Lliteratura

El Conceyu de Bimenes ta acabante convocar la XI edición del Concursu de Cuentos pola Oficialidá del Asturianu. Al certame puen presentase cuentos n’asturianu inéditos que nun tengan más de diez fueyes d’estensión. Amás del orixinal, hai que mandar trés copies y una versión en soporte informáticu. Los rellatos tienen d’unviase enantes del vienres 6 de xunu a la Casa la Cultura de Bimenes, asitiada en Santuyano, s/n. 33527, Bimenes.

Los premios d’esti añu son dos, d’800 euros pal primer clasificáu y 500 euros pal segundu, amás d’un tercer premiu de 350 euros. La entrega de premios va celebrase’l vienres 4 de xunetu, coincidiendo cola Fiesta de la Oficialidá de la Llingua Asturiana.

Los ganadores del añu pasáu fueron Pablo Rodríguez Medina, Xosé Nel Riesgo y José Luis Rendueles.

Bases completes del concursu

Con motivu de la celebración de la “XXIX Selmana de les Lletres Asturianes”, qu’esti añu va dedicase a María Teresa González, la Conseyería d’Educación y Ciencia del Principáu d’Asturies convoca’l XIII Certame de Poesía y Dibuxu pa escolinos d’Educación Infantil y Primaria y alumnos d’Educación Secundaria y Bachilleratu.

Nel concursu pue participar tol alumnáu d’asturianu y de gallego-asturianu dende 4 y 5 años d’Educación Infantil a 2u Cursu de Bachilleratu.

Los escolinos y escolines d’Educación Infantil de 4 y 5 años y 1er Ciclu de Primaria, han participar con un dibuxu inspiráu na vida y obra de María Teresa González. Los otros ciclos han participar con poesíes escrites n’asturianu o en gallego-asturianu y ser inédites. La temática de los poemes ha tar averada a la vida y obra de María Teresa González. El llargor ye llibre. Los rapacinos y les rapacines que participen nel 2u y 3er Ciclu d’Educación Primaria podrán dibuxar el testu presentáu y sedrá valoráu por parte del Xuráu.

Daránse tres premios por caún d’estos siete ciclos establecíos: 4 y 5 años, 1u, 2u y 3u de Primaria, 1u y 2u d’ESO y Bachilleratu. Estos consistirán en llotes de llibros y trofeos. Fadráse mención especial a los centros de los alumnos y alumnes ganadores del certame con un diploma acreitativu.

El Xuráu tará formáu por persones averaes al mundu de la narrativa y de la educación y los trabayos podrán presentase, pol autor o autora o pol centru educativu, al Coordinador d’Enseñanza de la Llingua Asturiana, Plaza d’España, nu 5, pisu 2u, 33007 – Uviéu, hasta’l día 4 d’abril 2008, nun sobre zarráu nel que s’escribirá: XIII CERTAME DE POESÍA Y DIBUXU “MARÍA TERESA GONZÁLEZ”. Nel sobre meteránse: los dibuxos o les poesíes que llevarán TÍTULU, NOMATU, CICLU y CENTRU del autor o autora, y la PLICA na que s’escribirá la rellación de los y les autores cola so verdadera identidá.

El fallu del Xuráu fadráse públicu na “XXIX Selmana de les Lletres Asturianes”. Los premios del CERTAME daránse’l día 9 de mayu, C.P. de L’Infiestu, nel que se celebrará l’homenax escolar a María Teresa González. La participación nel CERTAME supón tar d’alcuerdu coles bases establecíes. Al fallu del Xuráu nun se podrá retrucar.

“En casa ayena”, un llibru asoleyáu pol Atenéu Obreru de Xixón y que tien por autora a Berta Piñán (Cangues d’Onís, 1963) recueye les tornes que l’autora escoyó d’entes toles feches dende los sos entamos como escritora. Pián cree que “traducir testos ayenos ye una de les meyores víes que puede tener un escritor pa deprender de la so propia llingua”.

