Lliteratura

El Centru Asturianu de Madrid fizo recaer na escritora M.ª Esther García López el primer premiu del VI Concursu de Rellatu Curtiu en Llingua Asturiana Xose Álvarez “Pin”. La obra ganadora foi’l cuentu “La maestra” y l’accesit foi pal rellatu “La semiente”.

M.ª Esther García López, natural de Valdes, ye miembru de l’Academia de la Llingua Asturiana amás de pedagoga y maestra. Como investigadora tien espublizaos dellos llibros d’investigación sobre llingua y cultura asturiana. Como novelista de ficción espublizó “L.luribaga”, “Zamparrampa”, “Tiempu d’iviernu” y “Historias de vida ya señas de muerte”.

Ta acabante d’apaecer na rede un nuevu blogue ‘llectoresyllectures’, un blogue que ñaz “col envís de facer un archivu de crítica lliteraria asturiana plural ya independiente, al empar que rigorosu”. La páxina apurre yá unes normes pa la llibres espublización de crítiques. El principal criteriu que ponen los responsables del blogue ye “ser un apasionáu de la lliteratura y la llectura”.

Enllaz col blogue

Hasta’l 20 de payares ta abiertu’l plazu pa presentar orixinales al premiu ‘Marqués de Sargadelos’, un certame convocáu pola asociación d’amigos d’Antonio Raymundo Ibáñez, Marqués de Sargadelos. Esta ye la sesta edición d’esti concursu de rellatos rellacionaos col patrimoniu cultural d’Os Ozcos y del occidente d’Asturies, costumes, lleendes, refranes, cántigues, dichos, remedios, anécdotas….

Al concursu van poder presentase rellatos n’eonaviegu o en castellán. Na categoría d’adultos, tien de presentase un rellatu de polo menos 100 llínies y los premios son de 250 euros pa un autor llocal y otru tantu pa un autor foriatu. El plazu de presentación finaliza’l 20 de payares y los trabayos han presentase o mandase a Muséu Casa Natal “Marqués de Sargadelos”. Ferreirela de Baxo. Santalla d’Ozcos, 33776, Asturies. Pa cualesquier dulda pue llamase al teléfonu 985 621 295 d’11.30 a 14.00 y de 16.00 a 20.00h.

Páxina web coles bases completes

Esti sábadu pasáu celebróse nel Cementariu de San Salvador d’Uviéu un homenaxe al poeta Xuan María Acebal (1815-1895), organizáu pol Partíu Carlista d’Asturies y onde participaron persones de distintes tendencies polítiques. L’actu celebróse al pie de la so tumba, mui cerca de la de Teodoro Cuesta y nel quíxose rindir homenaxe a la figura del poeta carlista, del que se recordaron datos biográficos llamativos. Javier Cubero, voceru del Partíu Carlista d’Asturies fai balance del actu nel vidiu qu’ufre Asturnews.com

Nel actu intervinieron Inaciu Galán y González, que va lleó dellos versos del poema Cantar y más cantar, consideráu polos estudiosos de la lliteratura asturiana como’l “primer poema nacional asturianu” y tuvo acompañáu pola música del gaiteru Ángel Cuesta Piquero, qu’interpretó ‘La marcha d’Antón’, ‘La marcha procesional de Llanes’ y otres melodíes.

Javier Cubero, y col son de la gaita de fondu, fizo una ufierta floral énte la tumba d’Acebal y peslló l’actu con un discursu nel que recordó momentos del poeta como’l que vivió cuando l’Ayuntamientu d’Uviéu tiró ‘El Carbayón’, l’árbol más célebre de la ciudá, y como Acebal lloraba mientres lu tiraben, dempués d’una llarga campaña a la escontra del valtu del mesmu.

Otru momentu del actu.

Mª Esther García lleva ganando esti añu dellos premios lliterarios bien importantes. Primero foi’l ‘Premiu Uviéu de Poesía’, nel mes de xunetu, el ‘Fernández Lema’ de rellatu curtiu y agora ún de los premios con más tradición, el ‘Xosé Álvarez’ de rellatu curtiu, convocáu pol Centru Asturianu de Madrid, col testu ‘La maestra’ L’autora del occidente ye miembru de l’Academia de la Llingua Asturiana y maestra d’asturianu y anguaño ta preparándose un discu nel que se musiquen los sos poemes y un poemariu tituláu ‘Faraguyes’.

L’accesit del premiu, que lleva’l nome de ‘Xosé León Delestal’, llevólu l’escritor, tamién occidental, Xosé María Rodríguez (Cangas del Narcea, 1956) pol cuentu ‘Semiente’. L’autor reside por motivos llaborales en Madrid y foi unu de los escritores, que xunto a Xosé Álvarez y Alfonsu Velázquez formó l’asociación Conceyu d’Asturies en Madrid. Amás foi ún de los primeros escritores contemporaneos en cultivar el dialectu occidental del asturianu con llibros de rellatos como Nueite de filandón y Xuan Canas. Nial d’alcurdanzas.

