Lliteratura

El conceyal d’Educación y Cultura de Xixón, Justo Vilabrille, presentó nuna rueda de prensa nel Centru de Cultura Antiguu Institutu les actividaes de Xixón pal Día del Llibru, ente les que tán la collaboración ente la Fundación Municipal de Cultura (FMC) y el Xardín Botánicu xixonés. Les biblioteques van regalar una flor, mientres que’l botánicu va regalar un llibru a cada visitante. Un intercambiu que quier promocionar dambes dos actividaes.

La llibrería Alborá Llibros de Xixón, va celebrar el próximu Día Mundial del Llibru, que va celebrase’l miércoles 23 d’esti mes, con un descuentu del 10% na compra de llibros, a los que va acompañase’l regalu d’una flor.

Alborá Llibros ye unu de los establecimientos hestóricos del movimientu asturianista, y dende va cerca de trenta años ufre llibros de temática asturiana con un importante protagonismu pa les publicaciones n’asturianu.

L’añu pasáu la llibrería Xicu Yepes dexaba la xestión del negociu dempués d’una llarga trayectoría y nel branu la llibrería pasó a manes de Cimadevilla Distribuciones, que remocicó’l llocal y amplió la ufierta habitual de llibru asturianu, a guíes de viaxes y rutes, llibru fantásticu y una importante estaya de llibru infantil.

Vicente García Oliva ta acabante espublizar una novela xuvenil “El Club Social d’Altos Vuelos” cola editorial Trabe, un nuevu volume que se suma a la montonera de publicaciones, lo mesmo pal públicu mozu que p’adultos.

Vicente García Oliva tien una llarga trayectoria como escritor y ye un destacáu activista na defensa del asturianu, dende que fuere unu de los miembros orixinarios del grupu xixonés de Conceyu Bable y ún de los pioneros en facer una lliteratura dirixida al públicu infantil o xuvenil.

Ente les sos obres más conocíes tán “Les aventures de Xicu y Ventolín”, “Diariu d’Enol”, “El mercaderu de tormentes”, “¡A la bin, bon, ban…!”, “L’aire de les castañes”, “El Norte” o l’ensayu “Aventura humana y lliteraria al rodiu de don Enrique García Rendueles”.

foto1>L’autor asturianu Xuan Bello ta acabante espublizar una torna al catalán de la so obra más conocida Hestoria Universal de Paniceiros, qu’en catalán lleva’l títulu d’“Història universal de Paniceiros”. La edición ta al cargu de la editoriao Adesiara y l’encargáu directu de la torna foi Jordi Raventós.

La editorial Adesiara ta especializada na torna de testos al catalán d’otros autores reconocíos en diferentes llingües del mundiu.

La torna d’esti trabayu, que tien en procesu tornes a otros idiomes, supón un pasu más na internacionalización del autor de Paniceiros, que nel añu 2002 algamó’l premiu Villa de Madrid col mesmu llibru y dende entós vien dándose a conocer fuera de les llendes d’Asturies.

foto1>L’autor asturianu Xuan Bello ta acabante espublizar una torna al catalán de la so obra más conocida Hestoria Universal de Paniceiros, qu’en catalán lleva’l títulu d’“Història universal de Paniceiros”. La edición ta al cargu de la editorial Adesiara y l’encargáu directu de la torna foi Jordi Raventós.

La editorial Adesiara ta especializada na torna de testos al catalán d’otros autores reconocíos en diferentes llingües del mundiu.

La torna d’esti trabayu, que tien en procesu tornes a otros idiomes, supón un pasu más na internacionalización del autor de Paniceiros, que nel añu 2002 algamó’l premiu Villa de Madrid col mesmu llibru y dende entós vien dándose a conocer fuera de les llendes d’Asturies.

La editorial CH ta acabante espublizar un llibru nuevu de Neto, la segunda nesti mes, pues yá dimos anuncia de la obra “Na punta (la llingua)”, onde recoyía munches de les meyores tires espublizaes en periódicos sobre l’asturianu. Sicasí, la nueva obra del ilustrador, ye un llibru “onde la ciencia ficción y l’humor se dan la mano nunes divertíes hestories pa neños de toles edaes”.

Escritu na variante occidental del asturianu, esta obra del autor de Cangas del Narcea declara en el prólogu “qu’este l.libru tenía que tar publicáu hai 25 anos”, yá que taba escritu yá daquella, anque por diverses razones d’oportunidá nun apaecío hasta agora.

Ente los cuentos que podemos atopar na obra tán “Nueite l.luniega nel nivel 17”, “El nuevu aniciu”, “La l.lienda los fouzáganos”, “La Fonte ferrada” y “Fábulas sarcásticas”.

