Lliteratura

El conceyu de Ribeseya tien convocáu un certame lliterariu, tituláu Arbidel, que tien l’envís de premiar rellatos eróticos n’asturianu y qu’acepta obres hasta’l día 15 d’esti mes d’abril. Asturnews ufre les bases a los sos llectores.

.-1. Los cuentos tarán redactaos dafechu en llingua asturiana, respetando les normes ortográfiques de la mesma.

.-2. El llargor de los cuentos (unu por persona) sedrá superior a ocho folios mecanografiaos a doble espaciu, escritos per una sola cara.

.-3. La temática sedrá de calter eróticu.

.-4. El plazu d’entrega de los trabayos tará abiertu hasta’l 15 d’abril del 2008. Tienen d’unviase a: Casa Conceyu de Ribeseya. “Conceyalía de Cultura”, Plaza Mª Cristina 1, 33560 Ribeseya, nun sobre nel que s’escribirá “Premiu Arbidel”. Dientro d’elli dirá l’orixinal del cuentu col títulu y tres copies, amás d’otru sobre cola plica del autor y el títulu del cuentu escritu per fuera, dientro, apaecerán los sos datos y un telefonu de contautu.

.-5. El Conceyu Ribeseya nomará un xuráu debidamente cualificáu pa fallar estos premios; les sos decisiones nun podrán ser retrucaes.

.-6. La entrega de los premios comunicaráse personalmente a los ganadores y fadráse público nos medios de comunicación.

.-7. El ganador de la presente edición formará parte del xuráu del próximu concursu.

.-8. Los trabayos premiaos son propiedá, amás del autor, del Conceyu Ribeseya. En dengún casu se tornarán los orixinales a los autores de les obres non premiaes, pero estos podrán, pela so parte, facer usu de les copies non presentaes.

.-9. Los premios sedrán los que vienen darreu.
Primer premiu: 1.000’00 €
Segundu premiu: 300’00 €

.-10. A xuiciu del xuráu, estos premios podrán declarase ermos.

Esti sábadu pasáu entregáronse n’Astorga, Lleón, los premios del I Certame de Rellatos Curtios “La Caleya”, qu’otorgaba l’asociación col mesmu nome y el Conceyu d’Astorga a rellatos curtios en cualesquier de les variantes del asturlleonés.

Cola presencia y participación del alcalde de la villa y el conceyal de Cultura Tradicional y Valores Autóctonos, Enrique Soto de Soto, que fizo la so intervención n’asturianu, entregáronse unos premios que tuvieron por ganador a Xosepe Vega, escritor lleonés y que cuntaron con representantes de tol dominiu llingüísticu, dende Zamora a Xixón, siendo Inaciu Galán, premiáu col cuartu premiu ax aequo pol rellatu “El ruiu que facíen les piedrines”, l’únicu asturianu ente los ganadores.

L’Asociación “La Caleya” convocaba esti añu per primer vegada esti premiu de rellatos curtios abiertu a la participación d’escritores de tol dominiu llingüísticu ástur y el fallu fízose públicu nuna ceremonia que se celebró nel auditoriu del Conservatoriu “Ángel Barja”, presentada por Mónica Pérez García, presidenta de l’Asociación qu’otorga’l galardón.

El xuráu d’esta primer edición del premiu tuvo formáu por Héctor García Xil, Roberto González-Quevedo, que por problemes de salú nun pudo acudiar al actu, y Fernando Álvarez-Balbuena faciendo de secretariu Mariano García Quintas.

A lo llargo de la entrega, Elena Monedero y Sara Fernández, alumnes del Conservatoriu interpretaron dellos temes a al guitarra, pa finar cola llectura de fragmentos de los cuentos ganadores per parte de los autores premiaos.

L’Asociación Cultural “El Portón” , l’Asociación Xuvenil el Tragaluz y la Fundación Docente de Mineros Asturianos, tán acante espublizar les bases del concursu, que tendría por oxetu l’esparcimientu de la lliteratura ente rapacinos y mozos y que tien les siguientes bases:

