Lliteratura

La Casa da Cultura da Veiga va acoyer esti vienres día 21 d’abril a les ocho y media la tarde el III Festival da Poesía en galego-asturiano qu’organiza l’Asociación Poegía, de Xixón. Nel actu van participar los poetes Fredo de Carbexe, Belen Rico, Xose Miguel Suárez y la escritora y miembru de Poegía, Aurora García Rivas.

Esta mañana presentábase nel patiu de la Conseyería de Cultura la XXVII Selmana de les Lletres Asturianes que se va cellebrar dende’l vienres 28 d’abril hasta’l domingu 7 de mayu y qu’esti añu va tar dedicada al mundu del teatru. Baxo’l títulu de “Teatru a escena. Cuatro sieglos nel actu” los conceyos asturianos van poder esfrutar de más de cuarenta actos diferentes, que van dende la llectura dramatizada de poemes en collaboración cola Institució de les Lletres Catalanes, la cellebración de conferencies como la que vuelve traer a Asturies al escritor Jon Cortázar, o la representación de tou tipu pieces, mesmo de calter modernu que la recuperación y actualización de les antigües comedies de guirrios. Llibros, DVDs y monólogos, enllenen una selmana cultural qu’empieza cola presentación del llibru de Dolfo Camilo Díaz, “En tables. Un teatru pal sieglu XXI”.

Los poetes asturianos Berta Piñán, Xuan Bello, Vanessa Gutierrez y Xandru Fernández, xunto a los catalanes Ponç Pons, Núria Martínez Vernis, Àngels Gregori y Jordi Cornudella, van llevar a escena l’espectáculu “Voces paraleles” que, de la mano de la Institució de les Lletres Catalanes y en collaboración col conceyu de Grau y l’Aula de les Metáfores, va tener llugar el día 28 d’abril a les ocho la tarde na Capiella de los Dolores de Grau. A les doce la mañana d’esi mesmu día, na Biblioteca Perez de Ayala d’Uvieu, l’escritor Dolfo Camilo Díaz va facer presentación del llibru “En tables. Un teatru pal sieglu XXI”.

La presentación oficial d’esta Selmana de les Lletres sedrá’l día 2 de mayu, nel patiu de la Conseyeria de Cultura del Principáu d’Asturies pa, actu siguíu, dar pie a la inauguración de les Xornaes de Teatru “Universidá n’escena”, que van llevar al Salón d’Actos de la Biblioteca del Campus del Milán, en collaboración col Seminariu de Filoloxía Asturiana y el Departamentu de Filoloxía Española, tou tipu de conferencies, de la mano d’autores tan conocíos como Montse Garnacho, d’Inmaculada Urzainqui, Boni Ortiz o Jon Cortázar, asina como representaciones d’autores asturianos que van dende Antón de Marirreguera al mozu Chechu García.

Pero como nun podía ser menos, na Selmana de les Lletres Asturianes dedicada al teatru, los grandes protagonistes son los propios autores asturianos, que van recibir un homenaxe per parte d’una escultura del artista Fidel Pena que sedrá inaugurada’l día 2 de mayu nel Teatru Palacio Valdes d’Aviles, y les compañíes teatrales asturianes. Telón de Fondo, Margen, Bacanal Teatro, Nun Tris, Higienico Papel, la Compañía Asturiana de Comedies, Traslluz, N’alpargates y orbayando, El Hórreo, l’Asociación Juan Manuel Mendez, Xana, Pico de Faro, Teatru Casona, Teatru Pausa, Penedo Aballón, los monologuistes d’AICA o’l director Eladio de Pablo van percorrer los teatros de toa Asturies a lo llargo de la selmana con pieces d’autores asturianos como Dolfo Camilo Díaz, Manuel Galano o Pedro Lanza y adaptaciones de clásicos estranxeros como Franz Kafka, Jaime Salom o Strindberg.

La espublización de llibros como “Del chigre” de Carlos Alba Cellero, una númberu especial de la Revista La Ratonera, dirixida por Roberto Corte y Pedro Lanza, dedicáu al teatru asturianu y la edición del DVD “Pieces”, que va ser presentáu por Ramón Lluis Bande y Javier Maqua, y que va ser distribuyíu de baldre nel Día de les Lletres Asturianes, son dalgunos de los acontecimientos d’esta selmana cultural, na que nun va faltar una mirada al pasáu de la mano de l’Asociación pola Recuperación de los Sidros y les Comedies que va llevar a Noreña la obra “Llegó la modernidá” (comedia de guirrios).

Depues de ganar el premiu Xosefa Xovellanos de Novela con “Potestas”, la magna novela histórica que narra les andances del noble asturianu Gonzalo Pelaiz, y de consolidar la so valía como escritor n’obres tan estremaes como la xuvenil “Misión Pelayo” o con “Un raposu en Tresmonte”, l’escritor entreguín Xulio Arbesú saca agora a la cai un volume de cuentos “con” pero non “pa” nenos. Espublizáu pola Editorial Trabe, “Cuentos con nenos” va presentase esti vienres día 21a les siete la tarde na Casa Cultura de L’Entregu de la mano del tamien escritor Chechu García.

