Lliteratura

La poeta asturiana Ana Vanessa Guiterrez ye la invitada esti martes na Casa Milà, la popular Pedrera de Gaudí, a les nueches de de poesía y música que organiza la Obra Social de Caixa Cataluña xunto cola Universidá Politecnica de Cataluña. La nueche del martes, empobinada a dar a conocer la poesía celta, va cuntar amás de Vanessa Gutierrez cola galesa Mererid Puw Davies ya l’irlandes Desmond Egan. La música celta tamien va tener espaciu esti martes na Pedrera cola actuación del compositor d’orixen irlandes Ron Kavana.

Vanessa Gutierrez tien espublizaes les obres de poesía “Onde seca l’agua” y “La danza de la yedra” amás de la novela “Les palabres que te mando” y l’ensayu “El país del silenciu” xunto cola autora Beatriz R. Viado.

Con dalgo de retrasu entamó esti sábadu la IV Selmana de la Cultura Astur, en La Baragaña (Candás), qu’organiza’l Grupu de Baille Tradicional San Félix. La presentación del númberu 3 de la revista Formientu pol so director, Inaciu Galán, abrió dos díes nos que’l pueblu de Candás disfrutó de los actos de la IIª Feria del Discu y el Llibru n’Asturianu. Una feria na que se presentaron munches de les novedaes lliteraries y musicales d’esti añu 2007.

Xurde Fernández, que ye de Candás y yera ún de los organizadores d’esti eventu, presentó’l llibru ‘Volver’, espublizáu pola editorial Ámbitu. Y darréu actuó’l grupu Xentiquina pa los neños y a pesar del fríu de la tarde nueche en Carreño. ‘Vía de Serviciu’, el primer llibru de la Editorial Suburbia y el recital de Pablo Texón, Sergio Camblor y Pablo X. Suárez remató’l día xunto a l’actuación del dúu Mestura, qu’anguaño promociona’l discu ‘Agua del norte’. El domingu volvió a cuntar col sofitu de públicu del conceyu.

La escritora xixonesa, con raigaños na fastera eonaviega, Marisa López Diz, acaba d’espublizar el so primer poemariu n’eonaviegu, ‘A terra esqueicida’, que sal col sellu d’Ediciones Trabe. Los sos primeros llibros fueron en llingua asturiana, como “Tiempu de tristura”. Amás pertenez al dúu musical Mestura. López Diz apaez na antoloxía de poesía “Unde letras falan” con testos n’eonaviegu que vieno espublizando nos últimos años nes revistes ‘Lliteratura’ y ‘Lletres Asturianes’.

Entregaos el ‘Fernán-Coronas’ de poesía, los Premios de l’Academia de la Llingua Asturiana, el ‘Fernández Lema’ de rellatu o los nuevos premios ‘Ciudá d’Uviéu’, queden tovía por conocer los ganadores de premios tan importantes como’l ‘Xosefa Xovellanos’ de novela, el ‘Xuan María Acebal’ de poesía o’l nuevu premiu de lliteratura infantil y xuvenil, el Premiu ‘Asturnews’. Los premios convocaos pol Principáu tienen de conocese esta selmana, depués de que se xunten tolos xuraos de caún de los premios.

El premiu Xosefa Xovellanos de novela llega con ésta a la so XXVII edición y a él podíen presentase obres inédites y sin premiar n’otros concursos, escrites en llingua asturiana y con una estensión mínima de setenta y cinco fueyes. Ta dotáu con 6.000 euros. El premiu Xuan M.ª Acebal algama la XIII edición y tá empobináu a premiar poemarios con una estensión mínima de quinientos versos. La so dotación ye tamién de 6.000 euros. El premiu Enriqueta González Rubín de periodismu celebra esti añu la so V edición.

Ediciones Suburbia ta acabante de poner nes llibreríes un llibru nuevu de Pablo Rodríguez Medina (L’Entregu 1978), ún de los escritores asturianos más reconocíos, autor de delles obres tanto en llingua asturiana como en castellán y que ta acabante de volver a ganar el Premiu de Cuentos Curtios ‘El Garrapiellu’. El llibru, ‘Perreríes’ axunta per primer vegada nueve de los cuentos más premiaos de Pablo Rodríguez Medina correxíos y prologaos pol propiu autor.

Los rellatos abarquen un ampliu campu temáticu, desde la fantasía sucia de Perreríes hasta’l puru costumismu en cuentos como El Plan (Friends forever). En pallabres del propiu autor: “Quien llea esti volume decataráse de que de fondu tolos cuentos tienen una mesma actitú: la de que’l llabor d’escritor sigue siendo, n’esencia, dar testimoniu de sigo y d’una época –bona o mala–, la que mos toca en suerte vivir. Y facelo de la manera más guapa posible: y non siempre lo guapo ye lo bucólico”.

