Lliteratura

Les II Xornaes Culturales “Joaquín Rodríguez Muñiz”, qu’entamaron ayeri en Morea, conceyu d’Ayer, van siguir güei con dellos actos centraos nel monólogu. A les 19:30 hores Ánxel Álvarez Llano va facer una semblanza del autor de monólogos ayerán, Pepe Campo. Nel mesmu actu va entregase’l V Premiu de monólogu Pepe Campo, que nesti casu recayó nel monólogu “Les vacaciones”, d’Inaciu Galán.

Tamién dientro d’esti actu va facese una llectura de poesíes a cargu de Fernando Suárez Albalá (Treslacruz, L.lena, 1952), prexubiláu de la mina, vive dende hai años en L.labayos (Morea d’Ayer). Autodidacta y activista de la cultura asturiana tien publicaos dalgunos pemes en revistes y cartafueyos de fiestes. Colaborador de Radio Parpayuela y perteneciente a dellos grupos de baille nada de la cultura asturiana-y abulta desconocío. Va pocos meses espublizó’l llibru de monólogos “Chispes y caricoses” cola editorial Trabe.

El Premiu de monólogu Pepe Campo ta empobináu a monólogos de temática moderna escritos n’asturianu, yá seya en versu o en prosa, y nos últimos años vieno dándose a monólogos de los conocíos como “monólogu modernu”. La edición del añu pasáu ganóla Benxa Pérez con “L’home y la gochería”, mientres que va dos años foi’l ganador d’esti añu, Inaciu Galán, a comuña con Isaac García de l’Arada quien algamó’l certame con “Asturianos al volante…”.

Nel actu va interpretar un monólogu Carlos Alba “Cellero”, mientres que’l monólogu ganador va ser interpretáu pol actor y presentador d’Al aldu: La risión, Lluis Antón González.

Programa completu de les Xornaes

Dende va unos díes pue atopase pelos llugares habituales de distribución el númberu 28 de la revista cultural gratuita “El Súmmum”, publicación billingüe de la editorial Ámbitu de calter trimestral y dedicada a les nueves tendencies artísques y lliteraries. Un magazine que dende va dellos númberos ye tou color.

Nesti númberu apaecen atopase collaboraciones lliteraries (como la escueta postal que’l poeta aragonés Manuel Vilas fai de la ciudá de Zaragoza o l’amplia entrevista que Jaime Priede fai-y a Ricardo Menéndez Salmón, novelista que ta acabante sacar nes estampes de Seix Barral una última novela titulada «Derrumbe»); amás d’esto, ente munches otres ayalgues, una reseña de Víctor Rodríguez sobre Iron Maiden, un ensayu de Víctor Vila sobre’l cantautor francés Serge Gainsbourg, una reflexón de Lino G. Veiguela sobre The Rolling Stones o la semblaza sentimental que Xune Elipe, cantante de Dixebra, fai de Corto Maltés, el personaxe d’Hugo Pratt…

Amás pue atopase na revista, una entrevista a Pablo X. Suárez y Sergio Gutiérrez Camblor, fecha por Rafael Valdés, un reportaxe sobre les pintures parllantes de Filippos Tsitsopoulos y una entrevista a Garikoitz Gamarra y Andeka Larrea, autores de «Bilbao y su doble».

El Club Prensa Asturiana n’Uvieu, agospió esti llunes la presentación del llibru “Camín de Bimenes. Concursu de Cuentos pola Oficialidá del Asturianu. 1998-2007”, el volume que recueye los testos ganadores nes diez ediciones que se cellebraron fasta agora desti concursu señeru. Pa presentar el llibru, asoleyáu pol Conceyu Bimenes y Xebana Ediciones, tuvieron presentes los escritores Dolfo Camilo Díaz y Pablo Rodríguez Medina, ganadores na primer y última edición del concursu. Tamien asistió l’alcalde de Bimenes Jose Emilio González Aller y el responsable de Xebana Ediciones, Xulio Vixil.

Na presentación, na que foron falando l’alcalde ya’l restu de participantes na presentación, destacó la intervención de Dolfo Camilo Díaz, que apuntó que denuncio la falta de respetu que sigue habiendo pal colectivu de los falantes d’asturianu y la perda del patrimoniu cultural por mor de la desapaición de la llingua. “Haz cinco años morrio mio güela materna y con ella morreríen 4000 o 5000 pallabres. Esi ye’l gran drama d’esti país. Podemos sentonos todos mui agobiaos teniendo un alzheimer en casa, multiplica-y eso por un millón de ciudadanos”.

Más vídios na canal d’Asturnews

L’escritor Pablo Antón Marín Estrada ta acabante espublizar el poemariu “Animal estrañu”, col que nel añu 2007 ganó’l Premiu de Poesía “Xuan María Acebal”, otorgáu pol Gobiernu d’Asturies.

Nos poemes d’esti llibru Marín Estrada “escarabica nos cagüeros de la memoria y el desenfotu a la busca del tesoru imposible de la identidá, les señes d´un tiempu y d´una vida que lleven siempre a niundes, a la patria común de la supervivencia y el desamparu”.

Pablo Antón Marín Estrada ñaz en Sama, conceyu de Llangréu, en 1966 y ye dende los años noventa una de les voces principales de la lliteratura asturiana contemporanea. Algamó tolos premios más prestixosos del panorama lliterariu asturianu y espublizó lo mesmo poesía que narrativa con notable ésitu.

