Lliteratura

El fancín cultural ‘El Espinete’ llega al so númberu dieceséis col númberu d’esti mes de payares. Esta revista lleva editándose camín de seis años dende’l pueblu d’El Espín, en Navia, y tien por llingües vehiculares el gallego-asturianu y el castellán, asoleyando la obra d’autores n’eonaviegu, asturianu o castellán, según-y pete al mesmu.

Esti númberu nueve recueye poemes en castellán de Randy Montero, Carlos G. Torrico, Javier Flores, Ikas, Pedro Gilthoniel, Xurde P. Lejarza, Marcos A. Quirós Fernández y Barry, xunto al testu en gallegu asturianu ‘Oficialidá’, de Moisés Cima Fernández y el poema n’asturianu ‘Yá sé que non’, d’Inaciu Galán y González. Los exemplares puen recoyese de baldre nes biblioteques d’Ortigueira y Navia, amás d’en dalgunos otros llugares del occidente y del centru d’Asturies.

Esti númberu nuevu cuenta con ocho páxines y sigue, como ye vezu na publicación, el diseñu clásicu de los fancines. N’El Espinete tienen collaborao escritores y artistes d’orixe mui estremáu, cuntando nesta entrega con autores dende Chile, Galicia, Alemaña y dellos conceyos asturianos, como Xixón, Navia o Cuaña.

Páxina web d’El Espinete

Alborá Llibros, en Xixón, foi la llibrería escoyida pola editorial VTP y pola Tertulia Cultural ‘El Garrapiellu’ pa presentar la so tercer antoloxía de cuentos curtios, onde s’axunten los cuentos premiaos y los accésit de los últimos cinco años del Concursu de Cuentos Curtios n’Asturianu qu’entama esa asociación. La llibrería cuntó cola presencia d’una importante representación de persones de la cultura asturiana y de la sociedá xixonesa.

L’actu tuvo presidíu por Chema Vega d’El Garrapiellu y por Ánxel Nava, ilustrador del llibru, qu’aprovechó pa facer una “pefomance” col so personaxe ‘Mariquina Galana’. Los rellatos que s’inclúin nel volume son «El mercaderu» (Constantino Álvarez Delgado), «Pretéritu imperfectu» (Pablo Texón Castañón), «Les fíes de Miguel Xuan» (Quique Faes Díaz), «Paco depués del trauma» (Quique Faes Díaz), «De penalti» (Pablo Rodríguez Medina), «Sedna» (Iris Díaz Trancho), «Ente l’agua» (Pablo Texón Castañón), «Les tardes del tesoru», d’Héctor Pérez Iglesias, «El cementeriu de Lechatnoir» (Pablo Rodríguez Alonso) y «El plan (Friends forever)» (Pablo Rodríguez Medina).

L’escritor aragonés Ángel Guinda va ser el convidáu d’honor d’esta segunda edición de la Xunta d’Escritores Asturianos que tendrá llugar n’Uviéu na Biblioteca del Campu San Francisco los díes 2 ,3 y 4 de xineru del 2008 col lema de Lliteratura asturiana y compromisu y embaxo la coordinación de Xaviel Vilareyo. Ángel Guinda ñació en Zaragoza el 26 d’agostu de 1948. Dende 1987 reside en Madrid. Reivindica “una poesía comprometida que seya non sólo obxetu de guapura sinón tamién suxetu de conducta, una poesía que-y sirva al ser humanu: moralmente pa vivir; estéticamente pa gozar; y culturalmente pa enanchar y afitar el so saber”.

La so obra ta marcada por un realismu esistencial. La so vida y poética podemos sacales d’una selección de los sos aforismos referíos al poeta y a la poesía: “La poesía sirve al individu y a la comunidá como mediu propagandísticu de guapura, verdá y llibertá”, “Ser poeta nun ye una profesión. Ser poeta ye una posesión”, “Escribir como se vive”, “Escribir como se ye”, “Espresase ye vivir”, “La poesía sirve, la poesía ye”, “La poesía ye palabra ensin apenas palabres”, “Poesía: conciencia con ciencia”, “El poeta ta siempre en contra, alcontrándose frente a y cola contradicción”, “Menos divos, más poetes suversivos”. En 1977 fundó la colección Puyal de llibros de poesía, y en 1988 la revista Malvís.