I.- Toles obres fadránse n´asturiano, mecanografiaes a doble espaciu y non superiores a ocho fueyes (pa rapacinos a mano tamién). II.- Los orixinales serán inéditos, non premiaos con anterioridá nin suxetos a nengún compromisu d´edición. III.- Crearánse tres categoríes: A) Primaria: 1º premiu 100 Euros en llibros. 2º premiu 50 Euros en llibros. B) Secundaria, módulos y bachillerato: 1º premiu 150 Euros en llibros. 2º premiu 100 Euros en llibros. C) Xóvenes de 19 a 30 años inclusive 1º premiu 300 Euros. 2º premiu 200 Euros. IV.- Puen participar llibremente y presentando un númberu indefiníu d´obres toes aquelles persones interesaes. V.- La temática ye llibre. VI.- El premiu podrá declarase ermu. VII.- El xuráu formaránlu persones escoyíes pola asociación. VIII.- L´orixinal y tres copies empobinaránse a nome de l´asociación cultural “EL PORTÓN” al apartáu 140 d´UVIÉU, indicando´l nome del concursu y la categoría. IX.- El trabayu mandaráse firmáu col nomatu y xunto a ésti mandaráse una plica n´un sobre zarráu onde se llante: nome, apellíos, edá, señes (cai, númberu, códigu postal, localidá). Too esto enantes el llunes 28 d´Abril de 2008. X.- Los trabayos premiaos son propiedá de l´asociación xuvenil que reservará´ l so drechu a editalos. En nengún casu se tornarán los orixinales a los autores. XI.- A les decisiones del xuráu nun podrá retrucase, ésti entiende los presentes finxos. XII.- Participar na convocatoria lleva inxerío aceptar perdafechu estes bases.

L’escritor y dibuxante avilesín Miguel Solís Santos ta acabante d’asoleyar cola Editorial Trabe la so última novela, titulada “El secretu de la cámara de cuarzu”. La obra ta empobinada al públicu xuvenil y editada dientro de la colección Montesín, que dirixe’l profesor Severino Antuña.

“El secretu de la cámara de cuarzu” cunta la hestoria de Marta, Xabel, Pachu y Ana, cuatro rapazos que, tres d’una protesta ecolóxica cola que queríen salvar la Llomba’l Carbayéu, acaben viviendo una aventura soterraña onde s’amiesten la corrupción urbanística y el crime.

Miguel Solís Santos (Avilés, 1956) ye un autor bien prestixosu dende va munchos años y ye autores d’obtes como “Les llamuergues doraes”, “El trunfu prietu” y “Los falapios del xigante”, ganadores les dos últimes del Premiu de novela Xosefa Xovellanos nos años 1985 y 2004. Ye amás un autor con una bayurosa producción de lliteratura infantil.

“Historia universal de Paniceiros”, quiciabes la obra más conocía del escritor Xuan Bello, ta acabante d’espublizase na so torna a catalán. El responsable de la torna ye y la editorial encargada de poner na cai esta nueva versión de la obra de Bello ye Ades i Ara. Dende l’añu de la so espublización en 2002, esta obra algamó perbonones crítiques, con premios destacaos como’l Ramón Gçomez de la Serna, y confirmó al autor como un de los narradores más importantes en llingua asturiana.

L’Asociación “La Caleya” convocaba esti añu per primer vegada un premiu de rellatos curtios embaxo’l mesmu nome y abiertu a la participación d’escritores de tol dominiu llingüísticu ástur. El fallu del xuráu va facese públicu esti sábadu a les ocho la tarde nuna ceremonia que va celebrase nel auditoriu del Conservatoriu “Ángel Barja”, asitiáu na llocalidá lleonesa d’Astorga. Nel actu van tar presentes Enrique Soto de Soto, teniente alcade d’Astorga y Conceyal de Cultura Tradicional y Valores Autóctonos, y Mónica Pérez García, presidenta de l’Asociación qu’otorga’l galardón.

El xuráu d’esta primer edición del premiu tuvo formáu por Héctor García Xil, Roberto González-Quevedo y Fernando Álvarez-Balbuena faciendo de secretariu Mariano García Quintas.

Depués de la entrega, Elena Monedero y Sara Fernández, alumnes del Conservatoriu van interpretar dellos temes a al guitarra, pa finar cola llectura de fragmentos de los cuentos ganadores per parte de los autores premiaos, que’l Conceyu d’Astorga y l’Asociación “La Caleya” guarden con gran secretu hasta’l sábadu.

Una nueva editorial, Cumio, con muncha experiencia na edición n’otres llingües (castellán y gallegu), aparez agora nel panorama lliterariu n’asturianu al traviés de la torna de dos obres empobinaes a los primeros llectores, incluyíes por tanto na lliteratura infantil.

Estes obres, que son les primeres d’un llabor que va siguir nel futuru con nuevos títulos d’estremaos xéneros, lleven los títulos de Florenta, la gata poeta y Les fábules de Leonardo da Vinci. Con una edición bien curiada, con muncho procuru, esta editorial, nel so debú na nuesa llingua, úfrenos en, Florenta, la gata poeta, una riestra de poemes que falen d’animales, al estilu que podríemos llamar “Gloria Fuertes”, escritos por Pilar Mayoralas y acompangaos por dibuxos fechos por Mónica Cañete.

