Lliteratura

La Casa Cultura de La Pola Siero va acoyer esti vienres un alcuentru lliterariu cola presencia d’autores asturianos de Siero y d’otros conceyos, ye la Entamada ’07, que quier axuntar dalgunes de les novedaes editoriales. Asina, esti vienres va presentase’l númberu 3 de la revista Formientu y l’antoloxía de narrativa moza ‘Vía de Serviciu’.

A les siete y media la tarde van entamar los actos cola presentación de Formientu. Darréu va presentate l’antoloxía de narrativa moza ‘Vía de serviciu’, la primer edición de la editorial Suburbia. Más tarde va celebrase un ‘Alcuentru d’autores’ sotituláu ‘Recital de poesía non oficial’, nel que van participar autores como Sergio Gutiérrez o Pablo X. Suárez.

El Conceyu de Piloña convoca una nueva edición del so concursu de cuentos pa escolinos de primaria, nel que puen tomar parte los estudiantes d’estos cursos de tolos centros escolares del país. El certame convócase tolos años con motivu de la celebración, a partir del 15 d’ochobre, d’una nueva edición de les Xornaes de Lliteratura Infantil en Llingua Asturiana.

El llargor de los trabayos tendrá que tener dos fueyes, como munchu, y con temática llibre. Serán valoratibles les ilustraciones qu’acompañen el testu. Nos cuentos hai que poner les señes de los concursantes: nome, colexu, cursu, edá y direición. Los cuentos hai que los mandar enantes del 31 d’ochobre, a la Casa Municipal de Cultura Marqués de Vistalegre d’Infiestu, asitiada na cai Cuadonga, poniendo nel sobre que se trata d’una narración pa participar nesti concursu.

Premiaráse’l meyor cuentu de cada categoría (primeru, segundu y terceru de primaria) con llotes de llibros, material escolar y trofeos. La entrega de premios va ser el día 9 de payares, nel actu lliterariu de pieslle de les Xornaes de Lliteratura Infantil. Nes pasaes ediciones esti certame lliterariu siempre cuntó con bayura de cuentos concursantes, penrriba de 150 trabayos de media.

Esti sábadu pasáu presentóse n’Arribada 2007 la revista ‘N’ast. Cartafueyos d’ensayu’, de la mano d’Inaciu Galán, Humberto Gonzali y Xabel de Cea, direutor de la publicación. Esti númberu 1 ta yá a la venta na Arribada y ta entamando a distribuyise peles llibreríes del país. La publización axunta una representación plural del pensamientu asturianu.

N’ast ábrese con un ‘Entamu’ y un artículu tituláu ‘Una llectura de la hestoria’ de Xosé Lluis García Arias, ex presidente de l’Academia de la Llingua Asturiana y profesor de la Universidá d’Uviéu. Darréu, y ordenaos pela cercanía nel tiempu del tema que traten, apaez un artículu tituláu ‘Nacionalismu / autonomismu tres les elleiciones de mayu de 2007’, firmáu pol llider d’Andecha Astur, Marcos Abel Fernández; otru trabayu tituláu ‘La llingua asturiana na televisión: Reivindicación y presencia (1974-2007) del escritor y presentador de la TPA Inaciu Galán y González.

La revista sigue con ‘Facismu social y esporpolle del neonazismu español’ del Colleutivu Calecer; ‘Un repás peles teoríes del nacionalismu y delles observaciones crítiques’ del profesor Xosé Carlos Loredo Narciandi; l’artíuclu ‘La identidá asturiana’, de Carlos X. Blanco; la ‘(Posible) Antoloxía de poesía patriótica’ del hestoriador Rafael Rodríguez Valdés; el trabayu ‘Lo tradicional como determinante de la cultura d’anguaño’ del académicu Roberto González-Quevedo; ‘La tradición y la modernidá na constitución de la música asturiana contemporánia’ del llider d’Unidá, Inaciu Llope y l’artículu sobre mitoloxía ‘La cervatina y la culiebra’ d’Alberto Álvarez Peña.

Una revista que vien a ampliar l’espectru del ensayu en llingua asturiana y qu’ufre una amplia ufierta d’artículos de temática variada. La revista va presentase n’Uviéu dientro de bien pocu, na nueva llocalización de la Llibrería Paraxuga, na cai Paraísu.

Dende va unos díes ye posible apuntase a los actos de l’Arribada 2007 d’un mou certificáu. La Dirección Xeneral de Promoción Cultural y Política Llingüísta va dar un certificáu oficial d’asistencia a tolos que quieran asistir a los actos d’una manera continuada. Con esti documentu y pa los efectos que puedan ser necesarios, la xente qu’asista al congresu va poder acreditar l’aprovechamientu de les xornaes que se van desenrrollase, na so parte académica, nun total de 36 hores.

