Lliteratura

Tomás Sánchez Santiago presenta esti llunes 17 d’avientu n’Uvieu la última de les sos obres, “Calle Feria”: premiu XI de Novela Ciudad de Salamanca y volumen col que’l poeta zamoranu fae la so primer incursión nel terren de la novela. L’actu va entamar a les 19:00 hores nel Club Prensa Asturiana y nel mesmu va oficiar de presentador l’escritor avilesín Jose María Castrillón. “Calle feria”, ufre en 500 páxines un retratu bien averáu a lo que yera la vida na España provinciana dende los años 30 a los años 50, dende la república a la dictadura.

L’historiador Rafael Rodríguez, director de la revista Erada, la poeta Vanessa Gutierrez, una conferencia de Xicu Mata sobre arquitectura popular son delles de les xeres que se van desendolcar dende esti vienres y durante’l fin de selmana nes xornaes sobre cultura asturiana «Xoranes 07». Los actos van tener llugar nel salón d’Actos de La Toba de Llaranes y tan organizaos poa Asociación de Vecinos El Camín, de Llaranes y El Pozón ya’l colectivu xuvenil Llarizón.

“Mitos y prexuicios na historia d’Asturies” ye’l nome de la conferencia cola que Rafael Rodríguez va abrir les xornaes esti vienres a les 17:30 hores. L’historiador aprovechará pa presentar el primer númbero d'”Erada”, le revista d’hestoria contemporanea d’Asturies de reciente creación y de la que ye’l director y responsable.

Na segunda entrega de les actividaes, el sábadu 15, van falar la poeta Vanessa Gutierrez, sobre lliteratura asturiana d’anguaño y Xicu Mata sobre arquitectura popular asturiana. La xornada va completase con un homenaxe al escritor avilesín Bernardino Guardado y una mesa redonda alredor de la situación del patrimoniu cultural y mediu ambiental d’Aviles. Amás va tar disponible durante los dos díes una esposición de discos y llibros asturianos.

Según informaben dende la organización de la Xunta d’Escritores 2008, Trinidad Ruiz va clausurar la Xunta d’Escritores Asturianos 2008 que va celebrase n’Uviéu, na Biblioteca del Campu San Francisco, los díes 2, 3 y 4 de xineru con una conferencia sobre’l llabor editorial nel Estáu y cola presentación d’ún de los sos últimos proyectos editoriales.

Trinidad Ruiz Marcellán (Agón, Zaragoza, 1950) ye llicenciada en Filoloxía Hispánica y Pedagoxía. En 1979 fundó la prestixosa Colección de Poesía Olifante, dirixéndola dende entós y formando una Asociación Cultural pa la realización d’estremaes actividades culturales como Alcuentros, Congresos, Conferencies o Dinamización de Biblioteques Públiques. En 2002 recibió la Medalla d’Oru al Méritu Cultural del Gobiernu d’Aragón, poles curiaes y curioses ediciones en castellanu y en versión billingüe, editades dende la Colección Olifante. En setiembre de 2002 funda’l Festival Internacional de Poesía Moncayo, dirixendo xunto con Marcelo Reyes la organización y realización de los mesmos nel Monesteriu de Veruela y el conceyu de Trasmoz.

Dirixe tamién La Casa del Poeta en Trasmoz, primer residencia pa poetes, allugada nes Tierres del Moncayo. Trátase de la primer casa-residencia pa la creación poética n’España y tá asitiada a unos diez quilómetros de la Casa del Traductor, en Tarazona, tamién única nel Estáu. La Casa del Poeta, fundada y dirixida por Tinidad Ruiz, ta pensada pa ser un espaciu onde s’escriba crítica lliteraria, ensayu y poesía. Como autora tien publicao los siguientes llibros: Poesía Urbana (Ayuntamientu de Zaragoza, 1980), Penúltimos poetas en Aragón (Diputación de Zaragoza, 1989), Poesía Ibérica- Generación de la Democracia (Malvís, Madrid, 1990). Anguaño exerce de profesora nun Institutu de Tarazona, llabor que compaxina coles publicaciones de poesía y la dirección de los Festivales. El so proyectu actual, amás de la continuación de los anteriores, ye la creación d’una Fundación pa “La Casa del Poeta” nel conceyu de Trasmoz, mui averada al Monasteriu de Veruela. Como editora de reconocíu prestixu, la so editorial difunde un lema: “lo que nun se conoz nun s’ama”; por eso gueta, vive y llee cola seguridá de que la lliteratura -la Poesía- val pa ser feliz y, en definitiva, pa ser meyores.

