Lliteratura

L’escritor Jesús Palacios va presentar esti vienres 30 de payares el so últimu llibru tituláu “Juegos mortales: Katanas, mentiras y cintas de vídeo” na llibreri Central de Xixón (calle San Bernardo, 31) a les 17:30 hores.

L’actu pertenez al programa de xeres del 45º Festival Internacional de Cine de Xixón.

Jesús Palacios, ye escritor y críticu de cine especializado en revistes como 2000 Maníacos, Fotogramas, Que Leer, El Cultural o la Guía del Ocio. Amás collaboró en programes de televisión como Crónicas Marcianas. Ente les sos publicaciones tan títulos como “Planteta zombie”, “Satán en Hollywoood”, “Psychokillers”, “Anatomía del asesino en serie” o “Los ricos tambien Matan”.

Formientu “revista de lliteratura mui moza” ye una revista lliteraria que busca espublizar la obra de los autores más mozos de la lliteratura asturiana y dala a conocer. Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño.

Alredor de la revista Formientu, Xareos! vieno organizando nos últimos meses recitales, presentaciones y alderiques en munchos de los conceyos d’Asturies, destacando la participación d’esta revista nos actos de la XXVIII Selmana de les Lletres Asturianes, en 2007, pa la que s’espublizó un númberu especial dedicáu a la narrativa más moza.

Con trés númberos al llombu, la revista quier celebrar el so primer añu nes llibreríes con un actu nel que van poder sentise les voces de dellos de los autores que participaron na publicación nesti primer añu, cerca de 40 autores ñacíos toos ellos del añu 1975 n’adelantre.

Nel actu va presentase amás, la web, que quier abrir agora una etapa nueva, convirtiéndose n’espeyu de toles iniciatives de l’Asociación Xareos!, un altavoz pa les noticies de la lliteratura más moza y amás, un llugar pa la promoción de los autores qu’apaecen na revista Formientu y de les actividaes que lleven alantre.

L’actu va entamar a partir de les 19:30 na Llibrería Alborá Llibros de Xixón. Dempués del actu, que ye de llibre asistencia, va celebrase un pinchéu na propia Llibrería Alborá, asitiada na Plaza Romualdo Alvargonzález 5, xunto al Centru Comercial San Agustín. A dambes celebraciones, los organizadores conviden a toles persones que quieran averase y conocer lo que ta dando de sí la lliteratura más moza y falar colos autores de la revista.

La poeta Sofía Castañón, ganadora del premiu Asturies Xoven de poesía pol so llibru de debú “Animales interiores” va participar nuna nueva velada de les que organiza davezu la vinoteca La Venera, asitiada na centrica cai de Fray Ceferino n’Uvieu. La entrada como vien siendo habitual nesti tupu d’eventos ye de baldre. Sofía Castañón ye amás de poeta, cineasta. Ente la so obra tan dos documentales sobre Lilián de Celis y Corín Tellado ya’l montaxe “El desafio”, ganador na pasada edición del Premiu Astragal, nel que entemecía poesía col ambiente del boxeu.

L’articulista y escritor Mnuel Vicent visita esta tarde Uvieu dientro de los actos de cellebración organizaos pol cuartu centenariu de la Universidá d’Uvieu, pa ufrir una conferencia embaxo’l titulu “Memoria literaria“. L’actu col escritor va tener llugar nel Aula Magna del Edificiu Hestóricu de la Universidá a partir de les 18:30 hores. L’asistencia a la conferencia ye llibre.

Manuel Vicent, levantín, ye un de los articulistes más ponderaos del periodismu español gracies, sobre manera, a la so llabor nes páxines de “El País”. Como periodista tambien tien espublizaos testos nel estintu Diario Madrid y na revista Hermano Lobo. Ente la so obra como escritor destaquen obres como “Tranvía a la Malvarrosa” y “Son de mar”, adaptaes con esitu al cine o”Balada de Caín”, ganadora del Premiu Nadal. Vicent tamien fui’l ganador en 1994 del Premiu Francisco Cerecedo de Periodismu que vien otorgando l’Asociación de Periodistes Europeos n’España dende 1983.