Xulio Arbesú (L’Entregu, 1957) ye miembru de la Tertulia Reciella Malory qu’edita la revista lliteraria del mesmu nome, asina como de los colectivos culturales Foru pola poesía y Cauce Nalón. Escritor costante, tien algamao dos premios de narraciones de l’Academia de la Llingua Asturiana coles obres “Misión Pelayo” y “Un raposu en Tresmonte”, asina como’l XXIII Premiu de Novela Xosefa Xovellanos, convocáu pola Conseyería de Cultura del Principáu d’Asturies, cola novela histórica “Potestas”.

“Corresponsal en Bagdag” y “Viaxe a Genova” foron los dos últimos relatos espublizaos por esti autor, collaborador habitual de tou tipu de revistes lliteraries

La escritora nacía n’Antigua (San Tiso d’Abres), Aurora García Rivas, presenta mañana martes día 11 a les siete y media la tarde, nel Ateneu Obreru de Xixón, el so últimu llibru de poesía “La Tierra Vertical”, espublizáu na colección Deva de la veterana asociación xixonesa. L’actu de presentación va correr a cargu del escritor Francisco Velasco.

“La Tierra Vertical” ye’l primer llibru de poesía en castellán d’esta escritora afincada dende va años en Xixón, onde ye miembru de l’Asociación Cultural Poegía y que ye conocida tamien pol poemariu “O viaxeiro da noite” (Trabe, 2004), escritu en gallego-asturianu, llingua na que tamien tien collaborao coles revistes Lliteratura y Lletres Asturianes.

L’actu de presentación va correr a cargu de Francisco Velasco (poeta, críticu lliterariu y coordinador de la páxina web Portal de Poesía).

Llibros del Pexe y la Casa del Libro de Xixón presenten esti xueves día 6 d’abril a les siete y media la tarde les dos últimes entregues de “La Crónica de Leodegundo”, l’ambiciosu trabayu del xixones Gaspar Meana (1960), col que l’ilustrador percuerre 180 años d’historia del reinu d’Asturies y del mundu que lu arrodiaba ente los sieglos VIII y IX de la era cristiana.

Un total de 25 volumes de 48 páxines cadún completen la saga de “La Crónica de Leodegundo”, una obra en cómic dibuxada y escrita por Gaspar Meana ente los últimos diecisiete años, que naz nel reinu astur pero que viaxa al travies de los sos personaxes per llugares tan allonxaos como Siria, Al-Andalus, Mesopotamia, Francia o Toledo.

Les dos últimes entregues d’esta colosal obra correspuenden a “Metatron N’Arabot (845-846 D.C.)” y “Xuiciu Final (846-850 D.C.)”.

Un recital, entamáu por POEGIA, que se va facer esti vienres 7 d’abril nel Centru de L’Arena, de Xixón va xuntar a les 20:00 hores nesi centru xixonés a los poetes Marta Mori, Susana R. Sela, Ricardo Candás y Pablo Texón.

Talamente como se desplica na so web, l’Asociación Cultural Poegía ye’l resultáu d’un interés y compromisu cola poesía, “ye un pasu firme nuna trayeutoria y llínea d’aición basada nel intentu de sacar la poesía pel ampliu complexu social. El nome Poegía resulta d’un xuegu de pallabres ente «Gijón» (nome castellanu de Xixón, ciudá d’Asturies, n’España) y «poesía», porque nesta fermosa ciudá viven los miembros y dende ella tien d’entendese’l surdimientu poéticu qu’intenta’l grupu. Asina, la ciudá conviértese en puntu dende’l qu’entamar l’andadura ensin llimitase la so actuación necesariamente a ella”.

L’Asociación entamó a trabayar nel añu 2000 cuando dellos alumnos participantes d’un Taller de poesía fechu en Xixón pol poeta Manuel Ángel Delgado Castro “deciden reunise, motivaos y xuníos pola poesía, pa charrar, comentar, recitar… y tamién, porque la poesía ye de xuru dalgunes vegaes un desnudase, conocese y formar un grupu poéticu”. D’estes primeres reuniones nacía la tertulia poética Poegía pa tol públicu interesáu con una primera sede y llugar de reunión periódica nel Atenéu Obreru de Xixón. Dellos miembros participaben ente mientres nos «Alcuentros Poéticos nel Antiguu Institutu» en Marzu de 2001 dándose a conocer como grupu poéticu e individualmente como poetas.

POEGIA ta formada por Armando Vega Rodríguez, nacíu en Cuerries d’Espinaréu (Piloña), Aurora García Rivas, poeta nacida en San Tiso d’Abres,Manuel Martínez Fernández, lleonés, y Ricardo Candás Huerta de Xixón.

Páxina web de POEGIA

L’Academia de la Llingua Asturiana ta acabante d’espublizar dientro de la so colección Escolín “Los inventos de mio pá”, un nuevu llibru pa los más pequeños del escritor y dibuxante piloñes Enrique Carballeira Melendi.

