Lliteratura

La Casa la Cultura de l’Entregu va acoyer la presentación del llibru de Pablo Rodríguez Medina “Tapín de Picupáu”. La presentación fadráse’l xueves 23 de payares a partir de eles 20,00 hores.
“Tapín de Picupáu” ye’l primer averamientu del autor a la lliteratura infantil. Nel añu 2005 alagamó’l premiu “Llectures pa rapazos” de l’Academia de la Llingua Asturiana”. El llibru contién bones dotes d’imaxinación, humor que fain qu’esti relatu infantil enganche a neós, neñes y a los non tán nuevos.

Pablo Rodríguez Medina ye autor d’obres como “Orbaya, Martema o Cantu de gaviotes.
Tapín de picupáu ta publicáu pola Academia de la Llingua Asturiana na so coleición Ecolín.

El Coleutivu de Muyeres Les Filanderes ta acabante de comunicar el fallu del so V Certame Internacional de Relatu Curtiu en castellanu «Filando Cuentos de Muyer» que se fizo públicu el día 17 de payares de 2006 nuna comida celebrada nel Restaurante Palaciu de les Nieves de Llangréu. La ganadora nesta edición foi “La saltadora de sombras” de Eduardo Beiger Vega, de Madrid.

El xuráu quiso premitar tamién con dos áccesit “La edad de la insolencia” de Reinaldo Cedeño Pineda (Cuba) y “Zona nacional” de José Miguel Barón Molina (Madrid).Los finalistes d’esti V Certame Internacional de Relatu “Filando Cuentos de Muyer” foron “En la noche de Venus” de José Manuel Rodríguez, Los Ángeles (EE.UU.), “La hija de Juana Iguazán” de Pablo Rodríguez Medina, L’Entregu (Asturies), y «Nushu» de Pilar Nieto, Madrid.

Roberto Quevedo presenta esti martes 21 de payares a les 19,30 n’Uviéu, nel Foru Abiertu de la Llibrería Cervantes, la so “Hestoria de la Filosofía”, espublizada pola Editorial Ámbitu.

L’autor de “Pol sendeiru la nueite» o «Pan d’amore» pública en Ámbitu una monumental “Hestoria de la filosofía”, qu’anque ye una hestoria de la filosofía universal, dedica una especial atención a los pensadores d’Asturies y de Lleón. como ye’l casu de los illustraos asturianos, o los discípulos asturianos d’Ortega y Gasset, a los que la guerra civil mandó a la emigración.

Sigún comentaba’l propiu autor nuna entrevista recién, “la función principal d’esta ‘Hestoria de la filosofía’ ye que seya una referencia pa los llectores en llingua asturiana interesaos na hestoria del pensamientu humanu y va pal gran públicu. Ye una obra de divulgación que cualquier llector sedrá pa entender, anque pue haber dalgún capítulu un poquín difícil. A munchos llectores va valí-yos p’alcordase de la hestoria de la filosofía qu’estudiaren en bachilleratu, pero’l mio interés yera escribir un llibru que divulgara la hestoria del pensamientu nun asturianu bien estremáu del castellanu y al mesmu tiempu claru y de llectura prestosa”.

La sala polivalente de la Casa la Cultura de Grau va acoyer la presentación del llibru “La Asturianá: de la magia a la desolación”, l’actu fadráse a les 19,30 hores del 17 de payares. L’actu organizáu pola Biblioteca de Grau y l’Asociación “Valentín Andrés” nun sedrá solo una presentación sinón que va dir más allá pa convertise nun espectaculu nel que s’amestarán cine, canción y poesía. La presentación del actu correrá a cargu de dos figures relevantes de la cultura asturiana, Gabino Busto Hevia y Pablo Rodríguez Medina, los cantares tarán interpretaos por Bibiana Sánchez y Francisco Jsoé Fernández Hernández.

Na obra “La Asturianá: de la magia a la desolcación”, Oscar Roces Arboleya, La Texuca, Bimenes; presenta un ensayu fondu y estensu, que dacuando ye polémicu por esponer idees tresguesores y novedoses, pero siempre dende’l rigor y con argumentaciones de pesu. L’Asturianá: De la Magia a la desolación. Un siglo de canción asturiana, ye un estudiu sobre l’Asturianá escritu en clave histórico-social y mui comprometíu, nel que’l so autor trata de facer homenax a la canción como ún de los heriedos de mayor importancia que nos llega de los nuestros antepasaos y como mediu de comunicación y espresión de la realidá socio-cultural asturiana.