Los interesaos n’incribise puen ponese en contactu cola Oficina de Política Llingüística del Principáu nel númberu 985 10 67 41, o cola Secretaría Técnica de l’Arribada 2007 nel númberu 662 50 61 49, asina como pel corréu arribada_sectec@yahoo.es facilitando’l so nome y apellíos, númberu de D.N.I, señes, teléfonu de contactu y, si ye’l casu, dirección de corréu electrónicu.

Especial Arribada en Lliteratu.com

La revista dixital Lliteratu llega a la so edición númberu diez con un númberu dedicáu a l’Arribada 2007 ‘vagamar lliteraria en Xixón. El númberu inclúi un resume de los actos, el programa completu, dellos reportaxes y collaboraciones lliteraries, amás del capítulu V de la ‘Historia Interminable’, escritu nesta ocasión pol escritor mozu Nicolás V. Bardio

El númberu inclúi collaboraciones lliteraries de Xabel de Cea, Verónica Canel y otros autores y un reportaxe sobre los trés homenaxes que van facese na Arribada 2007: Xosé Antón García, Eva González y Enrique García Rendueles.

Enllaz cola revista dixital de lliteratura ‘Lliteratu’

L’Asociación L’Arribada aconceyó ayeri domingu a les cinco la tarde en Xixón, al xuráu del Premiu Timón 2007, que l’asociación convocó nel mes de xunetu 2col envís de facer reconocencia de la trayectoria lliteraria y/o’l llabor de promoción de la lliteratura asturiana d’un autor de la nuesa lliteratura mayor de cincuenta años y con una carrera lliteraria importante”. Por embargu, hasta’l día 21 de setiembre, dientro de los actos de l’Arribada, nun va facese públicu’l fallu.

El xuráu tuvo formáu por profesor y miembru de l’Academia de la Llingua Asturiana, David M. Rivas, pol editor y escritor Milio Rodríguez Cueto, pol escritor y xestor cultural Humberto Gonzali, pola escritora Aurora García Rivas y pol llibreru y animador cultural Frichu Yustas, teniendo como secretariu con voz pero ensin votu a Inaciu Galán y González, presidente de l’Asociación L’Arribada, director de la revista lliteraria ‘Formientu’y presentador de la TPA.

El premiu pal ganador, escoyíu pol xuráu d’ente les candidatures presentaes por persones individuales y coleutivos, va ser una escultura del artista Ánxel Nava fecha en fierro y madera.

Güei llunes a les siete la tarde va presentase nel Salón d’Actos Centru Social Tomás y Valiente de Les Vegues, en Corvera, el llibru ‘Treslallende’. Un poemariu conxuntu nel que García y Suari ufren al públicu lo so poesía última y que yá fuere presentáu al públicu n’Uviéu. La próxima presentación va ser la selmana que vien nos actos d’Arribada 2007, en Xixón.

Berto García (Les Vegues, Corvera, 1975) ye autor d’Ensin otra sida (Ediciones Trabe, 2005) y de mui bien d’obra publicao nes revistes de lliteratura del nuesu país: Entellunu, El Canciu’l Cuélebre, Lletres Asturianes y Reciella Malory, ye ganador del Fernán Coronas 2007. Mayestru de profesión, trabaya como interín anguaño nuna escuela de Castiella. Amás, ye miembru de la Banda de Gaites de Corvera.

Carlos Suari (La Xungarosa, Avilés, 1982) ye autor del poemariu ‘El mio cachu tírolu’, publicáu n’internet de forma llibre en 2005. Llicenciáu en Ciencies de l’Actividá Física y del Deporte, estudiante d’Antropoloxía Social y Cultural, xuez y monitor de deportes tradicionales asturianos. Tien delles publicaciones científiques sobre l’aplicación educativa de la tradición física.

A menos de cinco díes pal entamu de l’Arribada 2007, Asturnews.com ufierta a los sos llectores el programa completu y definitivu de los actos, que van celebrase ente’l 14 y el 22 de setiembre. Descarga equí’l programa completu.

Un añu más, la Tertulia Cultural El Garrapiellu, entama’l concursu de cuentos curtios ‘El Garrapiellu’. Esti grupu cultural ye bien conocíu por mor de facer tolos años la ruta andariega a dende Xixón a Cuadonga y les Olimpiaes de Xuegos Tradicionales nel museu Pueblu d’Asturies, ente otros actos, y el Concursu ye’l que más años lleva convocándose como premiu de cuentos.