L’autora tien espublizaos otros llibros como “Vida privada” o “Un mes”, que dempués de que’l Príncipe d’Asturies lleere un poema del mesmu, llegó a espublizar una segunda edición.

traducir textos ayenos ye una de les meyores víes que puede tener un escritor pa deprender de la so propia llingua.

Miguel Allende ta acabante de ver espublizada, na editorial Trabe, la so traducción de “El medicu a palos” de Molière. Miguel Allende (Llaviana, 1960) peresentose en sociedá en 2004 col poemariu “Pallabres de payaso”, una esbilla del so trabayu dende primeros de la decada de los ochenta. Allende ye llicenciáu en Filoloxía Románica na Universidá d’Uvieu y trabaya como educador na Fundación Docente de Mineros Asturianos, nel antiguu Orfanatu Mineru.

El Conceyu de Ribeseya ta acabante convocar el primer certame de cuentos eróticos n’asturianu “Arbidel”. El plazu ta abiertu hasta’l 15 d’abril.

.-1. Los cuentos tarán redactaos dafechu en llingua asturiana, respetando les normes ortográfiques de la mesma.

.-2. El llargor de los cuentos (unu por persona) sedrá superior a ocho folios mecanografiaos a doble espaciu, escritos per una sola cara.

.-3. La temática sedrá de calter eróticu.

.-4. El plazu d’entrega de los trabayos tará abiertu hasta’l 15 d’abril del 2008. Tienen d’unviase a: Casa Conceyu de Ribeseya. “Conceyalía de Cultura”, Plaza Mª Cristina 1, 33560 Ribeseya, nun sobre nel que s’escribirá “Premiu Arbidel”. Dientro d’elli dirá l’orixinal del cuentu col títulu y tres copies, amás d’otru sobre cola plica del autor y el títulu del cuentu escritu per fuera, dientro, apaecerán los sos datos y un telefonu de contautu.

.-5. El Conceyu Ribeseya nomará un xuráu debidamente cualificáu pa fallar estos premios; les sos decisiones nun podrán ser retrucaes.

.-6. La entrega de los premios comunicaráse personalmente a los ganadores y fadráse público nos medios de comunicación.

.-7. El ganador de la presente edición formará parte del xuráu del próximu concursu.

.-8. Los trabayos premiaos son propiedá, amás del autor, del Conceyu Ribeseya. En dengún casu se tornarán los orixinales a los autores de les obres non premiaes, pero estos podrán, pela so parte, facer usu de les copies non presentaes.

.-9. Los premios sedrán los que vienen darreu.
Primer premiu: 1.000’00 €
Segundu premiu: 300’00 €

.-10. A xuiciu del xuráu, estos premios podrán declarase ermos.

“El reverso exacto del texto” ye’l títulu de’l poemariu de la filósofa Margarita Valencia Triana (Sayak), acabante de salir a la cai de manes de la editorial feminista Centaura Nigra Ediciones, del cual se va facer una llectura nel local de l’asociación cultural Cambalache n’Uvieu (C/Martínez Vigil, 30 baxu). La cita, ne que va participar la propia autora y la editora Nuria Duarte, va tenerv llugar esti vienres a les 20:00 hores.

L’Área de Mocedá del Conceyu d’Ayer entamó estri añu otra edición del Concursu de Cartes d’Amor, que lleva yá once años celebrándose. Les cartes pueden presentase n’asturianu y en castellán y queden pocos díes pa poder facelo. N’otres ediciones ganaron autores como Xabel de Cea, Estefanía Moro Montequín o Pelayo Fernández Rodríguez.

El tema del concursu tien que ser daqué rellacionao col amor. La llargura máxima de la carta ye d’una plana DIN-A4 escrita a máquina o a ordenador. Ha presentase por triplicao con un sobre zarráu, ensin nenguna identificación y que lleve dientro los datos del autor. Les dos modalidaes van tener de premiu caúna 500 euros y una flor.