Nos suplementos lliterarios de los periódicos Heraldo de Aragón, El Día, El Periódico de Aragón y en delles revistes (Turia, Cuadernos del Matemático, Poesía Por Ejemplo, Los Cuadernos del Norte …) publicó crítica en cientos d’artículos sobre los autores clásicos y contemporáneos. La obra d’Ángel Guinda ta marcada poles principales consideraciones de la so propia poética: “La palabra ye un ser vivu”, y “Escribo contra la realidá, non sobre ella”. Tamos ante una poesía útil, espresionista, torturada, grave y fonda. Una poesía fía de la rebeldía y del más llúcidu pesimismu; vitalista pesie a ser un testimoniu de la convivencia del ser humanu cola muerte. Nel añu 2006 llevó alantre una fuelga de fame pa reivindiar la reconocencia d’unos compromisos culturales irrenunciables.

Malditu pa unos, exemplar pa otros. La so gueyada filosófica, el so llinguaxe depuráu, l’estrictu dramatismu, lleváronlu a esa llende na que limita la poesía col puru silenciu y a consideralu por un sector de la crítica como “unu de los poetes más necesarios y reveladores que dio la lliteratura ibérica d’estes caberes décades. Defensor de toles llingües ibériques en perfecta harmonía publicó hai poco el pimer poemariu sextillingüe del Estáu español, (Tola lluz del mundu) incluyendo nél a les llingües asturiana y aragonesa.

Güei, xueves 15 de payares, va presentase na Casa la Cultura de L’Entregu, un llibru de Xuan Carlos Crespos “Lías, aprendiz de contador d’histores”, dientro de les VII Xornaes de Lliteratura Infantil y Xuvenil qu’organiza l’Ayuntamientu de Samartín del Rei Aurelio.

L’actu va ser a les siete y media la tarde y van partcipar, xunto al autor, Genma Suárez Torre, conceyala de cultura, y l’escritor Pablo Rodríguez Medina.

Alborá Llibros, en Xixón, va ser l’espaciu nel qu’esta tarde, p’hacia les siete y media, va celebrase la presentación de la Tercer Antoloxía de Cuentos Curtios premiaos pola Tertulia Cultural El Garrapielu. Un llibru que recueye los cuentos premiaos nos últimos cinco años.

Na presentación van tar los responsables de l’asociación y l’editor Milio Rodríguez Cueto, d’Ediciones VTP, qu’edita esta antoloxía. Amás, va entregase’l premiu d’esti añu, que recayó en Pablo Rodríguez Medina, con un accésit pa Sidoro Villa, polos cuentos ‘Graziella con zeda’ y ‘Escuridá’, respectivamente.

Esti sábadu entregáronse en L.luarca los premios del Certame de Poesía “Nené Losada Rico”, un concursu que premia obres n’asturianu y en castellanu. Esti certame convócalu dende va cinco años l’asociación de muyeres Valdés Siglo XXI y lleva’l nome de la poeta de l.luarca ganadora del Premiu Timón.

El premiu n’asturianu foi pal autor Rubén d’Areñes, conocíu por ganar esti mesmu añu’l I Concursu de microrrellatos convocáu pola Asociación de Vecinos El Hórreo del Carbayedo y poles sos collaboraciones en revistes como Formientu o Lletres Asturianes.

Rubén d’Areñes recibe güei’l primer premiu del Concursu de Microrrellatos d’Avilés

La IV Edición de Premiu de Periodismu en llingua asturiana “Enriqueta González Rubín” ya tien ganador que nun ye otru que l’avilesín Miguel Solís Santos. La Conseyería de Cultura reconoció con esti premiu, dotáu con 3000 euros, la llabor del escritor pol so artículu “La hemocianina de les andariques y el sangre del ciudadanu Capeto” espublizáu nel diariu “La Nueva España”el 15 de payares de 2005.

