Lliteratura

El II premiu de lliteratura infantil que convoca l’Asociación de Llibreros d’Asturies foi declaráu ermu. En pallabres de Carlos Madera, director de Promoción Cultural, nengún de los 19 trabayos presentaos llegaba al umbral esixíu.

La editorial asturtOOns ta acabante d’espublizar seis nuevos títulos dientro de la so colección Llingua de Trasgu, de lliteratura illustrada. Ente estos títulos destaca un nuevu llibru protagonizáu por Nardo y Quina, personaxes creaos pol piloñés Enrique Carballeira, que toles selmanes apaecen en formatu de tira d’humor gráficu en dellos periódicos asturianos.

Nesti casu trátase d’un volume dirixíu especialmente a los más neños, yá qu’ellos vienen siendo unos de los “fans” más fieles destos personaxes dende que nacieran nel añu 1992.

El restu de los títulos que se presenten como novedá son: “La Lluz de la Lluna”, “¿Pa qué val una Pota?” y “¿Pa qué val una bufanda?”, del tamién piloñés, Miguel Rojo Martínez. Estos dos últimos llibros formen parte de la estaya pa primeros llectores que s’abre dientro de la colección.
La llista de novedaes complétase con otru llibru d’Enrique Carballeira: “De recuerdu, un dinosauriu”, que cunta la historia d’un científicu chifláu, Ramón, empeñáu en construyir una máquina pa viaxar nel tiempu, y tamién una historia firmada pola autora de Xixón, Helena Trejo Fombella, baxo’l títulu de “A la gueta setes na seronda”.

Asturtoons

Una familia de Mieres del Camín dona a la Biblioteca Municipal del conceyu 133 llibros, d’énte finales del sieglu XIX y entamos del XX. Los llibros pertenecíen al Atenéu de Mieres que durante la Guerra Civil fuera espoliáu. Esta ye la segunda vegada nes últimes selmanes na que la Biblioteca de Mieres del Camín recupera parte de los fondos del Atenéu.

La familia Pérez-Amato mercó los llibros nos mercaos o na Feria del Llibru de Madrid. Los exemplares más antiguos daten de 1879 y énte les obres rescataes alcuéntrense la obra completa de Jacinto Benavente y dalgunes de les primeres ediciones de los testos d’Ortega y Gasset.
La Directora de la Biblioteca de Mieres del Camín destacó’l bon estáu de conservación de los volúmenes, citando que dalgún conserva les tarxetes de préstamu del Atenéu.

La Sociedá Económica d’Amigos del País d’Avilés y Comarca y la Conceyalía de Cultura van presentar esta tarde’l llibru tituláu “Ciclo de Conferencias sobre Armando Palacio Valdés”. Esti documentu recueye les charres que se ficieren al rodiu la figura del escritor nos meses de marzu y abrul. L’actu fadráse a partir de les 20,15 hores nel Palaciu de Valdecarzana

L’escritor vascu Bernardo Atxaga va dar una conferencia’l próximu 8 de xineru, a partir de les 20,00 hores, nel Club de Prensa Asturiana. L’actividá, na qu’Atxaga desenvolverá les sos opiniones sobre la situación d’Euskadi, ta organizada pola Asociación de Xóvenes Historiadores.

Bernardo Atxaga ye’l creador d’obres como Obabakoak, pola que algamaría’l Premiu Euskadi, el Nacional de Narrativa, el Premiu de la Crítica y el Prix Millepages, l’añu pasáu Obabakoak llegó al cine dirixida por Montxo Armendáriz col títulu d’Obaba.

L’Ayuntamientu d’Ayer vuelve a convocar otru añu más el so Cocursu de Cartes d’Amor. El Concursu de cartes amorosiegues llega a los diez años d’esistencia cola convocatorial de 2007. El plazu pa presentar les cartes, n’asturianu o castellano, ye’l 14 de febreru de 2007
Esti concursu dotáu con un primber premiu de 250€ y una flor y un segundu de 190€ y tamién una flor, recibe cartes dende bien de llugares del planeta, convirtiéndose nuna referencia mundial nos d’esti calter. Nesta edición ponse , amás, una nueva categoría empobinada a los y les ciudadanes del conceyu ayerán. Los y les autores premiaos recibirán tamién una estancia d’una finde selmana pel conceyu d’Ayer.

Les cartes han empobinase, primero del 14 de febreru, a la Oficina d’Información Xuvenil d’Ayer, Avda Tartiere 32 33.670 Morea (Ayer).

Conceyu d’Ayer

La Llibrería Ítaca de Xixón pesllará les sos puertes el día 5 de xineru de 2007. Ítaca, dirixida por Julio González, ye un de los puntos d’alcuentros de la cultura asturiana en Xixón. Por mor del peslle de la llibrería tou’l material de la mesma va tener un 50% de descuentu. La Llibrería Ítaca ta na cai Marqués de Casa Valdés de Xixón.

Dende’l 22 d’avientu y hasta’l 23 de xineru tará abierta na segunda planta de la Casa la Cultura de Llanes l’amuesa “Libros Pop-up: una vida en movimientu”, que representa un orixinal viaxe pol mundu de los cuentos infantiles. Trátase d’una de les principales propuestes del programa del nadal del Ayuntamientu de Llanes.

Los llibros “pop-up” o llibros animaos tán presentes dende’l mesmu entamu de la lliteratura infantil como xéneru independientes a finales del sieglu XVIII. Consideraos polos estudioses de la lliteratura infantil y xuvenil como auténticos “artefactos de la fantasía y l’alcordanza” fueren dende la so apaición una fonte de placer visual y artísticu.

L’amuesa completaráse con delles actividaes complementaries empobinaes a que los más nuevos descubran el mundu de la llibros pop-up faciendo ellos mesmos los sos propios volúmenes.

L’aportación que venía dando’l Ministeriu de Cultura a la rede de Biblioteques d’Asturies duplicaráse en 2007 algamando’l mediu millón d’euros.
L’anuncia fízose pública nel marcu de la Conferencia Sectorial de Cultura, cellebrada en Iruña, y qu’abordó’l nomamientu de representantes de les comunidaes autónomes na Comisión Estatal sobre la Dixitalización y l’Accesibilidá de les biblioteques, asina como’l siguimientu del proyectu européu de la Biblioteca Dixital Europea. La representación asturiana foi designada pa ser parte d’esta comisisón.
Asina mesmo, alcordáronse los criterios de distribución de los fondos qu’el ministeriu español empobina pa la merca de llibros nes biblioteques públiques. L’estáu español nesta partida incrmenta, tamién, la so aportación hasta los 19.600.000 euros, esta cantidá permite que l’aportación del gobiernu español a les biblioteques asturianes pueda medrar.

L’Asociación Gastronómica Rexón Llionesa pal Bon Xantar convoca la primer edición del so Premiu lliterariu “Jaime Andrés”. El certame ta abiertu a toles persones que tean interesaes en presentar los sos trabayos lliterarios en llingua asturiana sobre la gastronomía de la comunidá vecina. El xuráu del certame premiará con 600€ a la meyor obra presentada.

L’Asociación Gastronómica Rexón Llionesa pal Bon Xantar nació na primavera de 2005. Ta compuesta por un grupu de llioneses, d’estremaos ámbitos y orixe que s’axunten alredor de los Productos de Llión. Dende 2006 la entidá tien un alcuerdu con Caxa España na qu’axunten los ámbitos gastronómicu y llingüísticu plasmaos nesti certame.