Rodríguez Medina foi ganador nel añu 2001 del premiu Xosefa Xovellanos de novela con L’arna de San Atanás, y del Asturies Xoven de poesía con Los desconocedores del agua. De la so obra en astrianu tamién destaquen Los paraísos perdíos (2000) Nun blinquen ayalgues (2003) y les noveles Les vueltes toles vueltes (2002) y Los taraos. Tien dellos llibros de poesía ( El color de l’ausencia, Nel dialectu del grisú, Tiempu d’esiliu y povisa ayeno). En teatru ganó’l Asturies Xoven con Martema. Historia de una guerra, retratu d’unes culpes y el premiu de tratru de l’Academia de la Llingua Asturiana con Orbaya. Amás collabora de revistes como Lliteratura, Lletres Asturianes, Formientu…

El Grupu de Baille Tradicional San Félix organiza esta fin de selmana la IV Selmana de la Cultura Astur, en La Baragaña (Candás). L’actu va cuntar con un amagüestu popular y la II Feria del Discu y el Llibru n’Asturianu. Nesta feria van presentase munches de les novedaes lliteraries y musicales d’esti añu 2007. El primeru d’estos actos, el sábadu a les seis de la tarde, cola presentación del númberu 3 de Formientu.

El sábadu a les seis de la tarde va entamar esta II Feria del Discu y del Llibru n’Asturianu cola presentación del númberu trés de la revista lliteraria Formientu, que ta dedicada a la lliteratura erótica de los escritores más mozos. Media hora más tarde Xurde Fernández va presentar el llibru Volver, espublizáu pola editorial Ámbitu. A les siete va acutar el grupu Xentiquina pa los neños del conceyu.

A les ocho la tarde va presentase Vía de Serviciu, el primer llibru de la Editorial Suburbia y a les ocho y media, Pablo Texón, Sergio Camblor y Pablo X. Suárez van facer un llectura de poemes. A les nueve la nueche va pesllase’l día cola actuación del dúu Mestura, qu’anguaño promociona’l discu ‘Agua del norte’.

Yá’l domingu, a les seis menos cuartu, repite Mestura, pero esta vegada pa los neños, cola actuación y los ‘Poemes de carambelu’ de Marisa y Luis. A les seis y media preséntase la revista Remanecer, que llega yá al so segundu númberu. A les siete, Alberto Álvarez Peña presenta la Guía de la Mitoloxía Asturiana, de la Editorial CH. Los actos de pieslle d’esta IV Feria va centrala la presentación del tercer númberu de la revista ‘El Cuirno’ a les siete y media y un conciertu de música tradicional a les ocho la nueche. Dos díes nos que Candás va convertise na capital de la música y la lliteratura n’asturianu.

El Premiu Uviéu de Narrativa va ser el de mayor dotación, con 7.500 euros, de tolos que se convoquen añalmente en llingua asturiana sigún dió anuncia esti xueves el conceyal de cultura del AYuntamientu d’Uviéu, José Suárez Arias-Cachero nel actu d’inauguración de la esposición “La lliteratura n’asturianu”, que va tar disponible al públicu nel Cafe Español d’Uviéu (Cimavilla, s/n) hasta’l 30 de payares.

Na inauguración de la exposición que fai un repasu pola hestoria de la edición en llingua asturiana, José Suárez Arias Cachero aprovechó pa promete-y a l’Academia de la llingua asturiana’l so enfotu por espadir la presencia normal de l’asturianu nes actividaes de la conceyalía que preside y dió anuncia de que los Premios Uviéu diben convertise na referencia de los concursos lliterarios n’asturianu con esa dotación de 7500 euros pal premiu de narrativa y de 4000 pa los de teatru y poesía.

El xuráu del primer Premiu Uviéu de Poesía escoyó’l poemariu de la escritora Mª Esther García López, «Pisadas», escritu n’asturianu occidental, como’l ganador d’ente los 14 que se presentaren a esti al concursu convocáu pol Ayuntamientu d’Uviéu y que se fallaba esti mes de mayu. Na categoría de relatu curtiu, a la que se presentaron ocho textos, el ganador foi Albel Martínez González por «L’aventura de Minho».

Pela so parte, el Premiu Uviéu de Textos Teatrales foi’l que contó con más participación, escoyéndose ente 28 obres presentaes la de Lluís Portal Hevia “O36”. Esta obra de Lluis Portal va ser representada pola compañía ganadora de l’Amuesa de Teatru Amateur organizada pol Conceyu d’Uviéu.