El plazu termina’l 15 de marzu de 2008 y han presentase na Oficina d’Información Xuvenil d’Ayer (Avda. Tartiere, 32, 33670 Morea) poniendo en sobre “Decimoprimer concursu de cartes d’amor”.

La figura de Jose Agustíb Goytisolo va enllenar les últime xornaes del Congresu Internacional que-y está dedicando l’Aula Jose Agustín Goytisolo de la Universidá Autónoma de Barcelona y delles instituciones asturianes. Esti miercoles (18:30 nel edificiu históricu de la Universidá d’Uvieu) va cellebrase una llectura de poemes al cargu de Vanessa Gutierrez, Rosario Neira, Juan López Carrillo, Aurelio González Ovies, Antón García, Jose Luis Sevillano, Javier Lasheras, Felipe Prieto, Jaime Herrero y Celso Peyroux. El propiu Aurelio González Ovies. va ser l’encargáu de presentar, darreu a les 20:00 hores, un recital poeticu nel que Miguel Ángel Caballero, Carmen Turiel y Yasmina Álvarez van pone-yos voz a los poemes de Carmen Conde y Ángela Figuera.

Pal xueves, el programa entamá a les 09:30 nel aula magna con una conferencia sobre la música nos poetes de la xeneración del 50 y sigue a les 12:00 con una mesa redonda alredor de la rellación ente música y poesía. A les 13:00 hores Araceli Iravedra, Ricardo Labra y Xuan Bello participen nuna mesa redonda embaxo’l nome “Los poetas del 50 y su herencia”. Dempues, a les 6 de la tarde, Carlos Rodríguez y Miguel Ángel Caballero, van ser los encargaos de pone-y el ramu a la xornada con otra llectura del poemariu de Goytisolo.

El vienres, la xornada va tener llugar nel monesteriu de Valdediós, y les charres van xirar alredor de la cultura cisterciense, monesteriu de Poblet y la so rellación con Goytisolo. Los actos nesti últimu día d’actividaes va escomenzar a les 12:00 hores.

Un llibru, “El agua en la Asturias tradicional” d’Adolfo García Martínez y un discu, “Atlas sonoru de la llingua asturiana. El valle’l Nalón”, del investigador Jesús Suárez López, son les últimes referencies que va sacar a la cai la Fundación Municipal de Cultura del Ayuntamientu de Xixón al travies del Museu’l pueblu d’Asturies. García Martínez ye expertu en cultura asturiana, catedráticu y miembru del Real Institutu d’Estudios Asturianos, demientres que Suárez López desendolca llabores d’investigación nel propiu museu xixones.

Distribuciones Cimadevilla van ser los encargaos de poner nel mercáu los dos volúmenes. “El agua en la Asturias tradicional”, que va editase dientro de les unidaes didáutiques del museu, va tener una edición de 300 exemplares con un preciu únicu de seis euros. Pela so parte, el volumen cuartu d’esti Atlas sonoru de la llingua asturiana, dedicáu nesta ocasión al valle’l Nalón, va tener una tirada de 200 copies n’asturianu al preciu de 15 euros.

Alberto Álvarez Peña, qu’apocayá estrenó un nuevu programa en TeleXixón, acaba de poner nel mercáu una nueva entrega de la colección dedicada a la mitoloxía y que dende va años espubliza cola editorial VTP. El llibru cunta con ilustraciones del propiu autor y nél percuerre dellos de los mitos que formaron parte de les velees de xeneraciones de neños asturianos.

Nel llibru apaecen personaxes como María les Campanilles, la Zancabarranca, El Papón, el Caballu Blancu, l’Home del Sacu o’l Probe l’Untu, pasando tamién pel Piricu Sangráu o la Cúcara Mala de Caliao.

Ente los llibros anteriores d’Alberto Álvarez Peña tán “Ayalgues (Lliendes de tesoros n’Asturies)”, “Esconxuros y responsorios” o “Mitos de Xixón”.