Lliteratura

Amaya Caunedo, Irene Díaz y Pedro Alonso presenten esti vienres llibru “Asturias, 70 años, 70 voces. Testimonio y memorias de una guerra” nel club Prensa Asturiana d’Uvieu. Esti volumen recueye un buen piñu de testimoinos y documentación de primer mano aportada por dellos asturianos sobre les sos vivencies durante la guerra civil española na rexón.

Amás de los aturores van ter presentes nel actu, que entama a les 20:00 hores, los profesores d’Historia Contemporánea de la Universidá d’Uvieu, Ruben Vega y Carmen García ya0l periodista Eduardo García que va ser l’encargáu de presenter esta nueva obra qu’espubliza la editorial Laria.

Depués de delliberar na sede d’Asturnet n’Uviéu, empresa editora d’Asturnews, el xuráu del Premiu Asturnews de Lliteratura Infantil y Xuvenil llegó al alcuerdu de declarar ganadores ex aequo del concursu a Nicolás V. Bardio y Abel Martínez González. Amás decidióse dar dos accésits, que recayerón n’Helena Trexu Fombella y en Xavier Frías Conde.

Los ganadores del primer premiu, Nicolás V. Bardio pol cuentu “Les nueches azules del llúnada” ilustráu por Iara Tormo Moreira y Abel Martínez González, por “Una hestoria de pantasmes”, tienen un premiu de 500 euros. Los dos accésits son de 250 euros y llevólos Helena Trexu Fombella pol cuentu “Llara quier ser astrónoma”, ilustráu por Violeta Sánchez Trexu y Xavier Frías Conde por “Llectures de barriga”.

La entrega de premios va facese’l próximu xueves 27 na Llibrería Alborá Llibros de Xixón, de magar les 19:30 hores y nun actu nel que va haber delles sopreses y un pequeñu pinchéu nel que va poder charrase colos ganadores del Premiu Asturnews 2007. Les obres van ser espublizaes a lo llargo de 2008.

El xuráu d’esta primer edición taba formáu pol director d’Asturnews, Próspero Morán, Joaquín Morán López d’Asturnet y los redactores d’Asturnews, Sergio Cortina ya Inaciu Galán y González .

Ta acabante de fallase’l primer concursu lliterariu de la Fundación Asturies cola entrega del primer premiu al escritor entreguín Pablo Rodríguez Medina. L’autor algamó’l reconocimientu por dos obres: una n’asturianu, “Dende la sombra” y la otra en castellanu, “No se puede caminar con hambre bajo el sol”. Al actu d’entrega asistieron tamien Justo Rodríguez Braga, Secretariu Xeneral d’UXT d’Asturies y Antonio Másip, en calidá de secretariu del xuráu. Rodriguez Medina ye un prolíficu autor que ta acabante de ver espublizáu’l so últimu llibru: una esbilla de cuentos titulada “Perreríes”.

La biblioteca pública de La Puela nel conceyu d’Allande foi premieda, xunto con otros 350 centros d’España, poles sos polítiques de fomentu de la llecura ente los neños. Xeres con cuentacuentos, un carne por puntos de la biblioteca o proyecciones cinematográfiques son delles de les actividaes poles que’l Ministeriu de Cultura ta acabante d’escoyer a la biblioteca pública Celestino Valledor ente los centros destacaos. Como premiu van recibir un lote de 200 libros.

KRK ta acabante d’espublizar el “Diccionariu etimolóxicu de toponimia asturiana”de Julio Concepción Suárez, Doctor en Filoloxía y miembru del Real Insititutu d’Estudios Asturianos (RIDEA). El volumen, que recueye l’orixen y significáu de más de 30.000 topónimos d’Asturies,foi presentáu pol autor el pasáu 11 d’avientu n’Uvieu.

El nuevu diccionariu cunta con un impotante trabayu d’investigación fechu de pueblu en pueblu colos habitantes de los mesmos como fuente d’información cimera. El volumen repasa en 1300 páxines nomes de pueblos, caseríos, puertos, mayaes, brañes,patrimoniu hestóricu, ríos, requeros o caminos antiguos en más de 6000 entraes de diccionariu.

Nel actu d’entrega de los premios del Principái d’esti añu, nel que tuvieron presentes la Conseyera de Cultura y Turismu, Encarna Rodríguez Cañas, y la Directora Xeneral de Promoción Cultural y Política Llingüística, Consuelo Vega Díaz, les responsables de cultura anunciaron la prósima creación d’un nuevu premiu en llingua asturiana na categoría de lliteratura infantil que va llevar el nome de “María Xosefa Canellada” y va completar la ufierta de premios añales que fai esa Conseyería.

