Lliteratura

L’Asociación d’Escritores d’Asturies acaba espublizar la convocatoria pa los III Premios de les Lletres d’Asturies y los IX Premios de la Crítica d’Asturies. Pueden optar a premiu les obres espublizaes en llingua castellana o asturiana asoleyaes ente’l 1 de xineru y el 31 d’avientu del 2007.

Estos premios inclúin modalidá de narrativa, poesía, lliteratura infantil y xuvenil, narrativa de non ficción y columnismu lliterariu, siendo los propios socios de l’Asociación d’Escritores los qu’han de proponer los candidatos. El plazu d’almisión de les obres candidates fina’l 30 de xunu del 2008.

Los Premios de la Crtítica d’Asturies, patrocinaos pola Conseyería de Cultura y Turismu del Principáu d’Asturies y por Caxastur, salieron a la lluz del Café Apolo, nel añu 1999, por iniciativa d’Eva Carballo, Javier Lasheras, Juan Carlos García Villa, Jaime Herrero y Helios Pandiella, col enfotu de reconocer y potenciar la lliteratura realizada n’Asturies.

En cada edición prémiense los meyores llibros d’autores ñacíos o residentes n’Asturies, poles obres publicaes l’añu anterior a la convocatoria.

Nos dos primeros años, el premiu convocólu’l Café Apolo. Depués axuntóse a la iniciativa l’Asociación d’Escritores d’Asturies y, finalmente, depués del pieslle del Café Apolo, foi l’AEA la que se fexo cargu de la so organización y convocatoria. Amás, hasta l’añu 2005 el Café Apolo foi l’escenariu de los conceyos de los distintos xuraos, asina como de les velaes lliteraries nes que s’entregó a los ganadores la escultura Apolo, creada espresamente por Jaime Herrero pa esti galardón.

Bases completes

Esti martes 29 de xineru y con motivo del setenta aniversariu de la muerte del escritor Armando Palacio Valdes, van organizase dellos homenaxes n’Aviles y Llaviana. Los actos van entamar a les 12:00 hores n’Aviles con un actu institucional nel consistoriu avilesín y una ofrenda floral na tumba del escritor nal cementeriu de La Carriona.

Pela tarde, a les 17:30 hores los actos van siguir en Llaviana, con un actu nel Centru d’Interpretación “Armando Palacio-Valdes” y la conferencia de la Catedrática de la Universidá Complutense de Madrid, Guadalupe Gómez Ferrer nel CIDAN a les 20:30 hores. Los actos finaran con un conciertu coral nel mesmu recintu.

L’escritor del conceyu de Franco, Alfredo González Fernández, más conocíu pol nomatu de “Fredo de Carbexe”, ta acabante d’asoleyar el so tercer poemariu, un llibru colos testos n’eonaviegu y cola correspondiente torna al castellán. “Fruxes da nebra / Estirpes de la niebla” ta espublizáu por Andolía, como’l so llibru anterior, “Soños de pellegrín”, tamién asoleyáu en formatu billingüe.

Ganador en 1995 del V Premiu Xeira de “narracióis curtias”, Fredo de Carbexe publicó en 1996 un llibru de poemes “Mourén dos fondales” y dende entós nun para dar amueses del so bon facer poéticu, lo mesmo en volúmenes propios que n’antoloxíes y revistes.

La editorial Espublizastur, qu’espubliza la revista “La Sidra” y asoleyó llibros como la “Guía Sidrera” y “La Nación Asturiana” ta acabante de facer pública una iniciativa nueva, “Llibros de Nós”, un clú de llectores que, comenten los responsables, “ñaz col enfotu d’apostar pola independencia, entendida como respuesta a una dinámica editorial que n’Asturies ta cada vuelta más condicionada poles subvenciones y como una manera d’ufiertar, dende la cultura de nueso, materiales de llectura alloñaos del pensamientu únicu que controla’l mercáu del llibru”.

La dinámica del clú de llectores Llibros de Nós ye mui asemeyada a la d’otres organizaciones como’l clásicu “Círculo de lectores”, el sociu nun ha pagar nada por apuntase nin por siguir nel clú, l’únicu requisitu ye’l de mercar diez llibros al añu d’ente los que la editorial vaiga ufiertando nel so catálogu. Sobre los llibros que van ufiertase, el responsable de Llibros de Nós, Fonsu Álvari, comenta que “non solo se van ufiertar llibros asoleyaos por Espublizastur, sinón que cuntará tamién con trabayos d’otres editoriales y d’estremaos coleutivos sociales”.

No que cinca a los proyectos de la editorial encargada del proyectu “trabayaráse especialmente en dos ámbetos malapenes atendíos anguaño, como son l’ensayu y la producción científica”, nesi sen preparen yá nuevos trabayos pa los meses vinientes.

N’apuntándote al clú los gastos d’unvíu son de baldre en casu de facer el pagu per cuenta bancaria o con tarxeta de créditu, pa los reembolsos cobraránse dos euros por unvíu. Amás, la editorial proyecta importantes descuentos d’alredor del 20 % nel preciu de los llibros ufiertaos, un llibru de regalu al facete sociu y cada añu que se renueve la suscripción d’un sociu.

El tiempu mínimu de pertenencia a Llibros de Nós ye d’un añu. D’ente tola ufierta editorial del clú de llectores, los socios han mercar “lo que vien a ser un llibru al mes, sacantes los meses de xunetu y agostu”. Tolos meses, de nun producise un pidíu alternativu enantes del día diez, “Llibros de Nós unviará’l llibru mensual recomendáu.”