Esti añu faise la XVI edición d’esti perconocíu certame, que tará dotáu con 900 € pal primer premiu y un accesit de 300 € pal segundu. Amás del premiu en metálicu los cuentos ganadores van asoleyase nel llibru qu’El Garrapiellu saca cada cuatro años colos rellatos ganadores. Nesti añu presentaráse al públicu na II edición de L’Arribada’l tercer llibru nel que tan tolos cuentos de la xente que ganó estos caberos años. “Les hestories que lu algamen nesta convocatoria axuntaranse pa con otros y van facer el cuartu llibru dientro de cuatro años”, comenten los organizadores.

En cuanto a la fecha de convocatoria, más tarde de lo habitual n’otros años, los encargaos de concursu comente “la diferencia col añu pasáu ye’l cambeu nes feches, nesta edición y nes vinientes el premiu convocarase y fallarase na seronda, esti treslláu nel tiempu debese a temes alministrativos”.

El ganador del añu pasáu foi Pablo Rodríguez Alonso, que tamien algamó’l prestixosu premiu de poesía Teodoro Cuesta. Pa cualesquier dubia rellacionada col premiu escribir un correú a: premiu.elgarrapiellu@yahoo.es

BASES DEL
XVI CONCURSU DE CUENTOS CURTIOS “EL GARRAPIELLU”
LA TERTULIA CULTURAL EL GARRAPIELLU CONVOCA’L XVI CONCURSU DE CUENTOS CURTIOS EL GARRAPIELLU
BASES

1. �� Los cuentos han tar redactaos dafechu en Llingua Asturiana, respetando les normes ortográfiques de l’ALLA
2. �� El concursu va empobináu a escritores mayores de 16 años.
3. �� El llargor de los trabayos (unu por persona) nun será enxamás superior a les 12 fueyes mecanografíaes a doble espaciu, escrites per una sola cara.
4. �� La temática ye llibre.
5. �� El plazu d’entrega de los trabayos tará abiertu hasta’l 20d’ochobre de 2007 y tienen d’unviase a: TERTULIA CULTURAL EL GARRAPIELLU, apartáu de correos 8133 – 33280 Xixón, nun sobre onde s’escribirá “XVI Concursu de Cuentos Curtios EL GARRAPIELLU”. Dientro del mesmu dirá l’orixinal del cuentu col titulu y TRES copies, baxo plica, amás d’otru sobre cola plica’l autor y el títulu del cuentu escritu per fora, que contendrá los sos datos y un telefonu de contactu.
6. �� El fallu’l concursu sedrá’l día 3 de payares. EL GARRAPIELLU nomará un xuráu debidamente cualificáu pa fallar estos premios y les sos decisiones nun serán retrucaes.
7. �� La entrega de los premios comunicaráse personalmente a los ganadores y faráse público nos medios de comunicación.
8. �� A xuiciu de la Tertulia Cultural El Garrapiellu, el ganador de la presente edición formará parte del xuráu del próximu concursu.
9. �� Los trabayos premiaos son propiedá d’EL GARRAPIELLU que los espublizará nel IV volumen de Cuentos Curtios qu’entama nesta edición. En dengún casu se tornarán los orixinales a los autores de les obres non premiaes, pero estos podrán, pela so parte, facer usu de les copies nun presentaes.

PREMIOS
Establecense los premios siguientes:
1 Premiu de 900 Euros y diploma
1 Accesit de 300 Euros y diploma
A xuiciu del xuráu estos premios podrán declarase desiertos
Esti concursu cuenta cola collaboración de la Conseyería de Cultura del Principáu d’Asturies
Tertulia Cultural EL GARRAPIELLU. Tfnu: 609-82 40 32
premiu.elgarrapiellu@yahoo.es

Estos díes atrás y embaxo la organización y patrociniu de La Fundación ‘Juan Muñiz Zapico’ y la Federación Minerometalúrxica de CC.OO d’Asturies convocóse la cuarta edición del ‘Concursu de Rellatos Mineros Curtios Manuel Nevado Madrid’, que tien categoría n’asturianu y en castellán y qu’obliga a que la temática tea rellacionada de dalguna manera col mundiu de la mina.

Los cuentos nun pueden pasar les 40 llinies y han unviase per corréu a la Fundación Juan Muñiz Zapico col lema ‘Concursu de Rellatos Mineros Curtios Manuel Nevado Madrid’ a la cai Santa Teresa 15, códigu postal 33005 d’Uviéu hasta’l próximu 22 d’ochobre de 2007.

Bases completes