Solís Santos cunta con una amplia producción novelística n’asturianu de la que destaquen trabayos como “Les Llamuergues Doraes”, “El Trunfu Prietu”, “‘Los Falapios del Xigante” o l’ensayu “La Memoria de les dos Orielles”. Tamien ye collaborador en dellos periódicos y pintor, illustrador y cartelista.

Nun nuevu artículu n’AsturnewsOpinión, l’escritor y políticu Humberto González reabre una vieya iniciativa, la propuesta de creación d’una d’un Institutu del Llibru Asturianu. Una iniciativa que recuerda entamó a mover nel añu 1993 de la mano de l’Asociación d’Escritores en Llingua Asturiana. Amás l’autor recuerda’l momentu nel que “consiguimos l’apoyu catalán al nuestru ingresu en Galeuska”.

Nel artículu, Gonzali recuerda amás que “nun pudimos anotanos el tantu de contar cola figura d’un Manuel Rivas o un Atxaga que sirviera pa entainar el conocimientu fuera d’Asturies del nuestru mundu lliterariu”. Pa solucionar toles torgues que vien viviendo la nuesa lliteratura Gonzali diz “Necesitamos una Institución de les Lletres Asturianes que sía una entidá alministrativa, venceyada al Principáu d’Asturies, que gocie de personalidá xurídica y de patrimoniu propiu”.

Artículu d’Humberto Gonzali n’AsturnewsOpinión

Marisa López Diz, escritora ñacida en Xixón peró con orixe en Grandas de Salime, vieno acabante ganar la XVII edición del “Premio Xeira de narracióis curtias en gallego-asturiano” col rellatu “A fiya del xastre”. López Diz va llevar un premiu de 500 euros y y tien detrás una importante carrera lliteraria, desendolcada sobre manera n’asturianu con títulos como “Tiempu de tristura” y “Poemes de carambelu”.

El Premiu Xeira ñació nel añu 1991 de la mano de l’asociación cultural Xeira pa promover la creación lliteraria de la realidá llingüística del Eo-Navia. Fueron ganadores dalgunos nomes bien conocíos como l’académicu d’honor de l’ALLA Manuel García-Galano, Alejandro Antúñez, Fredo de Carbexe, Rafael Cascudo, M.ª José Fraga, Xaviel Vilareyo o Aurora García Riva.

Marisa López Diz saca’l so primer poemariu n’eonaviegu

La editorial asturtOOns, dientro de la so coleición Llingua de Trasgu, ta acabante presentar los nuevos trabayos de dos autores, Miguel Rojo Martínez con ‘Pepu’l Pastor’ y Enrique Carballeira cola narración ‘Pol, un perru Real’. La presentación de los llibros, ilustraos por Carballeira, tuvo llugar estos díes nes Xornaes de Lliteratura Infantil en Llingua Asturiana, celebraes en L’Infiestu, conceyu de Piloña.

Na presentación, que tuvo llugar na Casa de Cultura Marqués de Vistalegre de la capital piloñesa, los dos autores tuvieron acompañaos pol alcalde del conceyu, Camilo Montes. Nel actu, los presentes tuvieron la oportunidá de ver proyectaos en pantalla grande, dalgunos de los dibuxos d’estos volúmenes.

‘Pepu’l pastor’ ye una historia enllena d’humor onde un rebañu d’oveyes sufren l’engañu del ‘Bichón del Monte’, artista de la gaita que resulta ser, a la fin, un vieyu conocíu.

‘Pol, un perru Real’ tamién ye una narración con abondes notes humorístiques, sobre les aventures del perru del Rei, nun país perlloñe. La vida en castiellu sería munchu más difícil si nun fuera pol llistu animal.