El xuráu d’esti ‘Xosé Álvarez’ 2007 tuvo presidíu pol profesor y académicu David M. Rivas, acompañáu pol filólogu Luis Casteleiro, el poeta Xosé Bolado, Manuel Fernández de la Cera, Pablo Xuan Manzano siendo secretaria, con voz pero ensin votu, Pilar Riesco.

Partíu Carlista d’Asturies organiza un homenaxe al poeta Xuan María Acebal nel 174 aniversariu del primer llevantamientu carlista d’Asturies, con un actu nel Cementeriu de San Salvador d’Uvieu. L’eventu va entamara a les 13:00 hores y va cuntar cola presencia d’ Inaciu Galán y González que llerá dellos versos del poema “Cantar y más cantar”, consideráu como’l primer escritu poeticu de calter nacional asturianu.

Acompañando nel recitáu a Inaciu Galán va tar el gaiteru Ángel Cuesta Piquero que va pone-yos música a los versos d’Acebal cola “Marcha d’Antón” y la “Marcha procesional de Llanes”.

“Cuentu de Navidá”, de Charles Dickens, “La tresformación”, de Franz Kafka o “Tres aventures de Sherlock Holmes”, de Arthur Connan Doyle son dalgunes de les noveles que’agospia la esposición “Ello yera una vez… un tiempu de traducciones”. L’amuesa recueye una selección de noveles de la narrativa de toles epoques traducida al asturianu y ta organizada pola Dirección de Promoción Cultural y Política Llingüística del Principáu y pol Ayuntamientu de L.lena.

Según la directira xeneral de Promoción Cultural y Política Llingüística, Consuelo Vega, l’oxetivu de la esposición ye dar a conocer l’importante trabayu de traducción al asturianu que se fexo nos últimos trenta años, con trabayos de tou tipu d’autores dende Lewis Carrol hasta Albert Camus. La directora xeneral tamien señaló la importancia de la lliteratura escrita n’asturianu nel panorama cultural asturianu.

L’alcalde de L.lena, agradeció al Gobiernu d’Asturies qu’escoyera’l conceyu pa esta amuesa y sorrayó que l’ asturianu tien que tar reconocíu como llingua oficial nel nuevu estatutu d’autonomía . “L’asturianu ye un un valor y una riqueza que tamos perdiendo, y polo tanto necesítase l’apoyu de les instituciones; si nun apostamos dende les instituciones esto va a morrer. Nun lo permitamos”, declaró.

La revista dixital de lliteratura ‘Lliteratu.com’ presenta güei un nuevu númberu y yá van once. Nesta edición de Lliteratu úfrese toles convocatories de premios abiertes, como’l Teodoro Cuesta de poesía. Esti númberu inclúi tamién un poema d’Alejandra Sirvent, un rellatu de Ricardo Candás y la triple entrevista ‘Venti preguntes’ a los escritores David Rivas, Susana Sela y Nicolás V. Bardio. Amás, faise un pequeñu homenaxe a la figura de Xosé Antón García, escritor muertu va agora diez años.

Enllaz cola revista dixital de lliteratura ‘Lliteratu.com’

Verónica García Moreno, ganadora de la última edición del premiu “Cálamo” de poesía erótica organizáu pola sociedá cultural Gesto, va presentar el so poemariu “Carne de Dios” a partir de les 20:00 hores nel centru municipal de La Arena en Xixón. Durante l’actu el xuráu tamien va dar a conocer el fallu sobre los finalistas de la edición d’esti añu del premiu.

La sociedá cultural Gesto ye una de les asociaciones culturales con más solera de la ciudá ya que lleva organizando concursos y xeres culturales dende 1963, añu de la so fundación. El premiu “Cálamo” de poesía cumple esti año la so vixesimusegunda edición y ye l’únicu d’esti calter en tol estáu.

El Centru Asturianu de Madrid cellebra esta nueche’l Día de les Lletres Asturianes na so sede con dellos actos. A partir de les 20:00 hores nel Salón Príncipe d’Asturies del Centru va dase a conocer el ganador del VI Concursu de Rellatu Curtiu en llingua asturiana «Xose Álvarez» 2007 y van entregase los diplomes palos escolinos del cursu de llingua asturiana. Na ceremoni tamien se va presentar la edición de la obra ganadora del premiu na pasada edición que nesti casu recayó nel escritor Abel Martínez por “Alicia y la mar”.