Lliteratura

L’Asociación Cultural Valentín Andrés de Grau ta acabante de convocar la XVII edición del Concursu Internacional de Cuentos Valentín Andrés. A esti concursu pueden presentase obres escrites n’asturianu o en castellán, siendo los premios de 2.000 y 1.000 euros pal primer y segundu premiu respectivamente, amás del compromisu d’espublización de la obra.

Los cuentos tienen de presentase col sistema de plica, por cuadruplicao, con lletra de 12 puntos, a doble espaciu per una sola plana tamañu A-4, y con un llargor de diez fueyes. Mandaránse a l’A. C. Valentín Andrés (apartáu de correos nu 7, 33820- Grau) o al Conceyu de Grau («Concursu Valentín Andrés», 33820-Grau), enantes del 30 d’abril de 2008.

El fallu va producise na cabera selmana de xunu de 2008.

Bases completes del concursu

Yá ta disponible pa la so desgarga na web del serviciu de Mocedá de la comarca de la sidra, la edición ellectrónica del llibru “Literatura Comprimida, 2007”, que recueye los microrelatos premiaos na segunda edición d’esti concursu organizáu pol propiu servicio en collaboración con Cajastur. Nel concursu, que ñació al abellugu del programa cultural CREACIóN, participaron alredor de mil rellatos.

La Fundación Fernández Lema ta acabante d’abrir el plazu pa presentase a la edición correspondiente al añu 2008 del Premiu de rellatu curtiu que lleva’l so nome y que tien dos modalidaes: llingua asturiana y llingua castellana. El premiu pa los rellatos n’asturianu ye de 3.500 euros y pa los escritos en castellán, de 7.000 euros.

La estensión de les obres nun pue pasar de 25 folios A4 mecanografiaos a una sola plana y con un tamañu mínimu de lletra de 10 puntos. N’igualdá de circunstancies y méritos xenerales de los candidatos, va premiase la obra que, en sí mesma o pol so autor, s’estime con más vinculación, yá sía personal o oxetivamente, con Asturies y, de manera particular, col conceyu de Valdés. Hai que presentar les obres por sestuplicao, col sistema de plica y una declaración de que se trata d’obra propia y inédita.

Les obres hai que les mandar enantes del 31 de marzu a la Casa la Cultura de L.luarca (c/ Olavarrieta 24, 33700 L.luarca). El resultáu del concursu va dase a conocer primero del 1 de xunetu de 2008. Los premios van entregase nun actu públicu na Casa de Cultura de L.luarca (Valdés) el 5 de xunetu de 2008 a les 20:00 hores.

El xueves 7 de febreru a les 19:30 hores va presentase nel Ateneu Obreru de Xixón la revista d’estudios “Erada. Revista d’Historia Contemporánea d’Asturies” coordinada pol hestoriador Rafael Rodríguez Valdes y espublizada por Trabe. Esti nuevu actu, enantes ya se presetó n’Uvieu, va tar moderáu pol propiu Rafael Rodríguez y va cuntar cola intervención de dalgunos de los participanmtes nel proyectu como Sergio Sánchez Collantes, C.A. Gordon, Faustino Zapico Álvarez y Xuan F. Bas Costales.

Nel primer númberu de la revista puen atopase artículos como: “25 de mayu de 1808: significáu históricu y consecuencies”, del profesor d’Hestoria Faustino Zapico, “Esbozo histórico del republicanismo en el último tercio del XIX. El movimiento republicano en Gijón como botón de muestra: política, cultura y sociabilidad (1875-1890), de Sergio Sánchez Collantes; y “Trabayu, disciplina y resistencia na Asturies franquista” de C. A. Gordon. Otru de los conteníos destacaos ye’l testu de Xose Miguel Suárez Fernández, “Un artículo inedito de 1931 sobre autonomía y agrarismo pal periódico El Aldeano de Castripol”.