Enrique Carballeira Melendi (L’Infiestu, 1970) ye autor de numberosos llibros pa rapacinos amás d’ilustrador de los perprestosos dibuxos que nellos apaecen. Collaborador habitual del periódicu El Comercio, y de los selmanarios “Les Noticies”, “El Nora”, “El Narcea” y “El Fielato”, amás de dellos programes de radio, (a nivel rexonal y nacional), sobre too na cadena “Onda Cero Radio”, rellatando llendes y tradiciones asturianes, ye coordinador d’abondes actividaes rellacionaes cola llingua asturiana y la lliteratura infantil y xuvenil, siendo un avezáu cuentacuentos.

Ún de los sos últimos proyectos foi la puesta en marcha de la editorial piloñesa Asturtoons, un ambiciosu proyectu qu’abarca dende la edición de llibros al diseñu de páxines web, pasando pola edición de DVDs d’animación.

Asturtoons

La revista d’arte y lliteratura Lúnula, editada pol Atenéu Obreru de Xixón, acaba de publicar un nuevu númberu dedicáu a muyeres creadores. Autores como Inés Toledo, Rosana Popelka o Gema Ramos collaboren nesti nuevu númberu de la publicación que va presentase esti xueves en Xixón y que ye una referencia ente les revistes culturales asturianes.

Lúnula, dirixida na so dómina actual por Pepa Pardo, Rosana Popelka y Sibisse Rodríguez, abre la so nueva entrega con un trabayu de la escritora Susana Carro y ufierta trabayos de Graciela Pérez Miranda, Gema Ramos, Carolina Fernández Rodríguez, Konchy Rodríguez Castellano, Sibisse Rodríguez Sánchez, Alicia Jiménez, Moira Teke, María Suárez Alonso, Inés Toledo, Verónica García, Roxana Popelka, Natalia Granada y Altagracia Cancel. L’epílogu a esti númberu de la publicación del Atenéu Obreru de Xixón ponlu les fotos En Salmuera, Woman 20.

L’actu de presentación de Lúnula va entamar nos locales del Atenéu, na cai Covadonga, a les 19,30 y va cuntar cola presencia de les responsables de la publicación y delles collaboradores del so últimu númberu.

L’escritor eo-naviegu Manuel García Galano va recibir un homenaxe esti sábadu 1 nel so llugar natal de Tapia pol so llabor a lo llargo del tiempu en favor de la pervivencia de la fala d’Entrambasaguas. El conceyu tapiegu, la Secretaría Llingüística del Navia-Eo de l’Academia de la Llingua y l’asociación cultural Xeira entamen esta reconocencia pública del más veteranu de los autores en gallego-asturiano.

Al meudía del sábadu 1 nel salón d’actos del Institutu Marqués de Casarego va celebrase l’actu institucional cola presencia y les intervenciones de la presidenta de l’Academia de la Llingua, Ana Cano, l’alcalde de Tapia, Gervasio Acevedo y l’académicu José Antonio Fernández Vior. L’actu va servir pa presentar la última obra de Galano: “Vento d’outono”, editada pola Secretaría Llingüística del Navia-Eo.

Pela tarde, a les 17,00 hores diverses actuaciones van homenaxear al escritor tapiegu nuna carpa instalada na plaza de la Ilesia de la villa occidental. La Coral Polifónica de Tapia, el grupu de teatru Pico de Faro de A Roda, la rondalla Brisas Tapiegas, el grupu de folk sinfónicu Ayalga y el grupu de teatru Ameicer, van sucedese nel escenariu xunta escolinos del institutu y la escuela de Tapia que van lleer fragmentos de la obra de Manuel García Galano.

José Havel presenta esti xueves 23 n’Uviéu la fotobiografía del escritor Víctor Botas titulada “Con el lenguaje de la melancolía”, un percorríu n’imáxenes pela vida del autor de “Rosa, Rosae” ya “Historia antigua” que s’acompaña del documental filmáu pol realizador uviéin col mesmu títulu qu’esti volumen.

La figura de Botas, un de los poetes más valiosos y singulares de la lliteratura asturiana en castellano, aparez indisolublemente xunida a la de la tertulia lliteraria Oliver y a la del so principal mentor, José Luis García Martín. La so repentina muerte en 1994 nun impidió que col tiempu se convirtiere nuna referencia imprescindible del panorama poéticu contemporáneu del estáu y nun autor que llogra crear una inquebrantable rede de llectores cómplices y fieles.

La fotobiografía y el documental de Havel, miembru tamién de la tertulia carbayona, recopilen material gráficu y audiovisual del archivu priváu del propiu Víctor Botas pa trazar una crónica de los momentos emocionales claves de la so vida y la so obra. El volume y el DVD, editaos por Llibros del Pexe, van presentase esti viernes 23 a les 20.00 hores nel Club Prensa Asturiana de La Nueva España, nun actu que van cuntar cola presencia del autor José Havel y de José Luis García Martín.