Lliteratura

El Local Cambalache d’Uvieu (Martínez Vigil, 30, baxu) acueye esti viernes 22 de febreru l’actu de presentación del llibru “Michel Foucault, caja de herramientas contra la dominación”, de los autores Juan Pastor, de la Unidersidá d’Uvieu y Anastasio Ovejero, de la Universidá de Valladolid. La cita pal que quiera conocer dellos aspectos de la vida del hestoriador y filósofu frances entama a les 20:00 hores.

Yá ta disponible’l catálogu de “Llibros de Nós”, un proyeutu de la editorial Espublizastur. La ide ye la d’un clú de llectores que, comentaben los responsables apocayá, “ñaz col enfotu d’apostar pola independencia, entendida como respuesta a una dinámica editorial que n’Asturies ta cada vuelta más condicionada poles subvenciones”. Nel catálogu apaez títulos espublizaos pola propia editorial, como “La Nación Asturiana” o la “Guía Sidrera” y otres publicaciones d’otres editoriales.

La dinámica del clú de llectores Llibros de Nós ye mui asemeyada a la d’otres organizaciones como’l clásicu “Círculo de lectores”, el sociu nun ha pagar nada por apuntase nin por siguir nel clú, l’únicu requisitu ye’l de mercar diez llibros al añu d’ente los que la editorial vaiga ufiertando nel so catálogu. Sobre los llibros que van ufiertase, el responsable de Llibros de Nós, Fonsu Álvari, comenta que “non solo se van ufiertar llibros asoleyaos por Espublizastur, sinón que cuntará tamién con trabayos d’otres editoriales y d’estremaos coleutivos sociales”.

Xulio Viejo, secretariu de la Revista de Filoloxía Asturiana, adelantó esti llunes la intención del Seminariu de Filoloxía Asturiana de la Universidá d’entamar unes xornaes dedicaes a les nueves tendencies d’investigación llingüística aplicaes a la investigación asturianista. La intención, según Xulio Viejo, ye “poner definitivamente los nuesos reloxes na mesma hora que los del restu d’invesigadores”.

Viejo fizo estes declaraciones nel actu de presentación del quintu númberu de la Revista de Filoloxía Asturiana, que tuvo llugar nel aula magna de la Universidá d’Uvieu. A la cita acudieron, el Sr. Rector de la Universidá d’Uviéu, Juan Vázquez García, la Directora Xeneral de Promoción Cultural y Política Llingüística, Consuelo Vega Díaz y el director de Trabe Ediciones, Inaciu Iglesias Fernández.

El responsable de la revista tamien avanzó que un de los oxetivos cimeros de los que trabayen nesta revista ye convertise nuna referencia nel campu de la investigación sobre filoloxía española y románica. Amás, Viejo amosó’l so deseu de que la revista tea presente, al travies de soscripción, nes principales universidaes europees, dalgo pa lo qu’espera contar col sofitu de la Conseyería y de la propia Universidá.

La Revista de de Filoloxía Asturiana ye una publicación especializada coordinada por Ramón d’Andres, que vien faciendo’l Seminariu de Filoloxía Asturiana, grupu d’investigación adscritu al Departamentu de Filoloxía Española de la Universidá d’Uvieu, y que ta editada por Alvízoras Llibros y por Trabe Ediciones. Na revista tienen cabida, estudios sobre l’asturianu, el gallego-asturianu o les variedes del propies de les árees lleonesa y mirandesa, asina como artículos sobre lliteratura.

Vicente García Oliva, escritor xixones con abondante producción lliteraria tantu n’asturianu como en castellanu, tien un nuevu llibru na cai, “Elemental, Querida Lisa”, y va presentalu esti prósimu martes 19 de febreru. L’actu cellebrase na sede del Atenéu Obreru de Xixón (C/Covadonga, 7-1º Izda.) de magar les 19:30 hores y aparte del propiu autor, van tars presentes l’espertu en lliteratura infantil y xuvenil Severino Antuña y Esther Prioeto, de Trabe.

Según informen los organizadores del actu nuna norta de prensa, “Elemental, Querida Lisa” cuenta’l procesu de maduración d’una moza de 16 años que, pola mor d’un accidente de tráficu, va a reponese al pueblu de los sos güelos. Vicente García Oliva foi un de los pioneros n’escribir lliteratura pal públicu infantil con obres bien conocíes como “Les aventures de Xicu y Ventolín”. Ye academicu de l’Academia de la Llingua Asturiana y foi miembru de Conceyu Bable.

