Lliteratura

Redacción.

El vienres pela tarde nel recintu de la Feria Internacional de Muestres d’Asturies presentóse’l programa de l’Arribada 2007 a la prensa. Nel actu dieronse dalgunos detalles nuevos del actu, ente los que destaquen novedaes d’esti añu como les actuaciones musicales que van pesllar munches de les nueve xornaes de l’Arribada 2007.

El 14 de setiembre, día de l’apertura, va facese un actu institucional nel que los políticos xixoneses van facer una llectura de lliteratura asturiana dempues de la llegada de más de sesenta escritores y personalidaes de la cultura nel barcu ‘Cimavilla II’, que va facer previamente un percorríu pela costa xixonesa colos escritores foraneos y los convidaos al congresu.

Y esi mesmu día va tocar la formación ‘Ayalga sinfónica’, lo que va suponer el pieslle a un día d’actividaes nel que va presentase l’espaciu de les editoriales pa la venta de llibros a lo llargo de tola selmana nel patiu del Antiguu Institutu Xovellanos y el periódicu oficial de l’Arribada, ‘Vagamar’, qu’esti añu quier dar un pasu más “ampliando conteníos y acercándose más al públicu xeneral”. Ente les actuaciones musicales destaca la participación del grupu Mestura, Senogul, Xera y del músicu Dani García de la Cuesta.

Redacción.

Güei, llunes 20 d’agostu, ye’l ‘llunes d’asturianía’ n’Aviles, un día organizáu pola Asociaciones de Vecinos El Hórreo del Carbayedo. El día inclúi un festival de tonada pela nueche y a les ocho la tarde la entrega de los premios del Concursu de Microrrellatos, onde los ganadores van lleer los sos cuentos.

El ganador d’esti añu foi Ruben d’Areñes por ‘La siya de Delfina’. L’autor ye habitual de revistes como Lletres Asturianes o Formientu.

Ente los finalistes tán otros rellatos titulaos ‘Cafe Pirata’, de Braulio Guerra, ‘Garrái al lladrón’, d’Alfaraz, y ‘A eso das dúas’, de Luisa Mendez Fernández. Esti yera’l I Concursu de microrrellatos que convocaba l’Asociación cola collaboración de la Estaya de Normalización Llingüística del Conceyu d’Aviles y la iniciativa facíase dientro del programa de fiestes de San Roque d’esti añu, qu’entamaren nel barriu avilesín d’El Carbayedo la selmana pasada.

Redacción.

El Conseyu Llocal de la Muyer del Conceyu de Siero convocó apocayá la segunda edición del Concursu de Rellatos Curtios ‘Muyer y Participación’. Los rellatos han de tratar temes sobre la participación de la muyer na vida social, política, económica y cultural. El llargor máximu ye de diez fueyes per una cara. El plazu sigue abiertu hasta’l 28 de setiembre.

Les obres tienen que se presentar n’asturianu y nun tar premiaos nin espublizaos. Los trabayos presentaos nun tienen que pasar de los diez folios d’estensión, per una cara namás, en tamañu DIN A4 y escrites a ordenador o máquina a doble espaciu. Cada participante puede presentar, como muncho, dos obres con una estensión máxima de diez folios per una cara.

Cada rellatu tien que presentase per triplicao, grapáu, en sobre zarráu y col sistema identificativu del pliques ente’l 3 y el 28 de setiembre de 2007 na Casa d’Alcuentru de les Muyeres de Siero: Cai Celleruelo 67, baxu. 33510, La Pola (Siero). Na pasada edición resultó ganador Inaciu Galán y González pol rellatu ‘Suañar en tiempu de guerra’ y Mar Cueto Aller, que recibió un accesit por ‘Los llibros cola fueya en blancu’.

Redacción.

L’Asociación Cultural L’Arribada presenta esti vienres el programa d’actos de l’Arribada 2007 ‘vagamar lliteraria en Xixón’, la segunda edición d’esti festival lliterariu que “ñació col envís de sacar la lliteratura asturiana de los espacios y el públicu de davezu y acercala a la xente’. L’actu va ser a les cinco la tarde nel Palaciu de Congresos de Xixón, asitiáu na Feria de Muestres de la ciudá.