La poeta asturiana Nené Losada Rico, conocida por obres como “Cantares Valdesanos”, “El nome de las cousas” o “Ente apigarazos” foi nomada esti sábadu Fía Predilecta del conceyu de Valdés. L’actu tuvo llugar nel salón d’actos del Institutu “Carmen y Severo Ochoa” de L.luarca y al mesmu acudieron ente otres autoridaes la directora del Institutu Asturianu de la Muyer y la Directora de Cultura y Política Llingüística, Consuelo Vega.

Col nomamientu, el conceyu de Valdés, quixo destacar “el valir humanu y lliterariu d’una de les sos vecines más ilustres, siendo amás, una de les poetes más sobresalientes de la llingua asturiana na so variante occidental”. Pero esti nun ye’l primer reconocimientu de l’autora, anguaño decana de les lletres asturianes. Nel añu 2007 recibió’l Premiu Timón, otorgáu pola Arribada de Xixón a toa una carrera lliteraria en llingua asturiana y nel añu 2000 recibió l’Urogallo 2000, entregáu pol Centru Asturianu de Madrid, al que nel 2005 sumó la medaya de plata del Principáu d’Asturies.

Nené Losada Rico ñació en L.luarca nel añu 1921 y de bien neña conoz al Padre Galo nel pueblu valdesanu de San Féliz, na parroquia de Trevías. Nun espubliza la so obra hasta l’añu 1992 y dende entós convirtióse nuna de les voces más reconocíes de la lliteratura asturiana, cuntando con un premiu de lliteratura col so nome, nel que participa cada añu como miembru del xuráu.

Güei, llunes 19 de mayu, va presentase nel Club de Prensa Asturiana de La Nueva España a les 19:00 hores, n’Uviéu, el llibru “Camín de Bimenes. Concursu de Cuentos pola Oficialidá del Asturianu. 1998-2007″, que recueye los testos ganadores nes diez ediciones que se cellebraron asta agora del concursu.

Pa presentar esti volumen, asoleyáu pol Conceyu Bimenes y Xébana Ediciones, ta anunciada la presencia de los escritores Dolfo Camilo Díaz y Pablo Rodríguez Medina, ganadores na primer y última edición del concursu. Tamién van asistir l’alcalde de Bimenes José Emilio González Aller y el responsable de Xébana, Xulio Vixil.

El dramaturgu y poeta mierense Jose Luis López Fernández va tar esti llunes presentando la so primera incursión nel terren de la novela curtia na Librería Cervantes d’Uvieu de magar les 19:30 hores. Esti primer trabayu titúlase “Los hijos de la vara” y propón, según reza la reseña, una mirada al pasáu más negru y reciente del país en clave cásique autobiográfica.

Jose Luis López Fernández ñació en Valdecuna anque ye d’orixen lleones. Ente los sos trabayos como dramaturgu tan tres obras de teatru, quescribió y dirixó, durante la so estancia en Bruseles: “Alborada”, “Diálogos de mutantes” y “El jardín de los espejos” . Amás, tien na cai dellos poemarios illustraos sobre Almería, les comarques lleoneses de Babia y Luna, y Asturies, ente otros.

El fórum cultural que la tienda FNAC tien nel centru comercial Parque Principado de Siero va acoyer esti vienres 16 de mayu la presencia de la escritora asturiana Irene Parra pa presentar el so debú nel campu editorial. “Sin sospechar quien era” narra la hestoria de les rellaciones qu’entamblen al travies de mensaxes de telefonu, una camarera y un de los sos clientes. L’actu va entamar a les 19:00 hores.

El profesor de griegu Xose Gago va presentar el vienres n’Uvieu la traducción al asturianu que fizo de La Odisea d’Homero, nun actu organizáu pol Seminariu d’Estetica y Semiótica ya’l Seminariu de Filoloxía Asturiana de la Universidá d’Uvieu. L’actu entama a les 12:00 del mediudía y nel mesmu van participar el propiu autor: el coordinador del Seminariu d’Estetica y Semiótica, Lluis Xabel Álvarez y el coordinador del Seminariu de Filoloxía, Ramón d’Andres.

El llugar onde se va cellebrar la presentación del llibru ye’l Salón de Graos de la Facultá de Filosofía (Campus del Milán, Edificiu Alministrativu, Uvieu).

La escritora y miembru de l’Academia de la Llingua Asturiana, Mª Esther García López, va presentar güei, a les doce la mañana, el so llibru “Pisadas”, un poemariu que resultare ganador nel añu 2006 del Premiu de Poesía Uviéu. L’actu va llevase alantre na feria LlibrUviéu.

El premiu foi convocáu pol Conceyu d’Uviéu y la edición del mesmu ye de l’Academia de la Llingua Asturiana.

Nel actu van presentase tamién les obres ganadores del añu 2007 nes modalidaes de narrativa y del teatru.

Amás, nesti actu, van facese públicos los nomes de los ganadores del añu 2007.

Van tar nel actu, el conceyal de Cultura del Ayuntamientu d’Uviéu Xosé Suárez Arias Cachero “Felechosa”, la presidenta de L’Academia de la Llingua Asturiana, Ana María Cano y el presidente del Gremiu d’Escritores, Luis Martín.