Dende la maxa a la desolación, Oscar Roces, con rigor y espíritu críticu, analiza ya interpreta’l pasáu y el presente de l’Asturianá pa rematar definiendo’l so futuru como mui poco esperanzador pol devenir de la propia sociedá asturiana y pola falta d’escuela, causes que torguen tou tipu d’esperanza pa esti xéneru y falen d’un momentu de desolación nel que se fai necesario una intervención que posibilite la involución d’esta situación. En definitiva un interesantísimu ensayu sobre l’Asturianá qu’aporta munches idees novedoses y analiza’l xéneru ensin prexuicios, con gran compromisu y munchu rigor, rematando nuna visión xeneral qu’avanza claves definitories de la identidá cultural del pueblu asturianu.

Esta presentación en Grau sigue a la que yá se ficiera en L’Entregu y va tener continuación en próximes feches en Noreña, Uviéu y Xixón. L’autor del llibru va centrase nesta ocasión no que ye la tresmisión oral d’esti gran tesoru cultural asturianu, afondando tamién na figura de dellos interpretes de Grau -Prudencio Álvarez “El Polenchu”, José Miranda “El Repicáu” y Rogelio Fernández “Gelín de Grau”- de los que desafortunadamente güei nun tenemos grabaciones.

Ana Luisa Gutiérrez ye profesora de Psicoloxía de la Escuela Universitaria de Trabayu Social. El llibru que se presenta ye’l frutu del so trabayu nel programa de doctoráu d’Estudios de la Muyer na Universidá d’Uviéu. Amás foi promotora del proyectu “Planeta feminista” empobináu a averar les nueves tecnoloxíes de la información y el feminismu a les muyeres moces.
El llibru tien por oxetu revisar d’una manera clara y sintética los principales posicionamientos que nel debate al rodiu la prostitución femenina vieno adoptando’l feminismu español nos últimos años. Anque tradicionalmente’l comerciu sexual nun tuvo incluyíu nos temes prioritarios na axenda feminista, anguaño parez xenerar cada vegada mayor polémica y expectación.

L’autora analiza los diferentes puntos de vista sobre la prostitución adoptaos pol movimientu de muyeres nel Estáu Español, tratando d’alcontrar los supuestos teóricos que los fundamenten, faciendo por aclariar l’orixe de les sos diverxencies y la posibilidá de qu’esistan puntos d’alcuentru nos dos discursos.

Al tiempu, el testu tamién proporciona una panorámica xeneral de la prostitución anguaño, destacando la importancia del marcu de la globalización económica neolliberal a la hora d’entender parte de les sos manifestaciones, describiendo les diferentes modalidaes del so exerciciu asina como los variaos enfoques xurídicos que se vinieron adoptando sobre la cuestión.

L’escritor Gabriel Santullano presenta “La prensa clandestina en Asturias 1939-1975”, un llibru editáu pola Fundación Juan Muñiz Zapico. Santullano ye autor de dellos trabayos sobre la prensa n’Asturies, el movimientu obreru, la historia de la minería, la oposición al franquismu ente otros temes históricos.
L’actu de presentación fadráse les 20,00 hores, de güei xueves, nel Salón d’Actos del Palaciu de Valdecarzana d’Avilés. Darréu de la presentación entamará una charra coloquio sobre la prensa clandestino n’Asturies.
“Prensa Clandestina” ta editada pola Fundación Juan Muñiz Zapico y KRK ediciones; l’oxetivu d’esti llibru ye poner en manes del llector a lo llargo de les sos 536 páxines, una parte de la tapecida vida política d’Asturies ente 1937 y 1975. Xunta l’autor tarán Juan José Fernández, Conceyal de Cultura d’Avilés; Francisco Prado Alberdi, presidente de la Fundación Juan Muñiz Zapico; y Carlos Fernández, Secretariu de la Unión Comarcal de Comisiones Obreres d’Avilés.