Ayeri xueves, l’asociación “Grupu Epona” presentó’l llibru “Mitoloxía asturiana pa rapacinos y rapacines” d’Helena Trexu Fombella na Llibrería Trabe d’Uviéu. La encargada de presentalu foi la escritora Mª Luz Pontón, mayestra y presentadora de programes infantilesen Localia y del magacine “Revoltixu nes ondes” na RPA.

El llibru repasa, xunto coles illustraciones de Violeta Mateu, tolos personaxes de la mitoloxía asturiana y tamién contién dellos xuegos empobinaos al deprendizaxe. “Mitoloxía asturiana pa rapacinos y rapacines” ye’l segundo trabayu que asoleya l’asociación de cuentacuentos “Grupu Epona” pa la reciella ya’l públicu infantil dientru d’un catálogu nel que hai espaciu pa munchos estilos lliterarios y diferentes públicos.

Esti xueves, a les ocho la tarde, na Casa Cultura de L.luarca, Esther García López presentó’l so llibru últimu, una obra orixinal por demás, con ochenta poemes pequeños, como los haikus xaponeses, nos que llogra mui bien esa capacidá pa formar el so universu estéticu, con poques pallabres, pero con muncha fondura. Siguiendo’l círculu de las estaciones, quier Esther llegar al corazón de los neños dexando estes estampes enllenes de significáu y de guapura y siempres, na variante occidental del asturianu.

La presentación del llibru tuvo a cargu d’Emilio Menéndez Menéndez, filólogu y párrocu de La Montaña, presidiendo Juan Fernández Pereiro, Alcalde de Valdés y cola intervención de Néstor Fernández, Conceyal de Cultura de Valdés, Cristian Velasco d’Ediciones Madú, editora del llibru, l’ilustrador del llibru, Migule Solís Santos y la propia autora, Mª Esther García López, qu’esti añu algamó dellos premios tan importantes como l’Uviéu de Poesía.

Pablo Antón Marín Estrada y Miguel Solís Santos recoyeron ayeri los premios de la Conseyería de Ciltura del Principáu, “Xuan María Acebal” de poesía y “Enriqueta González Rubín” respeutivamente. Nel actu que se cellebró nel patiu del Palaciu del Conde Toreno, n’Uvieu tamien tuvieron presentes dellos de los poetes y escritores premiaos n’otres ediciones del concursu, como Xandru Fernández, Xuan Bello, Xulio Viejo o Jose Luis Rendueles. Al entamu ya’l final del actu actuó’l músicu Toli Morilla que entamo la so participación músicando un poema de Xandru Fernández.

En presencia de la Conseyera de Cultura y Turismu, Encarna Rodríguez Cañas y de la Directora Xeneral de Promoción Cultural y Política Llingüística, Consuelo Vega Díaz pasaron pol atril los dos premiaos p’agradecer el galardón y ufrir un pequeñu duiscursu, nos dos casos rematáu cola llectura de parte de la so obra. Tres d’ello la responsable de cultura anunció la prósima creación d’un nuevu premiu en llingua asturiana na categoría de lliteratura infantil. , el “MarÍa Xosefa Canellada”.

Pablo Marín Estrada, algamó’l premiu dotáu con 7.000 eurosa’lque se presentaren 15 trabayos, pol poemariu tituláu “Animal Estrañu”. Miguel Solís Santos pela so parte, algamó’l premiu pol artículu “La hemocianina de les andariques y el sangre del ciudadanu Capeto” asoleyáu en La Nueva España el 15 de payares del 2006. Nos dos casos el xuráu quieso destacar la calidá indscutible de los trabayos.

Esti xueves 20 d’avientu l’asociación de cuentacuentos “Grupu Epona” presenta’l llibru “Mitoloxía asturiana pa rapacinos y rapacines” d’Helena Trexu Fombella. L’actu va ser na Llibrería Trabe d’Uvieu a les 19:30 hores (C/Padre Buenaventura Paredes, 4) ya’l mesmu va asistir como presentadora la escritora Mª Luz Pontón, mayestra y presentadora de programes infantiles na TPA y en Localia.

El llibru repasa, xunto coles illustraciones de Violeta Mateu, tolos personaxes de la mitoloxía asturiana y tamien contien dellos xuegos empobinaos al deprendizaxe. “Mitoloxía asturiana pa rapacinos y rapacines” ye’l segundo trabayu que asoleya l’asociación de cuentacuentos “Grupu Epona” pa la reciella ya’l públicu infantil dientru d’un catálogu nel que hai espaciu pa munchos estilos lliterarios y diferentes públicos.