Pa ello, l’Arribada 2007 medra con respectu a la primer edición, pasando de siete a nueve díes, teniendo actividaes a lo llargo de tol día y pasando a ocupar el patiu del Antiguu Institutu Xovellanos de Xixón con un espaciu pa les editoriales y pa presentaciones que va tar abiertu mañana y tarde y que va cuntar con actuaciones musicales.

Asturnews.com avanza’l programa güei y nes próximes selmanes y hasta que llegue la fecha vamos dir adientrándonos nos conteníos d’unu de los acontecimientos lliterarios más importantes organizaos alredor de la lliteratura asturiana.

Programa de l’Arribada 2007

Redacción.

Ta acabante d’espublizase la resolución pola que se conceden les sovenciones pa la edición de llibros en llingua asturiana y n’eonaviegu pal añu 2007. Esta resolución da anuncia de la mayor parte de les novedaes editoriales en llingua asturiana pa la segunda metá del 2007 y los primeros meses del 2008. Cerca de 70 novedaes que van dir apaeciendo nos meses vinientes.

La editorial Asturtoons va espublizar esti añu nueves novedaes na so colección ilustrada pa neños d’autores como Miguel Rojo o Enrique Carballeira y Madú Ediciones va editar una ‘Guía secreta de la Llaboral’ de Dolfu Camilo Díaz y Mercerdes Menendez, ente otres novedaes.

Mención especial tien Ediciones Trabe, la editorial que más llibros espubliza cada añu y qu’edita tolos xeneros. Destaca la continuidá de la so colección ‘Albera’ de poesía, con nuevos númberos, la edición del primer llibru de monólogu modernu con autores como Benxa Perez, Chechu García o Inaciu Galán o tornes como ‘El medicu a palos’ de Moliere y la edición, bien novedosa na lliteratura asturiana, de la torna d’una obra d’esitu internacional como ye ‘Harry Potter y la piedra filosofal’ de J.K. Rowling, la primer entrega de les aventures del xoven magu ingles.

Nel casu de los ensayos, destaca la bayurosa producción d’esti añu, con obres como ‘Mitos y lleendes del conceyu de Xixón’ d’Alberto Álvarez Peña, editáu por VTP, ‘Otres xeneraciones y dexeneraciones (sieglu XX y lo que va de XXI) d’Antón García, ‘El nacimientu d’una nación. Historia de Sudáfrica’ de Faustino Zapico d’Araz Llibros o ‘El conceptu xeneracional (Actes de la Xunta d’Escritores n’Uvieu), coordináu por Xaviel Vilareyo y editáu por Trabe.

La edición pa neños y adolescentes va ufiertar, como cada añu, una bayurosa producción de tou tipu, con obres de Maite G. Iglesias, Vicente García Oliva, Berta Piñán y Sabel Tuñón y Lourdes Álvarez, que vuelven a espublizar ún de los sos llibros pa neños de cero a tres años, nesti casu ‘Animalaes’.

Ente les resoluciones apaecen dalgunes editoriales nueves como Suburbia Ediciones, dedicada a la lliteratura fantástica y a los xeneros menos habituales o Araz Llibros, dedicada al ensayu. Dambes dos van presentar esti mes de setiembre les sos primeres publicaciones n’Arribada de Xixón. Llibros como ‘Llingua estandar y normalización. La estandarización de les llingües subordinaes’ de David Guardado d’Araz Llibros o ‘Vía de Serviciu’, antoloxía cola obra de los autores más mozos de Suburbia Ediciones.

Otros autores con llibros nuevos pa estos meses van ser Xuan Bello, el debutante Nicolás V. Bardio, Esther García, Neto, Ismael Arias, Naciu Varillas o Beatriz R. Viado ente otros.
Espediente completu cola resolucion

Redacción.

Nestos díes fízose públicu’l ganador del premiu de poesía ‘Fernán Coronas’, qu’esti añu tuvo por ganador al poeta corverán Bertu García, autor de poemarios como ‘Treslallende’ (xunto a Carlos Suari) y ‘Ensin otra sida’.