Güei, martes 19 de febreru, a les 19:00 hores, nel Salón d’Actos de la Escuela Superior d’Arte d’Asturies, nel Palaciu de Camposagrado d’Avilés, va presentase’l llibru infantil “Trasgu”, de la llocutora y presentadora María Luz Pontón. Van participar Román Antonio Álvarez González, conceyal de Cultura y Deporte del Conceyu d’Avilés; la escritora y académica de l’ALLA Esther García López, y l’ilustrador y diseñador Anxelu González, al que va presentar Gabriel Fernández. Representando a la editorial Pintar-Pintar, que publica’l llibru, va tar Ángela Sánchez.

“Trasgu” ye un álbum infantil con desplegables “onde un trasgu mui modernu va cuntando cómo ye”. Un llibru que se suma a la llarga riestra de publicaciones de Pontón, que suelen tener como filu conductor la mitoloxía asturiana. Amás pontón presenta un programa na RPA y otru, nesti casu pa neños, en LocaliaTV, dambos dos n’asturianu.

La mierense Mari Luz Pontón va presentar esti martes n’Aviles l’album infantil y n’asturienu “Trasgu”, que cunta con ilustraciones d’Anxelu González. L’actu va cellebrase nel salón d’actos de la Escuela Superior d’Arte d’Asturies de magar les 19:00 hores y al mesmu van asistir, amás de los dos autores, el conceyal de Cultura y Deportes del Ayuntamientu d’Aviles, Román Antonio Álvarez y Ángela Sánchez de la Editorial Pintar Pintar.

L’escritor y periodista Naciu Varillas va presentar la so segunda entrega lliteraria güei vienres 15 de febraru nel Centru d’Innovación y Desarrollu d’Asturies (CIDÁN) de La Pola Llaviana. “Camín de Dios”, títulu de la nueva novela del xixones ta editada por Ámbitu y supón la vuelta a l’actividá del escritor tres “Carretera ensín barru”. Xunto col propiu autor van tar nel actu, que va entamar a les 20:00 hores. Alberto Suárez, xerente de Publicaciones Ámbitu; Marcia Barreñada, Alcalde de Llaviana y l’escritor Jose Luis Rendueles.

Güei vienres, a les 19,30 hores, va celebrase na sede del Atenéu Xovellanos de Xixón, asitiáu na cai Francisco Tomás y Valiente, 1, vieya Escuela Comerciu, la conferencia “Patriciu Aduriz, cronista y poeta”, al cargu de Xosé Lluis Campal. La figura de Aduriz (1927-1992), cronista oficial de Xixón, escritor ya investigador de la cultura y la hestoria de la villa de Xovellanos y d’Asturies, foi de suma importancia pa la ciudá, col so importante llabor de coordinación y potenciación de la hemeroteca xixonesa.

Xosé Lluis Campala ye filólogu ya investigador lliterariu. Llicenciáu en Lliteratura Española pola Universidá d’Uviéu, especialista na obra del escritor realista Armando Palacio Valdés, autor al que dedicó una tesina de llicenciatura, amás de numerosos artículos y conferencies. Tien espublizaos trabayos d’investigación sobre escritores del sieglu XIX y XX, como Fabricio, Pepín Quevedo, Adolfo Camilo Díaz, Miguel Solís Santos, Armando Palacio Valdés, Manuel Pilares, José León Delestal, Vital Aza, Clarín, Campoamor, etc.

Dempués de que la demanda d’unos vecinos de la zona d’El Molinón terminara nuna sentencia dictada pol Tribunal Superior de Xusticia d’Asturies, n’agostu de 2007 y a favor de los vecinos del edificiu demandante, la organización d’esti eventu ta a la busca d’un llugar nuevu onde celebrar l’acontecimientu. La sentencia dexare afitada la prohibición de tornar a la so tradicional llugar d’instalación na rodiada d’El Molinón y el parque Sabel la Católica.

Delles fueron les propuestes del ayuntamientu y paez que la opción va que va garrando cuerpu ye la que quier llevar a La Llaboral, agora Ciudá de la Cultura, la celebración de la Selmana Negra 2008. Sicasí, son munchos los que cuestionen esti llugar onde la vida nocherniega de la Selmana Negra diba tener una convivencia difícil col patrimoniu cultural del edificiu y cola activida académica. La propuesta espera agora la opinión de la organización.

L’escritor gallegu Manuel Rivas va dar una conferencia alredor del mundiu de la lliteratura y la importancia de la llectura na educación esti martes 12 de febreru nel Centro de Cultura Antiguo Instituto de Xixón. La charra va entamar a les 19:00 hores y pertenez al programa d’actividaes del ciclu “Érase una vez la escuela”qu’organiza’l Centro del Profesoráu de Xixón ya’l consistoriu xixones. El ciclu fina esti xueves cola ponencia de Gonzalo Moure.