Los premios Uviéu de lliteratura n’asturianu taben dotaos l’añu pasáu con 3.000 euros por categoría y la publicación de les obres y esti añu van ampliase hasta los 7500 euros pala narrativa y 4.000 respeutivamente pala poesía y los textos teatrales.

El segundu Congresu Internacional de Lliteratura Asturiana (CILLA) que ta cellebrando estos díes l’Academia de la Llingua nen campus del Milán d’Uvieu echa esti xueves el pieslle cola cellebración de la última xornada. Amás de conferencies esta sesión cabera va finar cola inauguración, a les 20:00 hores, de la esposición “La lliteratura n’asturianu”, que va tar disponible al públicu nel Cafe Español d’Uvieu (Cimavilla, s/n) hasta’l 30 de payares.

La mañana nel CILLA va acoyer la presencia de Marta Fernández Morales de la Universidá de les Illes Balears que falará, dende les 09:30, sobre lliteratura n’asturianu y catalán y l’escritor Xose Lluis Campal que va pronunciar la conferencia “Lliteratura asturiana y prensa decimonónica. Xenealogía d’una recepción”. Tres del descansu les xeres del congresu siguen con un ponencia de Jaime Subirats alredor de la poesía de Berta Piñán y María-Merce Marçal y una conferencia de la propia Berta Piñán sobre’l trabayu de les muyeres na poesía asturiana contemporanea.

Pela tarde Mº Cristina Valdes y Helena Trejo abordarán el campu de la traduicción, Xose Ramón Iglesias Cueva intervendrá con “La Xudí” (1770). Reaiciones crítiques”, Montserrat Machicado falará de la epoca barroca asturiana, Marta Mori sobre la narrativa asturiana d’anguaño, Laura Marcos va facer un analísis de la obra de Xandru Fernández, Aurora García intervendrá con “A augua, elemento vital e recurrente na poesía d’agora mesmo en galego-asturiano. Unha ollada poetica” y Ramiro González abordará’l tema “Llíricos griegos arcaicos en llingua asturiana”.

Dempues de la xornada de conferecies el Congresu Internacional de Lliteratura Asturiana va cellebrar la última de les meses redondes que se viene faciendo durante estos tres días nesta ocasión p’aldericar sobre la producción teatral n’asturianu d’anguaño. Na charla van intervenir el dramaturgu Chechu García, el director Roberto Corte y l’escritor Ramón Lluís Bande.

La poetisa asturiana Violeta Suárez González va presentar “Fotopoemas desnudos/Canciosemeyes esnúes”, el so últimu llibru de poemes, el prósimu xueves na Casa Conceyu de Xixón a les 19:00 hores. Durante la presentación dellos escolinos de la Escuela Pública Clarín de Mieres y del Institutu de La Camocha de Xixón van recitar una esbilla de poemes pertenecientes a esti poemariu.

Amás la escritora va aprovechar l’actu pa homenaxear al so profesor de lliteratura, Miguel Ramos Corrada: autor de la Historia de la Literatura Asturiana, profesor, investigador y vicepresidente de la Academia de la Llingua Asturiana que tará presente. Confirmaren la so asistencia tamien al eventu’l conceyal de Cultura de Xixón, Jesús Montes Estrada; Carmen Rúa, asesora del Tercer Teniente d’Alcalde de la ciudá; y Roberto Colunga, responsable de Cultura Tradicional y Llingua Asturiana.

Violeta Suárez González, anatural de Turón y vecina de Xixón cunta ente otres obres con: “Poemario de Sueño, amor y muerte”, “C@ncios nes semeyes” y “Paisajes y momentos bajo una luz violeta”.

Entama en Xixón, el V Festival de Cuentos pa un mundiu posible entama güei xueves con delles sesiones nocherniegues que van durar hasta’l sábadu 10 d’esti mes. Los actos van desenrrollase en dellos espacios de la ciudá de Xixón.

Nel Muséu Barjola, asitiada na cai Trinidá 17, va celebrase’l primer cuentacuentos güei xueves a les ocho la tarde con Anselmo Herrero y Yoshi Hioki. Darréu, esti últimu va tar nel Café Trisquel a les 22:30 . Yá pal vienres, a les nueve menos venti la nueche van ser Félix Albo y Maricuela los encargaos d’esta sesión nel Barjola. Y Félix Albo nel Centru Municipal Integráu d’El Llano a les once la nueche.

El vienres a les diez y media la nueche, nel Café Dam, torna Yoshi Hioki y el sábadu van tar Yoshi Hioki, Anselmo Herrero, Maricuela y Félix Albo nel Muséu Barjola.