L’escritor Pablo Marín Estrada ganó la XIII Edición del premiu con un dotación más importante d’ente los que galardonen poemarios en llingua asturiana, el Xuan María Acebal, que concede la Conseyería de Cultura y Turismu y pol que va llevase 7.000 euros. Al concursu presentáronse esti añu un total de 15 obres.

Marín Estrada, ñació en Sama, conceyu de Llangréu, en 1966 y tiene una llarga trayectoria como poeta, narrador, autor de llibros infantiles y otres xeres lliteraries. En 1997, con “La ciudá encarnada”, ganó, ex aequo col escritor Antón García, el Premiu Xosefa Xovellanos de novela.

El xuráu tuvo tuvo presidíu pola directora de Promoción Cultural y Política Llingüística, Consuelo Vega Díaz, y formáu por Humberto Gonzali, Miguel Ramos Corrada, Leopoldo Sánchez Torre, Penélope Miranda, Marisa López y María Antonia Pedregal.

Cola filtración d’esta noticia yá se conocen esti añu tolos premios otorgaos pol Gobiernu d’Asturies pa la creación en llingua asturiana. Esti añu quedaron ermos el Fuertes Acevedo d’Ensayu y el Xosefa Xovellanos de Novela, llevando Miguel Solís Santos l’Enriqueta González Rubín de Periodismu por un artículu espublizáu en La Nueva España.

L’escritor de Tinéu, responsable hasta va bien poco de la editorial Trabe, ta acabante de sacar al mercáu un llibru frutu del so bayurosu trabayu alredor de la edición crítica de la obra de dellos autores a lo llargo de les últimes décades. El llibru, “Xeneraciones y dexeneraciones [sobre lliteratura asturiana]” ye’l primer volume de dos y estudia a dellos autores dende’l tiempu d’Antón de Marirreguera a Fernán-Coronas.

Un llibru que según cuenta l’autor “ye ún de los últimos deberes que-y dexé fechos al nuevu responsable de Trabe”. Un llibru pensáu pa quien quiera afondar na obra de los autores estudiaos o p’averase a la lliteratura clásica asturiana conociendo qué tien de bono y qué de malo.

El volume inclúi un “Propuesta de periodización de la lliteratura asturiana” y artículos alredor de la obra de Xosé Caveda y Nava, Xuan María Acebal, Manuel Fernández de Castro, Marcos del Torniello y el Padre Galo, amás d’otros como “La lliteratura secreta”, “El sieglu XVIII”, “El sieglu XIX. Apuntes pal estudiu de la lliteratura asturiana”, “El cuentu asturianu (1860-1939)” y “El rexonalismu asturianu y la lliteratura”, ente otros.

Antón García va falar de “Xeneraciones y dexeneraciones” mañana sábadu na Cadena Ser

L’Academia de la Llingua Asturiana ta distribuyendo estes selmanes peles llibreríes del país el númberu 96 del so boletín ‘Lletres Asturianes’, un númberu que s’abre con una valoración de les elecciones atutonómiques no que cinca a la política llingüística y qu’inclúi los apartaos de davezu: Trabayos d’investigación, Materiales d’etnografía, Materiales d’hestoria, Faza lliteraria y Notes y anuncies.

La faza de Trabayos d’Investigación ábrela Aurélia Merlan con “Las variedades lingüísticas del noroeste peninsular: convergencias y divergencias” ya inclúi tamién los artículos “La poética les esqueles” d’Aurelio González Ovies, “Contribución al refraneru de la parroquia de Podes (Gozón)” de Xurde Fernández Fernández, “Supraterritorialidad de las lenguas y perímetros lingüísticos” de Leopoldo Tolivar Alas y una “Edición filolóxica de los documentos del sieglu XII del Monesteriu de Santa Mª de la Vega d’Uviéu, conservaos nel real Monesteriu de San Pelayo d’Uviéu” de Jesús Menéndez.