El poeta y novelista Pablo Antón Marín Estrada algamó’l Premiu de Narrativa de la editorial Trabe na edición de 2007 pola novela “La boca puerca de Mores”. El Xuráu, formáu por Esther Prieto, Xuan Bello, Marta Torre, Xulio Viejo, Xandru Fernández ya’l secretariu Inaciu Iglesias, fizo públicu’l fallu nel que destaca la obra del llangreanu pol so tresfondu líricu y la so capacidá evocativa.

Per otra parte el xuráu quiso alvertir de “la escasa ambición estetica na que se mueve últimamente la lliteratura asturiana deseando que, nos años vinientes, los autores procuren un esfuerzu de renovación temática, estetica y llingüística de superior esixencia”.

Una nueva revista ta acabanate de ñacer y va salir a la lluz nes prósimes selmanes. Esta espublización titúlase “Vieya Gigia”, va tener una periodicidá semestral y va tar dedicada dafechu a dar a conocer el patrimoniu cultural, turísticu, arqueolóxicu o social del conceyu de Xixón con testos n’asturianu y castellanu. La editorial responsable d’esta iniciativa ye la casa “La Cruz de Grado”.

Dalgunes de les persones que tan involucraes nesti proyectu son Xurde Morán, Chema Vega, Janel Cuesta, Boni Ortiz, Tino Lozano, Jose Luis Suárez o Alberto Álvarez Peña anque la editorial tien abiertes les puertes a futures collaboraciones.

El lliones afincáu n’Aviles Luis Miguel Rabanal va participar nun alcuentru poeticu en Xixón nel que van recitase pieces del so poemariu ineditu, “Mortajas”. L’actu va cuntar con una presentación al cargu del periodista y novelista Fernando del Busto, la participación de l’actriz Yasmina Álvarez, qu’acompañará al autor na llectura de los poemes y la música de grupu “Gijón” de pulsu y púa. La cita ye a les 20:00 hores na sala de conferencies del Centru de Cultura Antiguu Institutu.

Luis Miguel Rabanal entamó a espublizar la so obra en 1977 col llibru “Variaciones”. Dende entós vien espublizando regularmente y con reconomientos como’l premiu Ana Valle, qu’algamó’l por “Labios de la locura”. Tamien foi’l ganador del premiu Calamo de poesía erótica en 1993 por “Libro de Citas”.

Güei, xueves 31 de xineru, a les 7,30 de la tarde va presentase na Biblioteca Pública del Fontán d’Uviéu el llibru de poemes “La mirada aliella (oesía reunida, 1981-2006)” del escritor y productor audiovisual Antón García, qu’asoleya l’Atenéu Obreru de Xixón na colección “Tiempu de Cristal”. La presentación va facela Javier Almuzara.

Benigno Delmiro va dar una conferencia alredor del papel que xugó’l trabayu na mina na prodicción lliteraria d’Asturies a lo llargo de la hestoria nel Centru de Cultura Antiguu Institutu de Xixón. La charra va tener llugar el xueves 31 de xineru a les 20:00 hores y ta enmarcada dientro del programa d’actividaes de la XII selmana cultural del Aula Popular Jose Luis García Rúa.

Benigno Delmiro ye doctor en lliteratura pola Universidá de Zaragoza, títulu qu’algamó con una tesis sobre l’uso que se fixo del mundiu mineru na lliteratura española de los sieglos XIX Y XX. Anguaño exerce como profesor de lliteratura nel institutu Rosario de Acuña de Xixón.

L’escritor y columnista Juan Jose Millás, nomáu recientemente doctor honoris causa de la Universidá d’Uvieu, va tar presentando la so última novedá lliteraria, “El mundo”, nel Club Prensa Asturiana d’Uvieu a les 20:00 hores d’esti miercoles 30 de xineru. Con “El mundu”, novela de calter autobiográficu, Millás algamó’l premiu planeta nesta última edición de 2007. L’actu va tar modaráu pol escritor y periodista Chus Neira.