Dientro de bien poco va poder consultase tola ufierta del clú na páxina www.llibrosdenos.com o pidir el catálogu en papel, al traviés del corréu lletrónicu llibrosdenos@hotmail.com . La editorial tien abierta yá la posibilidá de facese sociu, pa lo qu’han unviase los datos qu’apaecen nel pdf que s’axunta a esta noticia.

El Colexu de la Salle, en Xixón, lleva tola selmana celebrando la so Selmana Cultural ya’l vienres echó’l pieslle a estes xornaes el presentador de la TPA y la Cadena SER, Inaciu Galan y Gonzalez, que tuvo dando la conferencia “Facer televisión n’Asturies”, nesti casu p’alumnos de bachiller. Na charra, va poder vese un documental preparáu por alumnos del centru a costafecha pa la ocasión y nel que se pue ver el procesu de realización del so programa de la TPA, “Al Aldu: Xente de Casa” dende la realización del guión y hasta la so emisión.

L’escritor lliones Francisco Álvarez Velasco va tar presentando’l so últimu poemariu, “Las aguas silenciosas”, nel Ateneu Obreru de Xixón (C/Covadonga, 7-1º izda), el vienres 25 a les 20:00 hores. Nel actu de presentación d’esta novedá editorial, l’autor va lleer varios poemes acompañaú por Clara Muñoz, qu’interpretará dellos temes cola flauta travesera. Amás participarán Antonio Merayo y l’editor Álvaro Díaz Huic.

El poemariu contien un total de 56 pieces y ye la setima obra del poeta tres “Tiempo de maldición”, “En el nombre del árbol”, “”Tierra”, “Del viejísimo jugo de la Tierra”, “La hiedra del silencio” y “Noche”, obra cola qu’algamó’l Premiu Internacional de Poesía “Antonio Machado en Baeza” ya’l Premiu de la Crítica d’Asturies na edción de 2006. Álvarez Velasco tamien foi’l ganador del l premio de la Crítica d’Asturies na modalidá de columnismu lliterariu.

El Colexu de la Salle, en Xixón, lleva tola selmana celebrando la so Selmana Cultural y güei va cuntar cola presencia del escritor y presentador de la TPA y la Cadena SER, Inaciu Galan y Gonzalez, que va dar una charra titulada “Facer televisión n’asturies”, na que va poder vese un documental preparáu por alumnos del centru y pol propiu autor a costafecha pa la ocasión y nel que se pue ver el procesu de realización del so programa de la TPA, “Al Aldu: Xente de Casa”. Güei tamién, a les doce y media la mañana escritor, etnógrafu, dibuxante ya ilustrador Alberto Álvarez Peña va falar de los “Mitos del Conceyu de Xixón”.

L’últimu día de la selmana cultural va abrise mañana con una reflexón sobre “Los llibros…”, a la que va siguir, a les 11 hores una segunda sesión de la charra d’Inaciu Galán “Facer televisión n’asturies”, que va repetir la conferencia de güei pa dellos alumnos más del centru.

El Colexu San Eutiquio de Xixón celebra güei la terce xornada de la so Selmana Cultural cola reflexón titulada “Pa entender matemátiques ha lleese”. Darréu, a les 11.00 hores entama la xornada de conferencíes con “L’humor gráficu y el Cómic n’Asturies” con Ernesto García del Castillo “Neto”, dibuxante y humorista gráficu de La Voz de Asturias, pa zarrase dempués, a les 12.30 hores, cola conferencia “Cómo llegar a ser empresariu cultural “, con Inaciu Iglesias, empresariu, editor y escritor.

Mañana, xueves 24, entama’l día cola reflexón “Carta a un neña que nun quier lleer”. A les once la mañana l’escritor y presentador de la TPA y la Cadena SER, Inaciu Galan y Gonzalez, va entamar una charra titulada “Facer televisión n’asturies”, na que va poder vese un documental preparáu por alumnos del centru y pol propiu autor a costafecha pa la ocasión y nel que se pue ver el procesu de realización del so programa de la TPA, “Al Aldu: Xente de Casa”. Esi mesmu día, a les doce y media la mañana escritor, etnógrafu, dibuxante ya ilustrador Alberto Álvarez Peña va falar de los “Mitos del Conceyu de Xixón”.

L’últimu día de la selmana cultural va abrise con una reflexón sobre “Los llibros…”, a la que va siguir, a les 11 hores una segunda sesión de la charra d’Inaciu Galán “Facer televisión n’asturies”, que va repetir la charra del xueves pa dellos alumnos más del centru.

L’editor y escritor arxentinu Mario Muchnik inaugura esti miercoles 23 de xineru dos esposiciones sobre la so faceta de fotógrafu en Xixón. “Instantes robados”, empobinada a retratar a los grandes escritores del siglo XX y “Crónicas viajeras”, una esbilla de semeyes tomaes pol autor durante los viaxes que fizo ente 1960 y 2006, van tar disponibles nel salón d’actos de l’antigua Escuela d’Empresariales hasta’l 29 de febreru.

A les 20:30, hora de la inauguración, Mario Muchnik va ufrir tamien una conferencia titulada “El llibru y la tecnica: problema de vida o muerte” na que l’editor falará sobre la salú del mercáu editorial n’españa.

Esti martes 22 de xineru, a les 20:00 hores l’escritor Sidoro Villa Costales va presentar na Casa la Cultura de La Pola (Siero) el so “Llibru de los suaños”. La obra, que ta empobinada al públicu infantil y axunta venti poemes y otres tantes ilustraciones, asoleyala la editorial Trabe, na colección Montesín. Na presentación participarán, amás del autor, Nacho Fonseca, mayestru y músicu; y Ramón Quirós, director de la Casa la Cultura de La Pola.