Alfonso Román, conceyal de Cultura d’Uviéu y Aberto Mortera, conceyal non adscritu y escritor, presentaron esta fin de selmana los primberos premios Uviéu de Relatos, curtios, teatru y poesía en llingua asturiana”. Mortera siñaló que los premios queren convertise nuna iniciativa “qu’abra les puertes a la cultura asturiana y en llingua asturiana”, amás de pa incentivar la creación lliteraria”. El conceyal de cultura uvieín, Alfonso Román, destacó la importancia económica d’esti premiu, dao que l’autor de la obra ganadora recibirá 3,000€ y habra dos accesits de 1,000 y 600€ en cauna de les categoría, amás del asoleyamientu de les obres premiaes.
Román siñaló que Gabino de Lorenzo, alcalde d’Uviéu, tien l’enfotu de que la obra teatral ganadora d’esti certame “valga pa la clausura del XV Concursu y Muestra de Folclore Ciudá d’Uviéu”. Mortera, que sedrá’l presidente del xuráu, anunció que’l xuráu tará compuestu por respresentantes de la Cátedra Alarcos, Academia de la Llingua, Asociación de Llibreros y Conceyalía de Cultura.
El conceyal de cultura esplicó que, por iniciativa del Alcalde Gabino de Lorenzo, “la obra de teatro ganadora va representase nos actos de clausura del “XV Concursu y Muestra de Folclore Ciudá d’Uviéu'”, algo que-y abulta que “pue atraer más al autor de la obra que la cenciella edición del testu”. Pela so parte, Alberto Mortera certificó que nel xuráu van tar, amás d’elli, un secretariu y cuatro vocales, que van ser representantes de la Cátedra Alarcos, de l’Academia de la Llingua Asturiana, de l’Asociación de Llibreros d’Uviéu y de la Conceyalía de Cultura.

Convocatoria y Bases del Premiu Uviéu

Valores en claves femenino ye’l nuevu llibru d’Helena Trejo. La llangreana, que tien espublizaos llibros como Camientos, coses, curuxes, Abril, obra ganadora del Vital Aza de poesía o Camín davezu, novela espublizada l’añu pasáu cola editorial Vtp, presentó ayeri’l llibru nel Antiguu Institutu Xovellanos de Xixón.
La presentación abrióla Frichu Yustas, periodista y llibreru conocíu pol so llabor cola emigración asturiana y la promoción de la música folc fuera de les llendes d’Asturies. Yustas destacó qu’«anque’l llibru quier centrase nes problemátiques de les muyeres, pue aplicase a munchos otros coleutivos» y faló de la prosa d’Helena Trejo como «mui cercana al estilu d’Isabel Allende, falando de la vida dende la perspeutiva femenina».
L’autora, pela so parte, destacó la necesidá de meyorar la situación de la muyer, que ve llaceriosa en munchos casos y comentó como «los falantes d’asturianu y les muyeres vivimos una situación mui paecida n’Asturies, tamos marxinaes y minorizaes, fuera del poder». Asina mesmo, encamento’l llibru lo mesmo a muyeres qu’a homes y amosó la esperanza de qu’esta novela, claramente de crítica social, «sirva pa remover munches conciencies machistes, que munches vegaes son de les propies muyeres»
Valores en clave femenino, tará bien ceo nes llibreríes y ta espublizada pola Asociación Grupu Epona, cola que Trejo yá sacare dellos llibros. Na presentación anunció qu’esti añu va tener nel mercáu dos llibros nuevos, A la gueta de setes na seronda y Dos, dambos dirixíos a los neños y centraos nel cuentu.

La escritora Helena Trejo va presentar el llibru “Valores en Clave Femenino” esti xueves, 9 de payares, a les 20,00 hores Antiguu Institutu de Xixón. L’actu que va tar dirixíu por Frichu Yustas cuntará cola presencia de muyeres conductores de tráiler, autobús, autocar y d’una bombera.
Helena Trejo foi Premiu de Torna de l’Academia de la Llingua Asturiana, en 1995, por “El Caminante y la muria”, de Salvador Espríu, Premiu Elvira Castañón de poesía. En 2003 coordinó y editó l’antoloxía de muyeres poetes asturianes.

Hector Pérez Iglesias ganó’l premiu convocáu pola Asociación de Muyeres Valdés Sieglu XXI na so categoría n’asturianu mientres que Natalia Pérez Iglesias algamó’l premiu na modalidá castellana.
El xuráu de la categoría de llingua asturiana compusiéronlu Nené Losada, Carmen Guardado, Mª Esther García, Marta Mori y Xuan Santori que concedieren el premiu a la obra L’Amarga Cazumbre. El xuráu destacó “la riqueza ya precisión del llinguaxe ya l’ambición artística, qu’abren rumbos nuevos na poesía asturiana actual”, según diz l’acta.
Pela so parte Natalia Menéndez Rodríguez cola obra “Restos de un naufragio” algamó la unanimidá d’un xuráu compuestu por Carlos León, José Antonio Pérez, Juan José Alonso y Gonzalo Moure. La escritora avilesina al poco de recibir la notificación del Nené Losada recibía’l resultáu del Premiu “Ana de Valle” que tamién acabara de ganar cola obra “Las virtudes cardinales”