Trinidad Ruiz Marcellán sedrá la convidada que pesllará la Xunta d’Escritores Asturianos 2008 el cuatru de xineru próximu n’Uviéu con una conferencia que tendrá por títulu “Olifante, una oferta de felicidad” a la que seguirá la presentación d’ún de los sos recientes llibros editaos “Tola lluz del mundu” que recueye la poesía amorosa d’Angel Guinda nos seis idiomes hespañoles, incluyendo al asturianu.

Xuan Carlos Crespos va presentar güei xueves nel Xardín Botánicu de Xixón (18:00 hores) el so nuevu llibru infantil tituláu “Lías. Aprendiz de contador d´Histories”. Esti nuevu trabayu del autor asturianu, que cunta con debuxos de l’artista Rocío Pinín, ya foi presentáu’l mes pasáu na Casa la Cultura de L’Entregu. Enantes de la presentación de les seis l’escritor va facer un alcuentru colos medios de comunicación y con un grupu d’escolinos xixoneses, a les 11 la mañana nel mesmu llugar.

Xuan Carlos Crespos Lanchas ñació en Xixón en 1970. Ye collaborador avezáu de diverses publicaciones como “La Ratonera”, “Reciella Malory”, “Lliteratura o Lletres Asturianes”. Como reconocimientu a la so obra recibió en 2004 el premiu Nene Losada Rico col llibru ‘Poemes Raros”, editáu por Trabe al añu siguiente.

El Diaro de León, entregab ayeri col periódicu y por namas 1’5 euros, la reedición d’un llibru hestóricu dientro de la lliteratura asturiana, “Cuentos y poemas en leonés”, de Caitano Álvarez Bardón. Na redacción d’Asturnews punxímonos en contactu col periódicu lleonés pa conocer la forma de facese col llibru n’Asturies y dende’l mesmu unviáronmos el llistáu de quioscos qu’ufiertamos a los nuesos llectores. Un llistáu de quioscos que na mayor parte los casos namás distribuyen esti periódicu en branu, cuando miles de lleoneses tán de vacaciones n’Asturies.

Amás, según pudimos saber, nos pocos quioscos que venden el Diario de León tol añu, nun manden nunca los llibros y otres ufiertes adicionales al periódicu. D’esta manera, ayeri yera imposible facese col llibru n’Asturies.

Va agora cien años Caitano Álvarez Bardón componía’l llibru “Cuentos en dialecto leonés”, un volume bien conocíu y que va dende entós pola so tercer edición. La Biblioteca Leonesa de Escritores ufría esta selmana esti volume, pero na so segunda edición, menos conocida y con dellos testos cuasi inéditos pal gran públicu, que completen el llibru cola parte en versu, con poemes como “Las mis montañas lionesas”.

La edición ta a cargu de la empresa Edilesa. El testu igüóse poles complicaciones ortográfiques qu’implicaba un testu de principios del sieglu venti ensin nengún tipu de norma ortográfica.

La obra tamién inclúi collaboraciones y pieces recoyíes de la tradición oral del tíu de Caitano, Emilio “Fulgacián” y del so primu Wenceslao. Militar de profesión, Cayetano Álvarez Bardón (Carrizo de la Ribera, 1881-Uviéu, 1924) estudió con enfotu la hestoria y la llingua tradicional del Órbigu, Cepeda y Omaña, escribió numerosos testos pa una “Historia de la provincia de León” que se quemaron na so casa d’Uviéu nel tiempu de la Revolución d’Ochobre de 1934.

