Lliteratura

Dende ayeri xueves y hasta’l 9 d’avientu ta cellebrándose n’Uvieu el I Congresu Nacional que organiza l’Asociación d’Escritores Noveles (AEN). L’alcuentru va tar presidíu durante tol fin de selmana pol escritor Jose Saramago y na programación pa estos díes inclúyense conferencies, alderiques, talleres lliterarios y presentaciones de llibros.

Organizen l’eventu, que se cellebra nel Auditoriu Prícipe Felipe, xunto cola l’Asociación d’Escritores Noveles. el Ministeriu de Cultura, el Plan de Fomentu de la Llectura, el Conceyu d’Uvieu, l’Auditoriu Príncipe Felipe, Ediciones Letra Clara y Cedro.

Sigue abiertu’l plazu, hasta’l día 31 de xineru de 2008, de los premios convocaos pola Conceyalía de Cultura del Conceyu d’Uviéu na so segunda edición. Los Premios Uviéu de Narrativa, Teatru y Poesía. El concursu ta abiertu a toles persones interesaes, siempre que les obres presentaes sían orixinales ensin asoleyar y tean escrites en llingua asturiana.

Los premios de Poesía y Teatru tienen una dotación económica de cuatro mil euros caún, xubiendo’l premiu de Narrativa a los siete mil quinientos euros, la mayor dotación pa un premiu de narrativa n’asturianu. Amás del premiu en metálico, el Conceyu d’Uviéu va editar les obres premiaes de narrativa y poesía y afalar Ia estrena de la obra de teatru. Les bases completes puen consultase en www.ayto-oviedo.es

El xutáu de la Cuarta Edición del Concursu de Microrrellatos Mineros “Manuel Nevado Madrid”, formáu por Benigno Delmiro Coto com presidente, Juventino Montes, Laudelino Vázquez, Alejandro Álvarez, Elizabet Felgueroso y Benjamín Gutiérrez Huerta., como coordinador técnicu esti últimu, decidieron los premios va unes selmanes, agora faise públicu’l premiu a Félix Fernández Rodríguez por “Día ún” pa la estaya d’asturianu y a José Quesada Moreno na estaya de castellán por “Última noche”.

El xuráu decidió tamién otros premios, como les Menciones Especiales n’Asturianu pa “Na cuarta” d’Adolfo Camilo Díaz, “Maestru” de Carlos Javier Blanco Martín y “A lo menos, ta mañana” de Xana Reyes Fernández, una autora bien moza, ñacida n’Avilés en 1980 y miembru de les Xuventúes Comunistes d’Asturies.

L’Accésit Xoven, pa menores de 26 años, foi pa “Arañas polvorientas”, de Gerardo Fernández Bustos y fízose una Mención Especial Xoven pa “Él yera ún d’ellos” de Celia Fernández Loredo.

L’Accésit Testimoniu Hestóricu foi pa “Corría el invierno de 1888”, del que ye autora Meritxell Coello Tortajada, amás faise mención especial nel acta a “Once rosas” de José Manuel Regal García.

A obres en castellán, ficiéronse Menciones Especiales a “Por vía de instancia, Almadén, 10 de diciembre de 1761” de José María Menéndez Martínez, “La pesca del “Menaswan” d’Adolfo Camilo Díaz, “Quédate con nosotros” de José Luís Argüelles Argüelles y “Sociedad anónima” d’Álvaro Maceda Arranz.

Acta del xuráu

La figura del escritor mierense afincáu en Xixón, Victor Alperi va central la xornada lliteraria na llibrería Cervantes d’Uvieu (Cai Doctor Casal, 9), cola presentación de dos obras: el llibru “España, un corazón desnudo” del propiu Alperi y “Un espíritu literario. Vida y obra de Víctor Alperi” del periodista Victor Guillot sobre la obra del primeru. L’actu va escomenzar a les 19:30 hores y nelli van participar los autores, el periodista Carlos Cuesta ya’l profesor Alejandro Fernández. Ambos volúmenes tan editaos por KRK Ediciones.

Güei martes, a les ocho y media la tarde, Sergio Gutiérrez va presentar el so primer poemariu “A dixo a B: ‘perversu’ ”, na Casa Posafuelles, chigre de la Xunta pola Defensa de la Llingua Asturiana, n’Uviéu.

Sergio Gutiérrez ñaz nel 1985 y vive de siempres en Lieres, Siero. Tien publicao poemes y narrativa na revista Formientu y foi ganador del premiu de poesía Elvira Castañón esti añu. Amás, toó parte na creación del alcuentru lliterariu “Entamada07”, nel conceyu Siero. Ye diplomáu n’enfermería y ergónomu.

La Universidá d’Uvieu proceduó esta mañana a la investidura como doctores Honoris Causa de los escritores Ángel González y Juan Jose Millás nuna ceremonia que se cellebró a les 12:00 hores nel paraninfu del Edificiú Hestóricu de la institución academica n’Uvieu. Nesti actu intervinieron la Catedrática de Llingua Española de la Universidá d’Uvieu, Josefina Martínez Álvarez, ya’l Profesor Titular de Lliteratura Española, Álvaro Ruiz de la Peña, como madrina y padrín de Millás y González respeutivamente.