L’Academia de la Llingua Asturiana dio anuncia güei de qu’esti añu l’actu oficial del Día de les Lletres Asturianes va facese’l 9 de mayu, vienres, a les 20 hores, nel Teatru Campoamor d’Uviéu y que na esión académica va tomar posesión como nueva Miembru de Númberu de l’Academia la escritora Berta Piñán. L’Academia de la Llingua Asturiana quier, d’esti mou, “reconocer la fondura de la so contribución lliteraria al procesu de recuperación llingüística n’Asturies y facer posible, al empar, qu’esa valible contribución pueda enanchase col so trabayu dientro de la propia institución”.

Amás d’esta importante novedá, l’ALLA anunció qu’esti añu va abrir l’actu l’entamu musical del gaiteru Llorián García al que siguirá la Xunta Estraordinaria de l’Academia de la Llingua Asturiana col discursu institucional de la Presidenta, Ana Cano.

Amás, una de les novedaes más importante de la edición d’esti añu ye’l “Homenaxe a la Música Asturiana”. Nesti sen, l’Academia da anuncia de l’actuación coleutiva nel escenariu del Teatru Campoamor, en representación de tolos músicos y solistes asturianos, de: Nuberu, Dixebra, Llan de Cubel, Carlos Rubiera y Los Berrones.

L’Academia de la Llingua Asturiana, siguiendo’l facer entamáu n’ediciones pasaes, encamienta a los asistentes que, na midida de les sos posibilidaes, lleven el traxe asturianu como amuesa del so compromisu col resurdir de lo meyor de les solemnes tradiciones del país.

Llueu del actu académicu habrá una espicha, abierta a la participación de tola xente, nel restaurante “La Gruta”, con bailles y música asturiana.

Amás, l’Academia, diz nel comunicáu, “aguarda cuntar cola to asistencia a estos actos de celebración y pide la collaboración, nestos momentos nos que se xuega’l futuru de la llingua cola reforma del Estatutu d’Autonomía d’Asturies, pa esparder ente tolos asturianos y asturianes la demanda d’esixencia de la OFICIALIDÁ como únicu preséu pa garantizar el futuru y la sobrevivencia del nuesu idioma”.

L’humorista gráficu Ernesto García del Castillo “Neto”, acaba de sacar al mercáu un volume nel qu’axunta delles de les tires cómiques espublizaes a lo llargo d’estos venti años. “Na punta (la llingua)” ta asoleyáu por CH Editorial y n’él pueden atopase trabayos que Neto espublizó en La Voz de Asturias y Les Noticies.

La obra va repasando bona parte de la hestoria de les reivindicaciones llingüístiques n’Asturies dende 1986 hasta anguaño y tien un entamu de Roberto González-Quevedo.

L’alcaldesa de Xixón, Paz Fernández Felgueroso, y el presidente del Centru Español de Drechos Reprográficos (CEDRO), Juan Mollá, van celebrar el Día Mundical del Llibru y del Drechu d’Autor güei, cola plantación simbólica d’un cedru na Plaza d’Europa.

L’actu va facese güei a les 12.30 hores y va participar l’escritor José María Merino, que pronunciará unes pallabres escrites pa la ocasión sobre la importancia de la creación lliteraria.

Xixón acueye, asina, la décimu primer edición d’esti actu, que n’años anteriores celebróse en Madrid, Barcelona, Santiago de Compostela, Granada, Valencia, Málaga, Murcia, Toledo, Salamanca y Zaragoza, según informaron los promotores del eventu.

La Xunta Direutiva de l’Asociación Cultural l’Arribada celebró un conceyu xeneral nel que designó la nueva directiva de l’asociación y tomó decisiones sobre los actos de la edición d’esti añu de la “vagamar lliteraria en Xixón”, que va celebrase del 11 al 21 de setiembre con numeroses novedaes y “col envís d’averar la lliteratura a la sociedá”.

Na nueva directiva’l periodista y escritor Inaciu Galán continua de presidente, l’escritor y técnicu en desenrrollu rural Xosé Nel Riesgo de vicepresidente y el profesor de la Universidá Autónoma de Madrid, David Rivas como ayalgueru, amás de Maite González como secretaria. Nel casu de les vocalíes, súmense a les mesmes l’escritor y realizador d’audiovisulaes Xosé María Vega ‘Chema Vega’, l’etnógrafu y presentador de televisión Alberto Álvarez Peña, l’escritor y xestor cultural Humberto Gonzali ya Iyán González, realizador, siguiendo na mesma l’abogáu Roberto González.

Nel conceyu, celebráu nel Vieyu Institutu Xovellanos de Xixón na tarde del xueves, l’asociación confirmó delles actividaes que se preparen dende va meses na asociación y confirmóse la collaboración de delles persones ayenes a l’asociación, que como en cada edición collaboren cola organización, na secretaría técnica que se fai a costafecha. Ente estes persones tán la poeta Aurora García Rivas, el promotor musical Frichu Yustas, el compositor Juan Carlos Casimiro, ente otros. Amás, escoyóse’l xuráu del Premiu Timón 2008, que fuere convocáu esta selmana pola asociación y va ser entregáu nel trescursu de la celebración de l’Arribada 2008.

Páxina de l’Arribada