literario de 2005 y 2009 y «María Elvira Muñiz» de 2010, otorgáu pol Ayuntamientu de Xixón, en reconocencia a la so contribución a la promoción del llibru y la llectura. En 2008 concediéron-y la Medalla d’Oru de la Sociedá San Pedro de La Felguera.

El suplemento «Cultura» recibió, baxo la so direición, el Premio Atlántida y el premiu de la Society For News Design de la Universidá de Siracusa, siendo finalista del Premio Nacional de Fomento de la Lectura.

Nesta convocatoria sesta del Premio Timón taben nominaos, amás de Francisco García Pérez, los escritores Fulgencio Argüelles, Pilar Sánchez Vicente, Pepe Monteserín, José María Ruilópez, Carmen Gómez Ojea, Herme G. Donis, Tino Pertierra, Aurelio González Ovies, Francisco García Pérez, José Luis Campal, Paco Abril, Luis Arias Argüelles-Meres, Fernando Fonseca, Ricardo Labra, Javier Lasheras, Pedro de Silva, José Luis Argüelles, Juan Cueto, Olvido García Valdés y Ángel García Prieto.

Los anteriores ganadores del premiu son Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013) y Carmen Ruiz-Tilve (2014).

El gallardón del VI Premio Timón, consistente nuna obra del escultor y ceramista xixonés Jesus Castañón, va entregase mientres la cellebración de La Vagamar 2015.

La Casa de Cultura de Grandas de Salime llenóse nel entamar d’abril cola presentación de la novela El Batallón Galicia, de Cristóbal Ruitiña. Amás de munchos vecinos del conceyu anfitrión, tuvo presente xente de territorios limítrofes como Ibias, Ayande, Negueira o Fonsagrada. Eduvigis Valledor, del Colexu Públicu El Salvador, presentó a los dos intervinientes y l’escritor Xosé Miguel Suárez contestualizó l’aparición de la novela nel procesu de remanecer lliterario del gallego-asturiano y describió la so estructura.

Según apuntó Xosé Miguel Suárez na so intervención, “chama el atención pra ben el feito de qu’El Batallón Galicia ten úa estructura mui trabayada. Hai úa primeira parte que se desenvolve nel presente, con un protagonista, Jaime Souto, que volve a Grandas y atópase cuas escavacióis que tán fendo nel Garabocho pra identificar os restos del comandante Moreno y os sous homes. É un arranque que ten suspense, que ta escrito con habilidá, y unde se nos apuntan dalgús dos temas sobre os que se vai volver al largo del obra.”

Suárez tamién destacó cómo fai l’autor pa mezclar realidá y ficción. “Por poñeryes un caso que me chocóu, a Jaime Souto, el protagonista, pídenye úa colaboración pral libro das festas de Grandas y cópianosla na novela, con notas a pé de páxina y todo. Nunca sabemos ben únde acaba a realidá y únde empeza a ficción, y ese xogo é importante pral interés del lector.”

Pa terminar, el tamién coordinador de la revista literaria Trabatel llamó l’atención de los asistentes sobre cómo termina El Batallón Galicia. “El final da novela, que nun yelo vou cuntar, tamén me pinta mui al xeito porque, anque sabemos cómo acaba a traxedia, deixa úa porta aberta mui poética y mui suxerente.”

Pola so parte, Cristóbal Ruitiña desplicó a los presentes cómo foi el procesu de xestación de la novela, dende qu’a mediaos de los noventa sintiera la primer vez el cantar del comandante Moreno, que na comarca fora pasando de padres a fíos, hasta qu’un día descubre qu’el so güelu formó parte d’esa mesma compañía, pasando pol entamu de les exhumaciones nel branu de 2007. Ye entós cuando nacen les preguntes que se convierten nel motor de la novela: “¿puido conecer el meu abolo al comandante Moreno?. ¿Chegaran a tratarse?. ¿El feito de qu’el meu abolo tuvera nese batallón tuvo algo que ver pa qu’acabaran vindo por Grandas?.”

De magar estes preguntes inciales, Ruitiña foi relatando les dificultaes que tuvo qu’afrontar demientres la construcción de la novela. L’autor d’El Batallón Galicia quixó treslladar a los presentes lo importante que fuera la so vinculación sentimental a los escenarios de la novela pa poder terminala. “Hasta hai ben pouco nun sabía qu’os carreiros qu’eu anduvera por detrás de Penafonte cuando neno tamén os anduvera el comandante Moreno muitos anos atrás. E un día, cuando inda nun sabía se iba ser quén a rematar a novela decidín volver a andalos, piséin a mesma terra que pisara José Moreno Torres, vín lo que probablemente vira él cuando escapaba da morte, respiréin un aire mui parecido pro sin a urxencia de saber que podía ser el último; e decidín que sí, que tía que terminar a novela, anque nun fora máis que pa qu’os futuros caminantes de todos esos carreiros souperan que por aí tamén anduvera un home chamado José Moreno Torres al que todos chamaban comandante Moreno.”