Tamien esti llunes 3 d’avientu pero a les 20:00 hores va cellebrase una mesa redonda p’aldericar alredor de la figura del poeta Angel González. Na mesma van intervenir amás del propiu González, Juanjo Millás, Francisco Brines, Benjamín Prado, Luis García Montero, Almudena Grandes, Jose Luis García Martín, Felipe Benítez Reyes y Ricardo Labra. La moderación vca correr al cargu de Juan Cruz.

L’escritor y periodista ovetense Miguel Barrero ta acabante d’espublizar lka so última novela na editorial KRK. “La vuelta a casa” cunta la hestoria de la huida d’un exiliau durante la guerra civil española. Barrero ye redactor del diariu Les Noticies, espubliza en El Comercio y coordina la revista El Súmmum. En 2004 algamó’ Premiu Asturias Joven de Narrativa con “Espejo”. Amás d'”Espejo” tien espublizaos testos en el diariu “La Nueva España” y en revistes como “Eventual”, “Narrativas” y “El Norte de los libros”

Esti miercoles 5 d’avientu van entregase los premios a los ganadores de la edición d’esti añu del Concursu de Cómic y del de tires cómiques “Comarca de la sidra”, que cumplen la so quinta y tercer edición respeutivamente. El ganador na modalidá de mayores de 14 años foi’l dibuxante de Blimea Alfonso Zapico. que va recibir el galardón nuna ceremonia Casa Cultura “Marta Portal” a les 19:00 hores.

Alfonso Zapico, ganador d’esta edición cola obra “Les Cuentes de Gasparín”, ye l’autor de “Manolita Pulgarcita” que apaez davezu en “El Gomeru” amás de debuxante, ilustrador ne editorial Edelvives y diseñador gráficu. Ente los reconocimientos que recibió la so obra destaca l’algamáu en Francia, nel FestiBd pol llibru “La Guerra Del Profesor Beltenev”.

Amás del primer premiu a Zapico, dotáu con 500 euros, el xuráu va facer entrega de dos accesit de 200 euros a Juan Miguel Borja Estevez pola obra “¿otru culín?” y a Jose Juan González García por “Milagru na Canga” . Toles obres van ser espuestes nos centros culturales de la comarca y van ser espublizaes pola organización del festival nun volumen conxuntu.

La Casa La Cultura de Pola L.lena celebrará güei vienres, a partir de les seis y media de la tarde, l’actu de presentación del llibru de l’autora llocal, Paula Pulgar Alvés, ‘Primeres Aventures de Pulgu y Yolín’.

Nel actu participará l’autora, que tará acompañada pola filóloga y téunica del Serviciu de Normalización Llingüística de L.lena, Penélope Miranda y pol responsable de la coleición Llingua de Trasgu, Enrique Carballeira.

‘Primeres aventures de Pulgu y Yolín’ ye una historia ilustrada pa neños (o pa mayores con ganes de pasalo bien) que cunta la situación que tien llugar nuna casa onde vive yá un perru, cola llegada del segundu. Los problemes qu’apaecen ente los animales tienen, por suerte, un bon final. El llibru ta ilustráu pola artista Sonia Díaz.

Formientu “revista de lliteratura mui moza” ye una revista lliteraria que busca espublizar la obra de los autores más mozos de la lliteratura asturiana y dala a conocer. Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño. Güei vienres 30, a partir de les 19:30 va celebrar un actu na Llibrería Alborá de Xixón.

Alredor de la revista Formientu, Xareos! vieno organizando nos últimos meses recitales, presentaciones y alderiques en munchos de los conceyos d’Asturies, destacando la participación d’esta revista nos actos de la XXVIII Selmana de les Lletres Asturianes, en 2007, pa la que s’espublizó un númberu especial dedicáu a la narrativa más moza.

Con trés númberos al llombu, la revista quier celebrar el so primer añu nes llibreríes con un actu nel que van poder sentise les voces de dellos de los autores que participaron na publicación nesti primer añu, cerca de 40 autores ñacíos toos ellos del añu 1975 n’adelantre.

Nel actu va presentase amás, la web, que quier abrir agora una etapa nueva, convirtiéndose n’espeyu de toles iniciatives de l’Asociación Xareos!, un altavoz pa les noticies de la lliteratura más moza y amás, un llugar pa la promoción de los autores qu’apaecen na revista Formientu y de les actividaes que lleven alantre.

L’actu va entamar a partir de les 19:30 na Llibrería Alborá Llibros de Xixón. Dempués del actu, que ye de llibre asistencia, va celebrase un pinchéu na propia Llibrería Alborá, asitiada na Plaza Romualdo Alvargonzález 5, xunto al Centru Comercial San Agustín. A dambes celebraciones, los organizadores conviden a toles persones que quieran averase y conocer lo que ta dando de sí la lliteratura más moza y falar colos autores de la revista.

Vidiu convidando al actu.