‘Manual contra’l vacíu’, el poemariu ganador, ta conformáu por un conxuntu de 50 poemes escritos dende l’añu 2003 al 2005, que se dixebren en bloques temáticos o rempuestes que baxo títulos como tiempu, lliberta, camín o manes respuenden a “los cinco puntos que se precisen pa echar a andar”, esplica l’autor.

El premiu Fernán Coronas ye ún de los más prestixosos de la poesía asturiana y yá lu ganaron n’otres ocasiones poetes como Luis Miguel Fernández, Taresa Fernández Lorences, Anxel Alvarez Llano, Miguel Rojo, Inaciu Llope, L.luis Fernández, Jose Luis Rendueles y Susana Rodríguez Sela.

Redacción.

El poeta Armando Vega entama’l performance poeticu ‘Cuerpos (con)versos’ esti sábadu ente les 11:30 y la una y media la tarde na playa de L’Arbeyal. Según el propiu autor “la idea ye utilizar el cuerpu como soporte poeticu, como llenzu nel que plasmar la grafía de la pallabra”.

L’acción interdisciplinar “na que cuerpu y espíritu (cuerpu como soporte y espíritu como manifestación escrita de los sentimientos) da llugar a un tou formal”. Nel actu y al travies de distintes formes, dellos cuerpos van facer de soporte pa un únicu poema tendíos na pendiente de la playa en forma escalonada, con un versu en cada llombu, de manera que dende la distancia puea visualizase’l poema completu.

D’esta acción va quedar un documentu gráficu en formatu de semeya y vidiu, que van ser espuestes nel Ateneu de La Calzada.

Redacción.

Lleva más de dos sieglos muertu pero la so producción sigue dando de sí. Un manuscritu de Xovellanos de cuasi 250 años ta acabante d’espublizase gracies al trabayu del padre agustín Juan B. Olarte y al sofitu del Foru Xovellanos. La obre ye una torna al castellán de la obra de teatru escrita en 1674 por Jean Racine.

L’orixinal taba nel archivu del Monesteriu de Yuso en La Rioxa y paez que Xovellanos nun lu espublizó por mieu a la Inquisición. El llibru ye facscimil ya inclúi una trescripción que moderniza ortográficamente’l testu orixinal de Xovellanos pa facelu más accesible al llector d’anguaño.

Redacción.

La poeta xixonesa Sabel de Fausta ta acabante de sacar al mercáu, embaxo’l sellu de Trabe Ediciones, un llibru nel que recueye la so poesía espardida nos últimos años per delles publicaciones. El llibru titúlase ‘Na solombra del silenciu’ y nel amosa l’amor, el pasu del tiempu, la muerte, el dolor, l’amor pola tierra y el sentimientu relixosu, toes elles figures habituales na so poesía.

Sabel de Fausta ñació en Xixón en 1934 y tien trabayao la poesía y la narrativa, siendo la primera la más cultivada pola autora. En 1987 espublizó’l llibru de rellatos ‘Mercáu de vida, mercáu de muerte’ y nel 1996 ‘El tren de media nueche y otros cuentos’, amás de numberosos llibros de poesía.

Redacción.

La directora de la Biblioteca d’Asturies, Milagros García, anunció estos díes una serie de midíes pa meyorar los servicios de la biblioteca asturiana. Dende estos díes l’horariu de la biblioteca pasa a ser de 8 de la mañana hasta les 20:50 hores. Amás, acaba d’inaugurase un sistema de ‘mostrador únicu’ que permite facer xestiones d’una manera más rápida.

La directora considera prioritario otres midíes, como “dotala de places d’auxiliares y una llei de biblioteques, yá qu’Asturies ye la única comunidá que nun la tien”. La Biblioteca d’Asturies inauguróse en payares 1987 y tien nos sos fondos un total de 320.000 llibros, de los que 170.000 pertenecen a los fondos de conservación del patrimoniu asturianu.

Nos últimos tiempos instauróse un carne una rede única pa toles biblioteques asturianes y el ciudadanu pue consultar el fondu de cualesquier biblioteca d’Asturies namás con metese n’internet.