Nos Materiales d’etnografía preséntase l’artículu “La tradición de la escanda en dellos l.lugares del Val.le’l Güerna: historia, costumes y vocabulariu” de Paula Pulgar Alves y na de Materiales d’hestoria apaez l’artículu “Toponimia y paisaje rural en la parroquia de Santiagu d’Aces (Candamu – Asturies). Reconstrucción histórica desde la toponimia y la arqueología espacial” d’Andrea M. Miranda y Juan Ignacio Santos.

El boletín inclúi amás una Faza lliteria con dos partes, una dedicada a les Lletres Nueves, con una torna de Paquita Suárez sobre un testu de la escritora cubana Sonia Rivera-Valdés, y otra dedicada a les Lletres Vieyes, onde Xosé Lluís Campal recupera dos poemes de los años caberos del sieglu XIX asoleyaos nel so día nel periódicu “El Oriente de Asturias”.

Lletres Asturianes 96 piésllase cola estaya de Notes y anuncies, qu’inclúi’l discursu de la nueva acádemica Marta Mori y de la presidenta de l’ALLA, Ana Cano, lleíos el XXVIII Día de les Lletres Asturianes nel Teatru Campoamor d’Uviéu. Amás, apaez un poema reivindicativu del personaxe de Mariquina la Galana y delles noticies d’importancia sobre la llingua y la lliteratura asturianes, como los Premiaos de los Concursos de l’Academia de la Llingua Asturiana d’esti añu o la convocatoria de dellos concursos lliterarios.

Esti númberu 96 inclúi tamién un testu na alcordanza de la escritora lleonesa en llingua asturiana Eva González González, un sumariu con tolo espublizao n’asturianu nesti añu y delles reseñes de llibros de filoloxía del profesor Xosé Lluis García Arias.

Páxina web de l’Academia de la Llingua Asturiana

El xuráu del Premiu d’Ensayu Máximo Fuertes Acevedo declaró esta selmana ermu’l premiu, siguiendo’l camín que ya entamara la selmana pasada’l xuráu del Premiu de Novela Xosefa Xovellanos. D’ente los premios qu’entama la Conseyería de Cultura y Turismu del Principáu d’Asturies, namás queda por conocese’l fallu del Xuan María Acebal de poesía n’asturianu, que l’añu pasáu quedó ermu.

El Premiu Máximo Fuertes Acevedo foi creáu pa promocionar el xéneru ensayísticu en llingua asturiana y nun se convocaba dende 2002, colo que la declaración d’ermu por parte del xuráu nun fai den´gún favor a una estaya pernecesaria pal desendolque de la normalización intelectual de la llingua. Nesta edición presentáronse tres obres que, según el xuráu, nun axuntaben toles condiciones de calidá mínimes pa facese col gallardón. Sicasí, nel fallu insistióse na conveniencia de que’l premiu siga convocándose pola so importancia pa la normalización del usu escritu del asturianu. Amás, pa dellos miembros del xuráu, el fechu de que llevare cinco años ensin convocase pudo influir na poca participación.

Güei, xueves 22 de payares, a les siete y media la tarde, va presentase na Casa Cultura de L’Entregu la novela xuvenil “La islla del dios foscu” de Jean Françoise Ménard nun torna d’Anselmo Orviz y Severino Antuña. La novela ta editada dientro de la colección Monteserín, de la editorial Trabe.

La presentación ta dientro de les VI Xornaes sobre Lliteratura Infantil y Xuvenil y van intervenir Vicente Rodríguez Hevia, la conceyala de cultura Gemma Suárez Torrez y el traductor de la obra, Severino Antuña.

El vienres pasáu, a la una la tarde, aconceyó’l xuráu del XXVIII Premiu Xosefa Xovellanos de Novela pa valorar les dos úniques noveles presentaes al concursu y, depués de cuasi dos hores y media de deliveración, llegaron al alcuerdu de que nenguna de les dos obres presentaes nun teníen “méritos abondo” pa llevar el premiu.

Esti ye’l segundu de los premios del Gobiernu d’Asturies de los que se filtra esti añu’l resultáu, dempués de conocese que’l ‘Enriqueta González Rubín de Periodismu’ foi a parar esti añu a manes del escritor Miguel Solís Santos.