Nel prólogu recupérase’l testimoniu d’Emilio Álvarez Moro, sobrín del autor, con 79 años anguaño, que cunta delles anécdotes familiares de Caitano y d’Emilio “el Fulgacián”.

Pa los asturianos interesaos en mercar el llibru, el Diaro de León distribúyese tamién per Asturies. Reproducimos llistáu de quioscos onde pue mercase güei xunto al diariu.

Puntos de venta d’El Diario de León n’Asturies

Con gran ésitu de públicu presentaba ayeri Xuan Xosé Sánchez Vicente, escritor, políticu, estudiosu de la llingua y la lliteratura asturianes… la so primer novela en castellán, dempués de delles intervenciones na narrativa curtia n’asturianu, como la premiada col Xosefa Xovellanos “La muerte amiya de nueche”. Los encargaos de presentar la novela fueron Fernando Canellada, redactor xefe de La Nueva Españamn y Marta Magadán, directora de Septem Ediciones, qu’asoleya’l llibru.

Na presentación Canellada bromeó sobre “el pasu del Xuan Xosé roxu de los 70 al ‘azul’ d’anguaño”, énte lo que Sánchez Vicente dixo un simpáticu “¡sin pasase!”. L’autor encamentó la llectura d’una obra que s’avera a la época más difícil de la hestoria d’Asturies, la que se desenrrolla nos tiempos cercanos a la Guerra Civil.

“No miréis al mar” ta yá a la venta nes llibreríes embaxo’l sellu de Septem Ediciones. La hestoria entama n’ochobre de 1937, cuando los nacionales entren n’Asturies y nél apaecen hestories de les cárceles, la España franquista, la construcción d’Ensidesa y la vida cotidiana d’entós, escrita en castellán pero col respetu pa los topónimos tradicionales d’Asturies, como Xixón, Uviéu o otros.

Dempues de “Ficciones y realidaes”, el so últimu trabayu n’asturianu, Xuan Xose Sánchez Vicente torna a los estantes de les llibreríes colo que ye’l so debú como novelista en llingua castellana. “No mireis al mar” ye’l nome d’un volumen que va presentar, xunto col periodista Fernando Canellada, esti martes 11 d’avientu a les 20:00 hores nel centru cultural Antiguu Institutu de Xixón.

Espublizada por Septem Ediciones, “No mireis al mar” ye un retratu de la sociedá española na epoca de la guerra civil y de la España franquista al travies de dos personaxes estremaos. El prolíficu escritor y políticu traza con ironía ya inxeniu un lienzu nel que cabe gran parte de la hestoria contemporánea asturiana.

L’escritor ovetense Guillermo del Pozo va presentar esti martes el so nuevu poemariu, “Segundos fuera”, na llibrería Cervantes d’Uvieu, (C/Doctor Casal, 9). L’actu va entamar a les 19:30 hores y amás del propiu autor va cuntar cola presencia del tamien poeta y Vicedecanu de la Facultá de Filoloxía de la Universidá d’Uvieu, Aurelio González Ovíes que exercerá de maestru de ceremonies.

Con”Segundos fuera”, editáu por Lria, Guillermo del Pozo pon nes estanteríes el que ye’l so segundu llibru de poemes tres “Contraterceros”, obra cola que foi un de los finalistes del premiu Ateneu de Sevilla de Poesía na edición de 2004.

Esta tarde a les 20:00, Julio Concepción: Doctor en Filoloxía y miembru del Real Insititutu d’Estudios Asturianos (RIDEA), presenta’l “Diccionariu etimolóxicu de toponimia asturiana” nel Club Prensa Asturiana d’Uvieu. Nesti volumen, espublizáu pola editorial KRK, l’autor analiza l’orixen y significáu de más de 30.000 topónimos d’Asturies.

Xunto col filólogu van tar presentes nel actu, el que foi Presidente del Principáu Juan Luis Rodríguez-Vigil; el miembru del RIDEA, Joaquín Fernández; la profesora de filoloxía Marta Perez Toral ya’l responsable de KRK Ediciones Cesar Inclán.