Na segunda obra, Les fábules de Leonardo da Vinci, recuéyense delles de les fábules escrites pol polifacéticu artista italianu, acompañaes tamién de debuxos bien prestosos, nesta ocasión fechos por Rossana Casano. Estes dos primeres tornes tán feches pol escritor Berto García [Les Vegues (Corvera), 1975], que ye autor de los poemarios: Ensin otra sida (2005), Treslallende (xunta Carlos Suari, 2007) y Manual contra’l vacíu, obra cola qu’algamó nel 2007 el Premiu Fernán Coronas. L’autor ye mayestru interín d’Educación Infantil y Primaria, amás d’espertu en llingua asturiana, y anguaño pon clas nel C.R.A. OZCOS.

Páxina web de la editorial Cumio

La escritora Esther García López va presentar “Faraguyas”, el so últimu llibru, esti xueves a les ocho la tarde nel institutu Isla de Deva de Piedras Blancas. La obra más reciente de la escritora afonda na tradición del haiku japones, entregando una coleición d’ochenta poemes pequeños escritos na variante occidental del asturianu y acompañaos poles ilustraciones de Miguel Solís Santos. La presentación va correr al cargu de Emilio Menendez, filólogu y cura párrocu de La Montaña (Valdes) y va cuntar cola presencia, amás de la propia autora, de l’alcaldesa de Castrillón, Ángela Vallina.

L’Academia de la Llingua Asturiana ta acabante de poner nes llibreríes del país el primer númberu de 2008 del so boletín oficial, Lletres Asturianes. Esta entrega fai la 97 nos yá ventiseis años que lleva l’ALLA asoleyando esta publicación. L’Entamu d’esti númberu fala nesti casu de la elección de rector na Universidá d’Uviéu, onde l’Academia de la Llingua “nun va pronunciase”, pero sí va “vixilar los programes en cuantes a les promeses sobre l’asturianu y el so cumplimientu futuru per parte del candidatu escoyíu”.

La estaya de “Trabayos d’investigación” ábrela l’expresidente de l’ALLA, Xosé Lluis García Arias, col artículu “La dialeutoloxía nel dominiu llingüísticu ástur” y sigue colos testos “Edición filolóxica del sieglu XIII del Archivu Municipal d’Uviéu” de Jesús Menéndez Gómez, “Narrador y personaxe na lliteratura asturiana anterior a 1930” de Miguel Ramos Corrada, “La lliteratura grecollatina en llingua asturiana”, un trabayu de Ramiro González Delgado premiáu na anterior edición de los premios de l’ALLA, “Imáxenes de muyer na poesía asturiana d’entamos del sieglu XX” de Xosé Lluis Campal y Aurora Sánchez y un trabayu en castellán “El uso de la lengua en los procesos administrativos” de José Mª A. Magán Perales, profesor de Drechu Alministrativu de la Universidá de Castiella-La Mancha.

La estaya de “Lletres vieyes”, dedicada a la recuperación de testos n’asturianu inclúi unes nueves versiones manuscrites de testos d’Antón de Marirreguera, estudiaes por Xosé Lluis García Arias.

Les “Lletres nueves”, estaya formada por aportaciones lliteraries de güei, inclúin poemes de Xuan P. Reyán y tornes de poemes del poeta monagascu Robert Roc, feches por Josep Carles Laínez.

Nel separtáu de “Notes y anuncies”, dase cuenta de les actividaes rellacionaes col facer llingüísticu, concursos, llibros, etc. Y nesti casu podemos atopar anuncia del II Conceyu Internacional de Lliteratura Asturiana, una torna oficial de la Carta Europea de les Llingües Rexonales o Minoritaries fecha pola ALLA pal Conseyu d’Europa y delles anuncies sobre premios lliterarios y d’otra mena.

Rematen esti númberu dos poemes navidiegos de Antonio González Busto y A.M. Vega. Amás del espaciu habitual dedicáu a les novedaes lliteraries y musicales n’asturianu.

El trabayu d’estos dos escritores ta acabante d’ufir al públicu llector infantil, al traviés d’Ediciones Trabe, el llibru “Garulla. Antoloxía del ritmu”, una compilación de cosadielles, xuegos de pallabres y otros dichos tradicionales. Les ilustraciones del llibru son d’Olmo García Huete.

El trabayu de los autores foi nesti casu axuntar un garapiellu de cosadielles, empapiellos, retafiles, esconxuros y rimes que formen parte del patrimoniu oral asturianu cola idea de tresmitir de xeneración en xeneración esti conocimientu.